Sociedá

Tres marchar poles cais Uría y San Francisco la manifestación punxó’l puntu final na Plaza Porlier d’Uvieu a onde llegó encabezada por una banda gaites, que acompañó a los participantes durante tol camín y una bandera d’Asturies portada por un de los manifestantes. Ya na plaza, taba preparáu un escenariu nel que la poeta Berta Piñán ya’l gaiteru Jose Ángel Hevia foron los encargaos de pone-y el ramu a la xornada cola llectura d’un comunicáu en representación del Conceyu Abiertu pola Oficialidá.

Nesti tramu final tanto Ornosa como Berta Piñán nun quisieron escaecese de que’l COA ye anguaño la organización civil que mayor númberu d’asociaciones del ámbitu social represnta n’Asturies y asina-yos lo recordaron a los asistentes. Tanto Piñán como Jose Ángel Hevia sorayaron la enorme importancia de que l’asturianu garre calter oficial dafechu pa dexar de ser una llingüa minorizada y en peligru claru de desapaición.

El gaiteru Jose Ángel Hevia quiso facer un llamamientu a los responsables políticos pa que permitan que l’asturianu puede ser usáu normalmente, daque que según el gaiteru nunca ficieron y que pasa lóxicamente pola oficialidá de la llingüa, el reconocimientu xurídicu de la igualdá llingüística. Berta Piñán tamien tuvo unes pallabres pa los asturianos de la fastera occidental que falen gallegu-asturianu y que tamien tienen derechu a que nun se-yos discrimine en cuestiones idiomátiques.

Tres la llectura del comunicáu taba prevista la actuación de La Bandina, nun conciertu que’l el grupu ayeranu diba dar de baldre pero dellos problemes con un xenerador estropieu llevaren a los organizadores a suspender l’actu. Fernando Ornosa cominicó la suspensión del conciertu ya anunció la sustitución de los ayeranos por una actuación de los componentes de la bandona gaites que durante tol trayectu animaron la manifestación pa zarrar esti gran eventu de llucha pola defensa de la llingüa.

A partir del 1 de xineru del añu prósimu cerca de 8.000 asturianos podrán escomenzar a recibir los 210 euros mensuales que-yos da’l Gobiernu como midía pa fomentar l’alquiler de vivienda ente la población mozo d’ente 22 y 30 años. La ministra de Vivienda, Carme Chacón, ya’l conseyeru d’Infraestructures, Francisco González Buendía sellaron ayeri esti alcuerdu pol cual Asturies será la primer comunidá autónoma en recibir les ayudes al alquiler.

210 euros mensuales durante un periodu de cuatro años pa los xóvenes d’ente 22 y 30 años que tengan unos ingresos añales de menos de 22.000 euros brutos. Estos son los detalles d’una iniciativa que tiene previstu amás dar prestamos de 600 euros pa pagar la fianza del alquiler y de 120 euros más pa sofitar el pagu de posibles avales. No tocante al gastu presupuestariu que van acarrear al Principáu estes ayudes, el Ministeriu de Vivienda señaló que nun va haber llímite presupuestariu dalgún anque la midía parte con una inversión de 8,9 millones d’euros.

Asturies ta a la cabeza na llista de comunidaes autónomes cuyos xóvenes tarden más en colar del hogar familiar y emancipase colo cual l’impactu d’esta midía va facese muncho más notable. “Esa gran cantidá de xóvenes que se emancipen mayoritariamente alredor de los trenta años podrá disponer d’una ayuda directa d’hasta 10.080 euros en 48 meses pa que pueda facer posible’l so proyecto de vida independiente nuna vivienda de calidá” señalaron fuentes del Gobiernu del Principáu a esti respectu.

Les ayudes van poder solicitase durante tol añu y van ser compatibles con otru tipu de deducciones por alquiler y con aquellos incentivos o beneficios fiscales y particulares de cada comunidad autónoma, eso si los solicitantes tendrán un plazu de tres meses p’alcontrar vivienda dende que se-yos reconoza’l derechu pa presentar el contratu.

L’Ayuntamientu de Xixón ta acabante d’abrir el plazu pa presentar propuestes al segundu Concursu de Cartel y Eslogan escontra’l Racismu y la Xenofobia con motivu de les xornaes sobre’l tema que se van cellebrar na ciudá nel prósimu mes marzu de 2008. Los cartelos que se presenten van tener que contener temática rellacionada con valores como’l respetu, la tolerancia, la non discriminación y la llucha escontra’l racismo y la xenofobia.

Puen participar persones mayores de 12 años y residentes n’Asturies hasta’l 28 de diciembre de 2007, día nel que fina’l plazu d’entrega de cartelos. El xuráu fallará un ganador que va ser espublizáu como’l cartel de la III Edición de les Xornaes escontra’l Racismu y la Xenofobia.

