Sociedá

Güei, 18 de mayu, Día Internacional de los Museos, la empresa Recrea, que xestiona les instalaciones culturales del MUXA, Parque de la Prehestoria, La Llaboral, Ciudá de la Cultura y el Centru d’Arte Rupestre de Tito Bustillo, entama actividaes y visites de calter gratuitu en caúna d’estes instalaciones. Esta xornada vien celebrándose dende l’añu 1977.

D’América a Oceanía pasando per Europa, Asia y África, el Día Internacional de los Museos ye la ocasión pa concenciar al públicu polo xeneral sobre’l papel de los museos nel desenvolvimientu de la sociedá. La tema pal Día Internacional de los Museos 2011 ye “Muséu y Memoria”.

Los museos guarden la memoria y cunten hestories. Caltienen nes sos colecciones oxetos fundamentales pa la memoria de les comunidaes nes que vivimos. Tales oxetos son la espresión de los nuesos patrimonios natural y cultural. Munchos d’ellos son fráxiles, dellos tán en peligru, y toos precisen un cuidu y un caltenimientu especiales. El Día Internacional de los Museos 2011 va ser la ocasión d’afayar y redescubrir les memories individuales y colectives.

Dende’l Muséu del Xurásicu d’Asturies, el Parque de la Prehestoria de Teberga, Centru d’Arte Rupestre de Tito Bustillo y La Llaboral Ciudá de la Cultura, quieren sumase a esta celebración y ufiertar a toos aquellos que los visiten güei numberoses actividaes y visites entamaes, con calter gratuitu.

Consulta’l programa d’actividaes de Recrea

El Conceyu por Otra Función Pública n´Asturies (COFPA) fizo anuncia esti miércoles la interposición inmediata d’un recursu contenciosu – alministrativu frente al mesmu ante la Sala correspondiente del TSXA.

Según la nota qu’asoleyare’l COFPA estama mesma mañana, “pa marchar, el Gobiernu PSOE-IU da l’últimu golpe a la imparcialidá de los funcionarios públicos del Principáu per mediu d’un Reglamentu de carrera horizontal y evaluación de l’actividá profesional (BOPA de 14 de mayu), nel que se somete la valoración del trabayu de los funcionarios públicos al control partidista – conformidá – de los altos cargos políticos”.

La nota diz que’l Reglamentu en cuestión, ellaboráu coles técniques, criterios y llinguaxe de les consultoríes privaes y del denomináu “management empresarial”, qu’amenorga y “asimila l’actividá pública de prestación de servicios y actividaes conforme al principiu de llegalidá a un procesu economicista de producción de mercancíes nel que l’Alministración configúrase como empresariu y los ciudadanos y ciudadanes como veceros/consumidores, contién perlles tan significatives como les siguientes: – La evaluación del desempeñu de los funcionarios públicos va facese polos superiores xerárquicos y tendrá de cuntar cola conformidá de los responsables cimeros de los evaluadores , esto ye, polos altos cargos políticos (artículu 28) – Dicha conformidá política – partidista – nun se somete a criteriu oxetivu dalgunu pa la so emisión, de tal manera que se configura como una especie de “nihil obstat” o censura política sobre la resultancia de la evaluación – La evaluación del trabayu de los Xefes de Serviciu y puestos similares de llibre designación – a deu – realízase directamente pol políticu del que dependen (artículu 28.2). Esto ye, el personal d’enfotu políticu ye evaluáu pol políticu que lu noma dixitalmente, polo que la oxetividá de la evaluación queda totalmente desvirtuada. – Introdúcense criterios d’evaluación tan evanescentes y risibles como’l “compromisu cola organización”, nel que se mide “un sentimientu de llealtá y sentir y deseyar permanecer na mesma anque haya alternatives y posibilidaes más curioses” – Establezse una hipertrofia de procedimientos y burocracia – evaluadores, unidaes d’evaluación, unidaes de xestión, comisiones de revisión- que va colapsar l’actividá alministrativa ordinaria de l’Alministración asturiana al serviciu de los ciudadanos y ciudadanes, va amenorgar la productividá y dedicación de los trabayadores públicos y va aumentar costos y órganos ineficientes en dómina de crisis.

