Sociedá

L’Asociación Cultural Zamorana Furmientu tien abiertu’l plazu pa esti concursu que tien por oxetivu la recoyida del máximu númberu de pallabres y espresiones característiques de los pueblos y contornes de la provincia lleonesa. Puede participar cualesquier persona, ensin distinción de nengún tipu, presentando caún un vocabulariu inéditu.

Los vocabularios tienen de contener polo menos 60 vocablos. Cada vocablu tien de tar definíu con una pallabra o frase, constando la fecha averada de recoyida del material. Los vocabularios participantes nes ediciones anteriores pueden allegar de nuevu nésta, siempres que’l material apurríu contenga delles aportaciones nueves.

Al par de cada pallabra tien d’indicase la llocalidá na que se recoyó, nel casu de que non tolos vocables vengan d’una mesma llocalidá. Si tol material vien de una única localidá, va bastar con indicar una sola vegada’l so nome.

El xuráu va valorar el númberu de vocablos recoyíos (al par d’otres cuestiones), y va tener en cuenta dichu númberu en rellación a la zona o zones nes que se recoyó’l material. Tamién se va valorar positivamente que’l vocabulariu contenga información complementaria de los vocablos o de la fala llocal polo xeneral, como, por casu, frases que exemplifiquen l’usu de los vocables, o información sobre la so vixencia, según la descripción d’estructures llingüístiques propies de la fala local.

Los vocabularios pueden ser apurríos escritos a mano, n’archivu informáticu de testu (preferiblemente) o impresos en papel. Los materiales presentaos tienen de contener el nome y apellíos del autor de la escoyeta, según el so llugar de residencia y un teléfonu de contactu. Pa concursar va bastar con ponese en contactu cola asociación cultural Furmientu al traviés de los teléfonos 669322834 o 695515386, o unviar per corréu ordinariu los vocabularios a l’Asociación Cultural Zamorana Furmientu, na cai Grijalva 6 2u A. 49021 Zamora.

El períodu de recepción de material d’esta sesta convocatoria entiende tol añu 2011. El ganador va recibir un premiu consistente nun llote de llibros. El fallu del xuráu, formáu por socios de l’asociación cultural “Furmientu” y por llingüistes especialistes na materia, va ser comunicáu por escritu a toos los participantes y va ser inapelable. Un fragmentu del vocabulariu ganador va ser publicáu na publicación trimestral de l’asociación: “El Llumbreiru”.

Carmen Rúa, Conceyala d’Educación, Pueblu d’Asturies y Promoción de la Llingua Asturiana de Xixón ente 2003 y 2007, morrió ayeri a los 58 años por mor d’un cáncanu. Rúa militara hasta 2010 n’Izquierda Xunida, ocupando cargo de conceyala y asesora hasta 2009. En payares d’esi mesmu añu afilióse a la FSA-PSOE xixonés. La capiella ardiente ta instalada na sala 4 del Tanatoriu de Xixón, faciéndose un funeral esti llunes na Ilesia de San Pedru.

Nel so tiempu como Conceyala acusó al PSOE de tener “poca voluntá política” na promoción del asturianu y a l’alcaldesa d’entós, la socialista Paz Fernández Felgueroso, de “nun querer aprobar la ordenanza d’usu del asturianu”, qu’entá tardaría dellos añosen ratificase nel plenu xixonés.

Nel tiempu de la so xestión nel Conceyu de Xixón firmó un alcuerdu cola Academia de la Llingua Asturiana y, ente otres acciones, afaló y publicó un estudiu sociollingüísticu dirixíu pol profesor Francisco Llera Ramo, según el cualu una amplia mayoría de xixoneses yeren partidarios del usu del asturianu dientro del Ayuntamientu y un 61 por cientu favorables a la oficialidá.

L’Academia de la Llingua Asturiana acaba d’editar l’Estudiu Sociollingüísticu de Zamora (Fastera Occidental), estudiu fechu polos académicos Xosé Antón González Riaño y Xosé Lluis García Arias. Con estos datos de les zones zamoranes de Senabria, La Carbayeda, Aliste y Sayago, la institución completa l’estudiu sociollingüísticu de tol dominiu de la llingua asturiana, dempués d’espublizar estudios sociollingüísticos d’Asturies, Lleón y Miranda del Douro.

