Sociedá

La Universidá d’Uviéu convoca delles places destinaes a estudiantes universitarios que quieran pasar un tiempu como cooperantes voluntarios en distintos proyectos. Les ONGD asturianes que collaboren colos sos proyectos y son el contactu n’Asturies son Cáritas, IEPALA, Asociación Gaspar Garcia Laviana, Paz con dignidad, Nuevas y desarrollo y dalgún profesor en particular.

Les solicitúes pa formar parte de la iniciativa pueden presentase hasta l’11 de mayu. Los documentos y bases completes tán nel BOPA de 26 d’abril de 2010.

L’Academia de la Llingua Asturiana celebra esti vienres 7 de mayu, la XXXI edición del Día de les Lletres Asturianes a parte de les ocho y media la tarde. L’actu va escompencipiar con un entamu musical a cargu del Che de Cabaños, cantador de tonada, y Rodrigo Joglar, gaiteru y miembru del grupu folk Verdasca, al que la selmana pasada entrevistaba Asturnews.

Darréu l’ALLA va nomar un nuevu miembru, el xurista ya investigador de la lliteratura tradicional Nicolás Bartolomé Pérez, lleonés que trabaya como abogáu n’Asturies, y que vien collaborando cola ALLA dende va años al traviés d’artículos en Lletres Asturianes, la so participación nes Xornaes d’Estudiu y la redacción d’un vocabulariu, el segundu de la inciativa Termast, centráu na terminoloxía xurídica y alministrativa. El nomamientu supón un refuerciu de la presencia d’académicos del sur del del cordal, que ye fechu natural dende los entamos de l’ALLA.

L’actu va siguir col discursu institucional de la presidenta Ana María Cano González, una esbilla de testos del númberu últimu de Lletres Lliterariu, y un conciertín d’Alfredo González.

Amás, l’ALLA celebra una espicha nel Restaurán Tierra Astur de Cualloto, pal qu’hai qu’acutar plaza nel teléfonu 985 211 837. Cuntaráse con serviciu d’autobuses.

Convidada al actu

Un añu más, y van delles décades, los asturianos van salir a la cai pa, coincidiendo col XXXI Día de les Lletres Asturianes, manifestase pola reconocencia del estatus d’oficialidá pa la llingua asturiana. Un idioma qu’afirmen dende la Xunta pola Defensa de la Llingua Asturiana, vive un momentu “preocupante pola perda cada vez más grande de falantes”. La manifestación va entamar a les 19:30 hores na Estación del Norte, d’Uviéu, y va siguir pela cai Uría llegando hasta les puertes del Teatru Campoamor. A les puertes del mesmu va dase llectura al discursu añal de la XPDLLA.

La Xunta aprovecha esta convocatoria pa denunciar la presencia “testimonial” del asturianu nos medios de comunicación públicos y el so usu “tan escasu” pola Alministración asturian, que comenten “nun ayuda precisamente a que la nuestra llingua gane prestixu y reconocimientu ente la xente”.

Amás, denuncien “la precariedá de l’asignatura nes primeres etapes educatives -hora y media voluntaria a la selmana- y en Secundaria -optativa en competencia con asignatures como Informática o Francés- dan una idea de la poca importancia que merez pa l’Alministración educativa”.

Pa la Xunta namás se pue cortar el retrocesu d’un idioma minorizáu como’l nuestru con una política de normalización decidida qu’abra espacios d’usu al asturianu, que lo faiga dalgo normal na vida diaria n’ámbitos como la educación, los medios de comunicación o l’Alministración.

La organización calificó la política llingüística del Gobiernu asturianu“adornu anecdóticu o folclóricu” que namás fai “usos testimoniales per un llau y, cuando se trata d’iniciatives fundamentales como’l trabayu de les Oficines de Normalización nos Conceyos, precariedá na dotación y falta de control”.

La Xunta denuncia la “falta d’usu” de los topónimos que la propia alministración aprueba y recuerda los caos daos esti añu, como’l del ciudadanu al que “queríen negar el derechu a dirixise n’asturianu a l’Alministración”, derechu que, recuerden “el Tribunal Constitucional acaba de reconocer”, y que pa la XPDLLA “confirma la vía xurídica como ún de los caminos pa reclamar los nuestros derechos”, anque recuerda “la necesidá d’un marcu llegal d’oficialidá que garantice que les polítiques llingüístiques y los derechos ciudadanos nun dependan de la interpretación más o menos arrogante d’un Gobiernu o d’un xuez”.

Dientro del Programa Territorial d’Empléu 2009-2011 y hasta’l 5 de mayu, Uviéu convoca places pa 10 monitores d’ociu y tiempu llibre, 2 p’arbañiles, 1 pintor y 1 monitor d’informática. La convocatoria destínase a paraos yá inscritos como talos nel Serviciu Públicu d’Empléu d’Uviéu y empadronaos un mínimu de dos años ininterrumpidamente nel conceyu, a fecha de fin de presentación de solicitúes.