Bases

La vocera de Comisiones Obreres d’Asturies, Carmen Fernández, denuncio ayeri nun comunicáu la creciente violencia que sufren les muyeres por razones de sexu nel Principáu y en tol estáu. CCOO espublizó esti documentu como anticipu de les cellebraciones del día internacional pa la eliminación de la violencia escontra la muyer, el prósimu 25 de payares.

Fernández recordó que fueron alredor de 1108 denuncies les que se presentaren na rexón por motivos de malos tratos a muyeres ente xineru y setiembre d’esti añu, unes estadístiques cada vegada mayores. La vocera del sindicatu tamiñen quiso pidir a los empresarios que collaboren activamente coles midíes de sofitu a les muyeres maltrataes dándo-yos emplegu estable y a los responsables d’educación que trabayen pa eliminar la desigualdá de xeneru nes escueles.

Cuatro premios Príncipe d’Asturies d’Investigación Científica y Técnica van ufrir un ciclu de conferencies nel marcu de los actos conmemorativos del 40 aniversariu de la Facultá de Medicina Académica Universidá d’Uviéu y del IV Centenariu de la institución.

Enrique Moreno, Valentín Fuster, Joan Massagué y Antonio Damasio van protagonizar el ciclu de conferencies que se van desarrollar ente payares del 2007 y setiembre del 2008.

Enrique Morena González, Premiu Príncipe d’Asturies 1999, va abrir el programa’l vienres 23 de payares, a les 13.00 hores, nel Aula A de la Facultá de Medicina d’Uviéu, con una conferencia titulada ‘Impactu social de los avances nel tresplante hepáticu’.

La segunda conferencia va ser a cargu de Valentín Fuster Carulla, Premiu Príncipe d’ASturies en 1996, Joan Massagué , Premiu d’Investigación Científica y Técnica nel 2004, va impartir la tercer conferencia en mayu y la cuarta ponencia del ciclu va ser en setiembre del 2008, y va dala Antonio Damasio, Premiu Príncipe d’Asturies nel 2005.

“Asturias para tod@s” ye’l nome de la nueva guía turística pa discapacitaos que’l Principáu d’Asturies ta acabante d’asoleyar col enfotu de que sirva p’averar los atractivos turísticos de la comunidá tamien a les persones que, por problemes físicos diversos, nun puedan disfrutar d’ellos como deberíen. El Principáu cuntó na ellaboración d’esti trabayu col conseyu de la Confederación Española de Persones con Discapacidá Física y Orgánica d’Asturies.

Les más de sesenta páxines que se presentaron ayeri nel Jardín Botánicu Atlánticu de Xixón.componen un documentu informátivo básicu pa descubrir les carauterístices que tien caún de los recursos natuales, rutes, museos y dellos equipamientos d’Asturies no tocante a la accesibilidá de les persones con discapacidá. La conclusión que saquen los responsables de la guía ye que Asturies ye un enclave turísticu accesible.

Nel actu de presentación tuvieron presentes el Xerente de la Sociedá Rexonal de Turismu, Jesús Alfaro y dellos representantes de Confederación Española de Persones con Discapacidá Física y Orgánica d’Asturies como Mónica Oviedo. Esta última recordó que un de los oxetivos d’esta guía ye sensibilizar a l’alministración, a los hosteleros, y a la sociedá de lanecesidá de que sus recursos puedan ser disfrutaos por toles persones.

El Grupu d’Opinión ‘Algamar’ que ñació apocayá en Siero cola idea d’afalar el diálogu social y que se presenta como , va celebrar como segundu actu del añu una mesa redonda y coloquiu qu’alrodiu de la oficialidá de la llingua asturiana habrá d’entamase na Casa la Cultura de La Pola Siero, el martes 13 de payares a les 19:30 hores. Na mesa redonda van participar Xurde Blanco, Xurista, Penelope Miranda, Filóloga, Beatriz R. Viado, Periodista, y l’economista y profesor universitariu David Rivas.

Esti actu ye ún más de los qu’el Grupu d’Opinión Algamar Asturies tien camentao siguir organizando periódicamente sobre temes d’interés p’Asturies.

‘Algamar’ preséntose en setiembre como un grupu persones de Siero y otros conceyos de la redolada que quieren avanzar nel so compromisu con Asturies. El grupu entama esi camín sumándose al trabayu de les más de doscientes organizaciones que formen el Conceyu Abiertu pola Oficialidá.

