Sociedá

El portavoz del PP de Siero, José Antonio Noval, dio anuncia de qu’una de les prioridaes del so grupu, si llega al poder nel conceyu, sería preservar y potenciar la cultura asturiana. Pa ello los conservadores de Siero proponen fomentar la difusión y la enseñanza de la cultura asturiana nel conceyu. Nel ámbitu de la normalización, José Antonio Noval propón la rotulación billingüe de les dependencies municipales, el fomentu del teatru asturianu y la potenciación de la tradición oral nes sidreríes.

El Conceyu Abiertu pola Oficialidá va cellebrar güei miércoles 7 de marzu, a partir de les 19 hores, la tercer puya de la”III Amuesa d’Obres pola Oficialidá de la Llingua Asturiana”. La puya pública va facese na sala d’esposiciones del Auditoriu d’Uviéu.

La puya pública de les obres tien como fin algamar fondos pa la campaña en defensa del reconocimientu de la oficialidá de la llingua asturiana, y del gallego-asturiano nel so ámbitu, dientro del próximu Estatutu d’Autonomía.
Los precios de salida de les obres van dende los 3 euros de la obra “puya’l ramu” d’Ánxel Nava hasta los 1900 de la obra “Madera d’abetu” d’Adolfo Manzano. La recaudación de les obres vendíes va empobinase na so totalidá al CAO, nel casu de ser la primer venta de la obra del artista, y en casu de que l’artista yá vendiere dalguna obra nes dos primeres amueses esti recibiría’l 50% del preciu de venta de la mesma. La recaudación algamada pol CAO, pola puya de les obres d’arte, ye d’alredor de 11.000 euros.
Na tercer Amuesa d’Obres d’Arte pola Oficialidá algamóse la participación de 99 artistes asturianos. Ente los que figuren Maite Centol, Nel Amaro, Anxel Nava, Adolfo Manzano, Xulián Fueyo, el colectivu Fiumfoto*, Rubén Figaredo o Ernesto Avelino.

La edición de 2007 de l’Arribada va fecese ente’l 14 y el 22 de setiembre. Con un formatu de Congresu l’Arribada aconceyará a escritores, periodistes, editores y estudiosos de la llingua y lliteratura; amás ufrirá un espaciu pa la ciudadanía que va participar nes actividaes entamaes.

La Secretaría Técnica de l’Arribada cuenta cola presencia de 50 invitaos d’otres comunidaes autónomes o de fuera del estáu español que se van axuntar les sos ponencies a les de los congresistes asturianos.

Muerre en Porrúa’l músicu Jorge Monchales del grupu Brenga Astur, amás de ser un de los responsables del Muséu Etnográficu del Oriente d’Asturies. Asturnews trasllada a la so muyer Marta Elola, familiares y amigos el so más sentíu pésame. El funeral pol músicu va facese güei a les 3 de la tarde na ilesia de Pría.

Jorge Mochales morrió por mor d’un infartu’l llunes pasáu. Nacíu hai 30 años en San Sebastián de los Reyes (Madrid) taba casáu cola cantante Marta Elola, cantante de Brenga Astur, y tien un neñu nacíu a finales d’avientu.

Brenga Astur

Izquierda Asturiana presentó la candidatura del historiador, y Secretariu Xeneral de la organización, Faustino Zapico. Esta ye la segunda vegada na que Zapico se presenta como candidatu nel so conceyu. Nes elecciones de 2003 Izquierda Asturiana situóse como la cuarta fuerza más votada nes elecciones municipales.

La candidatura de Zapico aspira a conseguir la representación nel Ayuntamientu de Mieres cola fin de “llevar la voz de la esquierda asturianista y verde del conceyu”. El programa qu’el partíu políticu de la esquierda asturianista va presentar va tener como puntos principales la reactivación económica, la democracia participativa, la vivienda, el mediu ambiente y la llingua y cultura asturianes.

Faustino Zapico ye llicenciáu en Xeografía y Hestoria pola Universidá d’Uviéu y profesor del IES Sánchez Lastra de Mieres del Camín. Actualmente ta faciendo la so tesis doctoral, que trata sobre les corrientes federalistes y autonomistes na Asturies contemporanea. La tesis doctoral de Zapico ye motivu de conflictu cola Universidá d’Uviéu, yá que la institución académica nun accedió a la tramitación de la mesma por tar escrita n’asturianu. D’es anegativa saldría una polémica sentencia del Tribunal Superior de Xusticia d’Asturies que negaba los derechos llingüísticos de Zapico, que piensa recurrir esta decisión nel Tribunal Constitucional.

