Sociedá

Delles paroquies de los conceyos de Colunga, Cangues d’Onís y Ayer tan acabante de ver espublizada la so toponimia na colección qu’embaxo’l mesmu nome edita l’ Academia de la Llingua Asturiana. Los trabayos d’investigación correspuenden a Inaciu Hevia nel casu de la parroquia de Gobiendes, en Colunga; M.ª Conceición Vega nes parroquies de Cuadonga y La Riera, en Cangues d’Onís; y Jorge Alberto García, que trabayó na toponimia de les parroquies de Conforcos y L.lamas, nel conceyu d’Ayer

El pintor y escultor xixones Joaquín Rubio Camín morrió esti vienres 28 d’avientu a los 78 años d’edá. Nun comunicáu asoleyáu pol ayuntamientu l’alcaldesa de xixón Paz Fernández Felgueroso recordó la figura del artista. “Rubio Camín no sólo fue una figura clave del panorama de la escultura española de la segunda mitad del siglo XX, que tambien fue un referente y un apoyo incondicional para las generaciones de artistas mas jóvenes”.

Escultor dende 1961, tres años de dedicación a la pintura polos que llegó a algamar el Premiu Nacional de Pintura, delles muestres de la so obra tan repartíes por tola xeografía asturiana, sobre manera na so ciudá natal. El conxuntu d’escultures d’hormigón de los xardines de Begoña, l’altar de la Virxen de Cuadonga na ilesia de San Pedro o el bustu que recuerda al periodista Francisco Carantoña son dalgunos de les sos contribuciones.

En 2001, el Principáu reconoció la so llabor artística concediendo-y la medalla de plata d’Asturies por tola so carrera. Amás en 2003 foi la Fundación Municipal de Cultura la que organizó una retrospectiva del so trabayu na que se puedieron ver más de 300 maquetes, alredor de 200 dibujos, trenta cartelos y 400 semeyes.

La presidenta de l’Academia de la Llingua Asturiana, Ana Cano, denunció nunes declaraciones a l’axencia Europa Press, la situación de discriminación na que ta l’asturianu nel módelu de programación de la Televisión Pública del Príncipáu d’Asturies. Según la másima responsable de l’ALLA la TPA habría emitir a lo menos el 50% de la so programación n’asturianu y, nel mesmu sen, pidió l’usu del asturianu como “llingua vehicular nún de los dos espacios informativos diarios de la TPA, el del mediudía o el de la nueche” como “una preba de que la cosa entama a dir con normalidá.

Nel repartu de responsabilidaes Ana Cano venceyó la situación de desaniciu que vive l’idioma a la falta de voluntá política por algamar la oficialidá. Según la responsable academica el mayor problema al que s’enfrenta l’asturianu ye la perda de tresmisión xeneracional de la llingua de padres a fíos, dalgo que podía camudase dafechu cola oficialidá, y con una Llei de Normalización que faiga viable la normalización social real.

Per otra parte, alredor del tema de la incompatibilidá de les variantes dialectales de la llingua cola norma academica, Ana Cano negó la mesma. “Nenguna norma respuende exactamente a lo que se fala na cai en nengún idioma, y eso nun ye problema específicu del asturianu”, apuntó la presidenta al tiempu que recordó que anque l’asturianu normativu ta fechu, en fonetica y morfoloxía, alredor de la variante central esto nun diba ser problema ya que “la identificación del falante cola llingua culta soluciónase con una bona escolarización, cola presencia digna de la llingua nos medios de comunicación y con una bona normalización social”.

Dos dobladores profesionales asturianos, Pedro González del Valle y Clara G. Vega, tan espublizando nun canal de youtube los sos trabayos de torna de clásicos del cine al asturianu. L’espaciu que ye pioneru na rede n’esti ámbitu y pasa yá de les 2000 visites y ufre cachinos de películes como “Atopando a Nemo”, “Lo que’l vientu llevó”, “El Rei lleón” o “Pulp Fictión” en llingua asturiana.

Pedro González y Clara Vega tan formaos en Madrid anque anguaño tan trabayando na rexón y fixerón esti trabayu como avance de lo que sería un trabayu de torna profesional de cine al asturianu, dalgo que se vien faciendo con normalidá en Cataluña o en Galicia. L’ultimo vídiu que ufre, “Cine n´asturianu”, ye una esbilla de dalgunos momentos clásicos del setimu arte anque tamien puen vese trabayos antiguos como la torna de “El Rei Lleón o “Atopando a Nemo”

El Conceyu de Mieres y l’Asociación de Comerciantes del Caudal (ACC) van fomentar l’usu del asturianu nos sos establecimientos asociaos al travies del repartu de cartelos en llingua asturiana. “Acutao”, “Pesllao” o “Permítese fumar” son dellos de retulos que vesturan los locales del conceyu como cada añu. Según afirmó’l Director de la Casa de la Cultura de Mieres, Ismael María González Arias, esta campaña tien meyores niveles d’aceutación nel sector hosteleru que nel comerciu anque “un añu sí y otru tamien vamos viendo cómo más comercios acepten la iniciativa”.

