Política

Dempués de la rolda de contactos con diputaos y senadores que fizo Iniciativa pol Asturianu va unos meses, Izquierda Xunida fizo a petición d’esta organizacón una entruga parllamentaria per escrito al Ministeriu de Fomentu sobre l’usu de la toponimia oficial, que vien incumpliéndose dafechu nes carreteres estatales. Apocayá contestó Fomentu y la so argumentación lléndase a dicir que la llingua asturiana “nun ye oficial”. En respuesta a lo dicho, Iniciativa pol Asturianu, denuncia que’l Ministeriu de Fomentu “manipula la llexislación al so favor”. Si bien l’asturianu nun ye oficial, espliquen, “la toponimia tradicional recuperada y aprobada pol Gobiernu d’Asturies sí que tien esi rangu, y ye d’usu obligáu pa tolos estamentos públicos, incluyíu’l Ministeriu que xestiona les carreteres estatales al so pasu per Asturies”.

Según comenenten dende la organización “la normativa que cita Fomentu refierse a la rotulación d’información nes señales, casu de lletreros como “toles direcciones”, “salida”, o “centru ciudá”, que nes carreteres estatales tien que ponese nes llingües oficiales del territoriu pel que pasa, pero en nengún casu a la topinimia”. Dende Iniciativa pol Asturianu insisten en que “los nomes de llugar tienen que ponese en tolos casos na forma na que tán oficializaos nel BOPA”.

Énte esta respuesta, Iniciativa pol Asturianu anunció yá que va solicitar un conceyu col Delegáu del Gobiernu n’Asturies, Gabino de Lorenzo, y el responsable de Formentu na comunidá, “col envís de buscar solución a esta llamentable situación d’illegalidá, amás d’aprovechar pa tratar otres cuestiones d’importancia pal idioma y que dependen del Gobiernu d’España”.

Iniciativa pol Asturianu denuncia que’l Rei marxina al asturianu ente les llingües del Estáu. Y ye que Casa Real anunció qu’esta nueche’l discursu del Rei Xuan Carlos va traducise a catalán, gallegu y vascu, pero non al asturianu. Por ello, Iniciativa pol Asturianu fizo llegar a la Casa Real la so quexa porque la institución “nun usa l’asturianu xunto al restu de les llingües del Estáu”. Un fechu qu’Iniciativa pol Asturianu ve como “una nueva marxinación de la llingua asturiana frente al restu de llingües del Reinu per parte de la Casa Real y el Rei”, como yá denunció la organización va unos meses, al estrenase páxina web de la Casa Real con versión nes llingües oficiales, pero escaeciendo al asturianu.

Como yá espresó entós la organización pol tema de la páxina web real, dende Iniciativa pol Asturianu recuerden qu’“el fechu anómalu de que la llingua asturiana nun seya entá oficial nun quita pa que la Casa Real use l’asturianu, yá que la normativa actual obliga a les instituciones a protexer y fomentar el so usu”.

Por ello Iniciativa pol Asturianu solicita a Casa Real que “rectifique y ponga a disposición de los ciudadanos una versión n’asturianu del discursu que van emitir esta nueche les televisiones, si ye qu’esta institución quier siguir diciéndose representantes de tolos ciudadanos del estáu”, lo qu’entendienden “tien qu’incluyir tamién a los asturianos”.

El proyectu de presupuestu que pautaron FSA-PSOE, Izquierda Xunida y UPyD pal añu 2013 va dedicar 1.706.735 euros a la promoción del asturianu, lo que supón una baxa, una cifra que supón una baxa del 14%. La Conseyera Ana González anunció que van eliminase les ayudes p’asociaciones, empreses y p’actividaes cinematográfiques qu’usen l’asturianu, anque dixo que les de medios de comunicación y música van medrar. Esto supón que los pocos pasos daos na normalización del asturianu nel ámbitu de la empresa y l’asociacionismu podríen vese desaniciaos en pocu tiempu.