La Oficina de Política Llingüística organiza’l cursu d’encuestadores de toponimia, dirixíu por Xulio Viejo Fernández, va entamar el próximu 13 de marzu y va durar hasta’l 19 d’abril. Les clases van ponese les tardes de los martes, miércoles y xueves na Faculta de Filoloxía. El cursu ye gratuitu y les inscripciones pueden facese hasta’l mesmu día 13 de marzu na Oficina de Política Llingüística.

Los profesores del cursu son: Fernando Álvarez-Balbuena, Ramón d’Andrés, Xulio Viejo Fernández, Héctor Xil, Felipe Fernández, María Antonia Pedregal Montes, Jesús Suárez López, Xosé Antón Fernández “Ambás”, Llinu Álvarez Santidrián y Ramón Sordo Sotres.

El documentu naz dende la esperiencia de los técnicos de los servicios de normalización 4 años depués de la creación del primer órganu municipal de normalización llingüística. L’ausencia del marcu d’oficialidá provoca que la Asociación de Trabayadores de la Normalización Llingüística diga que “falar de normalización d’una llingua que nun tien reconocíu un estatus d’oficialidá ye irreal”.

“Propuestes polítiques pa la normalización del asturianu” va ser presentáu a los partíos políticos, sindicatos, instituciones públiques y privaes, asociaciones cola fin de que valga como preséu de cara a la planificación d’estos servicios, que n’otros países nun se circunscriben sólo al ámbitu públicu sinon qu’esisten nes empreses privaes..
Anguaño esisten n’Asturies 10 Servicios de Normalización Llingüística, qu’abarquen 16 conceyos: Llangréu, Xixón, L.lena, Cabu Peñes, Siero, comarca de la Sidra, Avilés, Cangas, Mieres y Samartín del Rei Aurelio.
La creación d’un serviciu de normalización ye un fechu que supón la implicación delos poderes públicos nel llabor d’afitamientu y prestixamientu social del idioma. Anque dende’l colectivu de técnicos se considera que “nel llabor diariu se tán atopando dificultaes de diversu tipu” dalgunes relacionaes con cualesquier campaña que llance’l serviciu, y otres que son “frutu del desconocimientu de que ye realmente la normalización d’una llingua y otres consecuencia de la falta de voluntá política”.

Nel testu esplícase la necesidá d’una “aición decidida de normalización dende los poderes públicos” pa evitar la perda d’un patrimoniu cultural, en referencia a la situación diglósica del asturianu. Asina mesmo se diferencia ente los términos normalización y promoción llingüística.

La necesidá de tresversalizar les aiciones de los Servicios, que tengan reflexu en toles conceyalíes, ye un de los mayores esmolecimientos de los técnicos normalizadores. Asina proponen la creación d’una conceyalía propia, que cunte con asignación presupuestaria y la ellaboración d’un plan de normalización municipal. Dientro del documentu danse unes pautes orientatives sobres estes cuestiones.

La situación llaboral, la discontinuidá del trabayu de los Servicios de Normalización son puntos que dende l’Asociación de Trabayadores de la Normalización.
Ente les midíes polítiques que los técnicos consideren tán: la declaración d’oficialidá del asturianu, que la Oficina de normalización del Principáu tenga’l rangu de Dirección Xeneral; la creación d’un consorciu que faiga real la rede de normalización de los conceyos; la firma d’un conveniu col Principáu y los conceyos que tenga como fin sufragar les llabores de normalziación; la unificación de los procesos selectivos y la garantía d’unes condiciones llaborales mínimes, en relación a los medios y a la continuidá de los Servicios.

El presidente del Conseyu de la Mocedá del Principáu d’Asturies, Paulino Feito, aconceyó ayeri col coordinador xeneral d’Izquierda Xunida, Jesús Iglesias, pa trasllada-y les propuestes de la entidá xuvenil a los partíos políticos. El presidente del CMPA va continuar una ronda de conceyos colos candidatos de los restantes partíos políticos.

