Sociedá

Esti miércoles 11 de xunu, el Salón de Plenos de la Casa’l Conceyu de Llangréu acoyó la presentación d’una campaña de normalización social del asturianu que l’Ayuntamientu de Llangréu ta poniendo en marcha. La nueva campaña de normalización social del asturianu que busca esta vegada “la normalización nel ámbitu familiar”. L’oxetivu d’esta campaña ye, según los responsables, “trabayar por evitar que ruempa la tresmisión xeneracional de la llingua y la cultura asturianes introduciendo l’asturianu, en mayor o menor midida, nel usu de les families”.

L’actu presentación presidiólu Ester Díaz García, Alcaldesa de Llangréu, y tamién asistieron Ana Oliva Rodríguez, Conceyala de Cultura, Turismu y Política Llingüística, Manuel Rodríguez Rosete, Coordinador del Área de Cultura y Política Lingüística de Llangréu y Eloy Antuña Responsable del Serviciu de Normalización Llingüística.

Nel actu anunciaron que la nueva campaña de normalización social del asturianu “va repartise ente los y les recíen nacíos del conceyu”, trátase d’una axenda, “pero non pa un añu concretu”, comentaron, “sinón pa organizar y anotar en función del crecimientu de lo piquiñino de la casa”.

”El llibru del Naciatu” pretende rexistrar los avances del neñu o neña dende que naz hasta los 3 años. Esti llibru vien a ser continuación de la campaña “AFAYÁIVOS EN CASA” que l’añu pasáu yá punxera en marcha l’Ayuntamientu de Llangréu.

Trátase d’un llibru pal bebé que presenta información d’interés pa los padres y les madres y que sirve pa introducir l’asturianu nel usu de les families del nuestru conceyu. 38 páxines que presenten la evolución en semeyes y dibuxos de neños y neñes dende que tán na barriga la ma hasta los 3 años: etapes de crecimientu, calendariu de vacunación, añaes, cantares, cosadielles, xuegos infantiles, ficha personal, espacios p’anotar revisiones médiques, conseyos d’hixene y alimentación, sitiu pa dalguna semeya… “Col envís d’aforrar perres y enanchar l’ámbitu d’actuación”, comentaron na presentación, “esta campaña ponse en marcha en collaboración cola Rede de Normalización Llingüística nos Conceyos”.

Un grupo de 43 ciudades españolas, ente les que s’alcuentra Uviéu, va recibir 344,66 millones de euros pa proyeutos de rexeneración y desendolcu sostenible urbanos dientro del programa ‘Iniciativa Urbana 2007-2013’ (Urban), que ta dotáu dende los Fondos Europeos de Desendolcu Rexonal (Feder) de la Unión Europea. Avilés competía cola capital del principáu por esos 11 millones d’euros.

La campaña entamada pol Conceyu Abiertu pola Oficialidá pa recoyer apoyos pa la oficialidá del asturian en forma de semeyes algamó yá la cifra de 1.000 semeyes unviaes y continua col trabayu de recopilación.

Les semeyes pueden mandase a doilacara@gmail.com

El Conceyu Abiertu pola Oficialidá va poner esti llunes 9 de xunu, dende les 10:45, una mesa informativa delantre de la Xunta Xeneral del Principáu, na caiFruela, sobre les sos reivindicaciones y va retratar a tolos ciudadanos que quieran dar la cara pola oficialidá participando na campaña “Yo doi la cara”.

L’actu va coincidir cola reunión de la ponencia estatutaria. Tamién van facese valoraciones sobre la situación de la llingua asturiana y la oportunidá hestórica na que s’atopa.

Un total de venticuatro candidatures opten al Premiu Príncipe d’Asturies de Comunicación y Humanidaes que va fallase’l 11 de xunu n’Uviéu. Los aspirantes son nacionales d’Albania, Alemaña, Bulgaria, Canadá, Estaos Uníos, Finlandia, Irán, México, Polonia, Reinu Uníu, Venezuela y España.

El Premiu Príncipe d’Asturies de Comunicación y Humanidaes concédese a la persona, grupu de persones o institución que desarrollare un llabor creador y d’investigación que represente una aportación relevante a la cultura universal nesos campos y ta dotáu con 50.000 euros, una escultura de Joan Miró, un diploma y una insinia.

El xuráu que va aconceyase nel Hotel de la Reconquista va tar integráu por José Antonio Álvarez Gundín; Ignacio Bayón Mariné; Emilio Casinello; Alejandro Echevarría; Javier Gómez Cuesta; Javier González Ferrari; Álex Grijelmo; José Luis Gutiérrez; Miguel Ángel Liso; Manuel Lombardero; Ramón López Vilas; Catalina Luca de Tena; Hans Meinke; Ana Rosa Migoya; Jaime Montalvo Correa; Rosa Montero; Beatriz de Moura; Manuel Olivencia; Pedro Páramo; José Luis Pardos; Alberto Pico; José Antonio Sánchez; Ricardo Senabre; Jesús de la Serna; Enrique Ybarra y Juan Luis Iglesias Prada.

