Sociedá

La Xunta pola Defensa de la Llingua Asturiana denunció estos díes esti fechu, pol que la radio y televisión públiques d’Asturies “incumplen sistemáticamente los decretos de toponimia oficial cuando, como ente públicu que ye, tenía que ser un mediu fundamental pa llevar a la práutica tolos alcuerdos y normatives aprobaes pol Gobiernu asturianu”.

Un fechu que la XPDLA albidra “vergoñoso” dempués de que “32 conceyos tengan la so toponimia oficializada y publicada nel BOPA”.

La Xunta recuerda que l’usu de la toponimia aprobada pol Conseyu de Gobiernu: “ye d’obligáu cumplimientu per parte de l’alministración pública”. “Nun hai más vueltes que-y dar. Tanto la RTPA como’l Gobiernu asturianu tán actuando illegalmente no tocante a la toponimia oficializada”, añadieron.

Los responsables de la XPDLA opinen qu’”Asturies ye la única comunidá con llingua propia onde los medios de comunicación públicos nun emiten nel so idioma, con tolo qu’ello podía valir pa normalizar una llingua que ta a puntu de desapaecer si nun se tomen midíes urxentes y bien planificaes”. “Ta claro que los intereses del Gobiernu asturianu van per otru llau: el de marxinar la llingua asturiana”, añadieron.

El director del Kintapo Health Research Center de Ganha, Seth Owusu-Agyei, galardonáu col Príncipe d’Asturies de Cooperación Internacional 2008, amosó ayeri la so satisfacción al aportar a Uviéu señalando que’l premiu “ye bono p’ayudar al continente africanu y especialmente a los neños”.

Owusu-Agyei realizó güei estes manifestaciones a la so llegada al Hotel de La Reconquista d’Uviéu. Foi’l segundu galardonáu en llegar a la capital asturiana, minutos dempués de que lo ficiere’l fundador del Sistema Nacional d’Orquestes Xuveniles galardonáu col Príncipe d’Asturies de Les Artes, José Antonio Abreu.

Los países de la Unión Europea apautaronse esti llunes nun reglamentu propuestu pola Comisión col obxetivu d’amenorgar un 30% d’equí a 2020 el consumu d’enerxía de les fontes d’alimentación esterna.

Ye cuarta medida qu’adopten los 27 n’aplicación de la directiva sobre ecodiseñu de la UE.

La Selmana Mundial de la Llactancia Materna, qu’entamara esti martes 14, piesllase esti sábadu n’Uviéu cola presencia de Rosa Jové y con una fiesta a partir de les 15,30 hores nel Palaciu de los Neños d’Uviéu.

A les 16 hores, nel Salón de Actos ta prevista la charra “Apoyando a madres y padres en el camino de la crianza respetuosa” pola Psicóloga infantil y autora del llibru ”Dormir sin lágrimas”, Rosa Jové, y a les 19 hores, un pinchéu pales families asistentes.

Güei, xueves 16, El Comercio y La Voz de Avilés entamen la contiuación del cursu d’asturianu qu’ufrieron a los sos llectores l’añu pasáu. El cursu d’afondamientu va espublizase nes páxines del diariu los martes y xueves hasta completar les trenta unidaes que formen el cursu.

Xurde Fernández y Marián García son los autores d’esti cursu que ta dixebráu nes estayes ‘Siguiendo’l camín’, ‘La nuesa lliteratura’, ‘Más palabres en bolsu’ y ‘Viviendo los llibros’.

Esti sábadu, 18 d’ochobre, a les 20 hores, el Coleutivu de Gays, lesbianes,transesuales y bisesuales d’Asturies (XEGA) celebrará la so fiesta nel local de Conceyu Abiertu (Gascona 12, Baxu A, Uviéu) na que se fadrá entrega a la xente del Conceyu la Mocedá del Principáu d’Asturies. Nel actu esperase cuntar cola presencia de Merche García y Paulino Feito, Presidente del CMPA.

Darréu de la entrega, a les 20.30 hores, ta previstra la proyección del reportaxe “Homofobia” emitíu nel programa La Aventura del Saber, grabáu en Barcelona, durante los alcuentros de l’AMPGYL y nel que salen testimonios de los xóvenes de XEGA.

Pa les 21.30 hores ta previstu un Pinchéu y Fiesta pa celebrar el I Aniversariu del grupo de xóvenes y adolescentes.

Esti xueves día 16, a las 19.15 hores, organizada pol Fòrum per la Memoria del País Valencià, la Sociedad Cultural Gijonesa y l’Atenéu Obreru de Xixón, va celebrase nel Salón d’Actos de la Biblioteca Pública Xovellanos de Xixón (Cai Jovellanos, 21), una charra-coloquiu baxo’l títulu “Fosas comunes, represión y crímenes durante el franquismo”. N’ella intervendrán Rubén Vega (profesor de Historia de la Universidad d’Uviéu) y Empar Salvador (coordinadoa del proyectu y presidenta del Fòrum per la Memoria del País Valencià).

Durante l’actu va facese tamién la presentación del llibru “El genocidio franquista en Valencia. Las fosas silenciadas del cementerio”.

Güei, martes 14 d’ochobre, l’Academia de la Llingua Asturiana presentaba a les 12 hores, nel Hotel Principado d’Uviéu, el llibru “Terminoloxía d’Internet y d’interfaces pa programes informáticos en Llingua Asturiana”, que ta editáu pola propia institución en collaboración col Colexu d’Inxenieros Informáticos, faciendo’l númberu 5 de la coleición “Cartafueyos Normativos”.

