Política

L’Aconceyamientu de Xuristes pol Asturianu denuncia que la Procuradora Xeneral d’Asturies, equivalente al cargu de defensor del pueblu n’otros llugares, “vulnera un derechu humanu xustamente na convocatoria de la primera edición del premiu denomáu de Amparu de Derechos y Llibertaes” al nun permitir la presentación de convocatories usando l’asturianu, como afita la Llei d’Usu del Asturianu de 1998, y piden la rectifiación nes bases d’esti certame.

AXA albidra que “llaceriosamente los asturianos tamos tan avezaos a carecer actos de despreciu pol derechu al emplegu de la nuesa llingua protagonizaos pol gobiernu Areces y tolo que da vueltes alrodiu d’elli” que nun ven novedá na necesidá de denunciar esti tipu de fechos.

La organización de xuristes presidida por Xurde Blanco recuerda que “la llingua tradicional del paísénte los muérganos del Principáu d’Asturies ye un derechu fundamental proclamáu pelos artículos 2 de la Declaración Universal de los Derechos Humanos y 14 del Conveniu Européu de Derechos Humanos; recoyíu na Constitución Española, artículos 2, 14 y 96; ya interpretáu pel Tribunal Constitucional per dos veces: sentencia 48/2000 y autu de 25 de febreru de 2010”.

Ye por estes razones qu’AXA espera la rectifiación nestes bases per parte de la Procudoría Xeneral d’Asturies, pa lo que yá presentaron la correspondiente .

La senadora socialista por Asturies, Carmen Sanjurjo diz ser “una entusiasta de les llingües cooficiales; el pinganiellu namás lu uso col vascu”, afirma y “préstame sentilos falando en gallegu, catalán…”. “Si dalgún día l’asturianu ye cooficial tamién s’ufrirá la posibilidá de torna nel Senáu”, comentó a La Nueva España.

El candidatu a Presidente d’Asturies de los socialistes diz tar avezáu a usar el pinganiellu “usélu mil vegaes nel Senáu y nun pasa nada, agora s’amoplía pero non a too”.

Ovidio Sánchez, llider del PP asturianu, nun opina lo mesmo y diz que’l contribuyente “nun lo comprende, hai una llingua na que toos nos entendemos”.

Mientres l’asturianu sigue siendo una llingua marxinada nes instituciones asturianes y estatales.

El presidente d’Asturies, Vicente Álvarez Areces, destacó esti xueves que l’asturianu nun ye una llingua cooficial y por tantu “nun-y correspuende que nel Senáu tamién esista traducción de la mesma”. Unes declaraciones que recuerden cómo la falta d’oficialidá del asturianu fai perder puestos de trabayu a los conocedores del idioma, mientres financiamos les traducciones al gallegu, catalán y vascu.

Areces fizo les declaraciones nel programa Protagonistas Madrid” de Punto Radio Madrid, qu’esti xueves emitía’l so programa dende la Feria Internacional de Turismu d’España (FITUR).

“Nel Senáu creo que lo que se plantegen son les llingües cooficiales y el bable nun lo ye”, dixo Areces que recordó que l’asturianu “tien protección, sofítase’l so espardimientu y el so usu, ta recoyío nel Estatutu d’Autonomía protexer el bable y los sos variantes pero nun tien calter de llingua cooficial”. Areces añadió que’l Gobiernu d’Asturies “va siguir sofitando nos términos estatuarios nos que ta recoyío”.

El Bloque por Asturies vuelve a esixir al Ministeriu de Fomentu, FEVE, RENFE y la Dirección Xeneral de Política Llingüística que se cumpla l’usu de la toponimia oficial de Xixón. La reclamación vien pola falta d’usu del asturianu y la toponimia oficial na construcción y puesta en funcionamientu de la estación provisional nueva de trenes de Xixón, “na que puede vese na fachada, bien en grande, Gijón, ensin que apareza nin tenga visos d’apaecer l’otru topónimu oficial del conceyu; Xixón”.

El Bloque espera que-y pongan remediu a esta situación “illegal” enantes de la inaguración de la instalación ferroviaria, “y que la señalítica de la propia estación y los planos de llinies y demás elementos recueyan los topónimos qu’esti conceyu tien reconocíos como propios. Porque, como’l propiu Conceyu plubicita, agora son oficiales, agora usalos ye normal”, apunten dende la organización nacionalista.

