Sociedá

El Conceyu Abiertu tien abierta hasta’l 21 de marzu esta esposición que recueye semeyes y testimonios, Conceyu Abiertu quier acercar a la xente a esta nueva realidá: “la sociedá d’anguaño ye multicultural y tenemos nuevos vecinos y vecines, ente ellos munchos Menores que tienen que ser tutelaos pola Administración al llegar ensin padres nin tutores”.

L’ordenamientu llegal y los convenios internacionales suscritos encomienden a les Añministraciones Públiques velar pol interés superior d’estos neños y tutelar los derechos d’aquéllos/es que se alcuentren nel nuestru territoriu ensin persona adulta que se faiga responsable d’ellos, contribuyendo asina a forxar la persona adulta del futuru. Los menores estranxeros non acompañáos, ante too son nenos/es.

La llei nun dexa duldes. Autóctonos o estranxeros, pero menores siempre. Hai que los protexer, comenten dende’l CA.

El Conceyu por Otra Función Pública n’Asturies vieno acabante de dirixise a la Comisión de Peticiones de la Xunta Xeneral del Principáu d’Asturies cola fin de qu’entame les actuaciones ya iniciatives necesaries pa que puedan dase na Alministración del Principáu d’Asturies, de forma real y efeutiva, les condiciones mínimes pal exerciciu del derechu fonderu d’acceder en condiciones d’igualdá, méritu y capacidá a los puestos de trabayu del seutor públicu, asina como la promoción profesional acordies a los mesmos principios constitucionales, desaniciando les pilancos que tan torgando’l so exerciciu dafechu, n’especial cola fin de:

– Garantizar que los procesos seleutivos de personal nos entes y empreses del seutor públicu de la Comunidá Autónoma se desendolquen alcordies colos procedimientos que respeten los principios d’igualdá, méritu y capacidá, asegurando la publicidá de les convocatories y de les sos bases, la tresparencia, la imparcialidá y profesionalidá de los miembros de los muérganos de seleición, la independencia y discrecionalidá téunica na actuación de talos muérganos, l’adecuación ente’l conteníu de los procesos seleutivos y les funciones o tarees a desendolcar y l’axilidá, ensin perxuiciu de la oxetividá, nos procesos de seleición. – Regular un procedimientu regláu pal nomamientu de los miembros de los muérganos de seleición de personal que garantice la imparcialidá y profesionalidá de los mesmos y la independencia na so actuación. – Afitar que los procedimientos ordinarios de promoción profesional, los concursos de méritos, se convoquen dientro de los plazos llegalmente previstos, torgando la consolidación “sine die” de los nomamientos provisionales o en comisión de servicios. – Emplegar la llibre designación pa los casos esceicionales previstos na llei, torgando la so xeneralización pa determinaes categoríes de puestos, así como la inflación de places ocupaes per esti sistema fundamentáu nel enfotu personal que ta comprometiendo seriamente les condiciones necesaries d’imparcialidá y neutralidá política de la Función Pública asturiana. – Encadarmar una carrera profesional horizontal y unos sistemas d’evaluación que s’axusten dafechu a criterios de tresparencia, oxetividá, imparcialidá y non discriminación y que nun aminorguen los derechos de los emplegaos públicos. – Esixir el cumplimietu de les obligaciones llegales sobre la execución de les ufiertes d’emplegu públicu. – Esixir el cumplimientu de les disposiciones llegales sobre publicidá y tresparencia de places, nomamientos y retribuciones del personal eventual.

Javier Cubero, secretariu de l’asociación “La Brisa de Japón” abría esti xueves pela tarde les intervenciones na presentación del I Congresu de Cultura Xaponesa, que celebra esta organización en collaboración cola Universidá d’Uviéu y l’Ayuntamientu d’Uviéu. El Conceyal de Mocedá de la ciudá, Gerardo Antuña Peñalosa, comentó darréu la importancia d’un eventu “que fai más cosmopolita a Uviéu”. Peslló les intervenciones Javier López Espinosa, presidente de la organización y director del Congresu, que percorrió la hestoria d’esta organización y adelantó los conteníos d’un Congresu “qu’esti añu mira p’Asturies nes sos actividaes y cunta con tol material asoleyáu de forma billingüe, asturianu/castellán”.

Na sede del Club de Prensa Asturiana de La Nueva España, tuvieron tamién dellos de los congresistes, como Mari Luz Pontón y Esther García, al igual qu’otros miembros de l’asociación. En representación de l’Academia de la Llingua Asturiana tuvo Roberto González-Quevedo.

Los actos entamen el llunes nel Edificiu Hestóricu de la Universidá d’Uviéu cola inauguración, a les 12 la mañana. Nella van participar el Rector Magníficu de la Universidá d’Uviéu, Sr. Don Vicente Miguel Gotor Santamaría, l’Ilustrísimu Primer secretariu y Direutor Xeneral del Centru Cultural y d’Información de la Embaxada del Xapón n’España, Sr. D. Naoki Yokobayashi, el Conceyal de Cultura del Ayuntamientu d’Uviéu, Sr. Don José Suárez Arias Cachero, el Presidente d’Honor de l’Asociación cultural “La Brisa del Japón”, Sr. D. Etsuro Sotoo y el Direutor del Congresu, Sr. D. Javier Espinosa.

Darréu, Naoki Yokobayashi va lleer la conferencia d’Entamu: “Rellaciones ente Xapón y España”.

