Sociedá

El presidente del Principáu d’Asturies, Vicente Álvarez Areces, fizo anuncia estos díes de que’l Gobiernu asturianu va entamar el próximu 5 de xunu, en Llangréu, un homenaxe al árbitru de fútbol Manuel Enrique Mejuto González. L’actu va contar cola collaboración del Conceyu de Llangréu y l’adhesión d’instituciones del deporte, como la Federación Española de Fútbol, el Conseyu Superior de Deportes y el Comité d’Árbitros.

El Gobiernu convida amás al mundu deportivu asturianu a que se sume a esti homenaxe.

La sede central del Institutu Cervantes, en Madrid, va acoyer la conferencia “Reflexiones de un ciudadano lingüista acerca del asturiano y su lugar entre las lenguas de España”, que va tar al cargu del profesor de la Universidá d’Uviéu, Ramón d’Andrés. L’actu va celebrase dientro d’un ciclu dedicáu a les llingües ibériques, el xueves 27 de mayu, a partir de les 19:30 hores.

Amás D’Andrés ta acabante espublizar nesti mediu un artículu alredor de la problemática surdía polos incumplientos de la llei sobre la toponimia de Xixón, que se dio apocayá nel casu nel qu’un ciudadanu pidió que nel so DNI figurara la forma oficial.

Artículu de Ramón d’Andrés n’AsturnewsOpinión

L’agrupación d’Unidá Nacionalista Asturiana (UNA) nel conceyu de Xixón convida a participar nuna nueva tertulia Pachín de Melás que se presenta sol títulu “Toros. Saca tarxeta encarnada al maltratador”.

Esta agrupación yá presentara énte l’Ayuntamientu de Xixón nel mes de febreru del 2008 una moción na que solicitaba que’l conceyu se declarara Antitaurín. Dicha iniciativa fue siguida por otres agrupaciones d’UNA en dellos conceyos asturianos. Precisamente’l que fuera representante municipal del partíu nacionalista nel conceyu de Carreño cuando la presentación de la propuesta, Santiago Artime, va ser ún de los participantes na Tertulia.

Artime tará acompañáu por Antonio Coviella, de l’asociación “ANADEL”, y Xicu Mata, de l’asociación Cultural y Mediuambiental “La Foz del Pielgu”.

Como novedá la tertulia cambiará’l so llugar habitual pol Bar Cantábrico, asitiáu énte los Xardinos de la Reina de Xixón. La tertulia tendrá llugar esti xueves 27 de mayu a les 20.30 hores.

El dibuxante collaborador d’ASTURNEWS, y realizador asturianu Alberto Vázquez García, va proyectar en Mieres el documental sobre’l viaxe de los antifranquistes asturianos que fueron homenaxeaos en Madrid nel mes de xunu de 2008. La estrena fízose’l pasáu mes de marzu, nel Teatru Xovellanos de Xixón.

El documental llega a Mieres mañana, martes 25, y a partir de les ocho de la tarde, de baldre y cola collaboración de l’Asociación d’Ex-Presos y Represariados Antifranquistas y l’Ayuntamientu de Mieres.

L’equipu arqueolóxicu de los Guerreros y Caballos de terracota del Mausoléu de Qinshihuang en Xi’an ye’l nuevu Premiu Príncipe d’Asturies de Ciencies Sociales, según fizo público esti día n’Uviéu’l Xuráu encargáu de la so concesión.

Consideráu ún de los descubrimientos arqueolóxicos más importantes del sieglu XX, el xacimientu ye una fonte d’información d’estraordinaria riqueza sobre la civilización china.

El Xuráu del Premiu taba presidíu por Manuel Fraga Iribarne ya integráu por Lluis Xabel Álvarez, Gonzalo Anes y Álvarez de Castrillón, marqués de Castrillón, Raúl Bocanegra Sierra, María Emilia Cases Baamonde, Leslie Crawford, José Luis García Delgado, Severino García Vigón, Manuel Jesús González, Luis González Seara, Carmen Iglesias, Manuel Menéndez Menéndez, Adolfo Menéndez Menéndez, José Manuel Oteru Novas, Alberto Pico Maeso, Rafael Puyol Antolín y Juan Vázquez García.

En total, ventidós asturianos de distintes disciplines tán lluciendo o van llucir a lo llargo de 2010 l’eslogan “Asturies Paraísu Natural” nes sos equipaciones deportives.

Estos patrocinios, que se basen nos puestos de clasificación pa los criterios de seleición, amuesen la bona salú de la que gocien, por exemplu, los rallies, el motociclismu, el montañismu o’l piragüismu asturianos. El palmarés de los nuesos deportistes fixo qu’esti añu, per primer vez, se crucie la barrera de la ventena de deportistes patrocinaos como parte de la estratexa de promoción turística del Principáu d’Asturies.

