Política

Un ciudadanu xixonés reclamó nel momentu d’anovar el so DNI y ante’l Delegáu del Gobiernu n’Asturies, la Comisaría de Gijón/Xixón y la Procuradora Xeneral d’Asturies, que se corrixan los erros llegales qu’apaecen nel so DNI, y que los funcionarios que lu atendieron, el pasáu 8 d’abril de 2010, na Comisaría de Gijón/Xixón dixeron “nun poder solucionar”.

El ciudadanu foi convidáu entós a pasar a un despachu de la Comisaría con un inspector, que-y fixo entrugues sobro les sos intenciones (cuando nun yeren otres que reclamar el cumplimientu de la llegalidá, como-y esclarió) L’inspector en cuestión volvió a indicá-y que “nada podíen faer cola so reclamación”. La única opción que-y dieron al ciudadanu foi salir indocumentáu de la Comisaría, o llevar el DNI colos correspondientes erros llegales y ortográficos.

El ciudadanu xixonés en cuestión dirixióse al Sr. Antonio Trevín, Delegáu del Estáu en Asturies, pa que se respete la toponimia oficial del so conceyu, pola que dende 2006, (BOPA Decretu 105/2006, de 20 de setiembre) el nome oficial ye “Gijón/Xixón”, y non como punxeron nel so DNI, “Gijón” nel casu del so llugar de nacencia, y “Xixon”, ensin tilde, y por tantu con una falta de ortografía, nel so llugar de vivienda, faciéndo-y escoyer ente poner “Gijón” o “Xixon”, cuando nengún de los nomes en sólu ye l’oficial agora, y poro, y siempres que nun se ponga “Gijón/Xixón” nun documentu oficial, ta incumpliéndose la Llei.

Amás, el ciudadanu pidió que’l so DNI apaeza n’asturianu, amparándose nel Títulu Preliminar y nos Artículos 3 y 14 de la Constitución española, y como reclamación, yá que cree que por ser asturianu y falante de la llingua propia d’Asturies nun tien porque ser “ciudadanu de segunda” o ensin los mesmos derechos que los demás, una y bones el DNI expédese n’otres comunidaes autónomes en versión billingüe, y xunto al castellán, en gallegu, catalán y euskera.

L’afectáu reclamó tamién énte la Procurador Xeneral y declaró que “llama l’atención a la propia Procuradora Xeneral, a la que se-y pide que medie pa que se cumpla la llegalidá vixente, por contestar a la protesta con un nuevu incumplientu de la toponimia llegal de Gijón/Xixón, yá que nos sos escritos de contestación apaez namás el topónimu “Gijón”, yá derogáu”.

La noticia espardióla Xuventú Asturianista y esta organización, nuna nota de prensa asoleyada esti día, da-y el so apoyu al ciudadanu y sofita la reclamación d’un DNI n’asturianu, “n’igualdá con otres CCAA del Estáu que tienen llingua propia”.

Unidá Nacionalista Asturiana sofitará esti vienres 7 de mayu, Día de les Lletres Asturianes, la convocatoria entamada pola Xunta pola Defensa de la Llingua Asturiana, “pa reclarar un añu más que se respeten los derechos de los asturfalantes pente medies d’un estatus llegal afayadizu pa la llingua asturiana”, según espresó la organización nun comunicáu que se sumó a los unviaos por Andecha Astur y Partíu Asturianista, que tamién van tar na convocatoria.

El “cortexu” d’UNA presentaráse baxo’l lema “Querémoste, Oficialidá, con toles lletres” yá que la organización asturiana entiende que la Oficialidá “ha de suponer tolos aspectos qu’aseguren el futuru del asturianu: tresmisión xeneracional, afitamientu nos medios de comunicación, normalización y prestixu social, inclusión dafechu nel sistema educativu y equiparación plena de derechos colos falantes de castellanu”.

Asina mesmo UNA anima a participar a toles persones esmolecíes pola situación de la llingua d’Asturies a participar na manifestación “amosando asina que la oficialidá tamién ye lo que más quieren”.

Un añu más, énte la cellebración del XXXI Día de les Lletres Asturianes el prósimu 7 de mayu, la organización política Andecha Astur vuelve a pidir la oficialidá pa la llingua asturiana, “como manera de garantizar los drechos llingüísticos de los asturfalantes, reconocíos por organismos internacionales comu la UNESCO, y comu primer pasu pa la dignificación, normalización social y caltenimientu de la llingua d’Asturies”, afirmen.

AA fai otra vuelta esti pidimientu, que vien acompañáu d’una denuncia: “la del xenocidiu cultural que tan cometiendo los dos principales partíos políticos con representación na Xunta Xeneral d’Asturies, PSOE y PP, al ñega-y a los asturianos un drechu democráticu que, por embargu, sí-y reconocen a la ciudadanía d’aquellos territorios del Estáu español onde hai una llingua propia estremada del castellán”.

