Sociedá

Mañana xueves, día 12 de payares, a les 8 la tarde, na Escuela d`Hostelería (asitiada nel Paséu de Begoña, 30), en Xixón, va presentase’l llibru “Dende a llareira con señardá. Cocina de Bual y del occidente asturianu”, del que ye autora María Teresa López García, escritora d`otres obres sobre esi conceyu, como’l so “Vocabulariu de Bual y algúa cousa más”.

La presentación va facela José Antonio Fidalgo Sánchez, profesor y escritor, entregándose-yos a los asistentes un exemplar del llibru.

El xuráu del premiu “Asturies” d’ensayu, conocáu pola Editorial Espublizastur, aconceyó estos díes presidíu por David Rivas Infante y compuestu por Xose A. Armayor, Fonsu Fernández Álvares y Mª Carme Marqués, otorgándo-y el primer premiu a la obra “Turismu ya identidá Nacional”, qu’una vuelta abiertes les pliques resultó ser obra de Bruno Gómez Jiménez.

Bruno Gómez Jiménez, (Xixón 1982) ye Teúnicu superior n’animación d’Actividaes fisico-deportives y estudiante de Turismu na Escuela Universitaria de Turismu d’Asturies. Gómez trabaya como Xefe d’animación del resort turísticu, Las Dunas Camping & Bungalow de Sant Pere Pescador, Girona, Catalunya y ye Xefe d’animación y Tour Leader de la mayorista de viaxes Travelkids del grupu Bestours, Barcelona, Catalunya.

Asina mesmo, el xuráu aprobó unitariamente encamentar la espublización del ensayu “Les Asturies nel nacionalismu vascu”, del que ye autor Xaviel Vilareyo y Villamil. Nel mesmu sen, tanto’l xuráu comu la editorial convocante d’esti I Premiu d’Ensayu “Asturies” felicita a tolos participantes (9 ensayos en total), pol bon nivel de los trabayos presentaos. En viendo’l perbón resultáu d’esta primer convocatoria, Espublizastur, anuncia la so intención d’aumentar en 1.000 euros la dotación económica del premiu (nesta primer convocatoria foi de 1.500 €).

L’Academia de la Llingua Asturiana abre’l plazu pa presentase a la primer convocatoria de 2010 pa esta prueba cola que s’algama la certificación de conocencia básica de llingua asturiana. La convocatoria va tener llugar el 30 de xineru n’Uviéu y la matrícula pue facese del día 18 al 28 de xineru.

Les estayes de les que s’esamina son: -La estaya llingúistica, na que se verán la gramática y el dominio oral y escritu y -La estaya de llingua y sociedá na se verá la conocencia del allugamientu de la llingua dientro la sociedá. La prueba inclúi parte escrita y prueba oral.

P’apuntase hai que llamar a l’ALLA, al teléfonu 985 211 837.

Conteníos completos del esame

La Conseyería de Cultura organiza mañana martes, na Facultá de Bioloxía de la Universidá d’Uviéu, el segundu Día de les Ciencies Asturianes. Los actos van entamar a les doce la mañana cola presentación del llibru “Homo Sapiens: la epopeya d’un llinaxe”, cola que Xosé María Fernández ganó en 2008’l premiu d’ensayu Fuertes Acevedo. Xunto al autor, que ye miembru del Institutu Européu de Bioinformática, va tar Xosé Ánxelu Gutiérrez Morán, del Institutu Español d’Oceanografía.

La segunda de les actividaes va celebrase media hora más tarde. Xosé María Fernández va dar llectura a la conferencia titulada “¿Ónde tamos dempués de venti años col xenoma humano?”, de la mano de Xosé Antón Suárez Puente, del Departamentu de Bioquímica y Bioloxía Molecular de la Universidá d’Uviéu.

Los dos actos d’esta xornada van celebrase nel Salón de Graos de la Facultá de Bioloxía de la Universidá d’Uviéu, asitiada nel Campus d’El Cristo.

L’Academia de la Llingua Asturiana espublizó un númberu más del so boletín oficial, Lletres Asturianes, que llega yá al númberu 101. Ente los trabayos espublizaos “El proceso de castellanización al sur de la Cordillera Cantábrica en el siglo XVII”, de José R. Morala Rodríguez; “Notes sobre l’asturiano-leonés medieval na ciudá de Lleón nel primer terciu del sieglu XIV”, d’Héctor García Gil; “Metereoloxía popular n’El Cabu Peñes”, de Rubén Fernández Martínez; y “Cartes de Fermín Canella a Víctor Balaguer”, estudiaes por Pilar Fidalgo Pravia.

En “Notes y anuncies” apaecen n’esta ocasión los discursos de José Angel Hevia y Ana Cano González nel XXX Día de les Lletres Asturianes, reseña de tolos llibros espublizaos pola Academia de la Llingua Asturiana nos meses útimos, convocatories de concursos y delles noticies alredor del asturianu.