“Lo meyor que se pue facer col periodu 1931-1977 ye sacalu de la política ya unvialu a onde tien que tar, a la hestoria. Lo que habría que facer ye sacalu de la Xunta Xeneral del Principáu y llevalu a la Universidá”. N’estos terminos defendió’l parlamentariu del PP Joaquín Arestegui, la refuga del soi grupu a la creación del institutu de la Memoria Democrática Asturiana que proponía IX-BA-Verdes. El PSOE tamien votó escontra’l proyectu.

Pela so parte, el PSOE en pallabres de la socialista Mercedes Fernández, considera que,anque dende’l so grupu compartense los mesmos oxetivos nesti sen que n’IX, ya hai organismos suficientes nel Principáu p’algamar los fines que persigue el pretendíu institutu como’l Archivu Históricu, los fondos documentales de dalgunes instituciones o la propia Llei de la Memoria Hestórica. “Nun consideramos oportunu crear un nuevu organismu que va duplicar los gastos porque ya se cumplen les funciones pa les que se crearíen”,dixo la diputada.

Izquierda Xunida-Bloque por Asturies-Los Verdes pedía, na voz del so diputáu Jesús Iglesias, la creación del institutu como un instrumentu públicu ya independiente que sirviese pa recuperar y fomentar la memoria de los desapaecíos y represaliaos na dómina que va de 1931 a 1977.

Güei xueves 20 d’avientu entamen n’Uvieu les xornaes alredor del Plan de Mocedá, organizaes pola Conseyería de Cultura del Principáu d’Asturies al travies del Institutu Asturianu de la Mocedá. Estes xornaes van durar hasta’l sábadu y tendrán llugar na Sala de Conferencies del Auditoriu Príncipe Felipe de la capital asturiana. Durante los tres díes pasarán pol auditoriu espertos, representantes xuveniles y políticos que van aportar opiniones y soluciones sobre cómo tienen que ser les prósimes polítiques empobinaes a la mocedá na rexón.

La presentación de les xeres va ser el vienres a les 12:00 hores y va correr al cargu del Director del Institutu Asturianu de la Mocedá, Guillermo Martínez y la Conseyera de Cultura y Turismu, Encarnación Rodríguez Cañas. La inscripción a los actos ye de baldre y pue facese al travies del correu plandejuventud@princast.es unviando el nome, apellíoss, dirección física y ellectrónica ya’l telefonu de contacto del solicitante.

La Unión de Consumidores d’Asturies manifestó güei en rueda prensa que cada asturiana va gastar estes navidaes una media de 912 euros, incluyendo la previsión del gastu en lloteríes, cesta de la compra navidiega, ociu, diversión, regalos y xuguetes.

Según el sondéu desarrolláu pola UCE, cada asturianu realizó una previsión del gastu na llotería de 110,83 euros, mientres que’l gastu qu’espera na cesta de la compra navidiega algama los 249,09 euros. Amás, el gastu estimáu n’ociu y diversión algama los 118,38 euros, mientres que’l presupuestu pa regalos ye de 220,38 euros por persona. La Unión de Consumidores, al traviés del so asesor xurídicu, Álvaro Carballo, caltién que los asturianos tamién van tener en cuenta otros gastos estres pa estes navidaes, como ye un mayor consumu de telefonía, unvíos de sms y tamién l’incrementu del gastu en calefacción.

Los topónimos tradicionales del conceyu de de Llaviana quedaron aprobaos ayeri na sesión del Conseyu de Gobiernu del Principáu d’Asturies. D’esti mou Llaviana ye l’último conceyu, fai’l númberu 24, en ver aprobada la so toponimia en forma oficial. Agora entá hai 27 conceyos na llista d’espera pa finar el procesu de recuperación de los sos topónimos hestóricos. Según declaró recientemente la la Directora Xeneral de Cultura, Consuelo Vega finar esti llabor “ye un oxetivu pa esta llexislatura”.

La teniente alcalde del Conceyu d’Uviéu, Isabel Pérez Espinosa, acusó güei al director de la Fundación Príncipe d’Asturies, Graciano García, de “enredar” y tentar de “presionar” al consistoriu uvieín al llanzar a los medios de comunicación la posibilidá de que dalgunes de les árees de la Fundación s’asitien fuera d’Uviéu, sigún recoyía Europa Press.

Espinosa fizo estes declaraciones nuna rueda prensa, dempués de qu’ayeri, fontes del patronatu de la Fundación plantegaren la posibilidá d’estudiar ufiertes d’Uviéu y d’otros conceyos, tres recibir la comunicación del Conceyu de que tien d’abandonar el palaciu de Villa Magdalena, onde taben dalgunes de les sos árees.

La teniente d’alcalde del Conceyu atribuyó en tou momentu a Graciano García eses manifestaciones “anque tente de camuflales atribuyéndoles a ‘fontes autorizaes'”. De fechu, dixo qu’eses consideraciones del director de la Fundación tán “fuera llugar”.