Sociedá

Un grupu de persones esmolecíes pola conservación de la cultura y la llingua en Caboalles d’Abaxo ta acabante crear l’asociación Club Xeitu, col envís de “recuperar y difundir los valores del Valle de L.laciana en particular y del monte occidental astur-lleonés en xeneral, asina como la proteición y revalorización de la so hestoria y patrimoniu”. Pa ello, van organizar nos próximos meses estremaes actividaes, “esistiendo la idea d’espublizar delles obres y documentos de relevancia”.

La presidencia honorífica de la mesma recairá en María Luisa Jorissen, mientres que’l vicepresidente sedrá Manuel Gancedo, correspondiendo’l cargu de secretariu a Víctor del Reguero y el de vocal a Juan Carlos Gómez-Barthe.

Ente los oxetivos más inmediatos del “Club Xeitu” tará la edición d’un boletín añal, baxo la cabecera de “Xeitu”, nel cual sedrán asoleyaos trabayos d’investigación y artículos venceyaos cola zona. El boletín saldrá’l branu próximu y sedrá distribuyíu principalmente ente los socios del club, si bien una parte de los exemplares sedrán puestos a la venta.

Otra de les actividaes previstes a curtiu plazu sedrá la organización del Concursu Lliterario en Pal.luezu (variedá suroccidental del asturianu) “Guzmán Álvarez”, n’homenaxe al recordáu filólogu babianu fináu va cuatro años. Nesti certame, del que sedrán presentaes les bases el mes d’abril próximu coincidiendo cola celebración de la Feria del Llibru en Vil.lablinu, estableceránse dos premios, ún pa la modalidá de poesía y otru en prosa. El xuráu d’esti certame tará presidíu por Roberto González-Quevedo, secretariu de l’Academia de la Llingua Asturiana.

L’Audiencia Nacional condergó ayeri a Fer G.R. a diez meses de cárcele, frente a los ocho pidíos pol fiscal, por un delitu d’estragos, al considerar probao que’l 13 de setiembre de 2005 intentó colocar un artefautu incendiariu cerca de la sede del PSOE en L’Infiestu. El tribunal desestima considerar al activista como terrorista al nun cuntar con utilizó “medios de gran poder destructivo capaces de causar destrucción de determinadas instalaciones” nin causó “un pelligru patente pa la vida o seguridá de les persones”, requisitos que recueye’l Códigu Penal pa ello.

La Xunta Moza convoca dos clases d’asturianu na cai dientro la campaña que ta llevando alantre contra la propuesta d’esclusión de la llingua asturiana de los futuros planes d’estudiu de maxisteriu, que van desendolcas’l martes 3 y el xueves 5 de marzu a las 11:30 de la mañana delantre la Escuela Maxisteriu,na cai Aniceto Sela d’Uviéu. La Llei 1/98 d’Usu y Promoción del Asturianu recueye: “La Universidá d’Uviéu tien de garantizar la capacitación del profesoráu pal enseñu del asturianu y el gallegu-asturianu na enseñanza reglada”. Más de 20.000 escolinos y escolines escueyen cada añu voluntariamente estudiar l’asignatura de Llingua Asturiana. Si la Escuela de Maxisteriu elimina los estudios d’asturianu ¿Ónde van poder formase los futuros mayestros y mayestres?. Estudiar asturianu ye un derechu irrenunciable. La Xunta Moza llama a la movilización pola so defensa: a la participación nes dos clases na cai que van facese el martes 3 y el xueves 5 de marzu, a les 10:30 delantre la Escuela de Maxisteriu, y na manifestación que convoca la Xunta pola Defensa de la Llingua Asturiana el sábadu 7 a les 17:00 na Estación del Norte d’Uviéu.

Antonio Pino salió reelixíu esti vienres como secretariu xeneral de Comisiones Obreres d’Asturies (CC.OO Asturies) nel X Congresu de CC.OO Asturies por una amplia mayoría del 71,14 por cientu, con un total de 212 votos a favor, 84 en blancu y ún votu nulu. D’esti X Congresu de CC.OO Asturies salió tamién la nueva Executiva del sindicatu compuesta por 34 delegaos más el secretariu xeneral colos votos de 298 delegaos, de los que 23 fueron en blancu.

Les candidatures alternatives a la de Pino algamaron cinco delegaos caúna, al axuntar ente dambes 79 votos. La llista d’Antonio Pino foi sofitada por 196 votos y algamó 24 delegaos.

La Tertulia Pachín de Melás, afalada pola formación UNA en Xixón, organiza esti xueves 26 de Febreru na Cervecería Astuera de Xixón (asitiada detrás del Centru Comercial San Agustín), una mesa redonda alredor de la Normalización Llingüística.

L’actu, que va celebrase a partir de les ocho la tarde, va cuntar cola presencia de Ramón d’Andrés Díaz, ex responsable de la Oficina de Política Llingüística del Gobiernu d’Asturies; David Guardado Diez, autor del llibru “Llingua estándar y Normalización Llingüística” y Mónica Rodríguez Riesgo, responsable del Serviciu de Normalización L.lingüística de Cangas del Narcea.

La Pita volvió esti martes tres los pasos del presidente Areces y acompañólu durante l’actu d’inauguración del Centru d’Empreses n’Asturies de “La Caixa”.

