Política

El candidatu d’Uviéu pola Izquierda, Roberto Sánchez Ramos, propunxo esti día convertir la Fábrica de Gas nun contenedor d’actividá cultural, tres de xuntase colos miembros de la plataforma SOS Cultura. Les dos partes coincidieron amás pela mañana en reclamar una completa renovación de la política cultural municipal.

El conceyal destacó que los postreros 20 años de gabinismo supunxeron un atrasu ensin comparanza con otres ciudaes de similares característiques.

Sánchez Ramos comprometióse a recoyer y treslladar al conceyu toles propuestes de la plataforma SOS Cultura. Ente elles destaquen la recuperación de la Fundación Municipal de Cultura o la creación d’un Conseyu Municipal de Cultura que marque les llínees estratéxiques d’una programación de calidá y qu’atienda a la pluralidá de los gustos de la ciudadanía.

No tocante a infraestructures culturales, el candidatu de OI y SOS Cultura apuesten por convertir la Fábrica de Gas nun contenedor d’actividá cultural que ye más necesariu que nunca, según s’apuntó na xunta, tres la desapaición de toles sales d’esposiciones de titularidá pública.

El candidatu d’Uviéu pola Izquierda, Roberto Sánchez Ramos, fai apueste pola entrada del movimientu asociativu vecinal nos órganos de gobiernu municipales, como son les comisiones o la mesa de contratación. L’oxetivu sería averar a la ciudadanía los asuntos qu’ellí s’enceten y que dexe a los uvieinos llegar a conocer les principales empreses que caltienen relaciones col Conceyu. Nesti sentíu, recordó Sánchez Ramos, que nos dos últimes décades l’únicu provisor de material d’oficina foi la empresa Igrafo. Rivi realizó estes declaraciones demientres la xunta caltenida esti llunes cola Federación d’Asociaciones de Vecinos d’Uviéu. Ente’l conxuntu de midíes de mayor participación vecinal, el candidatu apuesta tamién pol plenu desenvolvimientu de la Llei de Grandes Ciudaes y dientro d’esti marcu xurídicu, la creación de 11 distritos. El candidatu d’Uviéu pola Esquierda, que tuvo acompañáu polos númberos dos, trés, cuatro y cinco de la candidatura, Alejandro Suárez, Emilio Huerta “Triqui”, Beatriz Quirós y Virginia Palacios, pidió a la FAVO un compromisu políticu col Conceyu que tres la salida del actual equipu de gobiernu va precisar de los esfuerzos de toos, dada por casu l’afogadiza delda municipal. Nesti sentíu, Sánchez Ramos sollertó que l’alcalde fai “una fuxida palantre, cargando inclusive contra’l presidente de la Federación Asturiana del Comerciu, Severino Álvarez Zaragoza”. En cuanto al tresporte públicu, el candidatu d’Uviéu pola Esquierda propón la creación d’un Foru del Tresporte qu’incluya a vecinos, conceyu, empresa axudicataria del tresporte y trabayadores de TUA. Esti alcuentru tendría como oxetivu rediseñar les nueves llínees del tresporte y amontar les frecuencies y servicios, yá que, aseguró, apenes se tocaron na última década. El candidatu fixo especial mención al refuerzu de servicios na zona rural y nel ámbitu del nuevu HUCA y La Corredoria.

La formación Independientes d’Asturies, que tien por cabezaleru al ex popular Juan Morales, ufiertó esti miércoles una rueda de prensa acompañáu pol presidente del so partíu, Miguel Ángel Villalba, y polos representantes del Conceyu Abiertu pola Oficialidá (CAO) Carlos Pulgar y Xosé Candel, onde dio a conocer la so postura sobre la oficialidá del asturianu, que van sofitar cuando llegue’l momentu de reformar l’Estatutu. Pa la formación “el so sofitu a la oficialidá ye totalmente compatible cola so recién reivindicación a favor del modelu d’enseñanza billingüe, inglés-castellán”.

