La Xunta denuncia en Llangréu “otru ataque más a la enseñanza de la llingua asturiana”

Nun comunicáu fechu públicu esti mesmu día, la Xunta pola Defensa de la Llingua asturiana denuncia lo qu’atalante ye “otru ataque más a la enseñanza de la llingua asturiana”, por dar a escoyer ente asturianu ya informática, Según la Xunta, “el colexu concertáu Beata Imelda de La Felguera impide con mentires ya incumplimientos llegales la matriculación na asignatura de Llingua Asturiana”.

La Xunta pola Defensa de la Llingua Asturiana denunciaba güei “otru casu nuevu d’ataque a la escolarización de la llingua asturiana y a los derechos llingüísticos y educativos de los escolinos y escolines, nesti casu na escuela concertada Beata Imelda de La Felguera”. Nesti colexu dase, segun la Xunta, la posibilidá d’escoyer ente Llingua Asturiana ya Informática a los escolinos y escolines, “lo que ye una violación flagrante de la llexislación vixente que ye clara a la hora d’afitar la imposibilidá de que l’asignatura d’asturianu compita con otres asignatures na educación primaria”.

La Llei 1/98 d’Usu y Promoción del Asturianu dexa claro nel so artículu 10.3 que “La elección del estudiu o del usu del asturianu como asignatura del currículu, en nengún casu va poder ser motivu de discriminación de los alumnos… Pa los que lu escueyan, el so deprendizaxe o usu nun va poder constituir un obstáculu pa recibir la mesma formación y conocimientos n’igualdá de condiciones que’l restu del alumnáu”. Y de la mesma manera, nes INSTRUCCIONES de 8 de mayu de 2001, de la Viceconseyería d’Educación, poles que se regula’l procesu d’escolarización en Llingua Asturiana y Lliteratura na Educación Primaria nos centros públicos del Principáu d’Asturies, afítase que “l’alumnáu que nun estudie Llingua Asturiana y Lliteratura recibirá, como alternativa, enseñanza de Cultura Asturiana”.

Con esta política, la escuela llangreana “incumple tola llexislación vixente pa col enseñu del asturianu que ye clara a la hora d’obligar la ufierta a la matriculación ensin torgues de nenguna clase. Esti incumplimientu de la llei tien que tener consecuencies alministratives inmediates porque la normativa impide espresamente que l’estudiu de la llingua asturiana pueda competir col d’otres materies pa evitar la discriminación de los escolinos qu’escueyen asturianu al nun tener accesu a la mesma formación qu’aquellos que nun lo escoyeren”.

La Xunta pola Defensa de la Llingua Asturiana quier denunciar la responsabilidá de la Conseyería d’Educación “nestos casos qu’empezamos a conocer. Queda demostrao a les clares que la inspección educativa nun actúa nestos casos y qu’estes maniobres cuenten col preste de la Conseyería”.

Por eso, la Xunta pola Defensa de la Llingua Asturiana quier anunciar que va llevar alantre les acciones llegales necesaries pa tornar esta situación llamentable: “Queremos esclariar que’l marcu llegal que regula la presencia de la llingua asturiana nel sistema educativu ye mui curtiu, probe y discriminatoriu, y por eso ye más claramente inaceptable que s’incumpla dende les alministraciones”.