Les Xornaes Internacionales d’Estudiu remataron esti xueves la so edición XVIII con un tarde enllena de conferencies y ponencies alredor de cuestiones como’l neutru materia o la medicina popular. Michele Loporcaro, de la Universidá de Zürich, foi l’encargáu d’abrir la última tarde de les Xornaes con una conferencia sobre l’orixe del neutru asturianu, que dalgunos filólogos tienen teorizao sobre’l so orixe nel sur de la península itálica “onde tamién se da esti fenómenu”.

Loporcano punxo esta teoría en cuestión llegando a plantegar la posibilidá de que’l neutru de materia fuera anterior n’Asturies. Pal profesor ta clara “la continuidá dende’l llatín d’esti fenómenu” anque ente los asistentes, y nel alderique posterior, costó atopar respuesta a por qué “siendo la variente occidental del asturianu más arcaica, más conservadora de fenómenos del llatín, nun se da esti fenómenu n’ella”. Comentó tamién l’autor que’l neutru de materia “dase tamién en llingües como’l rusu o l’islandés”.

Montse Machicado Compañy foi la siguiente en falar, nesti casu de la “Llingua asturiana nel Llibru d’acuerdos del Conceyu d’Abillés (1479-1492)”, qu’atopó nel archivu d’esti conceyu y que namás estudiare, dende’l puntu de vista hestóricu, Covadonga Valdés. Machicado atopa nel testu, que “ta claro, ye n’asturianu con castellanismos”, una montonera de nicios d’ello.

Fenómenos como l’anteposición del artículu colos posesivos (la su corte, los sus reinos…); el xéneru de dellos términos (la ponte, el sal, la canal…); la disposición de los pronomes (mandáronla, condennáronlos…); el léxicu (conceyo, ferreru, xastre, pesquín, gordoneru, una figar, forneru, puya, d’abaxo, d’enriba…); l’usu del neutru (e non otro vino salvo d’aquello…) y la topónimia (Viesques, Coruxedo, La Ponte, Llaranes…) y otros munchos, confirmen pa l’autora l’asturianidá d’esti testu.

Cristina García-Sampedro Clérigo, hestoriadora, comentó dellos aspectos importantes que-y faen considerar l’orixe romanu o anterior d’Uviéu “Los últimos afayos, como una fonte monumental del sieglu III, confirmen qu’esistía un poblamientu importante na zona”. Pero l’autora albidra perimportante considerar otres cuestiones, como la toponimia “que mos pue dar nicios mui importantes del pasáu d’una zona”, anque recordó “la castellanización de los mesmos pon torgues pa estudiar el so orixe”.

La tarde siguió con una comunicación de Francisco Fernández-Guisasola y Joaquín Fernández García sobre les “Claves etnollingüístiques pa entender la melecina popular asturiana”, onde esplicaron “nun pretendemos facer un diccionariu médicu al usu, sinón estudiar les cuestiones llingüístiques del vocabulariu popular de la medicina”.

Los autores recordaron dellos falsos amigos ente’l castellán y l’asturianu, nesti campu, como “cuello”, qu’ha corresponder a “pescuezu” n’asturianu, y non a “cuellu”, qu’en castellán vien a ser el “regazo”. Ente les cuestiones comentaes polos autores, delles espresiones de l’Asturies tradicional “onde tar sanu yera tar gordu y meyorar, engordar” y onde “el mexu d’un neñu curábalo too”.

Rodrigo Fernández Alonso y José Martínez González dieron llectura darréu a la divertida conferencia “Paremioloxía asturiana del nacimientu, vida, pasión, muerte y resurrección del guchu”, onde fueron descubriendo a los presentes dellos refranes con respectu al gochu “que ye cuasi sagráu, pues resucita y dura unu o dos años… en forma d’embutíos, quitando muncha fame”. Ente les espresiones comentaes, más de 150 nel trabayu, tuvieron “cada gochín tien el so Samartín” o “los de Cabueñes comen cachos de carne como madreñes”.

Nicolás Bartolomé Pérez faló de l’asturianu al otru llau del cordal, con “La regulación xurídica de la nuesa llingua en Castiella y Lleón”, la so intervención recuéyela esti diariu n’otru artículu específicu.

Les Xornaes Internaciones pesllóles Ángel Iglesias Ovejero, de la Universidá d’Orléans falando alredor de la situación actual d’una fala del sur de Salamanca, xunto a Estremadura, “El Rebollar”, que comentó, “ta en clara recesión”.