L’Asociación Amigos d’Internet celebra esti congresu n’Uviéu, güei, 17 de mayu, a lo llargo de tol día. El so principal oxetivu ye desenvolver un alderique sele sobre una tema central de la nuesa sociedá, dando a conocer un pocu más de cerca la realidá del marcu llexislativu estatal, realizando un averamientu a la problemática dende un puntu de vista más social que xurídicu.

Más información del Congresu

El Grupu de Dinamizadores La Cla, xuntu cola collaboración d’otres entidaes como l’Asociación Xuvenil Esnala, el Grupu de Facebook Trueque y Mar de Borrina realicen un mercadín de trueque en Xixón el próximu domingu día 19 de xunu dende les 16:30 hores hasta les 20:30 hores nel Centru Municipal Integráu d’El Llano.

Anque esti espaciu ta destináu pa mozos ente 13 y 35 años, el Mercadín nun tien llende d’edá, polo que pueden averase tantes persones como deseyen. Lo único necesariu p’allegar a esti alcuentru ye llevar cualquier cosa, habilidá o conocencia que queramos intercambiar por otra y…un cobertor pa montar el puestu. Puedes informate meyor nel teléfonu 637 955 737.

El boletín de l’asociación zamorana Furmientu yá tien na so páxina web un nuevu númberu, que correspuende a los meses de xineru a marzu. Nesit númberu apaez la resolución del Concursu de Vocabularios del añu 2010 y un fragmentu del trabayu ganador de Fulgencio Ruiz, recoyíu na llocalidá zamorana d’Abezames. Amás, la estaya actualidá cultural, recueye les siguientes noticies: Furmientu celebra’l sou alcuentru d’iviernu – Novedades editoriales – Constitución d’una plataforma en defensa del gallegu y el llionés de Castiella y Llión – Xornada sobre’l patrimoniu llingüísticu n’Estorga – Congresu sobre llenguas minoritarias en Salamanca – 3ª edición del certame del Club Xeitu.

La estaya lliteraria recueye nesta ocasión “El carteiru d’Urz”, rellatu de Miguel Ángel del Cueto nel dialectu asturlleonés de la comarca de La Carbayeda.

Descarga’l boletín de baldre

La Universidá de Branu de Porto organiza un cursu sobre cultura y llingua mirandeses. Ente los díes 18 y 20 de xunetu les llocalidaes de Miranda del Douro y Picuôte acueyen a dellos especialites na materia, que van dar esti cursu, cuntando con formación práctica y teórica, incluyendo contactos con falantes llocales, integrando la llingua nos diferentes aspectos de la vida cotidiana.

Los alumnos aprobaos recibirán un certificáu de cursu con creitos europeos y de formación continua. Los interesaos pueden ponese en contactu colos organizadores nel corréu educacao.continua@reit.up.pt

Páxina con más información sobre’l cursu

La Universidá d’Uviéu convoca l’I Premiu de Proyectos Empresariales, col envís de sofitar los proyectos empresariales de los estudiantes universitarios y el so posterior desenvolvimientu empresarial.

Van poder participar na presente convocatoria individualmente o en grupos d’hasta cuatro miembros, los estudiantes de la Universidá d’Uviéu que cursen titulaciones oficiales de primer, segundu ciclu o grau na Universidá d’Uviéu o nos sos centros adscritos.

Les solicitúes pa participar y la Memoria del proyectu van presentase hasta’l 23 de mayu de 2011, y van afaese al modelu que figura como amiestu II y que se va topar a disposición de los interesaos na Unidá de Convenios y Ayudes del Vicerrectorado d’Estudiantes y Empléu de la Universidá d’Uviéu, allugada na cai González Besada, 13, 33007 d’Uviéu, y na web oficial de la Universidá d’Uviéu (http://www.uniovi.es/concursu-escurres).