Ente los datos qu’apaecen nel trabayu destaca que un terciu de los ciudadanos afirmen “entender y falar la llingua tradicional”.

Un 42’3 de los zamoranos occidentales llamen “castellán”a la so manera de falar.

Un 30% llámalo “gallegu”, “gallego-castellán” o “gallego-portugués”.

El 30% usa denomaciones llocales, “alistanu” –6,5%– y “sayagués” –6%–.

Un 2% llámenlu “lleonés” o “asturiano-lleonés”.

Un 50% refuguen l’estatus de llingua pal asturlleonés de la zona.

Ún de cada diez encuestaos tien sentimientu d’unidá llingüística col restu’l dominiu asturlleonés.

Esti martes 5 de xunetu va presentase na Casa Cultura de L’Arena, en Xixón, el proyectu ecoloxista “Equo”. A les siete la tarde tendrá llugar l’actu nel que van esplicar los detalles de la iniciativa, qu’aclarien “Nun son sigles, ye namái que una pallabra que fai referencia a los dos pegoyos de Equo: Ecoloxía y Equidá”.

Un añu más ESNE y La Escuela de Protocolu d’Asturies entamen la III Amuesa de Moda y Creación que se celebra güei, xueves 30 de xunu, nel Teatru Filarmónica d’Uviéu a la 19.30 hores. Esti añu va tar ambientada nel Neorrealismu y el so cine, d’ende’l so títulu: “Neorrealismu. Miraes de Cine”.

Nel actu va cuntase cola participación de los alumnos de les titulaciones universitaries d’Arquitectura d’Interiores -escenografía-, Diseñu de Moda -vestuario-, Informática ya Inxeniería de Videoxuegu -cartelos y animaciones-, Periodismu y Medios de Comunicación -notes de prensa, rellación colos medios- y Protocolu -invitaciones, autoridaes, recepción espectadores, …- que, como siempres, van poner el so granín d’arena pa qu’esta III Amuesa de Moda y Creación algame l’ésitu d’anteriores ediciones. La entrada ye llibre y de bladre.

Otru añu más, l’asociación cultural xixonesa Tertulia Cultural El Garrapiellu prepárase pa facer la perconocía ruta andariega ente Xixón y Cuadonga. Son al rodiu quince mil los andariegos que tolos años, camín de Cuadonga, pasen pelos plasmantes paisaxes que-y dan forma a esta sienda. Sienda que pasu ente pasu percuerre los conceyos asturianos de Xixón, Villaviciosa, Piloña, Parres y Cangues d’Onís. La Tertulia Cultural El Garrapiellu pon de manifiestu con esta escursión organizada’l so interés “nel sen de da-y un emburrión a esta ruta como posible motor económicu de les fasteres rurales asturianes peles que pasa, atrayendo un turismu secañosu de cultura y paisaxe”.

La ruta Xixón a Cuadonga tien al rodiu de setenta y cinco kilómetros. La marcha entama en Xixón, más concretamente en Deva pa dempués d’unes poques xornaes, polo xeneral faise en dos díes de camín, llégase al santuariu de Cuadonga. Pa ello, hai que siguir les marques que punxo l’Asociación Cultural El Garrapiellu. Éses marques son trisqueles (tamién llamaes garrapiellos), hai dellos llugares onde se punxeron cartelos de madera.

Hai dellos años púnxose, dende El Garrapiellu, munchu enfotu en facer un área recreativa en Sorribes (Piloña) nun llugar bien apegáu al camín que conduz a Parres, pa ello l’asociación aconceyó col Conceyu de Piloña. Esti añu, por fin paez qu’entamen les obres, ye por ello que facemos nuesa la idea d’esi llugar onde esparder na ruta que va a Cuadonga.

