Política

UNA de Mieres fizo pública, nun comunicáu, lo so refuga a l’actitú del Partíu Popular na Comisión de Cultura del Ayuntamientu, al abandonar un plenu del mesmu pola presentación de dos espedientes escritos dafechu en llingua asturiana.

Pa UNA de Mieres esta actitú ye un reflexu “del despreciu del PP pa cola llingua y la cultura del país, al tiempu que dexa a les clares la facilidá que tienen los grupos políticos n’Asturies pa saltar penriba de la llegalidá no tocante al asturianu”.

Asina mesmo UNA de Mieres “queda plasmada” pol usu d’espresiones tales como “presentado en un dialecto no oficial” que talamente, comenten dende la UNA “paecieren surdíes d’una conversación de chigre más que de la boca de responsable políticos a los que se-yos sobreentiende una cultura xeneral suficiente como pa saber que la llingua asturiana nun ye nengún dialectu sinon un idioma reconocíu por organismos internacionales como la UNESCO”.

UNA recuérda-y a la corporación municipal del Partíu Popular en Mieres que ta “caminando nel filu de la illegalidá arreblagando perriba la Llei d’usu y promoción del bable asturianu qu’ellos mesmos aprobaron cuando taben nel Gobiernu”.

Los miembros del PP de Mieres “nun entienden l’asturianu”

Una de les reivindicaciones más oyíes ente les bases del asturianismu políticu, la de la xunidá de los partíos nacionalistes, dio esta fin de selmana un pasu alantre. Les formaciones Andecha Astur y Partíu Asturianista roblaron un alcuerdu pol que se compromenten a una “xunidá d’aición”. L’alcuerdu espresa “la voluntá de les dos partes de caltener una comunicación permanente, intercambiar información y buscar puntos d’analís políticu compartíos sobre la realidá d’Asturies asina como, a partir de los elementos de coincidencia, entamar iniciatives de trabayu conxuntu sobre problemátiques concretes dende’l respetu a los sos compromisos particulares y quedando dende’l entamu asegurada la soberanía de les organizaciones pa continuar coles sos dinámiques y actividaes propies”.

L’actu, celebróse cola presencia de Mariu Arbesú, por Andecha Astur y Lluis Ánxel Nuñez pol PAS. Esti últimu comentó nel actu como esti actu “representa un acercamientu ente’l PAS y Andecha Astur que partiendo de cero permitirá dir conociendonos meyor y buscar les coincidencies ente les dos organizaciones pa ver que posibilidaes hai de trabayar conxuntamente”

Pa Mariu Arbesú “Esto ye una amuesa mui importante de voluntá d’entendimientu ente Andecha y el PAS. Andecha Astur fizo esta apuesta táutica y entama a dar resultaos pero queda munchu trabayu, paciencia y mano izquierda. Queremos que la sociedá asturiana perciba al traviés de xestos como esti que son posibles y necesaries otres alternatives a la política destructiva del gobiernu PSOE-IU”.

Bloque por Asturies, Izquierda Xunida y Los Verdes d’Asturies, amás de la organización Lliberación van celebrar mañana’l Día d’Asturies nel conceyu d’Illas. Los asistentes aconceyarán nel polideportivu de Caizuela pa esfrutar d’una xornada político-folixera.

IX d’Asturies escoyó esti ayuntamientu gobernáu por Alberto Tirador, Secretariu de Política de Conceyos d’IX, siguiendo la llínia entamada nes dos últimes ediciones del Día d’Asturies, celebraes en La Pola L.lena y Casu.

A les 12 hores va tener llugar una rueda de prensa na biblioteca pública d’Illas, Caizuela. (parte posterior del ayuntamientu) na que falarán: Manuel Couto, de Lliberación; Nacho González de Los Verdes; Pablo Fernández del Bloque por Asturies yJesús Iglesias, Coordinador Xeneral d’IX d’Asturies.

A les 13:00 h. Actu Públicu nel Polideportivu de Caizuela. (Cabo la casa conceyu) cola intervención de los mesmos representates de los partíos, que van echar dellos discursos embaxo la presentación d’Alberto Tirador, Alcalde d’Illas.

Esti añu cúmplense diez de la llegada a la presidencia del Gobiernu d’Asturies de Vicente Álvarez-Areces y dende la Xunta pola Defensa de la Llingua Asturiana víen nesti “un momentu bonu pa recordar lo que foi la so política no que se refier a la llingua asturiana”, que xulgue “foi de mal en peor, col perconocíu retrocesu nel númberu de falantes al cortase la tresmisión interxeneracional y la falta de derechos fundamentales de les persones qu’usen l’asturianu”.