El Teatru Campoamor volvió acoyer esti vienres, Día de les Lletres Asturianes, la Xunta Estraordinaria de l’Academia de la Llingua Asturiana, dempués d’una manifestación peles cais d’Uviéu onde miles de persones reclamaron la oficialidá del asturianu. Nel actu académicu, qu’enllenó’l teatru uvieín, tuvo llugar el nomamientu del nuevu académicu d’honor, José Ramón Morala Rodríguez, caderalgu de la Universidá de Lleón y especialista nel estudiu hestóricu del dominiu llingüísticu ástur al sur del Cordal. Amás reconocióse’l llabor a favor del asturianu del ex ciclista Chechu Rubiera.

L’actu abriéronlu’l cantante de tonada José Manuel Collado y el gaiteru Oscar Fernández González, presentando darréu la gala los periodistes Sonia Avellaneda y Próspero Morán.

La llectura del acta de la Xunta tuvo a cargu de Roberto González-Quevedo, Secretariu de l’ALLA, entregándose darréu los reconocimientos al nuevu académicu y a Rubiera, qu’abrieron les interevenciones.

José Ramón Morala Rodríguez recordó los sos entamos académicos n’Uviéu, onde reconoció ñació’l so interés poles variantes llingüístiques. El nuevu miembru d’honor de l’ALLA comprometióse a siguir sofitando’l llabor de l’ALLA “como lo fici dende’l primer momentu, yá que la mio primer intervención nun congresu foi nes Xornaes d’Estudiu d’esta institución”, añadió.

El discursu del ex ciclista Chechu Rubiera tuvo un aire bien estremáu. Nél, recordó la so rellación col asturianu dende bien pequeñu y como lo prexuicios pa cola llingua lu marcaron dende bien pequeñu. Rubiera defendió l’asturianu como “una llingua d’alcuentru y non de desalcuentru” y amosóse arguyosu de ser asturfalante, agradeciendo a l’Academia la reconocencia fecha.

Darréu llegó la intervención de la Presidenta de l’ALLA, Ana Cano, que como cada añu fizo repás de les actividaes entamaes pola institución dende’l Día de les Lletres posteru.

Ana Cano tuvo un recuerdu pal escritor Nel Amaro, fináu apocayá, del que destacó ser “ún de los primeros autores del Surdimientu”, tando amás “alloñáu yá de fórmules costumistes y diglósiques” na so primer obra de 1978. Cano afirmó que Amaro “,siempres tuvo averáu a l’Academia”, polo que pa la institución, “ye una perda inda más doliosa y emotiva”.

Darréu del repás biográficu del nuevu académicu y de Chechu Rubiera, Cano faló de les novedaes anuncies apocayá pa la revista Lletres Asturianes, amás de dar anuncia de la publicación nel BOPA del alcuerdu ente l’ALLA y la Universidá d’Uviéu qu’afita la Universidá Asturiana de Branu (UABRA) pal futuru y la inclusión d’ocho cursos nuevos alredor de la hestoria, la cultura, la toponimia, internet… Amás dio anuncia de les novedaes bibliográfiques de l’Academia.

En cuantes al analís de la situación sociopolítica, Ana Cano definió’l momentu como “un encruz perimportante pal futuru la llingua”, recordando que “l’ALLA, como institución oficial del Principáu d’Asturies, proclama otra vegada más la so neutralidá política y hasta, si me dexen dicilo, la so independencia con respeutu al poder políticu, seya esti poder del signu que seya”.

L’Academia , sicasí, “faciendo usu del papel tutelar de los derechos llingüísticos de los asturianos que-y atribúin los sos estatutos fundacionales” treslladó yá a toles opciones polítiques “la necesidá d’un tratamientu axeitáu de la política llingüística nel futuru inmediatu d’Asturies”. La institución entiende que “la defensa del derechu al usu de la llingua propia ye una cuestión tresversal qu’ha formar parte del ideariu democráticu de tolos partíos, de cualesquier tendencia, que trabayen por y per Asturies”.

