Sociedá

Según anunció la Conceyalía de Llingua Asturiana y Cultura Tradicional, xestionada por Jesús Montes Estrada “Churruca”, el fallu de la primer edición del Premiu Federico Fierro-Botas, qu’esti añu celebra la so primer edición, dio como ganador a Rafael Rodríguez Valdés, hestoriador y director de la revista d’hestoria contemporanea “Erada”.

El trabayu premiáu ye “Discursu llingüísticu y movimientu obreru na Asturies decimonónica”, que recibió la votación favoratible, por mayoría, del xuráu formáu por Carmen Rúa Morán, Ana María Cano, Francisco José Llera, Jaime González Fierro-Huerta, Jesús Ángel Fernández, Ismael González Arias, Humberto Gonzali, Xuan Cándano y María Xosé Rodríguez. Votando en contra, Mª Xosé Rodríguez, encargada de la Oficina de la Llingua de Xixón y Humberto Gonzali, asesor del grupu popular en Xixón.

L’aforru mediu nel preciu d’un xuguete pue llegar a un 20% según nel establecimientu nel que se merque y Uviéu ye la ciudá más barata pa mercar xuguetes de toa España. Esto ye lo qu’amuesa un estudiu sobre los precios de 42 xuguetes en 15 ciudaes españoles realizáu pola Organización de Consumidores y Usuarios (OCU) y qu’acaba d’asoleyase esti día.

La diferencia ye mayor nos xuguetes más baratos (los que cuesten menos de 40 euros), llegando a algamar más del 26% en dellos casos. Poro, nos xuguetes más caros (los de más de 40 euros), l’aforru ye menor y nmái pue algamar un 12%.

Esti estudiu de la OCU amuesa tamién que nun hai muncha diferencia de precios ente les ciudaes visitaes, pero dexa bien a les clares qu’Uviéu ye la más barata. Madrid y Alicante son les ciudaes más cares pa mercar los mesmos xuguetes.

Ne nota de prensa asoleyada esti domingu, dende’l Bloque por Asturies acoyese con plasmu y agradu la campaña publicitaria que la entidá bancaria Caxastur ta realizando en Cataluña y en catalán, pa la so promoción, cola imaxe del futbolista asturianu Luis Enrique. Al Bloque choca-y “qu’una entidá que se financia mayoritariamente col ingresu del pueblu asturianu, y que na so cúpula directiva tien la representación de partíos políticos d’Asturies, faiga gala de sensibilidá llingüística pa colos habitantes de Cataluña, pero non asina colos de la so comunidá; lo que xenera una situación discriminatoria no que se refier a los drechos llingüísticos de les persones de los diferentes territorios del Estáu Español. Nun hemos escaecer que Caxastur, a lo llargo de la so hestoria, nun foi quien a respetar la toponimia oficial de la nuesa tierra”. Por too ello, dende’l Bloque por Asturies, “esiximos a los dirixentes de Caxastur y a los responsables de los partíos que formen el so conseyu de dirección, que rectifiquen d’inmediato esa doble midida qu’apliquen a los drechos llingüísticos de les persones del Estáu, yá que, non de baldre, esta entidá tien a les clares un calter de serviciu públicu y, polo mesmo, asume la obligación d’aplicar principios d’igualdá y de respetu pa coles llingües que se falen en cada territoriu”.

El que fora un xugador de fútbol ensin igual, que militó nes files del Sporting de Xixón y del F.C. Barcelona, que tantes veces foi pichichi de la lliga y que ye un asturianu reconocíu y apreciáu por tol mundu, acaba de facer la semeya pa la exitosa campaña del Conceyu Abiertu pola Oficialidá (CAO)na que ya “dan la cara pola oficialidá” mas d’ocho mil asturianos.

Cuando se trespasa la cifra de 8.000 retratos y depués de contar cola participación de xente anónimo amás de la de munchos y munches representantes del mundu de la cultura y de la política, el míticu delanteru vien a sumase, como ún más, a esta llarga galería de persones que tienen claro que la oficialidá ye la única solución que val pa que l’idioma asturianu nun muerra abandonáu a les polítiques de pega, a les soluciones cosmétiques o a los aplazamientos que la faen retroceder día tres día en cuenta de revitalizase como llingua n’igualdá de condiciones col castellanu.

En declaraciones feches na mañana d’ayeri, el portavoz del CAO, Fernando Ornosa, dixo que “l’éxitu d’esta campaña ye una respuesta clara a les intenciones de la FSA y del PP d’acabar col asturianu a mediu plazu. Con esta forma orixinal de movilización vamos siguir buscando’l consensu y la participación de tola sociedá. D’equí a poco vamos empezar a recorrer Asturies: nun vamos dexar conceyu ensin la visita del CAO, pa que tol que quiera faiga la semeya y algamar con ello un númberu d’adhesiones muncho mayor del que yá hai. Con esti trabayu, dende’l CAO siguimos reclamando un estatutu que recueya nel so articuláu l’estaus d’oficialidá pa la nuestra llingua, primer pegollu necesariu pa que’l futuru del idioma tea aseguráu”.

