Política

Teresa Alonso, secretaria xeneral de Foru Asturies, diputada y responsable de Política Llingüística d’esti partíu firma l’últimu comunicáu de la formación política asturiana sobre l’idioma d’Asturies. Nél, la formación lliderada por Cascos recuerda’l so sofitu “al desenrrollu de la Llei d’Usu y Promoción del Bable/Asturianu” y el so compromisu pa “recuperar la dignidá del idioma como mediu de comunicación”.

El documentu, redactáu en castellán, titúlase “L’usu del Asturianu dende’l respetu a toos”, y nél Foru diz atopase “lloñe d’otres postures demagóxiques que piden respetar la Llei d’Usu y Promoción del Bable/Asturianu, pero que nin la respeten nin promocionen y/o usen la ‘llingua’”.

La postura de Foru con respectu al asturianu, afirmen “ye clara”. Como exemplu, recuerden que’l Conseyeru de Cultura d’Asturies, Emilio Marcos Vallaure, usó l’asturianu na so intervención énte la Xunta Xeneral d’Asturies, lo que califiquen “como una amuesa más de la normalidá social que tien que tener esti patrimoniu cultural de tolos asturianos”. Según Alonso “la so intervención contribuyó a da-y más considerancia y prestixu que pallabres vacíes”.

La diputada de Foru Asturies remóntase a la hestoria y recuerda que l’asturianu tenía prestixu “ente los sieglos VIII y X, cuando los primeros reis cristianos usaben l’asturianu como la so única llingua” y afirma que foi col asturianua “cola qu’entamaron la espansión de la Reconquista”.

Col desenrrollu de la Llei d’Usu y Promoción del Asturianu Foru Asturies, “quier acabar con unu de los problemes que tien l’asturianu como llingua sociolóxicamente minoritaria, que ye’l de tar disociada d’aquellos ámbitos de comunicación de prestixu”. Por ello la formación de Francisco Álvarez-Cascos quier “sacar del llar la llingua, como parte de recuperar l’arguyu polo nueso, porque l’asturianu nun ye menos que nenguna otra llingua”.

Foru recuerda, sicasí, que siguen “apostando pola llibertá d’elección, y ye qu’aspirar a la normalización del asturianu implica’l respetu absolutu a quien decide usar solamente l’español”. Según la formación gobernante “N’Asturies, al contrariu que n’otres comunidaes, convivieron en perfecta harmonía dambes llingües a lo llargo de toos estos sieglos, y Foru namás quier facer normal lo que siempres tuvo ehí”.

Comunicáu completu

Les declaraciones de Llamazares, nun rueda de prensa conxunta con miembros de la dirección de l’Academia de la Llingua Asturiana la selmana pasada, califíquense per parte de l’Asociación Cultural N’Ast como “un nuevu intentu de manipular de forma oportunista’l conflictu llingüísticu”.

Los responsables de N’ast albidren “vergoñantes y demagóxicos” los recientes pronunciamientos públicos que Gaspar Llamazares adoptó nel marcu de la so pre-campaña electoral.

Pa N’ast resulta “cuando menos esperpéntico” que’l que fuera másimu dirixente d’IX, y, afirmen “dempués de qu’esta formación política estatalista tuviera ocho años incumpliendo les sos promeses electorales sobro la oficialidá y participando nun gobiernu de coalición col PSOE, agora pretenda de nueu apoderase de forma electoralista d’una reivindicación ciudadana que realmente nunca nun alquirió presencia na so particular axenda política”.

Pa N’ast “el so supuestu compromisu a trabayar pola Oficialidá (cola consiguiente reforma estatutaria) dende’l grupu parllamentariu d’IX en Madrid vien a ser un auténticu insultu a la intelixencia”, yá que recuerden qu’“el principal bloquéu qu’atopa la reconocencia plena de los derechos llingüísticos s’alcuentra precisamente nel parllamentu d’Asturies”, onde pal colectivu “bien conocemos cuála foi la costancia, la fondura y l’entidá de los compromisos electorales d’IX, siempres mui per debaxo del esfuerzu que realizó’l PAS con un solu escañu a lo llargo de la llexislatura 1995-1999”.