El candidatu socialista a Presidente d’Asturies, Javier Fernández, declaró nun chat colos llectores de La Voz de Asturias que’l PSOE nun ta dispuestu a da-y el rangu d’oficialidá al asturianu “anque nun implicara imposición nenguna”. Fernández recordó que dende’l PSOE “siempres manifestamos abiertamente énte los asturianos la nuesa posición, que ta inscrita nel marcu de la Llei d’Usu y Promoción que tenemos pa protexer la llingua asturiana, ensin llegar a la cooficialidá”.

El fiscal superior de Galicia, Carlos Varela, pidió na so intervención nunes xornaes celebraes en Santiago de Compostela, onde s’analizó al situación sociollingüística de la fastera asturiana del Eo-Navia, que la Xunta de Galicia llegue a dalgún alcuerdu col Gobiernu d’Asturies pa “afalar l’usu del gallegu”

Valera llamentó la “desigualdá xurídica” ente los falantes d’unu y otru llau de la frontera asturgalaica. Refirióse tamién na so intervención a la situación de los “gallegofalantes de Zamora y Lleón”, que dixo viven tamién nuna situación de desigualdá.

Andecha Astur entama un Conceyu Abiertu esti sábadu 15 de xineru en Xixón, nel Llar d’Andecha, na cai Prendes Pando,11, de magar les 19:00 hores, col oxetivu de “siguir fomentando y afondando nel alderique alredor de la xunidá d’aición electoral” al que tan convidaes a participar toles persones interesaes nel tema.

Dende Andecha consideren necesario “abrir l’alderique sobre la necesidá de la xunidá d’aición electoral a la sociedá y actualizar los análisis que se ficieron n’anteriores conceyos abiertos al contextu políticu d’anguaño, mirando yá hacia les eleiciones de mayu”.

Andecha Astur considera un insultu les declaraciones del PSOE nes que’l so voceru n’Asturies, Fernando Lastra afirmó que l’arguyu de sentise asturianos ye propiu de xente “d’estrema drecha”. Pa la formación nacionalista “Escaez el PSOE y el Sr Lastra que la mayoría del Pueblu Asturianu ta arguyosu de ser y sentise asturianos y quieren seguir siéndolo y sintiéndolo”, preguntándose si “¿Ta llamando a los y les asturianes facistes?”.

Dende Andecha afimren “Sabíamos que nel PSOE da alerxa tolo que suena a asturiano, d’ehí les sos polítiques antiasturianes y d’esfarrapamientu del país social, cultural y económicamente”, sicasí, les declaraciones de Lastra, comenten “déxenlo mui claro”.

AA pide a Lastra qué esplique por qué l’arguyu de ser asturianu, catalán o alemán lleva a “situaciones dificiles” y nun pasa lo mesmos col “ so arguyu de sentise español y el so españolismu munches veces asoleyáu pol PSOE”, qu’afirmen tán “más averaos a la estrema derecha que los que nos sentimos arguyosos de ser asturianos y tenemos un proyeutu de futuru pal nuesu país”.

L’asociación N’ast, dedicada a la defensa de los drechos llingüísticos de los asturianos, denunció esta fin de selmana la postura de Francisco Álvarez-Cascos, ex miembru del Partíu Popular embarcáu agora nuna nueva aventura política de tintes rexonalistes. N’ast coincide col ex secretariu xeneral del PP na so denuncia de los “reiteraos insultos a la llingua asturiana per parte del PP”, pero desixen que se replantegue la so postura respectu a la oficialidá, dempués de que declare nos medios que “perxudica al bable”.

N’ast albidra estes declaraciones “infantiles ya inresponsables” yá que, recuerden, “la oficialidá ye un drechu indiscutible pa los asturianos y la única vía pa garantizar la pervivencia de la nuesa llingua”. Pa esta asociación, Cascos daña el llabor de les persones y asociaciones que “como nós, llevamos munchos años desixendo la Oficialidá como únicu marcu llegal posible pa la llingua asturiana”. Píden-y a Cascos “mayor respetu pa cola llingua asturiana”.

>foto1>El voceru de la FSA-PSOE na Xunta Xeneral d’Asturies, Fernando Lastra, critica’l discursu d’Álvarez-Cascos nel que dixo buscar que los ciudadanos recuperaren “l’arguyu de ser asturianos”. Pal llíder socialista Cascos de abandera un discursu d’”estrema derecha” cola so retórica sobre “l’arguyu de sentise asturianu”.

Foi na so intervención nel foru socialista “Modernización y eficacia en la Administración Pública: Transparencia y participación”, en Xixón onde añadió “l’arguyu de sentise asturianu o de sentise catalán o de sentise alemán lleva a situaciones mui complicaes”, manifestando “ye un discursu d’estrema drecha, clara y duramente”.