Mientres, PSOE y Partíu Popular siguen ensin sofitar la oficialidá. La candidata popular, Isabel Pérez-Espinosa, declaraba en Les Noticies esta selmana que la so postura yera la de siempres “nun apostamos pola cooficialidá”.

Queda por conocer entá la postura d’otres formaciones nueves, como al lliderada por Francisco Álvarez-Cascos, Foru Asturies.

Jesús Iglesias, candidatu de IU-Los Verdes, y Gaspar Llamazares, diputáu federal d’IX, van asistir a la presentación de la candidatura de Llangréu, encabezada por Jesús Sánchez. La semeya va realizar a les 18.45 hores al llau del Centru de Salú de La Felguera (nes chimenees). A les 19 hores va empezar l’actu dientro del hotel. Na presentación tamién ta previstu qu’intervenga José María García, ex-alcalde de Llangréu.

Esti llunes pasáu presentóse en Xixón la candidatura xunitaria del Conceyu d’Unidá Popular de Xixón (CUPX) que va concurrir nes eleiciones de conceyos del 22 de mayu. Cándido Carnero, destacáu sindicalista de la CSI y dirixente de les lluches de la Naval Xixón, foi l ‘encargáu de lleer el manifiestu que daba a conocer al Conceyu d’Unidá Popular. Posteriormente, tomó la pallabra’l cabeza de llista, Boni Ortiz, conocíu activista de la izquierda combativa de Xixón que fincó na intención de facer una política diferente, dende la representación real de los y les trabayadores y aseguró que “se siguirá diendo al ayuntamientu colos mesmos pantalones vaqueros”.

Tres la intervención de Boni Ortiz tomo la pallabra José Enrique Fernández, qu’espresó la preocupación y la necesidá de trabayar “polos paraos y les paraes” de Xixón y “poles families que viven en situaciones mui dures”. Javier Cubero, sorrayó la hipocresía del gobiernu llocal de PSOE-IX, y la so falta de midides sociales pa solventar una crisis “que va a empeorar la situación de vida de la población xixonesa nos próximos años”. Na mesa también taben Maria Jesús Suárez y Arantxa Carcedo.

El CUPX pretende “batallar contra’l clientelismu y el nepotismu na alministración pública, al través del visor de la democracia real y participativa”. Nel Conceyu d’Unidá Popular de Xixón busquen llevar al ayuntamientu “la voz indignada d’aquellos que lluchen por un Xixón más igualitariu, más xustu y más participativu nel que se defendan la cultura y llingua nacionales d’Asturies”.

Les fuerces d’izquierdes sedríen mayoría na Xunta Xeneral depués del 22 de mayu polo que cinca a la circunscripción central, según una encuesta fecha por Estudios Sociales y Servicios a la Comunidá pa la coalición formada pol Bloque por Asturies (BA)y Unidá Nacionalista Asturiana (UNA).

Según esta encuesta, qu’asoleyó esti día Europa Press, los 34 escaños de la circunscripción central repártiríense con 14 pal PSOE (37,1% d’intención de votu), 9 pal PP (25,2%), 6 pa FAC (16,4%), 4 para IU-Verdes (12,8%) y 1 pa BA-UNA (3,3%). PAS-URAS, UPyD, Ideas y otros nun llograríen representación pola circunscripción central.

La ficha técnica de la encuesta diz que se fizo na segunda selmana del mes de marzu per mediu d’entrevistes telefóniques en families, per selección aleatoria de númberos de teléfonu, y con distribución proporcional nos conceyos. En total realizáronse 1.000 encuestes.

La Xunta pola Defensa de la Llingua Asturiana afirma “acabar de plasmar” al comprobar l’ausencia del asturianu y l’incumplimientu de la toponimia oficial en toles instalaciones y señalética del reinauguráu, depués de munchos años, Muséu Arqueolóxicu d’Asturies. Pa la Xunta, la Conseyería de Cultura “vuelve a rise de la llegalidá y del patrimoniu que tien el mandáu de protexer”. Dempués de 12 años de retrasos y polémiques, y 20 millones d’euros gastaos, “nin siquiera ye quien a cumplir unos mínimos razonables nel respetu a la ciudadanía”, afirmen.

