Sociedá

L’Academia de la Llingua Asturiana dexó afitao esti día que “llamenta, daveres y fondamente, qu’el so llabor tutelar de los derechos llingüísticos tenga que ser una de les sos obligaciones más frecuentes” y que sía l’Alministración asturiana, “xustamente la que que tendría que facer de so la proteición de los nuesos derechos llingüísticos” la que “incumpla gravísimamente esi cometíu al refugar de mou esplícitu l’exerciciu de tales derechos”. Nun comuinicáu públicu la institución fizo tamién una propuesta a la Xunta Xeneral del Principáu pa iguar la situación.

Sigún diz nesi comunicáu la presidenta de l’Academia de la Llingua Asturiana, Ana Cano, “yá nun ye solo que l’asturianu seya la única llingua del Estáu que nun tien reconocíu’l so estatus como llingua oficial, sinón que, mesmamente, l’exerciciu d’un derechu incuestionable, como ye’l del emplegu de la llingua propia na rellación de los ciudadanos cola Alministración, vien siendo torgáu por decisiones qu’incumplen gravemente la llexislación europea (Carta de les Llingües Rexonales o Minoritaries), la española (Constitución) y el propiu ordenamientu xurídicu nel Principáu (Estatutu d’Autonomía y Llei d’Usu del Asturianu). Y ye l’Alministración asturiana, xustamente la que que tendría que facer de so la proteición de los nuesos derechos llingüísticos, la qu’incumple gravísimamente esi cometíu fundamental al refugar de mou esplícitu l’exerciciu de tales derechos. Decisiones como la non tramitación de la Tesis Doctoral del profesor Faustino Zapico o la denegación de cursar un permisu, pa ser sometíu a pruebes médiques, a D. Xurde Blanco, funcionariu de los Servicios Xurídicos del Principáu, poniendo n’ambos casos como xida l’emplegu de la llingua asturiana, son bona prueba de lo que dicimos”.

Inda más sangrín

A estos fechos, denunciaos nel so momentu pola Academia de la Llingua Asturiana, hai qu’axuntar agora la non tramitación per parte de la Conseyería d’Educación d’una comisión de serviciu, fecha pol profesor Xosé Nel Comba n’asturianu. El presente casu ye sigún la institución llingüística “inda más sangrín, si ello ye posible, en cuantes que’l mentáu profesor venía faciendo usu d’esti derechu, reconocíu esplícitamente na Llei d’Usu del Asturianu nel so artículu 4, dende l’añu 2004 y ensin nenguna torga burocrática. La mala fe ye bultable, amás, teniendo en cuenta que la documentación tramitada ye, darréu del so calter alministrativu, comprensible dafechu por cualquier funcionariu, al marxe del so conocimientu de la llingua asturiana”.

Esti facer ye pala Academia “especialmente doliosu en cuantes que’l discursu oficial del Gobiernu del Principáu d’Asturies caltién que la oficialidá nun ye necesaria, porque n’Asturies hai llibertá d’usu llingüísticu acordies cola llei. La realidá, ensin embargu, ye mui estremada desque ye’l propiu Gobiernu’l qu’incumple la so obligación de promoción del asturianu y, nel so casu, prohíbelu cenciellamente”.

Propuesta a la Xunta

L’Academia diz nel comunicáu fechu públicu esti día conocer esta situación y ser sabedora d’otres munches situaciones de discriminación llingüística y “nun pue, dende llueu, zarrar los güeyos énte una realidá dramática pa la llingua y la cultura del Pueblu Asturianu”. Poro, da anuncia de que, con calter urxente, y como máxima Institución llingüística del Principáu, empobinará darréu a la Xunta Xeneral o, nel so casu, a la Diputación Permanente del parllamentu asturianu, asina como a los grupos parllamentarios, la propuesta d’alcuerdu que vien darréu: “La llingua asturiana ye un patrimoniu milenariu del Pueblu Asturianu y, como tal, forma parte de la herencia cultural de tolos asturianos y asturianes ensin esclusión. Esti patrimoniu, como l’arte y otres manifestaciones culturales de nueso, necesita proteición y actualización. Poro, l’emplegu de la llingua asturiana per parte de los ciudadanos que quieran facer usu d’ella y el so reconocimientu con valir llegal son el meyor encontu pa la so proteición y actualización. Les instituciones asturianes d’autogobiernu tienen la obligación de facer que’l derechu de los ciudadanos asturianos al usu de la llingua asturiana seya, acordies cola llegalidá vixente, plenamente efeutivu. Nesti sen, la Xunta Xeneral del Principáu, muérganu históricu de representación de los asturianos, encamienta al Gobiernu del Principáu que faiga vidable’l derechu de los ciudadanos al emplegu del asturianu nes sos rellaciones coles instituciones asturianes y, nel so momentu, coincidiendo cola reforma del Estatutu d’Autonomía d’Asturies, proponga una definitiva toma de determín con respeutu a les llendes xurídico-oficiales de la so consideración”.