Feito traslladó-y a Iglesias una riestra de propuestes cola fin de que s’integren dientro de los programes electorales de les formaciones polítiques. El documentu del CMPA ta compuestu polos diferentes posicionamientos algamos pola entidá a lo llargo d’esta llexislatura, asina como poles propuestes elaboraes poles asociaciones la pasada fin de selmana en Xixón.

El documentu abarca campos como l’asociacionismu, l’empléu y la vivienda, los derechos fundamentales y la igualdá, la emigración, y la situación de la mocedá nes zones rurales y nes cuenques mineres. Feito anunció que la intención del Conseyu ye “evitar que se repitan otros cuatros desastrosos en política de mocedá”.

El coordinador xeneral y candidatu d’Izquierda Xunida, valoró positivamente el documentu del CMPA, afirmando qu’Izquierda Xunida “se siente mui identificada”, polo qu’aseguró que les propuestes “van reflexase nel programa de la coalición IX-Bloque por Asturies-Los Verdes”. Jesús Iglesias compartió con Feito la necesidá de meyorar l’actual política de mocedá. Iglesias denunció que “ser mozu güei ye ser un precariu en munchos aspectos”, destacando los del accedu a la vivienda y l’empléu.

Los dirixentes criticaron que se cuestionaria la “masiva” emigración de la mocedá asturiana, insistiendo en que “nun ye nenguna oportunidá de movilidá llaboral, como dalgunos pretenden, sinon un problema”, dixo Iglesias. Paulino Feito llamó a “reconocer la esistencia d’esi problema y buscar les soluciones afayadices”.

El CAO inauguró ayeri la III Amuesa d’Obres d’Arte pola Oficialidá de la Llingua Asturiana nel Auditoriu d’Uviéu. L’Amuesa va tar nel espaciu uvieín hasta’l próximu 7 de marzu, data na que se va facer la puya d’obres. Nel actu d’inauguración tuvieron presentes dalgunos de los 99 artistes que participen na mesma, asina como una representación de la clas política asturiana.
Los artistes que participen nesta Amuesa d’Obres d’Arte consideren que la reconocencia de la oficialidá del asturianu y del gallego-asturianu supón reconocer un derechu ciudadanu básicu como ye “la posbilidá llegal d’usar la llingua propia en cualquier ámbitu de la vida asturana”. El colectivu d’artistes afalen a la sociedá civil asturiana a “tomar conciencia de la urxencia de resolver esta cuestión d’una “manera tranquila y consensuada”

La recaudación de la puya de les obres empobínase a collaborar colos gastos de la campaña del Conceyu Abiertu pola Oficialidá.

La Pace University de Nueva York va entamar en coincidencia colos actos del Día de San Patriciu una xornada intensiva sobre la llingua y la cultura asturianes. La comunidá asturiana vien participando davezu na celebración de la fiesta de la comunidá irlandesa en Nueva York.

La xornada va facese’l próximu 16 de marzu ta organizada pola Asociación Asturianos en USA, presidía pol profesor del Rollins College Alberto Prieto Calixto y que tien como finxos la recuperación de la herencia de los asturianos qu’emigraron a los Estaos Xuníos d’América, amás l’Academia de la Llingua y la Conseyería de Xusticia y Rellaciones Esteriores van collaborar tamién nel actu.
La xornada va entamar col profesor de la Pace University Andrés Villagrá qu’espondrá una intervención sobre la emigración na lliteratura n’asturianu, na qu’intervendrá Pablo Xuan Manzano, Académicu de la Lingua Asturiana. La representante del Consuláu español en Nueva York, Pilar Fernández, va falar sobre la recuperación de la cultura asturiana nos Estaos Xuníos, y Alberto Prieto Calixto dará una charra sobre la presencia asturiana nos Estaos Xuníos. L’espaciu web www.asturianus.org centrá la segunda mesa. esti espaciu ye un pegollu fundamental como puntu d’alcuentru de la comunidá asturiana, y los sos descendientes, nos Estaos Xuníos. Pilar Suárez Coalla falará sobre’l papel de les muyeres nel campu asturianu y l’escritor y periodista Chema Vega recitará poesía asturianu acompañáu a la gaita por Bras Rodrigo.