El conocíu “Yá Yá Yá, Oficialidá” que coreaben los militantes de la Xunta qu’acompañaben a La Pita foi la banda sonora qu’acompañó ayeri de tarde la entrada del presidente Areces a un actu d’inauguración n’Uviéu.

Volvía repetise la imaxe d’una nueva acción de La Pita, con carteles nos que podía lleese “Esti gobiernu marxina y reprime la llingua asturiana”, denunciando la nefasta política llingüística que la llevando alantre esti gobiernu y recordando la neglixencia de quienes tán señalaos por organismos internacionales como la UNESCO o’l Conseyu d’Europa pola so responsabilidá ente’l peligru claru de desapaición del nuesu patrimoniu llingüísticu.

L’Aconceyamientu de Xuristes pol Asturianu, pente medies de dos notes de prensa asoleyaes los díes 12 y 13 d’avientu de 2008, fizo pública reconocencia al Conseyu d’Europa, tanto pola Resolución del so Comité de Ministros, de data 10 d’avientu de 2008, sobro l’aplicación de la Carta Europea de les Llingües Rexonales o Minoritaries n’España, como pol informe del Comité d’Espertos, de 8 d’abril de 2008, que-y dio sofitu.

Sicasí, l’Aconceyamientu de Xuristes pol Asturianu quier encamentar al Comité d’Espertos qu’afonde na llectura del Instrumentu de ratificación por España de la Carta Europea de les Llingües Rexonales o Minoritaries en visu de revisar la so encomencipiada resolución de nun incluyir a la llingua asturiana nel analís de l’aplicación de la parte III de la Carta, determín qu’aplicó nel so primer informe de 8 d’abril de 2005 (parágrafos 60 y 61) y repite nesti segundu de 8 d’abril de 2008 (parágrfos 2, 10, 11 y 78), en perxuiciu d’una llingua, propia y tradicional de la Comunidá Autónoma d’Asturies y falada en delles fasteres de les de Cantabria, Castiella y Lleón y Estremadura, arriendes de nel vecín estáu de Portugal onde, pal distritu de Miranda del Dueru, gocia del porgüeyu de la cooficialidá.

Col envís de collaborar nesa xera, l’Aconceyamientu de Xuristes pol Asturianu iguó un estudiu pal que pidió audiencia. Asturnews ufre’l documentu completu.

Quintu Informe del AXA

La ciudá de Xixón entama esti vienres les fiestes d’Antroxu 2009, col pregóny el tradicional “mazcarando a Pelayo”. La fin de selmana va dedicase a los concursos de disfraces y charangues.

El llunes, Jeronimo Granda va cantar les sos tradiconales “Coples d’Antroxu” y va celebrase’l Desfile d’Antroxu, terminando la nueche con una verbena amenizada pola orquesta Assia, na Plaza Mayor.

El martes van facese los actos dedicaos a la muerte y entierru la sardina, que cada añu piesllen les actividaes d’Antroxu n’El Muelle de Xixón.

Asturnews ufre’l programa completu del Antroxu xixonés.

Programa completu de les fiestes d’Antroxu

El Cao sal a la cai a recoyer semeyes de la campaña “Doi la Cara” enseñando les más de 8.500 que yá consiguio, amás de los vidios de personalidaes asturianes que piden la Oficialidá nel Estatutu d’Autonomía p’Asturies.

El vidiu de Victor Manuel, el de Corín Teyado, más los de Hevia, Chechu Rubiera, Carmen Gómez Ojea, ente otros, amás de les semeyes del mundu del deporte asturianu , la de Quini, les de Santi Cazorla, David Villa, Samuel Sánchez, Carlos Pérez , Javi Villa, Juan Mata , Pablo Álvarez , Santi Pérez , Manuel Enrique Mejuto, Benjamín Noval, Adrián López , Esteban Suárez, Carlos Barredo , Alberto Hevia , César Martín, Javi Hernanz y Manuel Busto , toos ellos que va tiempu decidieron respaldar la idea del Conceyu Abiertu pola Oficialidá, van poder vese na Plaza l’Ayuntamientu d’Uviéu nuna pantalla instalada pol CAO esti domingu día 22 a les 12:00 como reclamu a la ciudadanía pa que se retrate col cartel de la campaña.

Esta iniciativa respuende al proyectu del CAO de dir pelos conceyos asturianos llevando al pie de cai la reivindicación de los derechos llingüísticos pa los asturianos y tien l’oxetivu de consiguir miles de semeyes que sumar a les más d’ocho mil quinientes que yá se puen ver espuestes nel web ofical de la campaña doilacara.net.

Páxina web de la campaña Doi la Cara pola Oficialidá

Una llectura de testos, una esposición y un xuegu musical componen el programa de celebración del Día del Idioma Maternu en Xixón, entamáu pol Conceyu de Xixón, en collaboración col colexu públicu Rei Pelayo.

La Oficina Municipal de la Llingua del Ayuntamientu organiza nesti centru educativu un actu qu’inclúi la llectura d’un testu en distintes llingües, la presentación de la esposición del llibru ‘Les coses que-y presten a Fran’, de Berta Piñán, y el xuegu musical “Cómo nos canta la llingua”.

L’actu va entamrar nel colexu a les 10:45 de la mañana cola participación de l’asesora de la Conceyalía de Cooperación Internacional, Cultura Asturiana y Política Llingüística, Carmen Rúa Morán , la Responsable de la Oficina Municipal de la Llingua, Mª Xosé Rodríguez López, y la direición del C.P. Los Campos.