La próxima Marcha a Cuadonga, tendrá llugar los díes 15 – 17 xunetu. Saldráse’l vienres 15 xunetu a les 8:00 de la mañana dende la ponte de piedra de Deva, xunto’l llavaderu. El preciu ye 80 € pa socios y 85 € pa non socios, inclúi una furgoneta pa echar un gabitu coles maletes. Los interesaos pueden apuntase nel 606 390 344.

El Conceyu Universitariu pol Asturianu dio anuncia de la posibilidá de sumase a la so reivindicación d’un Reglamentu de Doctoráu que recueye la posibilidá d’usar l’asturianu n’igualdá de condiciones col castellán. Pa ello ufren un modelu de reclamación “col que namás añandiendo los datos personales puede facese la reclamación a la Universidá d’Uviéu”, unviando, hasta’l sábadu 2 de xunetu (incluyíu), al corréu lletrónicu viceordenacion@uniovi.es

Col envís de contabilizar el númberu de reclamaciones unviaes el CUPA pide que se mande copia del corréu unviáu al corréu de la organización conceyuasturianu@gmail.com La fueya tipu puede descargase nel enllaz qu’Asturnews ufre nesta noticia.

El CUPA anunció amás, qu’igual que ficiera ayeri l’Academia de la Llingua Asturiana, acaba de solicitar un conceyu col Rector pa los próximos díes de cara a conocer la postura d’esti, “dempués de facer unes declaraciones a un periódicu asturianu nes que pedía calma y dicía que diba solucionar esti conflictu de forma positiva pal asturianu”, recuerden.

Descarga la fueya-tipu pa facer la protesta

Un añu más ESNE y La Escuela de Protocolu d’Asturies entamen la III Amuesa de Moda y Creación que se va celebrar el próximu xueves 30 de xunu nel Teatru Filarmónica d’Uviéu a la 19.30 hores. Esti añu va tar ambientada nel Neorrealismu y el so cine, d’ende’l so títulu: “Neorrealismu. Miraes de Cine”.

Nel actu va cuntase cola participación de los alumnos de les titulaciones universitaries d’Arquitectura d’Interiores -escenografía-, Diseñu de Moda -vestuario-, Informática ya Inxeniería de Videoxuegu -cartelos y animaciones-, Periodismu y Medios de Comunicación -notes de prensa, rellación colos medios- y Protocolu -invitaciones, autoridaes, recepción espectadores, …- que, como siempres, van poner el so granín d’arena pa qu’esta III Amuesa de Moda y Creación algame l’ésitu d’anteriores ediciones. La entrada ye llibre y de bladre.

La Manifestación del Arguyu LGTB n’Asturies va celebrase embaxo’l lema «Nin un pasu atrás nos nuesos drechos». La manifestación va salir el sábadu 25 de xunu de 2011 a partir de les 19:30 hores de la plaza del Parchís de Xixóny va percorrer les cais Xovellanos, Cabrales, Cuadonga, La Plazuela, Capua, Xovellanos y Cabrales hasta llegar a la plaza Mayor del Conceyu, na que se va lleer el Manifiestu del Arguyu LGTB Asturies 2011.

Amás, el 28 de xunu va celebrase l’actu políticu-institucional «28 de xunu, Día Internacional de Lesbianes, Gais, Transexuales y Bisexuales» cola intervención de les distintes Árees y Grupos de trabayu de XEGA y de les entidaes sociales, sindicales y polítiques d’Asturies presentes nel actu, dándose entrega de los Premios Lladriyu Rosa, Triángulu Rosa y del XII Concursu de Cartelos de XEGA.

Va ser el martes 28 de xunu de 2011 a les 20:00 hores nel salón de conferencies del Centru Municipal «Vieyu Institutu» de Xixón, na cai Xovellanos 21. L’accesu ye llibre y gratuitu.

El Conceyu de Lleón celebra esti 18 de xunu’l “Día de la Llingua”, onde per sestu añu consecutivu, los lleoneses van homenaxear al so idioma. L’actu sedrá a les doce la mañana nel Palaciu de Don Gutierre, onde se lleerán obres en variedaes lleoneses del asturianu, como’l pal.luezu, cabreirés o cepedanu. Darréu d’ello, la Banda de Gaites Ciudá de Lleón, va tocar dellos temes.