Sociedá

Esti prósimu vienres, 14 de mayu, a les 19:30 hores, n’El Parche (Pza. l’Ayuntamientu) d’Avilés, va tener llugar una concentración escontra la Reforma Llaboral qu’anguañu ta apautando’l Gobiernu cola patronal y los sindicatos CCOO y UXT.

Esta concentración ta convocada pola Corriente Sindical d’Izquierda, Partido Comunista de Asturies-Corvera, Unión Proletaria, Andecha Astur, Partido Comunista de los Pueblos de España, Unidá Nacionalista Asturiana, Fai!, Colectivos de Jóvenes Comunistas, UNA-Mocedá, Darréu.

Según se diz na convocatoria, “na comarca d’Avilés vamos camín de los 15.000 paraos y paraes. Asturies ta averándose a los 100.000 paraos y paraes. El 40% la mocedá ta en paru. La mayor parte la población trabayadora cobra sueldos miserables. Siguen despidiéndonos cuandu-yos da la gana. Tan embargándonos les viviendes. Pero regalen miles de millones d’euros a los bancos y los grandes empresarios. Delantre esta situación, ufiértennos esta receta máxica: reformar y amenorgar les pensiones, xubir la edá xubilación a los 67 años, aumentar el númberu d’años cotizaos pal cálculu les pensiones, abaratar el despidu, facer más precariu (¡¡entá más!!) el mercáu de trabajo y les condiciones llaborales… Ye dicir: trabayar más, cobrar menos y despedinos cuandu quieran.

Trátase de la mesma receta que yá aplicaren en Grecia y toos y toes tamos viendo los resultaos. Anguañu, Grecia ta careciendo los ataques del capitalismu que, probatiblemente, vamos carecer nós dientru de pocu tiempu. Rescampla que toles movilizaciones entamaes nesi país remanecen de la xunidá de los y les trabayadores nun frente común. Grecia ta amosando que lúnicu camín pa frenar esta situación ye la llucha, la llucha continuo y xunitario. Les barricaes, el fuéu y tolos actos de movilización que tan dándose nel territoriu griegu son la imaxe de la llucha obrera. Son les armes que tenemos pa defendenos de les agresiones del capitalismu y son los símbolos de la llucha obrera n’Asturies.

Pero Grecia nun ta pidiendo solidaridá. El Pueblu Griegu nun quier que n’Asturies se faigan manifestaciones solidarias. El Pueblu Griegu ta pidiendo qu’Asturies y tolos pueblos d’Europa se llevanten escontra’l capitalismu y el so sistema d’inxusticia socia

El diariu Asturnews ufre a los sos llectores más d’un cientu de semeyes de la manifestación pola oficialidá del vienres pasáu, qu’axuntó a miles de persones nes cais d’Uviéu.

Galería d’imáxenes de la Manifestación

Asturnews ufre a los sos llectores delles imáxenes de la Xunta Estraordinaria de l’ALLA, celebra esti vienres nel Teatru Campoamor d’Uviéu, y de la espicha de darréu, que se fizo nel Tierra Astur de Cualloto cuntando con animación musical.

Galería de semeyes del actu

La manifestación pola oficialidá d’esti vienres foi una de les más esitoses de los años últimos. Miles de persones percorrieron les cais pidiendo la reconocencia del estatus d’oficialidá pal asturianu. Ente los grupos presentes, amás de los convocantes Xunta pola Defensa de la Llingua Asturiana y Xunta Moza, formaciones polítiques como Izquierda Xunida-BpA, Partíu Asturianista, Unidá Nacionalista Asturiana, Andecha Astur o PCPE, estayes sindicales de SUATEA, UXE y CC.OO; y colectivos culturales y cívicos como Trafego, que reclamó la oficialidá del gallego-asturianu, o Fai!, ente otros.

Ente los representantes políticos más destacaos, el diputáu d’Izquierda Xunida-BpA, Roberto Colunga, l’ex diputáu y presidente del PAS, Xuan Xosé Sánchez Vicente, Faustino Zapico d’UNA, Mariu Arbesú d’Andecha Astur, y dellos miembros del Gobiernu d’Asturies, como ‘l Director de Cooperación Internacional, Rafael Palacios.

Asturnews va ufrir a lo llargo d’esta fin de selmana más información y más d’un cientu d’imáxenes de la xornada reivindicativa del Día de les Lletres Asturianes.

Ente les novedaes más importantes presentaes nel discursu de la presidenta de l’Academia de la Llingua Asturiana, esti vienres, tuvo l’anuncia de la fundación d’una Universidá Asturiana de Branu, que se funda en collaboración cola Universidá d’Uviéu y el Conceyu de Cangas del Narcea, y que va incluyir los tradicionales Cursos de Branu y otres actividaes.