La so propuesta asienta en cuatro pegollos fundamentales, de los que’l cimeru ye la reclamación de los drechos civiles, como ye la oficialidá. Paez-yos que “n’Asturies hai grandes deficiencies democrátiques nesti campu; una serie de drechos van de recul, nun s’algamaren o precisen d’una reivindicación permanente: a condiciones llaborales dignes, onde’l colectivu inmigrante y les muyeres acaparen les cifres de precariedá; a la participación política y social; a la llibertá de prensa; a la llibertá d’opinión y de crítica; al drechu a usar y adeprender la llingua asturiana (y el gallego-asturiano); a una educación laica, pública, de calidá y n’asturianu: a un mediu ambiente conserváu, pa beneficiu de la tierra y la xente que la habitamos y non pa mercadexar; a una sanidá pública y de calidá; a unos servicios públicos bien xestionaos; a la equidá ente muyeres y homes; a la equiparación de drechos de les persones inmigrantes; los drechos de gays, lesbianes y transexuales… Con polítiques efectives y radicales, nel sentíu de dir al raigañu del problema. Somos persones, nun somos súbditos; ser consumidores nun mos define, despersonalízamos. Los nuesos drechos civiles son lo mesmo individuales que colectivos; somos persones viviendo en sociedá y formamos un pueblu; la nuesa condición d’asturianos y asturianes tamién xenera drechos”.

La reivindicación identitaria y cultural. Ésta ye otra demanda más como asturianos y asturianes conscientes; pero equí nun se trata solo d’un llabor de recuperación sinón d’integración de los elementos que conformen la cultura asturiana dientro d’un contestu que-yos dea sentíu. Interpretaciones descontestualizaes, ayenes o ridiculizantes puen desarmar valores identitarios de gran interés. Nós queremos siguir siendo asturianos y asturianes nel sieglu XXI y pa eso paezmos fundamental el respetu, la potenciación y l’actualización d’aquellos elementos que mos definen. La cultura popular asturiana nun ye folclorismu pa risión, ye un preséu más na voluntá de siguir organizándomos como pueblu.

Est fin de selmana el colectivu Xente Gai Astur organiza les primeres Xornaes d’Educación na Diversidá Afectivosexual que van axuntara a más de sesenta persones relevantes del movimientu escontra la homofobia y la reivindicación de los derechos de Lesbianes, Gais, Transexuales y Bisexuales. Los actos entamen esti vienres a les 19:30 hores nel Hotel Asturias de Xixón con un coloquiu sobre edcucación al cargu de Jesús Generelo Lanaspa, coordinador del área d’Educación de la Federación Estatal de Lesbianes, Gais, Transexuales y Bisexuales.

Mañana sábadu intervendrán Mercedes Sánchez cola ponencia “Infancia y adolescencia LGBT: ente la invisibilidá, la esclusión y la discriminación” a les 09:00 hores, Dolores Martín Romero, del Colectivu de Lesbianes, Gais, Transexuales y Bisexuales de Madrid, col tema de la infancia y adolescencia transexual como exe. Esti mesmu día tamien van cellebrase un taller y dos meses redondes, una sobre “Familia y educación na diversidá afectivosexual” y la otra tiulada “Educación na diversidá afectivosexual: marcu llegal y intervención sindical”. El domingu ta prevista la presentación d’un manifiestu y la cellebración d’un plenariu onde se van esponer les conclusiones de estos tres díes.

Cola manifestación del 24 de payares nel horizonte los respnsables de Conceyu Abiertu pola Oficialidá (CAO) tan faciendo delles iniciatives pa promocionar l’eventu, la última ye’l repatu de 100.000 sobres d’azucre decoraos col logu de l’anuncia de la manifestación polos chigres, cafeteríes y pubs de tol Principáu d’Asturies. La iniciativa fui presentada pol voceru de la organización Fernando Ornosa y representantes de la Xunta pola defensa de la Llingua.

Ornosa qu’aprovecho pa recordar que munchos de los militantes del PSOE son tamien favoratibles al reconocimientu oficial del asturianu nel nuevu estatutu d’autonomía, apuntó que’l deber de los grupos politicos mayoritarios n’Asturies ye’l de garantizar el derechu constitucional de los asturianos a poder falar un idioma con más de 1000 años d’antiguedá. Al tiempu tamien dixo que la oficialidá ye la única ferramienta llegal que garantiza la supervivencia del idioma.

La manifestación del 24 de payares va entamar a les 18:00 hores na estación del Norte d’Uvieu, llugar onde aportarán les distintes marches a pie que van salir dende Xixón, Aviles, Mieres, Llangreu y Trubia. La marcha xeneral va finar na plaza Porlier.

“Islam y cristianismu” ye’l teme alredor del que va xirar la conferencia que va pronunciar esti miercoles Vespertino Fernández, catedráticu de Filoloxía Románica de la Universidá d’Uvieu. L’actu entama a partir de les 20:00 hores nel Club Prensa Asturiana d’Uvieu ya va escomenzar cola presentación del mesmu al cargu del profesor titular de Llingua Arabe de la Universidá d’Uvieu, Juan Carlos Villaverde Amieva.