Sociedá

L’asociación N’ast fai un llamáu públicu “a boicotear a los establecimientos que tán sofitando la tortura de toros en Xixón”, lo qu’albidren “una xabazada inhumana que namás se caltién en Xixón pol fianciamientu de la Casa Conceyu” y califiquen como “espresión del españolismu”. Na so páxina web ufren un llistáu de los establecimientos qu’ufren “menú taurino” entamáu baxo’l nome de “Jornadas Gastronómicas Gijón de toros”.

Llistáu completu na páxina web de N’ast

Daniel Fernández como voceru de Compromisu por Xixón, llamentó qu’otru 6 d’agostu, día que celebramos el regresu de Xovellanos a Xixón, el gran ausente del actu conmemorativo ye precisamente l’ideariu xovellanista.

Dende Compromisu por Xixón destaquen que “la idea de serviciu públicu que trescala tola obra de Xovellanos, según la necesidá de primar l’interés colectivu sobre l’individual, ye tan alloñáu de la filosofía de los representantes de Xixón como’l restu del pensamientu del ilustráu” y añedió que “si Xovellanos viera los homenaxes que-y facemos en Xixón, nun sabría que se refieren a él mesmu sinón fora pola fecha, esi 6 d’agostu na que la ciudá celebró’l so regresu a la que yera la so casa”.

Daniel Fernández echa de menos referencies “a la so crítica a los festexos taurinos, tan tradicionales en Xixón según los dirixentes municipales y que Xovellanos consideraba ayenos a la mayoría social y descalificaba por bárbaros, o a la defensa de la llingua asturiana, que tanto los actuales como anteriores gobernantes marxinaron y arrequexaron, lo que nun puede tar más alloñáu del pensamientu de Xovellanos, gran defensor de la nuesa cultura y promotor de l’Academia de la Llingua”.Pa Compromisu por Xixón l’homenaxe a Xovellanos entraría de plenu nuna de les sos cites más célebres, cuidando que según el voceru de Xixón en “la ufrienda floral, toles referencia al prócer xixonés son tan llixeres como una burbuya de xabón, non yá pola ausencia de referencies al so pensamientu, sinón porque l’ideariu de Xovellanos allóñase tantu de los gobernantes actuales como los anteriores, que nunca desenvolvieron nin la filosofía de serviciu públicu nin compartieron les esmoliciones del pensamientu jovellanista” parafrasiando a les palabres de Xovellanos cuando dicía que “Bien tán los bonos pensamientos, pero resulten tan llixeros como burbuya de xabón, si nun los sigue l’esfuerzu pa concretalos n’acción” dixo pa finar Daniel Fernández.

El Conceyu de Llaviana ta acabante convocar una plaza pal so serviciu de normalización llingüística. Les bases pueden consultase na páxina web del Conceyu.

Bases completes

Cangas del Narcea acueye estos díes la celebración de la Universidá Asturiana de Branu, una esperiencia formativa organizada pola Academia de la Llingua Asturiana, la Universidá d’Uviéu y el Conceyu de Cangas. Dientro d’estos cursos, Iniciativa pol Asturianu organiza delles actividaes. Una charra informativa sobre la organización, una folixa con con concursu de karaoke n’asturianu y la grabación con públicu del programa Iniciativa pol Asturianu nes ondes, tán ente lo programao pa estos díes en Cangas del Narcea.

PROGRAMA COMPLETU D’ACTIVIDAES

Martes 7 d’agostu: Búscase una estrella. Canta pol asturianu.

Folixa con concursu de karaoke na Discoteca Zaycor. Los alumnos de la UABRA competirán cantando temes n’asturianu al karaoke nos qu’imitirán a los sos artistes preferíos. Celebraráse de magar les 22:30 hores.

Xueves 9 d’agostu: Charra informativa.

Miembros d’Iniciativa pol Asturianu darán una charra nel salón d’actos de la UABRA, de magar les ocho la tarde. Proyectaránse delles audiovisuales de la organización.