Nun conceyu celebráu na Xunta Xeneral del Principáu, representantes del Conceyu Abiertu pola Oficialidá (CAO) y del grupu parlamentariu d’IU-BA-Los Verdes analizaron las situación de la llingua asturiana y compartieron los sos paeceres sobre los avances no tocante a la redacción actual de la ponencia estatutaria. El CAO, representáu por Fernando Ornosa
y por Xuan Gonzalo, y el grupu d’IU-BA-Los Verdes, representáu por Francisco Javier García Valledor, Jesús Iglesias, Noemí Martín y Rafael Palacios, repasaron, nun ambiente constructivu y d’afinidá, la importancia que tien consiguir la oficialidá de la llingua asturiana como primer pasu decisivu y necesariu nel camín de la so normalización social.

Esti conceyu enmárcase nuna ronda de reuniones que’l CAO ta faciendo colos grupos parllamentarios. La selmana pasada foi’l grupu parllamentariu del PP el que s’aconceyó pa facer el mesmu análisis y compartir les mesmes inquietúes sobre los derechos llingüísticos de los falantes y la oportunidá hestórica na que tamos agora, a les puertes d’otru estatutu que tien que recoyer la realidá asturiana como comunidá que cuenta con una llingua propia, que ye patrimoniu cultural milenariu y que necesita decisiones polítiques series y responsables qu’atayen el so desaniciu. Ta de sobra demostrao nos últimos años que los programes de normalización y promoción, ensin oficialidá, nun valieron pa frenar la perda de falantes
nin p’asegurar la tresmisión xeneracional del idioma.

Otra manera, el CAO acaba de presentar la nueva campaña de visualización de la reclamación social de la oficialidá “Doi la cara pola oficialidá”, que ta recoyendo con munchu esitu’l sofitu qu’amuesa la sociedá asturiana a la reivindicación de la llingua. Nes próximes selmanes, el CAO va siguir na ronda de contactos que tien programada con grupos parllamentarios, partíos políticos, instituciones y axentes sociales.

El Conceyu Abiertu pola Oficialidá presentó esti martes pela mañana una campaña novedosa col oxetivu de llograr el reconocimientu de la oficialidá de la llingua asturiana na próxima reforma del Estatutu d’Autonomía.

La campaña Yo doi la cara pola OFICIALIDÁ consiste na recoyida masiva y esposición de semeyes individuales de persones con un mesmu cartel que lleva’l testu que da nome a la campaña. Pa eso ta yá colgada na rede la páxina www.doilacara.net, onde se pue atopar la información sobre la campaña, enllaces pa descargar y imprimir la fueya del cartel, tanto n’asturianu como en gallego-asturianu, y un corréu electrónicu al que mandar les semeyes: doilacara@gmail.com.

Ye una campaña diseñada pa llevar a tola ciudadanía asturiana la iniciativa de la defensa del nuesu patrimoniu llingüísticu. Trátase d’una propuesta abierta a la participación de toos y toes que dexa que cualquier ciudadanu o ciudadana pueda ser protagonista activu de la reivindicación de los derechos llingüísticos n’Asturies: dando la cara pola oficialidá y espardiendo la campaña ente les persones del so entornu, familiares, vecinos, compañeros de trabayu, asociaciones de tou tipu, etc.

Ente los actos que van entamase nos próximos díes pa esparder esta iniciativa tán actividaes como la recoyida de semeyes per tolos campus universitarios d’Asturies, contactos informativos con más de doscientes asociaciones y una fiesta de presentación en La Casa Posafuelles (La Cuesta la Vega 10, Uviéu) el vienres 6 de xunu que vien. A partir d’ehí la campaña va siguir con un calendariu d’actos que llegarán a tolos conceyos d’Asturies.

La campaña Yo doi la cara pola OFICIALIDÁ va valir pa dexar claru’l respaldu mayoritariu de la sociedá asturiana hacia la reivindicación de la oficialidá. Tamién va valir p’apelar a la responsabilidá de los partíos asturianos representaos na Xunta Xeneral que tán nestos momentos debatiendo sobre los conteníos de la próxima reforma estatutaria. Ye’l momentu de que, ehí onde tovía permanezan, desapaezan d’una vez los prexuicios y les posiciones restrictives y se dea pasu a que se nos reconoza, por fin, el derechu a usar la nuesa llingua propia llibremente, ensin prohibiciones nin restricciones. Ye un derechu reconocíu na Constitución y que yá disfruten, dende va más de venticinco años, el restu ciudadanos del Estáu.