Yá de tarde, dende les 17:00 hores, va presentase’l llibru de haikus n’asturianu “Faraguyas”, d’Esther García y asoleyáy por Ediciones Madú. A les seis, Hisako Hiseki, prestixosa pianista xaponesa, especialista en música española, va dar un conciertu.

Programa completu del I Congresu de Cultura Xaponesa

El científicu Carlos López Otín algaó esti xueves ún de los Premios Nacionales de Investigación correspondientes a 2008, el de Bioloxía, col que’l Ministeriu premiaba les sos pernomaes investigaciones de los caberos años.

Los profesores de la Universidá d’Uviéu, Alfredo Álvarez y Ramón d’Andrés, van dar una charra con proyección de semeyes sobre’l so viaxe a Venezuela, güei, xueves día 12 de marzu, a les ocho la tarde na Asociación “La Escandalera”, asitiada dende va poco nel so nuevu llocal de la cai Cabo Noval, 5, 1u, d’Uviéu.

La Cervecería Astuera, asitiada na cai Joaquín Fernández Acebal, 2 de Xixón, va acoyer esti xueves 12, a les 20:30 hores, la tertulia “¿Qué facer cola prostitución? Encruciyaes y propuestes”.

Na actividá van participar Ana Luisa Ordóñez, autora del llibru “Feminismo y Prostitución. Fundamentos del debate actual en España” y Marisa Cuesta, vocera de la Estaya d’Igualdá d’Unidá Nacionalista Asturiana (UNA). La charra va presentala Yolanda G. Huergo.

La Xunta pola Defensa de la Llingua Asturiana convoca pa esti sábadu a les cinco la tarde una movilización con salida na Estación del Norte d’Uviéu. La manifestación convócase col envís de defender “unes conquistes que nun pueden tener marcha atrás”. Pa la XPDLLA “Estudiar asturianu ye un derechu al que nun podemos renunciar”.

La manifestación tien por oxetivos principales normalizar la situación del enseñu del asturianu y de los profesores que según una del Tribunal Supremu, ye que illegal. Amás, la convocatoria quier afalar la creación d’una especialidá d’asturianu en Maxisteriu, yá que lo contrario “solo podría significar una cosa, la intención de les alministraciones de mantener a l’asignatura nuna posición marxinal y inestable que permita la so eliminación nun futuru prósimu”.

Comunicáu de la Xunta pola Defensa de la Llingua Asturiana sobre l’enseñu del asturianu

La Conseyería de Cultura y Turismu ta desarrollando nestos meses una nueva campaña de normalización social de la llingua asturiana nel sector socioeconómicu. En concreto, l’oxetivu d’esta campaña ye’l comerciu, que la Conseyería considera “unu de los ámbitos más importantes nes rellaciones cola ciudadanía”. Dempués de dellos meses, los responsables consideren “un gran ésitu” la mesma, “con visibilidá curiosa nos establecimientos comerciales y con bien d’aceptación social”.

Na campaña y col envís “d’animar a comerciantes y ciudadanos al usu del asturianu nes rellaciones comerciales”, distribuyéronse en 2500 comercios de catorce conceyos asturianos –Uviéu, Xixón, Avilés, Siero, Mieres, L.lena, Llangréu, Samartín del Rei Aurelio, Carreño, Gozón, Villaviciosa, Colunga, Nava y Piloña- 10.000 cartelos colos rótulos de “Rebaxes”, “Segundes” y “Últimes” con motivu de la campaña de rebaxes qu’emprimó en xineru. Amás d’ello, la campaña adopta una modalidá especial nos conceyos de Cangas del Narcea y Tinéu, pa los que s’editaron 1.200 cartelos colos rótulos “Rebaxas”, “Segundas” y “Últimas” acordies cola variante llingüística usada nellos.

Unidá Nacionalista Asturiana (UNA) llama a la participación na manifestación que’l próximu sábadu a les 12:30 sal de la Pista de la exposición en Les Meanes (Aviles) contra la crisis económica y los sos efectos y en particular énte l’aumento del desemplegu.

UNA considera que ye necesario amosar al gobiernu asturiano del PSOE-IU’l descontento de les y los trabayadores, que tán sufriendo en primer persona l’espectacular aumento del desemplego, y la desixencia de que se tomen les midíes necesaries para torgar los sos efectos, defender los puestos de trabayu y garantizar la proteición de los sectores más afectaos áa que la crisis global del capitalismu, que llega cuando Asturies inda nun saliera de la crisis anterior, tien nel nuesu país unes característiques específique, que se sienten especialmente na comarca d’Avilés.

Xuristes pol Asturianu apoyó esti martes la midida anunciada pol Ayuntamientu de Cangas del Narcea de valorar la conocencia de la llingua asturiana nes oposiciones municipales dexando nidio que ye “llegal dafechu”, anque l’asturianu nun seya oficial.

Xuristes fizo alcordanza de que l’artículu cuartu de la Llei de Promoción y Usu del Asturianu diz nún de los sos puntos que “el Principáu d’Asturies va propiciar el conocimientu del bable/asturianu por tolos emplegaos públicos que desarrollen el so llabor n’Asturies; el conocimientu del bable/asturianu va poder ser valoráu nes oposiciones y concursos convocaos pol Principáu d’Asturies, cuando les característiques del puestu de trabayu y la naturaleza de les funciones que vayan a desarrollase lo requieran”. Pal presidente de l’asociación, Xurde Blanco, si’l Principáu pue facer la valoración nuna oposición, nun hai por qué quita-y de facelo a un Ayuntamientu, que vien obligáu pola mesma llei.