A lo llargo de tola UABRA instalarán amás un puestu informativu y con llibros a baxu costu. Cola so venta van recaldase fondos pa la organización.

La Sociedá Canguesa d’Amantes del País “Tous pa Tous” colocó estos díes una placa d’homenaxe n’asturianu al llingüista suecu Åke W:son Munthe (1859-1933), que nel branu de 1886 visitó Cangas del Narcea y fizo un estudiu sobre l’asturianu de la zona.

Del so viaxe salió la so tesis doctoral, ‘Anotaciones de la fala popular nuna zona del occidente d’Asturies’, que lleó en 1887 na Universidá d’Upsala y foi espublizada esi mesmu añu. Cien años depués, en 1988, la Biblioteca de Filoloxía Asturiana de la Universidá d’Uviéu asoleyó la so torna al castellán.

Pero Munthe tamién asoleyó en 1888 y 1889 un estudiu tituláu ‘Poesía popular d’Asturies’, onde facía una esbilla y estudiu de cantares tradicionales recoyíos nesti conceyu del occidente asturianu.

Agora les casi de Cangas llucen la placa na so alcordanza y n’agradecimientu d’un pueblu al home qu’amó la fala de los cangueses.

Conceyu Abiertu por Noreña organizó una primer xornada de llimpieza del Ríu Noreña esti domingu pasáu. Dende les 11 de la mañana un grupu voluntarios de Conceyu Abiertu procedieron a recoyer l’abondante basoria acumulao nel ríu Noreña, dende La Chocolatera hasta L’Apeaderu, retirando gran cantidá de bolses y embases de plásticu, lates y botelles y otros desechos como paragües, material informático, recipientes de disolvente y tou tipu de pequeños oxetos ayenos al ríu.

Demientres trés hores los voluntarios de Conceyu Abiertu, ente los que s’alcontraba’l conceyal Pablo Pérez, llimpiaron esti tramu del ríu y los sos márxenes “col oxetivu de meyorar ambientalmente esti ecosistema, meyorar la imaxe del ríu dao que la situación yera vergoñosa y concenciar de la necesidá de cuidar el nuesu ríu y la importancia de mantenelu llimpiu”. Con too, cálculase que foron alredor de 60 quilos de basoria y varios cientos d’oxetos.

La iniciativa foi perbién acoyida polos vecinos y vecines qu’esta mañana paseaben pela zona del Los Riegos y foron munches les felicitaciones de noreñeses pol esfuerciu ecoloxista y el resultáu final. Tres la esitosa primera xornada de llimpieza del ríu, Conceyu Abiertu por Noreña estudia una prósima actuación n’otru tramu del Ríu Noreña, al so pasu pel nuesu conceyu, dao que, anque se llimpiare’l tramu más urbanu y espuestu a l’actividá humana, nel restu del ríu tamién hai necesidá de la retirada d’esti tipu de basoria, según espliquen.

Hasta’l 30 de setiembre, na Casa de los Valdés, el Muséu del Pueblu d’Asturies de Xixon acueye la esposición Mázcara ibérica, entamada por Progestur, asociación fundada en 2003 pa la promoción y espardimientu del patrimoniu cultural portugués, la promoción de les artes populares y la dinamización del turismu cultural tantu en territoriu portugués como foranu. Poles numberoses conexones culturales ente tolos territorios peninsulares, na organización d’esta esposición collabora la Rede Ibérica de la Mázcara, dedicada al estudiu y espardimientu de les fiestes tradicionales que traen rituales nos que participen mazcaraos.

La esposición Mázcara ibérica consiste nuna selección fotográfica que presenta una amuesa de diverses fiestes de tola península nes que participen mazcaraos. Estes fiestes reciben nomes variopintos: A bugiada (Valongo, Portugal); Vos caretos da Lagoa (Mira, Portugal); antroxu, zamarrones, guirrios, sidros y guilandeiros (Asturies); jarramplas (Cáceres)… Estes fiestes caltienen vives nes rexones portugueses de Lazarim, Vinhais, Sobráu y Mogadouro. Amás, son especialmente significatives n’Ourense, Zamora, Cáceres y Asturies, anque les mazcaraes d’iviernu conocíes como Antroxos tán esperimentando una gran puxanza en tolos territorios.