Llamazares comprométese a lluchar pola oficialidá del asturianu dende’l Congresu

El candidatu d’Izquierda Xunida d’Asturies al Congresu de los Diputaos, Gaspar Llamazares, aconceyó xunto a la candidata al Senáu y conceyala de cultura de Castrillón, Esther García, cola presidenta de l’Academia de la Llingua Asturiana, Ana Cano, pa tratar cuestiones llingüístiques alredor de la llingua asturiana. El candidatu de la coalición d’izquierdes comprometióse a facer fuercia dende’l Congresu pa que la oficialidá del asturianu se recueya modificando l’Estatutu d’autonomía, amás de busca solución pa la situación d’interinidá que viven los profesores d’asturianu. Llamzares comprometióse tamién a lluchar pol cumplimientu de la Llei d’Usu del Asturianu y a “tar atentos a cualesquier iniciativa que tenga que ver coles llingües y el so usu nes dos cámares”.

Llamazares recordó que los profesores d’asturianu tán nuna situción d’interinidá “porque’l Ministeriu nun reconoció nel catálogu d’especialidaes la d’asturianu”. A xuiciu de Llamazares esta situación ta produciendo una discriminación frente a los d’otres especialidaes, yá que viven en situación d’interinidá mientres nun se convoquen oposiciones. De la mesma, recordó que se trata d’una reivindicación xusta y de sentíu común” yá que n’Asturies yá esiste la especialidá na Universidá, con un minor y un máster. “Esti puntu esta recoyíu nel programa col qu’IX d’Asturies va allegar a les elecciones del 20-P”, recordó.

Asina, Ana Cano señaló, na so xunta con IX que, magar que la política llingüística correspuende al Gobiernu autonómicu, hai cuestiones que dependen del estatal, como ye’l casu de la reconocencia de la especialidá, “que tien una fácil solución al marxe de la oficialidá”.

Pela so parte, Esther García, quien tamién exerció como profesora d’asturianu, recordó que tol profesoráu de llingua ta en precariu . “La formación yá la tenemos”, recordó,la candidata al Senáu, señalando que namás falta la especialidá.

Llamazares reconoció que la reforma estatutaria nun ye una prioridá pal restu de fuercies polítiques presentes nel parllamentu y que na anterior llexislatura namás IX defendió la cooficialidá na reforma atayada. Amás, señaló que mientres nun se consiga la oficialidá, “hai un camín por percorrer col esplegue de la Llei de Promoción y Usu”.

Conceyu Abiertu por Noreña vien de denunciar’l refugu a una propuesta de so pa que nun se repitan los fechos polos que va pocos meses, l’Alcalde d’esti conceyu, el socialista Cesar Movilla, nun aceptó una moción d’esti grupu por tar redactada n’asturianu. Conceyu Abiertu presentó una moción billingüe (que pue consultase nel enllaz qu’ufre esta noticia) onde solicitaba al plenu que se pudieran presentar namás n’asturianu nel futuru, recibiendo’l votu en contra de PSOE ya IDEAS, les abstenciones de PP y FAC, y los votos a favor de los independientes y el Frente de la Izquierda, amás del grupu que presentaba la moción. Les protestes nun se ficieron esperar, l’Academia de la Llingua Asturiana y l’asociación N’ast yá s’espresaron en contra d’esta decisión de los socialistes.

Pa N’ast “el PSOE de Noreña caltien la so actitú cerrisca haza la llingua asturiana” y “non solamente prohibe l’usu del asturianu sinón que torga que pueda aldericase sobre ello”, polo que califiquen al PSOE como “organización fondamente antiasturiana y antidemocrática”, yá que torga “l’exerciciu d’un derechu humanu y civil”.

Pela so parte, l’Academia de la Llingua Asturiana, n’enterándose del determín del alcalde de Noreña, de refugar y nun tramitar nel Plenu del pasáu xueves 29 de setiembre una moción del grupu políticu «Conceyu Abiertu», sobro’l derechu a tratar mociones escrites en llingua asturiana quier treslladar a la opinión pública asturiana la so más fonda esmolición énte la reiterada “falta de respetu” qu’amuesa’l rexidor noreñense hacia la llingua y la cultura asturiana ya, inda más, afirmen “hacia’l propiu derechu de los ciudadanos del conceyu a usar la llingua d’Asturies”.