El grupu parllamentariu de Foru Asturies respondió a esta baxada cola intervención del diputáu Manuel Peña na Xunta Xeneral del Principáu nel turnu d’afitamientu de posiciones na comparecencia de la Conseyera d’Educación, Cultura y Deporte, Ana González:

Tocantes a la promoción y normalización social de la Llingua asturiana, l’amenorgamientu del 36,27 por ciento en comparanza colos actuales presupuestos prorrogaos ye un duru golpetazu pa la promoción del asturianu.

Iniciativa pol Asturianu dio anuncia d’una Entruga al Gobiernu d’España qu se presentó nel Senáu estos díes y que se fizo gracies a la rolda de contactos con partíos políticos, senadores y diputaos del Congresu que fizo esta organización. El senador Jesús Iglesias, d’Izquierda Xunida, presentó una entruga al Gobiernu d’España na que se-yos pide esplicaciones pola falta d’usu de la toponimia tradicional aprobada n’Asturies como oficial. Una toponimia que según espliquen dende Iniciativa pol Asturianu “sigue apaeciendo en cartelos de nueva fechura con versiones yá derogaes por nun responder a les formes tradicionales”.

Estos casos vienen asocediendo en dellos puntos del país, “como yá denunció, por exemplu, l’alcalde de Siero”, comenten dende la organización. Reclámose naquel casu al Ministreriu de Formentu “pola nueva salida d’una autopista estatal que pasa pel so conceyu y que nun tenía les señalizaciones cola toponimia oficial, sinón coles formes anteriores”, recuerden.

Tamién por petición d’Iniciativa pol Asturianu, la entruga fecha al Gobiernu nel Senáu presentóse con versión n’asturianu a la cámara alta. Y ye que nesti órganu “pueden usase con cierta normalidá toles llingües oficiales del Estáu, pero nada nun se diz de les que, como l’asturianu, y de forma inxusta, nun reciben esti mesmu tratamientu nos sos estatutos d’autonomía”, espliquen y denuncien dende Iniciativa pol Asturianu.

Inicitiva pol Asturianu valoró “de forma positiva” esta Entruga al Gobiernu d’España, al mesmu tiempu que recuerda “qu’equí tamién, n’Asturies, sigue incumpliéndose la toponimia oficial en munches ocasiones per parte del Gobiernu d’Asturies y d’otres instituciones” y que ye importante “cambiar esta situación y recuperar la toponimia tradicional de forma efectiva”.

Na rolda de contactos citada, miembros d’Iniciativa pol Asturianu aconceyaron con cargos electos de Foru Asturies ya Izquierda Xunida, y anuncien que “siguen a la espera de contestación per parte de FSA-PSOE, PP y UPYD, qu’entá nun dieron respuesta nenguna”.

Reproducimos completa la Entruga al Gobiernu presentada nel Senáu n’asturianu y castellán:

La puesta en serviciu d’estremaos tramos d’autopistes y autovíes n’Asturies ta trayendo l’allugamientu de distintes señales que contienen la denomación de los llugares que percuerren.

2.- Si’l Gobiernu piensa usar la toponimia oficial n’asturianu nes víes de comunicación embaxo la so dependencia n’Asturies.

Miembros de la dirección d’Iniciativa pol Asturianu aconceyaron esti miércoles pasáu na sede d’Izquierda Xunida d’Asturies cola diputada Emilia Vázquez, en representación del grupu parllamentariu d’IX, y col senador Jesús Iglesias. El conceyu celebráu n’Uviéu xiró alredor de l’actualidá del idioma y de les iniciatives que la organización política pueda presentar nun futuru. Dende I’asociación valoróse positivamente qu’IX “ye l’únicu grupu parllamentariu que recueye nel so programa la oficialidá de forma abierta”. Izquierda Xunida comprometióse cola organización en delles cuestiones, como presentar una enmieda a los presupuestos xenerales del estáu, pa que se financie a l’Academia de la Llingua Asturiana, como al restu de les academies de llingües del estáu, que reciben ente 170.000 y 200.000 euros.