Esta nueche, a partir de les 21 hores entama l’amagüesu poéticu “La pallabra flexible”, nel que van participar los poetes David González, Alejandra Sirvent, Miguel Rojo, Eterno, María Couceiro, el músicu Xabel Vegas, el grupu de teatru del fanzine Lata de Zinc, y el colectivu Cambalache. L’escenariu va tar na fábrica okupada La Reflexón, (nel barriu La Calzada, Xixón), que dará abellgu a lo que los organizadores llamen “conxura”.

Dende’l CSOA “La ReFLEXón” dicen naguar “por ufiertar a los vecinos del barriu La Calzada y de la ciudá de Xixón un llugar d’alcuentru onde compartir ilusiones, esmolecimientos y trabayar pol barriu, dando-y vida a l’antigua fábrica de la FLEX, llugar muertu n’un barriu afectáu gravemente pola reconversión y que, dempués de diez años, resucita como CSOA”.

Ye por eso, dicíen va dellos meses, el llugar “ñaz nun espaciu abandonáu col enfotu de convertise nun llugar onde construir, deprender, axuntar y plantegar alternatives a les coses que queremos camudar”.

La editorial Ámbitu ta acabante editar “L’asturianu que vien”, un llibru nel que se recueyen “observaciones y suxerencies sobre l’asturianu normativu y el so usu” feches pol profesor de la Universidád’Uviéu, miembru del Seminariu de Llingua Asturiana y de l’Academia de la Llingua Asturiana, Ramón d’Andrés. Un llibru que sigue la sienda percorrida por esti autor n’otres obres como “Cuestiones d’asturianu normativu (I, II y III) o la so Gramática asturiana.

Nel llibru reflexónase sobre lo que ye normativizar una llingua: “da-y normes prescriptives (ortográfiques, gramaticales, léxiques y ortolóxiques) que faigan posible usala como instrumentu de comunicación formal”.

Pa Ramón d’Andres el procesu de normativiación del idioma tien tovía “importantes cuestiones pendientes rellacionaes col usu prácticu n’ámbitos formales como’l periodísticu, el xurídicu, el lliterariu, el científicu y tantos otros”.

Mañana, vienres 5 d´avientu, dende les 21 hores entama l’amagüesu poéticu “La pallabra flexible”, nel que van participar David González, Alejandra Sirvent, Miguel Rojo, Eterno, María Couceiro, Xabel Vegas, el grupu de teatru del fanzine Lata de Zinc, y el colectivu Cambalache.

L’escenariu postindustrial de la fábrica okupada La Reflexón, (nel barriu La Calzada, Xixón) dará abellugu a esta, según los organizadores, “conxura”.

A Mesa pola Normalización Lingüística de Galicia y l’asociación vasca Behatokia de defensa de los derechos del euskera señalaron esti miércoles a l’Alministración del Estáu como “la que más incumple los derechos llingüísticos de los falantes de llingües cooficiales”, nun discursu que se repite en toles comunidaes con llingua propia, especialmente nel casu asturianu.

L’acusación ficiéronla estes dos asociaciones n un conceyu calteníu n’A Coruña onde les dos encamentaron a l’Alministración estatal que dexe d’actuar “como si nun existieren más llingües que’l castellán” y aseguraron que “munchos ciudadanos nin siquier saben que nos organismos estatales con sede nes sos comunidaes autónomes tienen derechu a ser antendíos na so llingua”.

La Conseyería de Mediu Rural va crear un Conseyu Asesor Agariu nel que van tar representaos los sindicatos del sector, pa poer afrontar los problemes qu’afeuten al mundu del campu, según fizo anuncia esti día’l nuevu Conseyeru, Aurelio Martín. La intención de la Conseyería ye presentar el borrador d’esti organismu nun plazu d’un mes a les tres centrales mayoritaries pa consensuar el documentu.

La noticia dióse esti miércoles tres de caltener el nuevu Conseyeru un primer conceyu de toma de contautu colos tres secretarios xenerales de les tres principales centrales sindicales agraries: Ramón Artime (Asaja), José Calvo (UCA) y Óscar Sirgo (COAG).

Esti miércoles 3 d’avientu, a les siete la tarde, la Plataforma Llaica d’Asturies organiza nel salón d’actos de la Biblioteca Pública Xovellanos de Xixón la conferencia “Llibertá de conciencia y llibertá relixosa”, a cargu de Francisco Delgado, presidente d’Europa Llaica.

Darréu va facese un alderique colos asistentes sobre los cambios anunciaos na Llei de Llibertá Relixosa de 1980 y la situación, nel Estáu español, en cuantes al drechu de la llibertá de conciencia.