Pa l’ALLA esti fechu amuesa “la necesidá de d’atayar situaciones como les descrites pente medies del reconocimientu del asturianu como llingua oficial n’igualdá de condiciones que’l restu de llingües del Estáu”.

Moción presentada por Conceyu Abiertu

El conseyeru de Cultura y Deporte del Principáu d’Asturies, Emilio Marcos Vallaure dexó perafitáu esti llunes so compromisu escontra la llingua asturiana y el gallegu-asturianu al emplegala dafechu nel Parlamentu autonómicu, na so primer comparecencia ante la Cámara asturiana.

Vallaure compareció esti llunes na Comisión de Cultura y Deportes de la Xunta Xeneral del Principáu dientro de la ronda de comparecencies parlamentaries de los miembros del Executivu asturianu pa informar sobre les sos respectives árees y aprovechó pa comprometese a qu’el so departamentu faiga un esfuerzu pergrande “en relación col asturianu y el gallegu-asturianu”. Nesti sen dixo qu’esa dirección xeneral va depender directamente d’ellli, dando asina amuesa de la importancia que-y concede, por ser la llingua asturiana un “derechu cívicu” y un espaciu de “llibertá y tolerancia”. Particularmente importante, añedió, ha ser n’ámbitos como la Universidá d’Uviéu y notres alministraciones públiques.

Vallaure tamién dixo que l’asturianu y el gallegu-asturianu han de considerase como “llingües d’España y parte del patrimoniu común”, cuidando con que cunten cola correspondiente reconocencia llegal y constitúin una realidá llingüística.

A la vista de les comparecencies nestos dos díes últimos de los representantes de les conseyeríes de Cultura y d’Educación, la Xunta pola Defensa de la Llingua Asturiana vieno acabante esti martes de facer delles reflexones, entamando por, a pesar d’apreciar un tonu xeneral positivu, nun “dexar d’echar en falta unos niveles de concreción más altos na definición de les llinies de trabayu inmediates. La ellaboración de planes de normalización, que puen ser ferramientes bien útiles pal desarrollu d’una política llingüística eficaz, desgraciadamente –como nos muestren esperiencies pasaes– ensin una voluntá clara na toma de midíes, acaben por convertise en referencies teóriques ensin llegar a tener aplicación na realidá”.

La Xunta Pola diz por eso que nun-yos queda otra qu’insistir “na necesidá de la puesta en marcha inmediata d’una política tresversal de visualización y usu del asturianu en tolos sectores, entes, departamentos y dependencies públiques. Al respective, paez-yos esmolecedor qu’en tola esposición “nun se ficiera nin una sola referencia a la situación de la llingua asturiana nel sistema educativu, teniendo en cuenta’l desastrosu empiezu del cursu en Primaria y la llaceriosa situación que presenta la escolarización del idioma en Secundaria. Namás hubo referencies a estos temes cola interpelación de la diputada Emilia Vázquez, d’IX, y les contestaciones volvieron a ser evasives”.

Polo tanto, la Xunta insta a la conseyería d’Educación a “l’aplicación inmediata de los preceptos llegales existentes, que tienen qu’asegurar el derechu al estudiu de la llingua asturiana n’igualdá de condiciones coles demás materies, como venimos esixendo dende hai años. Y eso supón, ente otres coses, la creación de la especialidá de Llingua Asturiana y les garantíes pa que l’asignatura en Secundaria seya voluntaria y non optativa”.

Los representates de la Xunta pola Defensa de la Llingua Asturiana, Carlos Pulgar y Llucía Menéndez, aconceyaron esti miércoles 14 de setiembre col nuevu director xeneral de Política Llingüística, Alfredo Álvarez Menéndez. Esti alcuentru forma parte de la ronda de contactos que la organización ta teniendo pa conocer les llinies de trabayu del Gobiernu nuevu y pa esponer les sos propuestes en cuantes a la llingua asturiana.

La organización de defensa del idioma asturianu treslladó-y al Director Xeneral delles reivindicadiones y tratáronse cuestiones sobre l’usu del asturianu poles Alministraciones públiques, la situación de los servicios de normalización llingüística nos conceyos, la educación, los medios de comunicación y la toponimia.