Ente los deportistes patrocionaos: Javier Villa, Toño Fernández da Silva, los motociclistes Aitor Izquierdo, Aitor Álvarez, Ovidio José Díaz Rey, Carlos Pando Medina, Rallies Asfaltu o Alberto Hevia; la montañista Rosa Fernández, o los piragüistes Francisco Llera, Jana Smidakova, Emilio Llamedo, Javier Herranz o Manuel Busto, ente otros.

La Universidá d’Uviéu acoyía la presentación de la nueva iniciativa de l’ALLA, qu’a comuña con esta institución y col Conceyu de Cangas del Narcea entama la celebración añal de la Universidá Asturiana de Branu (UABRA), dientro de la que van celebrase los tradicionales Cursos de Branu, ampliando la ufierta hasta los diez cursos estremaos. Los cursos más tradicionales, nivel básicu, avanzáu y capacitación pa torna, van siguir tando dientro de la Estensión Universitaria de la Universidá d’Uviéu, anque esti añu l’Academia pon especial interés na formación de los periodistes y profesionales de los medios de comunicación, acutando 10 places del cursu elemental pa periodistes n’activo o persones qu’amuesen una rellación profesional col ámbitu de la prensa.

El curus básicu de llingua asturiana inclúi, con 60 hores llectives, un repás peles Normes ortografiques, la sociollingüística aplicada al casu asturianu, exercicios escritos, situaciones comunicatives escrites y orales, y un averamientu a la Lliteratura Asturiana.

Pela so parte, l’Avanzáu, col mesmu númberu d’hores, adiéntrase nel estudiu de la llingua asturiana estándar y la so presencia na sociedá de l’Asturies de güei, plantegando tamién situaciones comunicatives escrites y orales, más complexes, aspeutos de la cultura asturiana y de la Historia d’Asturies, un repás a la Lliteratura asturiana contemporánea y un pequeñu cursu de téuniques de creatividá lliteraria.

Más cursos d’afondamientu que nunca.

No que cinca a los Cursos d’Afondamientu Cultural y Llingüísticu, les novedaes son abondoses nesta ocasión. Como cada añu va celebrase un cursu de Capacitación pa la Traducción al Asturianu, de 35 hores, del 2 al 6 d’agostu, y embaxo la dirección de Xosé Lluis García Arias, y la collaboración de los profesores Ana Mª Cano y Xosé Antón González Riaño. Nel cursu preséntense los presupuestos teóricos que rixen la traducción a una llingua minoritaria, teniendo en cuenta, de mou especial, l’exerciciu de tornes de testos lliterarios y periodísticos y de testos llegales y científicos.

El cursu dedicáu a les nueves tecnoloxíes va ser esti añu “Internet y asturianu: aplicaciones socio-educatives”, va celebrase del 2 al 6 d’agostu, y nes sos 35 hores va sirvir pa ufiertar nueves y prestoses posibilidaes pa que’l profesoráu de Llingua Asturiana d’Educación Primaria y Secundaria pueda acceder a los recursos qu’ufre la rede y pueda diseñar, llueu, xeres y actividaes d’aula pal deprendizax oral y escritu de la Llingua Asturiana. El so coordinador ye David Guardado y nél inxértense tamién como profesores Xulio Berro y Xabiel García Pañeda.

Una de les novedaes más llamatives d’esta Universidá de Branu va ser el Cursu d’averamientu a la llocución periodística en llingua asturiana, que se celebra tamién del 2 al 6 d’agostu y que ta plantegáu col envís de que los periodistes y trabayadores de los medios de comunicación (o persones interesaes nel tema) cunten, dende una cierta conocencia llingüística, con ferramientes afechisques pa facer un primer averamientu a la llocución (radio y tv.) en llingua asturiana. El so coordinador ye Próspero Morán, director d’Asturnews y nél inxértense tamién otros profesores como Rubén Martín-Llames, Cristobla Ruitiña, presentador d’informativos en TPA y Sonia Avellaneda, conductora de programes de radio na RPA.

Sicasí, les novedaes nun terminen ehí, esti añu, y ente’l día 9 y el 13 d’agostu, van celebrase otros cursos nuevos, ye’l casu del de Cantares, bailles ya instrumentos musicales asturianos, empobináu por Xuacu Amieva, cola participación de Xosé Antón Fernández “Ambás”, Maribel Parrondo y Covadonga González Muñiz. Nel cursín va afondase nel conocimientu de los cantares, bailles ya instrumentos populares asturianos dende la perspeutiva de la so presencia na escuela. D’esti mou, trátense aspeutos de la presencia de bailles, cantares ya instrumentos na cultura tradicional y les fiestes populares, siempre col enclín d’amosar el so valir educativu.