“Asistimos, inclusive –comenta la XPDLLA- a la persecución de l’Alministración a ciudadanos qu’escueyen llibremente la llingua asturiana pa la so vida normal”.

La Xunta camienta que “la política arecista, nesti tiempu, nun foi nunca a pasar de les declaraciones d’intenciones retóriques y vacíes, de les visiones de la llingua museístiques y acomplexaes. Too ello traxo como consecuencia unes actuaciones llingüístiques pa cubrir l’espediente, omitiendo les sos obligaciones y, munches veces, tomando decisiones, por acción o omisión, perxudiciales pal futuru del idioma”.

Según esta organización “Nun se vio nenguna midida efectiva p’ameyorar la situación del asturianu nel sistema educativu (sigue la precariedá en tolos niveles), nos medios de comunicación (con una presencia marxinal nos medios públicos) y nos diferentes organismos de l’Alministración (qu’escaecen sistemáticamente lo necesario que ye la tresversalidá de les polítiques llingüístiques)”.

D’otru llau, la XPDLLA califica d’ “avance” la oficialización de la toponimia de dellos conceyos, que diz, “ ye exemplu de participación ciudadana y procuru técnicu, vese burlláu de contino pola falta sistemática de cumplimientu poles propies instancies del Principáu y poles entidaes vinculaes directamente a ésti (la Radiotelevisón del Principáu d’Asturies, Caxastur… ente otres)”.

Por eso, terminen dende la XPDLLA, “cuando ta acabando la triste y buxa etapa d’inoperacia política del arecismu, pidimos a les persones y partíos que nel futuru tengan responsabilidaes de gobiernu n’Asturies que tornen esta situación de desigualdá xurídica de la ciudadanía declarando la oficialidá de la llingua asturiana. De la mesma manera, habían ser quien a llibrase de les polítiques culturales inútiles y megalomaniátiques, y axeitar unes polítiques llingüístiques series, realistes y eficaces que permitan al idioma ganar falantes y espacios d’usu, asegurando asina’l so futuru”.

La formación Bloque por Asturies presentó nueva imaxe corporativa que fai un apueste por “remarcar los valores ideolóxicos qu’inspiren la política de la organización basada na seriedá, la vitalidá y la fuercia”.

BpA espera tresmitir les idees claves “de solidez y confianza”, incluyendo los colores que remarquen posiciones sobre cuestiones medioambientales, d’igualdá de xéneru, participación de la mocedá y la identidá cultural d’Asturies.

Pa la organización independentista el datu dfechu públicu hai poco de 4000 mozos asturianos colando del país amuesa “la gran veracidá que’l señor Areces tien”, que s’atreve a calificar esta emigración forciada ente la mocedá como una “lleenda urbana” ñegando dafechu esti problema.

Nuna nota fecha pública ayeri, Darréu siñala qu’Areces “entá nun pidió perdón” poles declaraciones famoses que fixo aquel 28 de febreru de 2005. Pa Darréu amás de pidir perdón y dar desplicaciones, Areces y el so gobiernu “deben de buscar una mena de solucionar el problema a curtiu plazu”. Dende la organización de mocedá afiten que’l “pieslle d’empreses y el desmantelamientu del texíu industrial d’Asturies nun ye precisamente una solución y ye daqué que’l presidente del “principado” y el so executivu tan tolerando, y munches vegaes sofitando”.

Dende darréu vense que los datos ñegativos “nun fain otra cosa que comfirmar qu’un futuru dignu dientru d’Asturies nun ye posible pa la mocedá coles polítiques neolliberales qu’Areces y el PSOE siguen, onde la patronal sal siempres beneficiada y los y les trabayadores ven el so emplegu pendiente d’un filu siempres”.

Aparte de denunciar la emigración forciada Darréu denuncia “la represión que sufren les presones y colleutivos que toquen esti tema y señalen al gobiernu d’Areces como culpables d’esti problema, yá que nun tardando el señor delegáu de gobiernu, Antonio Trevín, coles sos fuercies d’ocupación suelen meter el mieu nel cuerpu a la mocedá esmolecía por esta torga pal so futuru”.