Amás, denuncien lo qu’albidren “silenciu cómpliz” de la Dirección Xeneral de Política Llingüística, dependiente d’esa mesma Conseyería, que pa la Xunta “dexa en papel moyao la so supuesta “promoción” del idioma y la toponima oficial”. Y y que según recuerden dende la XPDLLA: Al otru día d’inaugurase un Muséu onde nun se respeta la toponimia oficial, la Dirección Xeneral de Política Llingüística fai una rueda de prensa pa esplicar cómo promocionen la toponimia oficial. Nun pueden reclamar credibilidá cuando la humillación nel departamentu propiu ye la norma que marca la so inoperancia. ¿Cómo pue un departamentu l’Alministración, la mesma qu’aprueba nel BOPA la toponimia oficial, incumplir sistemáticamente la llegalidá toponímica? Nun hai más que ver los paneles: “Morillón” (pol oficial Moriyón), “Gamonedo” (pol oficial Gamonéu), “Cabañaquinta” (pol oficial Cabanaquinta), etc.

Ye por ello que la Xunta reclama “la rectificación inmediata de tolos elementos d’información, señalización y descripción del Muséu Arqueolóxicu d’Asturies p’adaptalos a la llegalidá vixente en materia de toponimia”. Amás “esixen la presencia de la llingua asturiana n’igualdá de condiciones coles demás llingües presentes nel Muséu, porque l’unicu billingüismu qu’entienden los responsables de Cultura paez ser col inglés”.

Los diputaos de CiU, EAJ-PNV, ERC, ICV y el Grupu Mistu presentaron esti martes pasáu nel Plenu del Congresu una propuesta reforma del Reglamentu de la Cámara Baxa, pa que se permitiere l’usu de les llingües cooficiales, tantu n’escritos como n’intervenciones parllamentaries. El resultáu foi un pautu de bloquéu ente PP y PSOE, 308 votos en contra frente a 24.

Sicasí, dos diputaos, del PNV y ERC, Aitor Esteban y Joan Tardá, falaron dellos minutos en catalán y en vascu, como reivindicación. Énte esti usu de les sos llingües, el presidente del Congresu, José Bono alvirtió “nun voi volver a permitilo, mientres nun se cambie la llei nesta casa ha falase castellán”. Otru diputñau, nesti casu del PP, calificó mal altu la lleva esta acción como daqué “intolerable”.

Na tarde del llunes 21 cellebróse na Casa Sindical de Xixón una xunta de representantes de la executiva de la CSI (Corriente Sindidcal d’Izquierda) y de la xunta nacional de Conceyu Abiertu. Nesa xunta espúsose, según espliquen dende CA “una perinteresante bayura de temes, dende les polítiques gubernamentales que tienen como oxetivu’l convertir Asturies nun parque enerxéticu en función de planificaciones estatales, hasta la necesidá urxente de desendolcar dinámiques unitaries de too tipu, que fructifiquen n’espacios coleutivos d’alderique y acción pa la defensa eficaz de los intereses de clase de los y les trabayadores asturianos”.

Tamién esistieron coincidencies al rodiu de que la presencia institucional “tien que ser fundamentalmente ún altavoz al serviciu de los movimientos sociales de base dientro d’una estratexa de confrontación belixerante cola clase política que gobierna Asturies”. CSI y Conceyu Abiertu falaron sobre la crisis económica y l’unidá d’acción dende la esquierda.

Esti sábadu pasáu, 19 de marzu, simpatizantes y militantes del PAS y de la URAS inauguraron la sede del PAS en Xixón, que ta asitiada na cai Fonte’l Real 45. A lo llargo de la selmana la sede tará abierta llunes, martes y miércoles a partir de les 19:00 hores.

Na inauguración participaron los candidatos nacionales d’Unión Asturianista URAS-PAS, Xuan Xosé Sánchez Vicente y Javier López, amás de la candidata de la coalición en Xixón, Margarita Cabana.