La Xunta pola Defensa de la Llingua Asturiana quixo sorrayar asuntos como la tresversalidá del usu del asturianu nel llabor cotidianu de los departamentos de l’Alministración pública, o la estabilidá y puesta en marcha efectiva de la rede de normalización llingüística de los conceyos, afitando y optimizando llabores y recursos, amás d’abrir, consolidar y ampliar los servicios, y facer siguimientu continuu y solucionar los problemes de los servicios qu’anguaño tán pesllaos por delles razones nos conceyos de Mieres, Corvera, Siero y Piloña.

Asina mesmo, la organización treslladó a Alfredo Álvarez Menéndez el so esmolecimientu pola falta d’aplicación efectiva de los topóminos que yá son oficiales por decretu nes Alministraciones tanto autonómica como estatal y nel Ente Públicu de Radiotelevisión, pal que tamién se reivindicó l’usu vehicular del asturianu nesta plataforma normalizadora fundamental pal futuru del idioma. Al respective de la enseñanza, asuntu yá tratáu más fondamente nel conceyu cola Conseyera d’Educación y Universidaes, amosóse la preocupación fonda de la organización pola situación tristemente repetida tolos empiezos de cursu na que la falta de dilixencia na axudicación y cobertura de places afecta gravemente al alumnáu, torgándo-y el so derechu básicu al estudiu.

Esta cabera cuestión dexa a les clares tanto la necesidá de regularizar y normalizar les condiciones del profesoráu como d’afitar la presencia efectiva del idioma en tolos niveles del sistema educativu.

Alfredo Álvarez Menéndez amosó una actitú reflexiva y positiva al respective de les midíes necesaries pa la normalización y comprometióse al «desarrollu positivu y non restrictivu de la Llei d’Usu y Promoción de la llingua asturiana».

La Xunta pola Defensa de la Llingua Asturiana va tar sollerte a la definición y cumplimientu del plan de trabayu del Gobiernu asturianu en materia llingüística. Sicasí, la organización de defensa de los derechos de los asturiano-falantes considera’l desenvolvimientu de les midíes anunciaes dientro del marcu actual como un reblagu previu a la tutela efectiva de los derechos llingüísticos de la ciudadanía que namás va poder garantizase cola oficialidá de la llingua asturiana.

El Conseyeru de Cultura y Deportes, Emilio Marcos Vallaure, va esponer nuna comparecencia na Xunta Xeneral del Principáu d’Asturies nos próximos díes les llinies de trabayu en materia de política llingüística. L’anuncia fízola’l Direutor de Política Llingüística, Alfredo Álvarez, nel trescurrir del aconceyamientu que caltuvo esti miércoles con representantes de la Xunta Pola Defensa de la Llingua.

Esti miércoles 14 setiembre a les 10 de la mañana na sede de la Conseyería de Cultura y Deporte ,C/ Eduardo Herrera “Herrerita” Edif. Buenavista, d’Uviéu; representantes de la Xunta Pola Defenta de la Llingua n van caltener una reunión col Director Xeneral de Política Llingüística pa tratar la situación de la llingua asturiana.

En saliendo d’esti conceyu, la XDLA treslladará a los medios les impresiones sobre’l mesmu.

Los partíos nacionalistes asturianos van celebrar un añu más el Día de la Nación n’espacios estremaos. La coalición de Bloque por Asturies y Una va facer los sos actos na Plaza d’Alfonso X el Sabiu, en La Pola (L.lena) dende les 13:00 hores, y va consistir nun actu políticu y una xinta popular. Pela so parte Conceyu Abiertu convoca pa esti xueves 8 setiembre una manifestación n’Uviéu pola soberanía y l’autodetermín.

La manifestación de CA va tener la so salida de la Estación del Norte a les 13:00 hores y baxo’l lema “Más Asturies, Menos España”.

D’otra banda, la coalición del Partíu Asturianista y la URAS nun va facer nengún actu oficial, anque’l presidente del PAS, Xuan Xosé Sánchez Vicente comentó que va facese un “actu informal” de militantes.