Esta denuncia estiéndese tamién, p’AA, “a la postura caltenía por Izquierda Unida y les sos organizaciones “satélite”, que, magar que dicen defender la oficialidá del asturianu, activen plataformes de reivindicación llingüística cuandu-yos interesa pañar votos y desactívenles cuandu algamen el so oxetivu, que nun ye otru que’l d’ocupar la titularidá de dalguna Conseyería a cambiu de caltener al PSOE nel Gobiernu”, lo que p’Andecha ye “ñéga-y al Pueblu Asturianu, una y otra vegá, un drechu fundamental”.

D’otra miente, Andecha Astur tamién quixo facer públicu’l so determín de sofitar la manifestación que la Xunta pola Defensa de la Llingua Asturiana convoca coincidiendo col Día de les Lletres Asturianes, el próximu vienres 7 de mayu y fizo un llamamientu a los sos militantes y simpatizantes “pa que participen na mesma de forma activa”.

El Partíu Asturianista (PAS) va tar presente na Manifestación pola Oficialidá que convoca la Xunta pola Defensa de la Llingua Asturiana, esti vienres 7 de mayu, XXXI Día de les Lletres Asturianes. Militantes de Xuventú Asturianista y del PAS van repartir los folletos de la so campaña esplicativa, a favor de la oficialidá de la llingua asturiana y escontra “les mentires de los partíos mayoritarios sobre l’idioma”.

Nos folletos asoleyaos pol PAS, que van presentase nun actu de la Xuventú, esti xueves 6 a les 19:30, na Llibrería Alborá de Xixón, amuésense les declaraciones recientes de los llíderes de les “sucursales” asturianes d’IU-BpA, PSOE y PP, ente les que tán negaciones de la propia esistencia de la llingua, promeses incumplíes d’usu del asturianun na Xunta Xeneral y casos de marxinación llingüística a ciudadanos, ente otres cuestiones.

El Partíu Asturianista (PAS) “tien claro que los culpables de la situación de la llingua asturiana tienen nomes y apellíos, son los llíderes de los partíos que mos vienen gobernando nos trenta años últimos, que lloñe de normalizar l’idioma d’Asturies, fueron arrequexándolu cada vegada más”.

La formación política recuerda que lleva pidiendo la oficialidá de la llingua asturiana “dende la so fundación, va 25 años, y consiguió aprobar la Llei d’Usu del asturianu en 1998”, la única llei –recuerden- “que permite defender a los usuarios del asturianu de los abusos del gobiernu del PSOE ya IU-BpA (col sofitu del PP) sobre los ciudadanos”.

El Partíu Asturianista espera qu’esta seya “la cabera manifestación pola oficialidá, anque ye consciente de qu’esto namás va ser posible si se consigue facer del asturianismu políticu verdaderu, una fuercia influyente nes decisiones que se tomen na Xunta Xeneral”. El PAS, termien “trabaya pa volver a la Xunta Xeneral y consiguir pa tolos asturianos la oficialidá y la normalización social del asturianu”.

El Conceyu Abiertu Pola Oficialidá consideró esti vienres nun comunicáu que les declaraciones del presidente del Gobiernu asturianu, Vicente Alvárez Areces, son “un insultu a la intelixencia de la sociedá asturiana”. “Toles encuestes y estudios sociolóxicos fechos hasta agora demostraron qu’una amplia mayoría de tola sociedá ta a favor de la oficialidá de la Llingua Asturiana”.

Dende’l CAO considéren “qu’el presidente debería dexase de poner en boca de tola ciudadanía lo que nun ye más que la so opinión personal, y ponese a trabayar polos derechos fundamentales d’una parte de la xente d’Asturies que nun los tien reconocíos. Y eso, nel nuestru marcu llegal, namás se consigue cola reconocencia de la Oficialidá”.

Al traviés d’esa nota prensa, el CAO respondía a les declaraciones que’l presidente autonómicu fizo’l xueves, nes que consideraba que les postures favoratibes a la oficialidá son “minoritaries” y dicía barbaridaes llingüístiques como qu’esisten “diverses variedaes d’asturianu según les zones, ente elles la ‘fala’”.

A Areces présta-y la “convivencia natural” del asturianu y el castellán

La situación de marxinación social y llegal que vive la llingua asturiana ye pal presidente del Principáu, Vicente Álvarez Areces, “una situación “cola que la ciudadanía ta a gustu como ta”. Anque reconoz “Hai posiciones que quieren más”, matizando sicasí “ye una opción minoritaría”. Areces escaez la reinvindicación viva dende va más de trenta años y afirma “la sociedá tien perfectamente asumíu l’estatus actual del bable” y la so “convivencia natural”.