Darréu camienta que lo que busca Areces y la FSA “ye perpetuase nel poder y na Xunta Xeneral, lo que-y fai que nun tea otra forma de facelu que mandar fuera d’Asturies a la mocedá, principal motor de la tresformación social y política d’una sociedá. A la par n’Asturies queden los más vieyos, fuercies inmovilistes que son el mayor sofitu que tien la FSA y los sos complices” y qu’esta torga pa la mocedá “nun ye namai qu’otru de los pegoyos nos que s’aida la FSA y Areces pa facer d’Asturies un barriu de Madrí y convertir Asturies nun parque temáticu asturianu, eso si ensín asturianos”.

El testu completu qu’asoleya la formación xuvenil pue lleese na so páxina web.

L’Institutu Asturianu de la Muyer va sofitar económicamente a Xente Gai Astur (Xega) n’asistencia xurídica a les muyeres víctimes d’agresiones lligaes a la lesbofobia y transfobia sigún apautaron la directora d’esti Institutu de la Muyer, María Fernández Campomanes, y representantes de l’asociación. La directora del Institutu comprometiose a entamar “una vía de collaboración pa reforzar el serviciu d’asistencia xurídica a disposición de les muyeres víctimes d’agresiones por lesbofobia y transfobia”.

Unidá Nacionalista Asturiana pidía-y esti vienres al gobiernu asturianu y a la Casa Conceyu de Cangas qu’habiliten la recoyida selectiva de basura en tola zona rural.

A la zona rural canguesa fai-y falta, según UNA, “la recoyida de cartones, plásticus ya vidrius pa acabar colos vertíos nos alrededores de los pueblos, que son focu d’infecciones o nial de perros salvaxes. La recoyida de plásticus ia especialmente necesaria, pola l.larga duración de los mesmu nel ambiente ya pola abundancia de plásticos. Nesta epoca hai muitos platicos de los silos. Estos plásticus tíranse ya van parar a las cunetas ou a los Rius ya’l romper enganchase nas ramas de los árboles”.

Dende UNA-Cangas camienten que “nun ia compatible tener un parque natural sin actuaciones pa que l’entornu seya realmente un parque natural, ente el.las la recoyida selectiva de basoria”.

El presidente del Partíu Popular d’Asturies, Ovidio Sánchez, y el voceru parlamentariu del PP na Xunta Xeneral del Principáu, Joaquín Aréstegui, ficieron anuncia ayeri de que van presentar una batería de propuetes en setiembre pa frenar la “estampida” que se ta produciendo de mozos asturianos a otres comunidaes.

El PPA pide un Plan Especial d’Emplegu Xuvenil, qu’ufra ayudes económiques a les empreses pa contratar mozos, fomentar los contratos indefiníos y estimular l’autoemplegu.

Les caberes cifres que se conocieren alluguen en 4.000 los mozos menores de 31 años que colaron d’Asturies nel primer semestre del 2009. Pal PP alcontrámonos delantre “d’una estampida dientro de los mozos que busquen emplegu”.

Unidá Nacionalista Asturiana (UNA) criticó esti día’l programa del prósimo San Mateu, por repetir cliches y escaecer a la cultura asturiana como referente. Dende UNA quier denunciase la política desendolcada pol Gobiernu del Señor Gabino, o más bien d’él al traviés del gobiernu del que ye alcalde, no que cinca a los conciertos de San Mateu.

Según una nota d eprensa espardida esti vienres ente los medios de comunicación, “un añu más la presencia de grupos asturianos, tantu na llingua’l país como en catellán, vuelve ser totalmente presencial. Mentantu’l Conceyu d’Uviéu anecia testeronamente en trayer grupos foriatos, que nos más de los casos, tienen menos auditoriu que los asturianos. Como máxima amuesa d’estos tenemos la vergoñosa ya insultante cantidá de perres que se-y van dar a la “tonadillera” Isabel Pantoja, trayendo arreyao darréu dexar ensin conciertos trés díes de corrío. Corriendo, amás, el riesgu de que faiga lo que yá ye zuna n’ella y nos sos representantes, la cancelación del conciertu por falta xente”.

Según Unidá Nacionalista Asturiana el más complexu sentir anti-asturianu “vuelve salir dende los Conceyos, esti casu n’Uviéu. Siguen aneciando en nun axixar la cultura asturiano y trayer la foriata que, como lleva pasando nos caberos tiempos, siguirán perdiendo les perres invertíes”.