Iniciativa pol Asturianu presentó a Izquierda Xunida la so opinón al rodiu del Informe sobre’l cumplimientu de la Carta de les Llingües Minoritaries d’Europa, tratáu firmáu pol estáu español, y nel que’l Gobiernu d’Asturies nun salió bien paráu de les valoraciones del Conseyu d’Europa, qu’encamienta a la oficialización del idioma, agora que se fala d’una posible reforma del Estatutu, y a una mayor presencia en tolos ámbitos (educación, medios de comunicación, etc.)

Recordóse a Izquierda Xunida la necesidá d’oficialidá del asturianu, asina como de desenrrollar la Llei d’Usu del Asturianu. Solicióse amás a IX que faigan un control, como oposición que son, sobre’l llabor en Política Llingüística del actual Gobiernu d’Asturies. IX coprometióse a presentar delles entrugues parllamentaries sobre la cuestión.

Falóse tamién de los problemes presupuestarios de l’Academia de la Llingua Asturiana dempués de los recortes. La propuesta d’Iniciativa pol Asturianu pasa por destinar la partida de 27.000 euros dedicada a la Fundación pro Real Academia Española a l’ALLA y solicitar al Gobiernu d’España una financiación asemeyada a la que da al restu d’academies d’otres llingües oficiales del estáu. El Senador Jesús Iglesias comprometióse con Iniciativa pol Asturianu a facer una enmieda a los Presupuestos Xenerales del Estáu pa que l’Academia de la Llingua Asturiana reciba una partida, como’l restu de les academies de llingües del estáu.

Falóse tamién de la situación de la toponimia asturiana por mor del inclumplimientu de los decretos, por parte del gobiernu, y les alministraciones llocales encamentándose a dicha fuercia política que faiga por iguar esta illegalidá, pa lo que Jesús Iglesias va presentar una entruga na Comisión de Fomentu nes cámares estatales. Per otru llau, púnxose enfotu na necesidá de rematar el procesu d’oficialización de los decretos de toponimia y l’aplicación de la toponimia oficial asturiana per parte de la Demarcación de Carreteres dependiente del Ministeriu español de Fomentu, pa lo que’l grupu parllamentariu d’Izquierda Xunida na Xunta Xeneral va elevar una entruga a Política Llingüística.

No que cinca a la rellación del asturianu col partíu, reconocíose que’l partíun use l’asturianu na so páxina web, documentos, elementos publicitarios, asina como de forma oral y pidióse que se siguiera reforciando esi usu, ufrieron la posibilidá d’organizar un cursu d’asturianu, como yá ficimos con Foru Asturies, pa miembros electos y personal del grupu parllamentariu, una propuesta que foi recibida de forma positiva, y qu’Iniciativa pol Asturianu va ufrir tamién a les demás fuercies de la Xunta Xeneral, cola idea de facelu nel propiu edificiu y facilitiar asina l’asistencia de diputaos y demás personal de los grupos.

Dende Iniciativa pol Asturianu espliquen que siguen esperando “respuesta de los grupos parllamentarios de la FSA-PSOE, PP y UPYD”. La organización aguarda poder aconceyar con estes fuercies pa siguir la so rolda de contautos y conocer la so postura sobre la situación del asturianu.