Nel actu interveníen la Presidenta de l’Academia de la Llingua Asturiana, Ana Mª Cano y el Decanu del Colexu d’Inxenieros Informáticos d’Asturies, David Melendi Palacio, amás del filólogu David Guardado, y de Xicu Xabel García, miembru tamién del Colexu d’Informáticos. Los tres formaron parte de la Comisión que dizo les prouestes d’aniciu que recoye l’Academia nel llibru.

Esti trabayu ye, según l’ALLA, “un primer averamientu normativu al gran ámbitu comunicativu de les Nueves Teunoloxíes y constitúi una primer entrega de les adautaciones terminolóxiques que venía siendo reclamada polos usuarios del asturianu”. Una publicación que la institución académica “afitará ensin dulda la normalización del asturianu nesti terrén”.

El cartafueyu que se presentaba esti día ufre los términos n’asturianu coles sos definiciones xunta les formes emplegaes notres lloingües vecines como’l castellán, el catalán, el francés o’l gallegu, ensin escaecer l’ínglés, orixe de la mayoría de los términos d’esta faza llingüística.

Nun comunicáu fechu públicu esti mesmu día, la Xunta pola Defensa de la Llingua asturiana denuncia lo qu’atalante ye “otru ataque más a la enseñanza de la llingua asturiana”, por dar a escoyer ente asturianu ya informática, Según la Xunta, “el colexu concertáu Beata Imelda de La Felguera impide con mentires ya incumplimientos llegales la matriculación na asignatura de Llingua Asturiana”.

La Xunta pola Defensa de la Llingua Asturiana denunciaba güei “otru casu nuevu d’ataque a la escolarización de la llingua asturiana y a los derechos llingüísticos y educativos de los escolinos y escolines, nesti casu na escuela concertada Beata Imelda de La Felguera”. Nesti colexu dase, segun la Xunta, la posibilidá d’escoyer ente Llingua Asturiana ya Informática a los escolinos y escolines, “lo que ye una violación flagrante de la llexislación vixente que ye clara a la hora d’afitar la imposibilidá de que l’asignatura d’asturianu compita con otres asignatures na educación primaria”.

La Llei 1/98 d’Usu y Promoción del Asturianu dexa claro nel so artículu 10.3 que “La elección del estudiu o del usu del asturianu como asignatura del currículu, en nengún casu va poder ser motivu de discriminación de los alumnos… Pa los que lu escueyan, el so deprendizaxe o usu nun va poder constituir un obstáculu pa recibir la mesma formación y conocimientos n’igualdá de condiciones que’l restu del alumnáu”. Y de la mesma manera, nes INSTRUCCIONES de 8 de mayu de 2001, de la Viceconseyería d’Educación, poles que se regula’l procesu d’escolarización en Llingua Asturiana y Lliteratura na Educación Primaria nos centros públicos del Principáu d’Asturies, afítase que “l’alumnáu que nun estudie Llingua Asturiana y Lliteratura recibirá, como alternativa, enseñanza de Cultura Asturiana”.

Con esta política, la escuela llangreana “incumple tola llexislación vixente pa col enseñu del asturianu que ye clara a la hora d’obligar la ufierta a la matriculación ensin torgues de nenguna clase. Esti incumplimientu de la llei tien que tener consecuencies alministratives inmediates porque la normativa impide espresamente que l’estudiu de la llingua asturiana pueda competir col d’otres materies pa evitar la discriminación de los escolinos qu’escueyen asturianu al nun tener accesu a la mesma formación qu’aquellos que nun lo escoyeren”.

La Xunta pola Defensa de la Llingua Asturiana quier denunciar la responsabilidá de la Conseyería d’Educación “nestos casos qu’empezamos a conocer. Queda demostrao a les clares que la inspección educativa nun actúa nestos casos y qu’estes maniobres cuenten col preste de la Conseyería”.

Por eso, la Xunta pola Defensa de la Llingua Asturiana quier anunciar que va llevar alantre les acciones llegales necesaries pa tornar esta situación llamentable: “Queremos esclariar que’l marcu llegal que regula la presencia de la llingua asturiana nel sistema educativu ye mui curtiu, probe y discriminatoriu, y por eso ye más claramente inaceptable que s’incumpla dende les alministraciones”.

El recién creáu Atenéu Xuan María Acabel va celebrar güei, a partir de les 19:30 hores, n’Alborá Llibros, en Xixón, un actu nel que va presentar los proyectos de la organización entamada “pa la defensa del mundiu rural asturianu, pa la promoción y revitalización de los elementos culturales (tanto materiales como inmateriales) qu’hestóricamente configuraron a Asturies como País”. Nel actu va facese un recital de poemes de Xuan María Acebal per parte de personalidaes de la vida pública asturiana.

Xuan Xosé Sánchez Vicente, académicu, escritor y políticu; Xosé Lluis Campal, escritor ya investigador de la lliteratura asturiana; Xurde Morán, presentandor de Canal10 y la cadena SER; Ignacio G. López-Dóriga, empresariu; Xabel de Cea, escritor y presidente de l’asociación El Tueru, ente otros, van recitar poemes como “El amor del hogar” o “La Fonte de Fascura”, del autor que da nome a la organización.

Dempués del recital va celebrase un pinchéu colos asistentes al actu, que ta abiertu al públicu xeneral y que va sirvir pa dar entamu a les actividaes de la organización que según cuenten los organizaciores “busca’l re-descubrimientu de la nuesa Hestoria dende una perspectiva asturiana dafechu” y “va trabayar tamién el campu de la lliteratura clásica asturiana”. N’esi sen, comenten dende la organización, “va trabayase na recuperación, l’estudiu y la reedición de la lliteratura asturiana menos conocida”, amás de por “afalar el so conocimientu ente la sociedá asturiana”.

Páxina del Atenéu Xuan María Acebal