Aguarda l’Academia de la Llingua Asturiana que la Xunta Xeneral del Principáu, una de les instituciones de más fondu raigañu n’Asturies y de más altu significáu pa los asturianos, sepa tar al altor d’esta xusta y democrática demanda y, darréu d’ello, la acueya como propia.

El Plenu del Conceyu de Siero aprobó esti xueves una moción na que se pide a la Xunta Xeneral del Principáu que declare la oficialidá del asturianu colos votos favoratibles de los grupos del Partíu Popular, Izquierda Xunida y Conceyu y la posición a la escontra del del PSOE. En Samartín del Rei Aurelio refugóse cola mayoría socialista otra moción asemeyada, cola que PP ya IX mostraronse al favor.

La moción taba presentada en Samartín por una iniciativa cívica col aval de más de 500 firmes que xunta los votos de PP ya IX nun pudieron cola mayoría absoluta del PSOE.

La posición de los socialistes nos dos conceyos argumentose siempre por “coherencia cola postura de la FSA” y por atalantar que “nun ye’l momentu más afayadizu”.

Dellos sectores cívicos de Samartín del Rei Aureliu van llevar al plenu d’esti xueves, 29 de marzu, una moción con cuenta de que l’Ayuntamientu inste a la Xunta Xeneral al reconocimientu dafechu de los derechos llingüísticos de los falantes d’asturianu na prósima reforma estatutaria.

Siguiendo’l camín marcáu en conceyos como’l de Villaviciosa –gobernáu pol PP– y el de L.lena –gobernáu pol PSOE–, que yá cuenten con declaraciones institucionales qu’insten a la Xunta Xeneral del Principáu d’Asturies a otorgar el status d’oficialidá a la llingua asturiana, diversos sectores del mundu social y cultural del conceyu de Samartín del Rei Aurelio promueven dende la participación cívica ciudadana una moción pa que nel Plenu del Ayuntamientu resuenen les más de 500 firmes de vecinos y vecines del conceyu que respalden la propuesta.

La moción contempla en tou momentu la VOLUNTARIEDÁ del individu a la hora d’exercer los derechos llingüísticos amparándose nes diverses lleis, constituciones, declaraciones y cartes de derechos yá esistentes y califica de discriminación el fechu de que n’otres partes del Estáu se contemple’l derechu a usar en tolos ámbitos la llingua patrimonial y n’Asturies, non. Tala moción foi remitida a tolos grupos políticos con representación na Casa Conceyu de Samartín, ente los qu’alcontró’l sofitu d’IX-BA, que sedrá’l grupu que presente esta reivindicación ciudadana nel plenu pal debate y, si atropa apoyos suficientes, la so posterior aprobación.

Nel día d’ayeri a un trabayador de la Conseyería d’Educación refugáron-y la presentación d’una orde de comisión de servicios por tar redactada n’asturianu. La orde foi devuelta con correcciones en castellano nun casu que recuerda al recientemente sucedíu de Xurde Blanco.
Asina’l trabayador de la enseñanza Xosé Nel Comba Paz entregó, como facía davezu elli y otros munchos mayestros y mayestres, la so orde de comisión en función del kilometraxe por poner clas fuera del so centru. Mientres que siempre se-y almitiera la fueya de comisiones ayeri ésta foi rechazada y “corrixida” en castellano. Comba ye mayestru nel Centru Rural Agrupáu de Cabu Peñes y pa poner les clases nes escueles d’esti centru utiliza’l so vehículu particular, por esti gastu la Conseyería reenvólsa-y unes perres pa compesar esti gastu.
Dende SUATEA denuncien esti “ataque a les más mínimes regles de convivencia democrática”. En términos similares la Xunta pola Defensa de la Llingua Asturiana asoleyó un comunicáu nel qu’amuesen el so compromisu de “trabayar pa que nun futuru prósimu los asturianos y asturianes podamos facer usu llibre y voluntariu de la nuesa llingua”. Les dos organizaciones van poner en conocimientu de los sos servicios xurídicos esti nuevu casu de represión llingüística por rellenar un formulariu n’asturianu.

La Escuela de formación de los Conseyos de la Mocedá asturianos ta acabante d’abrir el plazu d’inscripción pa la so nueva edición que se va desenvolver del 28 al 30 d’abril. A lo llargo d’estos tres díes los y les participantes van asistir a dellos cursos, talleres y seminarios formativos, ente los que destaca la Blogoesfera Asturiana.