Entrevista sobre la rolda de contautos d’Iniciativa pol Asturianu

Miembros de la dirección d’Iniciativa pol Asturianu aconceyaron na mañana d’esti llunes 29 d’ochobre cola diputada de Foru Asturies, Carmen Sela Fernández, en sede parllamentaria. El conceyu celebráu n’Uviéu xiró alredor de l’actualidá del idioma y nél la organización fizo delles propuestes a la formación política, recibíes de forma positiva. Iniciativa pol Asturianu presentó a Foru la so opinón al rodiu del cuartu Informe sobre’l cumplimientu de la Carta de les Llingües Minoritaries d’Europa, tratáu firmáu pol estáu español, y nel que’l Gobiernu d’Asturies nun salió bien paráu de les valoraciones del Conseyu d’Europa, qu’encamienta a la oficialización del idioma, agora que se fala d’una posible reforma del Estatutu, y a una mayor presencia en tolos ámbitos (educación, medios de comunicación, etc.)

Recordóse a Foru “la necesidá d’oficialidá del asturianu, asina como de desenrrollar la Llei d’Usu del Asturianu”, que Foru defende nel so programa. Solicióse amás a Foru que “faigan un control, como oposición que son, sobre’l llabor en Política Llingüística del actual Gobiernu d’Asturies”. Foru Asturies estudiará la posibilidá de pidir una comparecencia de la Conseyera ’Educación y Cultura sobre esta cuestión.

Falóse tamién de los problemes presupuestarios de l’Academia de la Llingua Asturiana dempués de los recortes. La propuesta d’Iniciativa pol Asturianu pasa por destinar la partida de 27.000 euros dedicada a la Fundación pro Real Academia Española a l’ALLA y solicitar al Gobiernu d’España una financiación asemeyada a la que da al restu d’academies d’otres llingües oficiales del estáu.

Falóse tamién de la situación de la toponimia asturiana por mor del inclumplimientu de los decretos, por parte del gobiernu, y les alministraciones llocales –incluyíes les de Foru- encamentándose a dicha fuercia política que faiga por iguar esta illegalidá. Per otru llau, púnxose enfotu na necesidá de rematar el procesu d’oficialización de los decretos de toponimia y l’aplicación de la toponimia oficial asturiana per parte de la Demarcación de Carreteres dependiente del Ministeriu español de Fomentu.

No que cinca a la rellación del asturianu col partíu, pidióse-yos qu’usen l’asturianu na so páxina web, documentos, elementos publicitarios, asina como de forma oral. Iniciativa pol Asturianu esplicó que-y sorprende que cargos públicos del partíu que son asturfalantes nun usen davezu l’asturianu nes sos intervenciones públiques. Iniciativa pol Asturianu ve imprescindible que los responsables políticos usen l’asturianu, y pa ello ufrió a Foru la posibilidá d’organizar un cursu d’asturianu pa miembros electos y personal del partíu, una propuesta que foi recibida de forma positiva, y qu’Iniciativa pol Asturianu va ufrir tamién a les demás fuercies de la Xunta Xeneral, cola idea de facelu nel propiu edificiu y facilitiar asina l’asistencia de diputaos y demás personal de los grupos.

Güei miércoles Iniciativa pol Asturianu sigue cola so rolda de contactos viéndose n’Uviéu col senador Jesús Iglesias, d’Izquierda Xunida d’Asturies y el grupu parllamentariu d’Izquierda Xunida.

Iniciativa pol Asturianu entama esta selmana una rolda de conceyos con representantes de partíos políticos cola fin de tratar la situación actual de la llingua asturiana nel ámbitu autonómicu y estatal, asina como presentar propuestes d’actuación nesta cuestión en tolos ámbitos de xestión. Pa ello, representantes de la organización van aconceyar con tolos partíos representaos na Xunta Xeneral y nes cámares estatales (Senáu y Congresu los Diputaos) qu’asina lo quieran. Dende la organización anuncien que tán confirmaos los conceyos col grupu de Foru Asturies, esti llunes 29 d’ochobre, a les 13 hores, en sede parllamanetaria, n’Uviéu, cola diputada Carmen Sela; y otru col Senador, Jesús Iglesias, d’Izquierda Xunida d’Asturies, pal miércoles 31.