Campaña Doilacara del CAO

En 1983 abría les puertes el Café Trisquel, na cai Pedro Duro de Xixón, un chigre que diba converstise n’abellugu y llugar d’alcuentru del movimientu asturianista. Va dellos años treslladóse pol derrumbe del edificiu nel que s’asitiaba hasta la cercana cai de Marqués de San Estebán y esti añu cumple un cuartu de sieglu convertíu nunu de los más célebres llocales asturianistes.

El Trisquel acoyó n’estos años conciertos, recitales, monologuistes y toa una riestra d’acontecimientos culturales que lu convirtieron nun llugar d’espardimientu de la cultura asturiana.

Pa celebrar esti acontecimientu, el Trisquel va acoyer esta nueche un conciertu de la perconocida formación Felpeyu, que tuvo los sos entamos musicales nesti llocal, onde llegó a facer ensayos nos sos inicios.

El recital va ser esta nueche a les 21:30 hores.

El Conceyu Universitariu pol Asturianu (CUPA) denunció güei “insultos y amenaces” nel procesu electoral al Claustru de la Universidá d’Uviéu. La dirección de la organización asturianista y universitaria quixo facer públiques les denuncies feches énte la Xunta Electoral, dirixida pol profesor Leopoldo Tolivar, por esta organización “por mor de los fechos asocedíos na campaña” electoral al Claustru de la Universidá d’Uviéu, que van celebrase esti xueve, 29 de mayu.

La denuncia del CUPA llama l’atención “sobre la situación d’acosu, insultos y amenaces” a la que, según el CUPA, se vio sometíu’l candidatu d’esta formación nel Campus del Milán, “que foi rematada”, esti vienres pasáu cola pegada de falsos cartelos electorales nos que se llanzaben mensaxes “cola fin de desprestixar a los candidatos del CUPA”, comenten los organizadores. Ente los lemes que pudieron vese esta selmana nes instalaciones de la Universidá tán “Por una misa todos los días en bable en tu Facultad”, na que según la organización “se demuestra que l’ataque bien por mor del so apoyu al asturianu dientro de la Universidá, amás tamien apaecieron otros nos que se cuestionaba la independencia de la organización, “que nun ta venceyada a nengú n partíu”, colos lemes: “Demuestra que en el Milán no somos todos unos malditos rojos. Por una candidatura de derechas como Dios manda” y “Ya está bien de tanto progre. Por una candidatura de derecha auténtica” .

Amás, espliquen dende’l CUPA, “sufrióse tamién la manipulación de los cartelos electorales del CUPA, nos que pudieron vese escritos insultos como ‘fascistas’”, nesti casu nel campus de Mieres.

Dende la Dirección del Conceyu Universitariu conderguen los fechos y quieren llamentar “la falta de cultura democrática de les persones que participen d’esta campaña d’amenaces y desprestixu”, que según comenten “apecieren nel trescursu de les elecciones a Rector de la Universidá d’Uviéu, momentu nel que yá pudieron vese comportamientos asemeyaos”.

El CUPA yá denunció entós, énte la Xunta Electoral, “como se repartíen papeletes y se facía campaña nel mesmu día de les elecciones y xunto a les meses electorales, con total impunidá”.

El CUPA, quixo amás, solidarizase con Javier López Espinosa, cabezaleru d’otra de les candidatures presentaes nel Campus del Milán y presidente de l’asociación cultural “La Brisa de Japón”, que tamién sufrió amenaces del mesmu grupu.

La Conseyería de Mediambiente y Desarrollu Rural emprimó un tratamientu na Reserva Natural Parcial de la ría de Villaviciosa escontra la planta invasora “Arctohteca calendula”; la so apaición ta investigándose. La Dirección Xeneral de Biodiversidá y Paisax entamó va dos selmanes el tratamientu al través de la fumigación con glifosatu, “totalmente inofensivo pa la salú humana, les plantes, la fauna y ensin efectos ambientales”, según la institución.

L’“Arcthoteca calendula” ye una planta perenne invasora procedente de Sudáfrica que tiende a formar manchones trupos. Presenta les característiques siguientes: tueru reducíu, fueyes alternes y envés blanquecinu, flores marielles y dimorfes, ente otres. La especie espárdese pol granu y en forma vexetativa por aciu d’estolones y la so época de florecimientu ye dende finales de la primavera a finales del branu.

En cuantes al so hábitat, suel desendolcase en suelos costeros arenosos y urbanos marxinales. Tamién aguanta bien la seca y crez en suelos bien drenaos. Ye una planta sensible a xelaes y, asina, pue resultar dañada con temperatures que ronden 0ºC.

Según la Dirección Xeneral de Biodiversidá y Paisax, el tratamientu va prollongase unes cuantes selmanes más hasta estrincar completamente la planta invasora. Esta especie entamó a florecer l’añu pasáu anque la so apaición foi más abondante a partir d’esta primavera. Tres la so erradicación, los servicios de la Dirección Xeneral van siguir sollertes por si en daqué momentu la planta volviera a apaecer.