L’estudiu de la violencia de xéneru, la comunicación asociativa, la sexualidá y les manifestaciones artístiques. Otros de los talleres y cursos que se van desenvolver xiren alredor de les posibilidaes qu’ufre’l mundu de la blogosfera.
Nesti puntu destaca la presencia d’un foru sobre la Blogosfera Asturiana, la que se fai n’asturianu. Nesti foru va analizase la situación de la blogosfera asturiana, faciédose presentaciones de dellos temes d’interés sobre esti tema.
Les inscripciones pa la Escuela de Seronda pueden facese na páxina web del Conseyu de la Mocedá del Principáu d’Asturies

Los topónimos tradicionales de Ribedeva van ser oficiales, a partir de la so espulización nel BOPA. El Conseyu de Gobiernu del pasáu 22 de marzu aprobó l’espediente toponímicu del conceyu oriental. Con Ribedeva yá son 19 los conceyos qu’oficializaron la so toponimia durante esta llexislatura.

Los institutos asturianos vivieron ayer una xornada de fuelga en defensa de la presencia del asturianu nel sistema educativu. La fuelga convocada pola xunta Moza recibió’l sofitu d’organizaciones como Mocedá d’Andecha Astur, Mocedá d’Izquierda Asturiana, el Conceyu Universitariu pol Asturianu, los Colectivos de Mocedaes Comuinistes o la Xuventú Asturianista.
El siguimientu de la fuelga n’Uviéu foi del 85% del alumnáu, destacando los centros de la Iría y Ventanielles y l’IES de Cerdeño. En Xixón instituos como’l Nº1 o el Rosario Acuaña tuvieron paros totales. Nel restu del país el siguimientu de la fuelga foi d’alredor del 80%.

Dende la Xunta Moza denuncien que les direcciones de dalgunos centros “ficieron lo posible por facer fracasar la movilización”, fixando esámenes pa esta data o en dalgunos casos puntuales unviando circulares a les families.

L’Academia de la Llingua emitió un comunicáu de prensa nel que se “valora mui negativamente”‘l conteníu de la propuesta de Decretu del Currículu d’Educación Secundaria Obligatoria fecha pola Conseyería d’Educación y Ciencia. La primer de les consideraciones de la máxima autoridá llingüística del país refierse al calter d’optatividá de l’asignatura, pa l’ALLA depués de revisar la propuesta curricular considera qu’ésta vulnera los derechos de los asturiano-falantes asina como a la Llei d’Usu al tar l’asturianu como asignatura optativa. Asina l’Academia cita que na propuesta de la Conseyería l’asturianu tendría que competir cola segunda llingua estranxera nos dos primeros cursos de la ESO y nel tercer amás cola “cultura clásica”; nel casu del cuartu cursu de la ESO l’alumnáu asturianu tendrá qu’escoyer ente una asignatura d’iniciación profesional, otra relacionada cola empresa o la realización de protectos de diversos ámbitos. Dende l’Academia recuerden que la Llei del Asturianu asegura en tou momentu que “la escoyeta del estudiu o del emplegu del asturianu como asignatura del currículu en nengún casu podrá sirvir de motivu de discriminación de los alumnos”
L’Academia considera que les dos hores selmanales de l’asignatura de llingua asturiana son “insuficientes dafechu oa que puean llevar alantre, con un mínimu de seriedá, los conteníos del currículu de llingua asturiana y lliteratura pa la ESO.
L’Academia vuelve a reclamar l’entamu del usu del asturianu como idioma vehicular . L’ALLa critica que na asignatura de llingua castellana’l tratamientu recibíu a la llingua asturiana como llingua ye arremente ambiguu. Poro la institución esixe que nel currículu s’esclarie qu’Asturies ye una comunidá billingüe na que coesisten en disigualdá de condiciones xurídiques y sociales dos sistemes llingüísticos.

Doce de los participantes na acampada en protesta pola construcción del banzáu de Caliao nel territoriu del Parque Redes acaben de recibir una multa de 60€ por acampada illegal. Los espedientaos consideren que la sanción sitúase dientro del mesmu ámbitu que les diferentes sanciones, contra dalgunos movimientos cívicos, que se tán desenvolviendo n’Asturies nos últimos tiempos.

Los denunciaos presentaron un recursu ente la Procuradora Xeneral del Principáu d’Asturies, la ex-conceyala socialista Maria Antonia Fernández Felgueroso, na que se pidía que s’investigara sobre la posible vulneración de los derechos fundamentales d’aconceyamientu y de llibertá d’espresión durante l’actuación de los cuerpos de seguridá nel trescurrir de l’acampada de Caliao, l’organu de defensa de los derechos archivó l’espediente entendiendo que nun se vulneraron los derechos por parte de l’alministración asturiana al nun “esistir resolución alministrativa” sobre’l casu.

El Boletín Oficial del Principáu d’Asturies de güe vienres 16 de marzu presenta la convocatoria de les subvenciones pa la normalización social del asturianu de 2007. Asina mesmo la Conseyería convoca los premios Maria Xosefa Xovellanos de novela, Xuan María Aceval de poesía, Máximo Fuertes Acevedo d’ensayu y Enriqueta González Rubñin de periodismu en llingua asturiana