Les Xornaes Internacionales d’Estudu lleguen al so fin güei xueves. La tarde va entamar cola ponencian de Michele Loporcaro, de la Universidá de Zürich, “Sobre el origen del neutro asturiano: evidencia comparativa”. A les 17:15 Montse Machicado Compañy va falar de la “Llingua asturiana nel Llibru d’acuerdos del Conceyu d’Avilés (1479-1492)”, siguiendo darréu a les 17:30, la comunicación de Cristina García-Sampedro Clérigo, “Contribución de la toponimia al debate sobre el origen romano de Uviéu”, siguida d’un alderique y descansu.

Les últimes conferencies de les Xornaes Internacionales van entamar a les 18:15 cola comunicación de Francisco Fernández-Guisasola y Joaquín Fernández García sobre les “Claves etnollingüístiques pa entender la melecina popular asturiana”. Más tarde Rodrigo Fernández Alonso y José Martínez González van lleer la conferencia “Paremioloxía asturiana del nacimientu, vida, pasión, muerte y resurrección del guchu”.

A les 18:45 Nicolás Bartolomé Pérez va falar de l’asturianu al otru llau del cordal, con “La regulación xurídica de la nuesa llingua en Castiella y Lleón”, a la que va siguir un alderique. Ángel Iglesias Ovejero, de la Universidá d’Orléans va falar alredor de la “Situación actual del habla de El Rebollar, analogías y contrastes con las hablas extremeñas”, celebrándo a les ocho, el pieslle de les Xornaes, que van volver l’añu que vien dedicaes al profesor García Arias.

La segunda parte de les XVIII Xornaes Internacionales d’Estudiu entamó ayeri miércoles afondando otra vegada en cuestiones de la filoloxía asturlleonesa de la mano, nesta ocasión, del profesor Vicente J. Marcet, de la Universidá de Xaén. Na so intervención Marcet amosó les representaciones estremaes, y por tanto posibles usos reales, de les silabantes, ente los sieglos XI y XIII. “Hai cuestiones que nun encaxen col llatín, y cuando pasa esto nes llingües romance de la península, échase la culpa al vascu ”, comentó .

Darréu tuvieron llugar les conferencies de Ramos Corrada y Xuan Santori, pa les qu’esti diariu dedica dos artículos dixebraos.

Vicente García Oliva fizo na so intervención nes Xornaes una propuesta de temporización pa una Hestoria de la Lliteratura Infantil y Xuvenil, que trenta años dempués del so ñacimientu “cree necesario”. Pa García Oliva, “pese a dellos exemplos anteriores, Montesín, de Canellada, ye l’entamu de la LLIX, en 1980”.

Sicasí, pal autor ha tenese en cuenta, como precedente, ha estudiase la lliteratura oral, un fechu nel qu’insistió Ana Cano nun intervención posterior “tola lliteratura infantil a la que tuvi accesu na mio infancia foi la oral, como muncha xente de la mio xeneración, ye un patrimoniu mui importante”.

Pa García Oliva, la lliteratura infantil y xuvenil dixébrase en trés etapes, la que noma “didautismu”, nos años ochenta, onde se busquen ferramientes pal enseñu del asturianu, traduccionismu”, cuando más obres se tornen d’otres llingües, “mitoloxismu”, onde diz Oliva “garramos una fartura de xanes y cuélebres”; y l’esporpolle, “onde los xéneros se diversifiquen, esisten meyores ilustradores y más llibertá temática”. Amás, García Oliva destacó la creación de premios, la Biblioteca María Josefa Canellada y otres iniciatives interesantes pa la lliteratura pa neños y rapazos.

La tarde siguió ayeri cola comunicación de Paula Pulgar sobre la obra de Xosé Álvarez “Pin”, autor del occidente yá muertu que siempres “tuvo esmolecíu pol caltenimientu de la variante occidental”, llegando a pidir poco enantes de morrer a dellos escritores del desapaecíu colectivu d’esta fastera “Pesicia” que volvieran a la variante occidental. Pulgar destacó la so importante obra lliteraria, “anque a vegaes caí nel adoctrinamientu, ye una obra fía del so tiempu” y pidió al Conceyu de Miranda, d’onde yera l’autor, “que lu homenaxee como merez”.

Por problemes personales Aurelio González Ovies nun pudo acudir a les Xornaes como taba previsto, polo que Marta Mori echó’l pieslle a la xornada con un repás pela obra “La cama”, d’Ana Vanessa Gutiérrez.

Asturnews ufre un importante material audiovisual de toles conferencies de la Xornada.

Les Xornaes Internacionales d’Estudiu, qu’organiza dende va cuasi trés décades l’Academia de la Llingua Asturiana, entamaron güei na Facultá de Filoloxía d’Uviéu y cola presencia de la presidente de la institución, Ana Cano, y el Decanu de Filoloxía Enrique del Teso García, que comentó que na Universidá “tán dándose paso alantre pa col asturianu, pero siempres insuficientes”. El Decanu reconoció, eso sí, la importancia de que “per primer vegada l’asturianu va tar nel enseñu regláu”.