Ana Cano recordó que “llueu de 35 años d’entamáu’l procesu de recuperación y, magar lo que s’apregonaba (y llamentablemente se sigue apregonando dacuando), el marcu xurídicu qu’agora tenemos de proteición de la llingua nun ye abondo pa vivir llibre y cotidianamente n’asturianu”. Por ello, reclamó, una vegada más, un estatus pal asturianu asemeyáu “al que llograron abenayá los ciudadanos baleares, valencianos, catalanes, araneses, navarros, vascos y gallegos”.

L’Academia de la Llingua Asturiana, recordó Cano “ta preparada pa la interllocución col próximu Gobiernu d’Asturies” y recordó al Gobiernu d’Asturies que van actuar “con llealtá y buscando la fórmula constitucional más afayadiza pa que l’exerciciu de los nuesos derechos llingüísticos nun se dixebre de la solución constitucional escoyida poles otres comunidaes billingües del Estáu”.

La presidenta de l’ALLA compromtióse a “ayudar na busca d’una fórmula xurídica d’oficialización del asturianu, asumible por tolos partíos que s’asitien na Xunta Xeneral, que garantice derechos civiles y nun imponga obligaciones a los que nun quieran exercelos, pero que sí los garantice —repito— a los que también mos pruya exercelos en llibertá; oficialización qu’ha ser asinamesmo razonable dende’l puntu de vista económicu y planificada y gradual na so puesta en práutica”. Una solución, dixo la cabezalera académica, “pa iguar, de mou definitivu, el marcu de sobrevivencia del idioma milenariu d’Asturies o, lo que ye lo mesmo, de la propia Asturies”.

L’actu siguió cola llectura de poemes del númberu 3 de Lletres Lliterariu per parte de Próspero Morán y Sonia Avellaneda, col conciertu del grupu Xera, y con un incidente nel descansu ente estes dos actividaes. Un grupu d’activistes llevántaronse frente al palcu del Delegáu del Gobiernu d’Asturies, Antonio Trevín, con pancartes reclamando “democracia y oficialidá”. Yá a les puertes del Campoamor, un militantes nacionalista foi multáu pola policia dempués de que’l Delegáu del Gobiernu lu denunciara por llamalu “corruptu” al so pasu.

Amás de Trevín, tuvieron nos palcos del Campoamor, otres representantes del PSOE, IX, URAS-PAS, Bloque por Asturies-UNA y Foru Asturies. Asistieron tamién la presidenta de la Xunta Xeneral, María Jesús Álvarez; la Conseyera de Bientar Social y Vivienda, Noemí Martín; la diputada d’IX Emilia Vázquez y el vicerrector de la Universidá d’Uviéu, Santiago García, amás de dellos decanos y profesores de la institución, xunto a representantes sindicales.

Col Campoamor enteru de pies, sintióse a la fin del actu l’Himnu d’Asturies, entonáu polos asistentes y tocáu a la gaita por Oscar Fernández.

Semeyes del actu nel Campoamor d’Uviéu

Esti llunes 9 de mayu, a les nueve, llega a la Oficina d’Estranxería d’Uviéu, allugada na Plaza España 3, d’Uviéu, la concentración de la Ruta contra’l racismu y la represión.

La Ruta contra’l racismu y la represión convoca esta concentración pa denunciar los retrasos d’hasta 6 y 7 meses, na resolución de los espedientes de les persones inmigrantes que tán tramitando’l so primer permisu de trabayu y residencia.

Xunta Estraordinaria de l’Academia de la Llingua Asturiana

Manifestación pola Oficialidá del Asturianu

Presentación de los llibros de la Selmana de les Lletres

Conciertu 13xMánfer

Llectura de testos n’asturianu na Xunta Xeneral

Gala d’inauguración de la 32 Selmana de les Lletres