Ente los cursos nuevos, qu’entamen esti añu Internet y asturianu: aplicaciones socio-educatives, d’averamientu a la llocución periodística en llingua asturiana, Cantares, bailles ya instrumentos musicales asturianos, La lliteratura asturiana nel aula d’Educación Primaria, d’aniciu a la investigación dialeutal, toponímica y de tradición oral y un Cursu d’entamu a la investigación hestórica de la lingua asturiana.

Amás Ana Cano reflexonó sobre les cuestiones que marcaron l’actualidá de la llingua asturiana a lo llargo d’esti añu, recordando que “tamos a un añu de les elecciones, y cuido que ye’l momentu de ver qué queremos pa la cultura d’esti país”. Pidió tamién “xenerosidá y altor de mires” a los partíos políticos pa solucionar el problema del estatus llegal del asturianu.

Asturnews ufre la intervención completa en vidiu:

Primer parte

Segunda parte

Güei, vienres 7 de mayu, va celebrase’l XXXI Día de les Lletres Asturianes, con una manifestación pola reconocencia del estatus d’oficialidá pa la llingua asturiana. La convocatoria faila la Xunta pola Defensa de la Llingua Asturiana y yá confirmaron la so presencia Partíu Asturianista, UNA y Andecha Astur, ente otres formaciones.

La manifestación va entamar a les 19:30 hores na Estación del Norte, d’Uviéu, y va siguir pela cai Uría hasta les puertes del Campoamor, onde va dase llectura al discursu añal de la XPDLLA.

L’Academia de la Llingua Asturiana celebra darréu, a partir de les ocho y media la tarde, la so Xunta Añal Estraordinaria, onde van nomar un nuevu miembru, el xurista ya investigador lleonés Nicolás Bartolomé Pérez, al qu’Asturnews entrevista güei. Amás, nel entamu, va cantar el Che de Cabaños y va tocar la gaita Rodrigo Joglar, miembru del grupu folk Verdasca..

L’actu va siguir col discursu institucional de la presidenta Ana María Cano González, una esbilla de testos del númberu últimu de Lletres Lliterariu, y un conciertín d’Alfredo González.

La Diputación de Guipúzcoa va patrocinar con 1,2 millones d’euros a la Real Sociedá la próxima temporada. A cambiu, el club de fútbol donostiarra comprometióse a fomentar l’usu del euskera. La cantidá que recibe l’equipu vascu, que ta en segunda división, supón una cantidá mui superior al total de les ayudes convocaes pa la llingua asturiana (asociaciones, empreses y editoriales), que namás supón 854.000 euros na convocatoria última.

L’equipu vascu va llucir el lema de la campaña “Gipuzkoa euskararekin bat” nes sos camisetes oficiales y d’entrenamientos. Tamién va apaecer nes valles publicitaries del Estadiu d’Anoeta y de les instalaciones deportives de Zubieta, amás de nes sales de prensa. Los xugadores van comprometese a participar n’actos pa fomentar l’usu del euskera.

Güei, miércoles 5 de mayu a les 19:30h. nel paséu de los Álamos (Uviéu), la Ruta contra’l Racismu organiza una concentración que pretende denunciar “les recién agresiones policiales a persones inmigrante”.

Los actos de la XXXI Selmana de les Lletres Asturianes siguen güei, miércoles, col homenaxe del Conceyu de Mieres al escritor Xosé Antonio García. A partir de les 12 hores, la corporación del Ayuntamientu va facer na Casa Cultura una declaración institucional y va producise’l descubrimientu d’una placa dedicada a Xosé Antonio García.

Pela tarde, a les 20 hores, l’Auditoriu de la Casa Cultura va ser l’espaciu escoyíu pal actu d’homenaxe de los ganadores del Premiu “Teodoro Cuesta” a Xosé Antonio García, nel XX aniversariu del premiu. Va cuntase entós cola actuación de los hermanos Valle Roso.

Mañana, xueves 6, a la una la tarde, vuelve a la Xunta Xeneral del Principáu d’Asturies, n’Uviéu, la yá tradicional llectura pública institucional de testos n’asturianu, per parte de diputaos, conseyeros y otres autoridaes.

Xosé Lluis Campal va falar güei, miércoles 5 de mayu, a les 19:30 hores, sobre la novela póstuma de José León Delestal, “Suso y la música”. L’actu fadráse na Casa de los Alberti, en Ciañu (Llangréu).