Otru de los cursos entamaos pola ALLA va ser La lliteratura asturiana nel aula d’Educación Primaria, empobináu por Iris Díaz Trancho y cuntando con Pablo Rodríguez Medina y Xandru Armesto como profesores. Trátase d’un cursu que tien como oxetivu’l tratamientu de la lliteratura asturiana nel marcu de la Educación Primaria. Pa ello, propónense cuatro bloques de conteníos, dixebraos en «Lliteratura infantil y xuvenil n’asturianu», «Aprovechamientu didáuticu de los testos n’asturianu», «Aplicaciones interactives de la lliteratura en llingua asturiana» y «Creación lliteraria en llingua asturiana». Asina mesmo, esti cursu va cuntar con delles actividaes de calter complementariu.

Otros cursos bien importantes esti añu van ser el d’aniciu a la investigación dialeutal, toponímica y de tradición oral, dirixíu por García Arias, y empobináu especialmente a estudiantes y llicenciaos o espertos y especialistes en Filoloxía que quieran afondar nes téuniques rellacionaes colos trabayos de campu, encuestación y primeros pasos na investigación y descripción llingüística y na toponímica y na de la lliteratura oral; y el cursu d’entamu a la investigación hestórica de la llingua asturiana que dirixe Ana Mª Cano y nel que tamién participen, ente otros, como profesores José Ramón Morala, Clara E. Prieto y Xosé Lluis García Arias, afondando na conocencia de la hestoria esterna ya interna de la llingua asturiana y les carauterístiques del actual procesu de normalización.

Amás, y dientro del programa de formación de profesoráu en gallego-asturianu, celebráse la segunda fase del cursu, con práctica escrita y oral de gallego-asturiano, averamientu a la lliteratura actual y plantiamentos didácticos.

Los cursos de dos selmanes cuesten 300 euros y los d’afondamientu 190, incluyendo agospiu en réxime de pensión completa y materiales.

Información completa de los cursos de l’UABRA

Güei, vienres 14 a les 19 hores, va presentase’l llibru “Días rebeldes”, colos autores, Abel Rebollo, Miquel Vallès y Paco Madrid. A les nueve la nueche, nel mesmu llugar, va proyectase’l documental Checkpoint Rock, dirixida por Fermín Muguruza y Javier Corcuera y rodáu n’Israel, Gaza y Cixordania.

L’argumentu de Checkpoint Rock:

De los anuncios publicitarios y el neón de Tel Aviv a la probitú y esperecimientu de los territorios ocupaos de Cixordania y el gran campu de concentración nel que convirtieron la Franxa de Gaza, Checkpoint Rock comparte, con músicos bien distintos, de pueblu en pueblu y de checkpoint en checkpoint, un percorríu que va camudar la visión que tenemos d’esti pueblu en conflictu.

Entemecer ye una iniciativa asturiana, independiente, democrática y de base que, dende la esquierda y los movimientos sociales, quier articular un espaciu d’acción, llucha y pensamientu críticu que refugue les bases económiques, polítiques y sociales del modelu capitalista imperante güei.

Una de les sos primeres actividaes ye l’asistencia y participación nos alcuentros Enllazando Alternatives, cumal alternativu al qu’entamen los xefes d’Estáu de la Unión Europea, América Llatina y Caribe, y que va facese esti fin de selmana (del 14 al 16 de mayu) en Madrid. Tamién, el vienres 21 de mayu, n’Uviéu, organiza un actu onde va participar un diputáu del Bloco de Esquerda de Portugal, un partíu que forma parte de la Esquierda Anticapitalista Europea y que nes últimes elecciones portugueses convirtióse na cuarta fuerza política del país.

Entemecer ye una iniciativa que se define como anticapitalista, internacionalista y d’esquierda, ecoloxista, que llucha contra’l racismu y la xenofobia, contra’l procesu de sustitución llingüística y la discriminación de los falantes d’asturianu y de gallego-asturianu, pola igualdá de derechos pa les persones LGTB, contra’l patriarcáu y pola lliberación de les muyeres.

Entemecer quier ser una ferramienta que, con estos principios, trabaye pola articulación n’Asturies d’un frente anticapitalista y unitariu que colos movimientos sociales y con dellos sectores de la esquierda camine hacia la tresformación radical d’esta sociedá.

L’asociación Ensame Sidreru algamó’l númberu 76 de la so revista “La Sidra”. Nesta ocasión la revista dedicada a la bebida más asturiana, inclúi un reportaxe estensu sobre l’eventu celebráu n’abril nel Pueblu d’Asturies en Xixón col nome de Primer Sidre l’Añu, otru sobre’l certame I Asturianada y Sidre y una crónica del Sidracrucis 2010. Pero la revista tamién inclúi un repás a la presencia la sidra na feria Alimentaria 2010 y otros conteníos.

Nes más de 100 páxines de la publicación billingüe, castellán y asturianu, apaecen reportaxes fotográficos, entrevistes,, actualidá sidrera, axenda, crítica de llibros, etc. La revista pue descargase de baldre na rede.