Más información nel Centru de Formación Ocupacional, na cai Francisco Pintáu Fe s/n, La Corredoria, 33011 Uviéu, o nel teléfonu 984 083 780.

Los distintos centros del Institutu Cervantes tán en plena fase de selección de personal, tanto alministrativu como técnicos y profesoráu. Na so páxina web informen de los plazos de solicitú de participación nes pruebes. Los exames faense, n’ocasiones, nel país de destín onde tien la sede cada centru del Cervantes y otres vegaes, en Madrid.

El castellán va ser darréu’l cuartu idioma más faláu de la Europa de los 27 depués de caltenese delles décades per detrás en númberu de falantes del inglés, el francés, l’alemán y l’italianu).

La noticia úfrenla les conclusiones del estudiu d’un proyectu col nome “El Valor Económico del Español: una empresa multinacional” que presentó esti vienres el vicepresidente executivu de la Fundación Telefónica, Javier Nadal, na IV Acta Internacional de la Llingua Española. Baxo’l lema “Un idioma vivu pa Europa”, esti alcuentru, entamáu pol Ministeriu de Cultura, l’Institutu Cervantes, la Fundación Cajasol y la Fundación Biblioteca de Lliteratura Universal (BLU), celebróse nel marcu de la Presidencia Española de la Unión Europea.

Siguiendo cola “xira” de presentaciones pela xeografía asturiana, esti xueves 29, a les 19:30 hores, va presentase n’Avilés, el colectivu “Emilio García” de la Fundación Andreu Nin d’Asturies.

L’actu va facese nel Palaciu de Valdecarzana, asitiáu na cai del Sol y va consistir nuna presentación per parte de los miembros de la mesma, y de la proyección del documental “Doblemente olvidados”, una producción de la Fundación Andreu Nin alredor de la figura del hestóricu militante comunista Wilebaldo Solano.

La Fundación Pájaro Azul, ONG asturiana de cooperación al desenvolvimientu, entama estes xornaes col doble oxetivu de sensibilizar y recudar fondos pa los sos proyectos n’África. Les actividaes van entamar el 4 de mayu, a les 20 hores, con ‘La vida puede más’, recital d’Elia Fleta Mallol, y con una preba solidaria na Plaza Trescorrales.

El 6 de mayu, a les ocho la tarde, va celebrase un conciertu de la Orquesta Clásica d’Asturies nel Auditoriu “Príncipe Felipe” d’Uviéu. Al día siguiente, van celebrase delles charres sobre la muyer, la probitú y la violencia nel África subsah.ariana, nel Salón d’Actos Campus del Milán. Participen cinco responsables de proyectos con muyeres na República Democrática del Congo, Camerún y Benín.

El 10 de mayu inaugúrase una esposición de pintura: “Artistes asturianos pola solidaridá”, que va tar nel Auditoriu d’Uviéu.

L’Academia de la Llingua Asturiana lleva agospiada dende 1981 nun pisu de la cai Marqués de Santa Cruz, y dende los sos entamos vien pidiéndose un llar que tea acordies a la importancia y l’actividá de la institución. Güei, y dempués d’un conceyu ente’l Gobiernu d’Asturies y l’ALLA, ta acabante sabese que l’Academia va treslladase “dientro d’alredor de dos meses”, al Monesteriu de San Pelayo, conocíu popularmente como de Les Pelayes, y hasta agora, llar del Archivu Hestóricu d’Asturies.

Nel conceyu celebráu esta mañana despacharon con Ana Cano, presidenta de l’Academia, el Presidente d’Asturies, Vicente Álvarez Areces, la Conseyera de Cultura, Mercedes Álvarez, y la Directora Xeneral de Política Llingüística, Consuelo Vega. Amás, participaron los académicos Roberto González Quevedo y Miguel Ramos Corrada.

El llar nuevu tien una superficie superior y unes meyores condiciones, polo que’l Gobiernu d’Asturies va invertir 24.000 euros añales, frente a los 18.000 que cuesta l’actual instalación na cai Santa Cruz. El llugar foi calificáu por Ana Cano como “agospiu estraordinariu” y reconoció “sabía que Chelo (por Consuelo Vega) tenía enfotu en solucionar esti problema”.

Ana Cano considera, asina, que se da “una bona solución pa un vieyu problema” yá que la sede anterior “nun podía selo d’una institución académica”, llamentóse.

Nes próximes selmanes tendrán qu’entamar les pequeñes obres d’acondicionamientu del nuevu llar, qu’esperen ocupar a lo llargo del branu.

L’Academia de la Llingua Asturiana llevaba dellos años poniendo clas d’asturianu en Santantolín d’Ibias. Sicasí, dende esti branu, y como yá ficiere va años, los cursos tornen a Cangas del Narcea, impartiéndose les clases ente’l 2 y el 13 d’agostu nel IES del Conceyu, ufiertando agospiu na Escuela Llar de Cangas.