Amás, ve “inxusto” que s’acuse al Gobiernu de ser “opuestu” al asturianu y sorrayó “l’esfuerzu pol caltenimientu, promoción y usu del bable”, del mesmu. Areces afirmó tamién que l’asturianu ta bien como ta nel sistema educativu “ensin conflictos y de forma optativa”.

Amás defendió l’usu del términu “bable” frente a llingua asturiana, “porque asina lo recueye l’Estatutu de la rexón” y recordó qu’esisten “diverses variedaes d’asturianu según les zones, ente elles la ‘fala’”.

El Plenu del Senáu aprobó esti miércoles tres d’un alderique polémicu una propuesta pa reformar el so Reglamentu que va permitir xeneralizar l’usu de toles llingües autonómiques menos l’asturiana. L’euskera, el catalán, el valencianu y el gallegu pudieron sentise esti día llibremente nes intervenciones de dellos y delles senaoes.

Namás s’opunxeron a la propuesta la senadora d’UPN, María Caballero, y el PP en bloque arguyendo que’l castellán ye la llingua común a tolos senadores y que estos son representantes del pueblu español y non de los sos territorios.

La non oficialidá de la llingua asturiana dexa ota vuelta arrequexáu un derechu fundamental en perxuiciu de los asturianos.

La iniciativa partió de 34 senadores de tolos grupos, nun siendo del PSOE y del PP, que quieren estender estes llingües más allá de la Comisión Xeneral de Comunidaes Autónomes, na que yá se puen emplegar. L’alderique de güei foi intensu y el presidente Javier Rojo tuvo que pidir en delles ocasiones “respetu y silenciu” a los miembros de la cámara, que nun paraben de facer comentarios. Y dende la tribuna amás tuvieron llugar les apelaciones personales d’unos voceros a otros y tamién a senadores del PP que vienen de Comunidaes con llingua propia, ente ellos, a Manuel Fraga.

UNA denunció güei lo que consideren “un nuevu despreciu del PSOE ya IX énte too lo que significa cultura asturiana y el so caltenimientu, que se manifiesta nesta ocasión col afayu de 20.000 pieces abandonaes de la escavación de la Campa Torres”.

La vocera d’UNA-Xixón, Yolanda González afirma que “ los fechos denunciaos públicamente nos últimos díes, en cuantes qu’afecten a un bien declaráu d’interés cultural, pudieren ser constitutivos d’una infracción, inclusive bien grave, de la Llei 1/2001 de 6 de marzu de Padremuñu Cultural “ y anuncia que la denuncia efectúase nel marcu de l’aición pública que la mesma llei establez”.

González, considera inalmitible que “la nueva responsable de la escavación de la Campa Torres nun se plantegue siquiera onde s’atopa’l trabayu de les escavaciones efectuáu con anterioridá a la so llegada al puestu” y considera que “en conciencia, nuna actuación tan llamentable como ésta nun valen escuses nin de los nuevos nin de los anteriores responsables que van tener qu’encarar les sos respectives responsabilidaes”

IX d’Asturies súmase a la concentración que’l próximu sábadu, dia 24, entamen diversos colectivos en Xixón, a les 17 hores frente al teatru Xovellanos, “contra la impunidá del franquismu y el procesamientu del xuez Garzón”.

IX d’Asturies amuésase en contra de que “los franquistes sienten nel banquín a los demócrates, lo que ta pasando agora mesmu cola denuncia de Falanxe y el xuez Garzón”. IX d’Asturies nun puede tolerar “que nel nuesu país xúlguen a un xuez por faer cumplir la llei y recuerda que los crimes del franquismu son imprescriptibles porque son crímenes contra la humanidá”.

IX d’Asturies asegura que la democracia española “nun va ser una democracia consolidada hasta qu’estos crimes nun sían reconocíos como talos”. Y afirmen que “n’España inda hai miles de ciudadanos sumíos que los sos restos tán nes cunetes y nos montes d’Asturies y el PP sigue ensin condergar el franquismu”.

El voceru del Bloque por Asturies, Pablo González, pidió esti día al presidente del Gobiernu asturianu, Vicente Álvarez Areces, “el cese fulminante” de la Viceconseyera de Mediu Ambiente, Belén Fernández, pol incumplimientu del pactu de Gobiernu, darréu de les sosdeclaraciones favoratibles a la instalación del banzáu de Caliao. el Pautu de Gobiernu afitaba nidiamente que que nun se diba “tocar esi tema nesta llexislatura”.

Pablo González criticó la desllealtá constante pal pactu de gobiernu y reprochó la “hostilidá hacia les polítiques medioambientales, defendiendo proyectos tan dañinos como la incineradora o Caliao” de la Viceconseyera de Mediu Ambiente.