Ana Cano comentó na so intervención l’esfuerciu importante de l’ALLA pa la organización d’estes Xornaes. “Ye perdifícil consiguir especialistes y muncho más llograr un públicu importante”. Amás recordó que les Xornaes del añu viniente van tar dedicaes al profesor Xosé Lluis García Arias, que fuera primer presidente de la institución.

Darréu entamaron los conteníos académicos de la xornada, con una ponencia de Fernando Sánchez Miret sobre la diptongación asturiana ante yod y wau, na que comparó esti fenómenu colos qu’apaecen n’otres llingües romániques. La conferencia xeneró un interesante alderique nel que dieron les sos teoríes Ana Cano y Xosé Lluis García Arias.

La marcación preposicional del oxetu directu n’asturianu fo’l tema escoyíu por Clara E. Prieto Entrialgo, ufriendo dellos datos medievales nuna comunicación áxil y bien espuesta, a la que siguió la de Fernando Quintas González y Xabiel Fernández García sobre “Toponimia y territoriu. Antrotoponimia y haxotoponimia como fontes d’estudiu de la estructura feudal del espaciu nel noroeste peninsular”, onde comentaron delles idees alredor de la importancia de la relixón y el poder nel ordenamientu del territoriu asturianu.

Carlos Rubiera Tuya fizo delles consideraciones alredor del asturianu y castellán remanáu nun inventariu de bienes d’una casa d’aldea del añu 1906, la de so, cola llectura d’un documentu salváu del incendiu del so llar familiar.

El léxicu del aire centró la conferencia de Rubén Fernández Martínez, recordando términos en recesión como l’aire “Xelón” y otros más afitaos como’l “Nordés”, nes estremaes fasteres del país. La filóloga inglesa y escritor Laura Marcos Domínguez siguió coles xoranes cola so comunicación “Cómo facer té n’asturianu: dificultaes léxiques, morfosintáctiques y culturales na traducción inglés-asturianu”. Asturnews ufre un artículu específicu sobre la mesma.

Pesllaron la xornada Xosé Martínez González y Xuan Xosé Llastra Menéndez con dellos aspectos de los “Nomes asturianos de dalgunes plantes de güerta”, y l’ex presidente de l’ALLA, Xosé Lluis García Arias, cola comunicación “Continuadores del llat. -ULUS” y un alderique alredor del tema.

Asturnews va caltener un siguimientu completu de les dos xornaes que queden d’esti importante acontecimientu cultural que llega cada añu a Uviéu con dalgunos de lo espertos más reconocíos del mundu de les humanidaes.

“Foca de Dios, tu que quites el pecáu del mundu ten piedá de nós”

Güei, martes 4 de payares l’Academia va inaugurar na Facultá de Filoloxía d’Uviéu la edición XVIII de les sos Xornaes Internacionales d’Estudiu. Les xornaes van entamar a les 16:45 cola ponencia de Fernando Sánchez Miret “La hipótesis de la diptongación asturiana ante yod y wau a la luz de la Romanística” pa sentir darréu a Clara E. Prieto Entrialgo col so estudiu “Reflexones sobre la marcación preposicional del OD n’asturianu. Dellos datos medievales”.

A les 17:45, Xabiel Fernández García y Fernando Quintas González van falar, na so comunicación, de “Toponimia y territoriu. Antrotoponimia y haxotoponimia como fontes d’estudiu de la estructura feudal del espaciu nel noroeste peninsular”, darréu va celebrase un alderique y va dase descansu a los asistentes.

A les 18:30 l’escritor, cantautor y académicu Carlos Rubiera Tuya va lleer la so ponencia “Asturianu y castellanu nun inventariu de bienes d’una casa d’aldea del añu 1906”, siguiéndo-y Rubén Fernández Martínez con “L’aire n’Asturies: un averamientu a la cultura del aire al traviés del léxicu”.

La filóloga inglesa y escritor Laura Marcos Domínguez va abrir a les siete l’alderique cola so comunicación “Cómo facer té n’asturianu: dificultaes léxiques, morfosintáctiques y culturales na traducción inglés-asturianu”.

A les 19:30 Xosé Martínez González y Xuan Xosé Llastra Menéndez van comenta dellos aspectos de los “Nomes asturianos de dalgunes plantes de güerta”, pesllando la xornada l’ex presidente de l’ALLA, Xosé Lluis García Arias, cola comunicación “Continuadores del llat. -ULUS” y un alderique alredor del tema.

Asturnews va facer un siguimientu completu de les trés xornaes d’esti importante acontecimientu académicu que llega yá a la so edición ventiocho.