Les fotografíes qu’integren la esposición Mázcara ibérica tomáronse en directu, mientres la celebración d’estes fiestes, lo que confier a la esposición frescura y dinamismu, dexando al visitante ser testigu de la vitalidá del fenómenu de la mázcara nuna sociedá urbana na que tovía perviven los elementos culturales más enraigonaos de la sociedá tradicional. La esposición compleméntase con una proyección en vídeu y con delles vitrines nes que s’amuesen los exemplares de mázcares más significativos.

Esta esposición complementaráse con un desfile de mázcares ibériques dende Begoña hasta L’Atalaya y una animación de cai nel paséu de Begoña.

El Conseyu de Mocedá de Xixón propón una nueche de branu distintu, una nueche onde la mocedá y la cultura son les protagonistes na ciudá. La música, les artes escéniques, el cine y la cultura urbana van tomar la cai y, too ello, cola lluna llena como cómpliz. El 19 de xunetu, a partir de les 22:00 hores, la Primer Nueche en Blanco Nueva del CMX va enllenar les casi de Xixón d’actividaes.

Programa completu d’actividaes

La organización N’ast entama una campaña antitaurina esti branu. Pa la organización nun ye entendible que “cuando n’Asturies tamos viviendo un momentu de fuerte cris social ya identitaria”, s’apueste “otra vuelta pol espardimientu del flamenquismu na nuesa tierra nun enfotu d’anular la cultura propia del País”.

N’ast califica esti fechu como “estratexa d’aculturación, aprovechando l’actual situación de descomposición folclorica de la estructura sociocultural específica d’Asturies”, que camienten “ta empobinada a sustituir unes pautes culturales y unes referencies identitaries como comunidá nacional por otres que fomenten l’alienación de la población en rellación al propiu territoriu col envís de llexitimar socialmente’l marcu de subordinación política y dependencia estructural d’Asturies al respective del Estáu español, garante de los intereses económicos de los oligarques d’un llau ya otru del cordal cantábricu”.

Poro, N’Ast, “como organización sectorial del Movimientu de Lliberación Nacional Asturianu que trabaya l’ámbitu cultural”, reivindica con esta campaña “la dignidá patria énte l’agresión permanente qu’implica la imposición del flamenquismu, que nun escaezamos que ye la variedá más rancia, reaccionaria ya etnocéntrica del nacionalismu españolista”, espliquen.

Les persones interesaes en collaborar na campaña pueden ponese en contautu con N’ast en L’Ayalga (cai Prendes Pando 11, Xixón) o nel corréu Nast.oficialida@gmail.com

Emmanuel Le Merlus, activista pola llingua bretona, ta de visita estos díes per Asturies, dempués de recorrer 17.000 km y más de 28 estaos col oxetivu de promover la diversidá cultural y el conocimientu mutuu ente les minoríes llingüístiques d’Europa. Esti viaxe ta patrocináu poles escueles en llingua bretona, pola Oficina de la Llingua Bretona, pol Institutu de la Cultura Bretona y pol Conseyu Rexonal de Bretaña.

A lo llargo d’estos díes, va aconceyar con dellos representantes del movimientu de reivindicación llingüística (Xunta pola Defensa de la Llingua Asturiana), d’Instituciones (Academia de la Llingua Asturiana), representantes políticos y educativos y con medios de comunicación.

Amás celebró un alcuentru cola prensa nel Conceyu Abiertu d’Uviéu, onde espresó la so opinión sobre la situación de la llingua asturiana, comentando “nun entender cómo l’asturianu sigue ensin ser oficial”.

Blogue del viaxe