Nel ámbitu de la representación d’Asturies nes cámares estatales, Congresu y Senáu, onde tienen representación FSA-PSOE, Foru y PP, ta confirmáu namás el conceyu con Jesús Iglesias, Senador por Asturies, pa esti miércoles. Iniciativa pol Asturianu “quier aconceyar con tolos grupos políticos que representen a Asturies en Madrid”, pues entienden que “dende Congresu y Senáu pueden favorecese polítiques que sofiten a un meyor futuru pa la llingua asturiana”.

Espliquen tamién dende Iniciativa pol Asturianu como “pel momentu”, PP, FSA-PSOE y UPyD, les otres fuercies representaes na Xunta Xeneral, “entá nun respondieron a la nuesa solicitú de conceyu”, anque dende Iniciativa pol Asturianu confíen en que “querrán sentir la voz y les propuestes de los ciudadanos no que cinca a la llingua asturiana y les polítiques pal so caltenimientu”.

Páxina web d’Iniciativa pol Asturianu

El Gobiernu de Javier Fernández (FSA-PSOE) ta acabante anunciar al traviés del BOPA un nuevu amenorgamientu de los prespuestos dedicaos a normalización llingüística. La partida afectada nesti casu ye la dedicada a Normalización social del asturianu y gallego-asturianu pa les entidaes llocales, una ayudes que, según espliquen dende Iniciativa pol Asturianu, quien denunció esti recorte, “sirven pa llevar a los conceyos, la entidá alministrativa más cercana al ciudadanu, les polítiques de normalización llingüística, qu’amás xeneren emplegos al traviés de los servicios de normalización”.

Dende Iniciativa pol Asturianu denuncien lo que consideren como “nuevu ataque al asturianu”. Y ye que, pa la organización “llama l’atención que dientro de la mesma partida, onde tamién apaecen ayudes a museos y colecciones museográfiques y a programes añales d’actividaes culturales, seya les ayudes al asturianu les úniques que se vean afectaes”. Espliquen amás que y”á yera la menor de les partíes, con 92.400 euros, frente a los 96.000 y 114.800 euros de les otres dos partíes”.

D’esta manera, espliquen dende Iniciativa pol Asturianu, “recortáse otra vegada onde menos hai pa recortar, dexando al asturianu nuna situación cada vegada más débil”. Reclamen al Gobiernu d’Asturies, que “si ha de facer recortes, faiga los mesmos de forma proporcional en toles partíes, y nun cargue, como yá vieno faciendo a lo llargo de los meses últimos, contra la llingua asturiana”.

Iniciativa pol Asturianu va aconceyar la selmana que vien colos grupos políticos presentes na Xunta Xeneral y llevará esta cuestión, ente otres munches. Pel momentu namás Izquierda Xunida d’Asturies y Foru respondieron al pidimientu de conceyu de la organización, pero esperen “poder falar con tolos partíos presentes nel parllamentu asturianu y face-yos llegar esta y otres cuestiones urxentes pal idioma asturianu”.

Recorte denunciáu (nel BOPA)

Dende la formación política Conceyu Abiertu amosaron el so refugu a la celebración que cada añu se produz n’Uviéu con motivu de los Premios Príncipe d’Asturies, unos gallardones que, según consideren, “respuenden principalmente a una operación de llaváu de cara pa la institución monárquica, cada día más deteriorada nel conxuntu del estáu español”.

Amás, esti criteriu afecta según la formación especialmente a Asturies, yá que camienten que “se mos impunxo la institución del “Principado”, una figura política qu’entendemos respuende a valores arcaicos y antidemocráticos inherentes a la propia institución monárquica”. Dende Conceyu Abiertu quieren afitar qu’Asturies “nun ye un “Principáu”, nin el pueblu asturianu siervu o vasallu de nenguna figura que nun seya formada y participada pol propiu pueblu”.

Nesi sentíu, denuncien “la situación de probitú democrática na que s’atopa Asturies, con cientos de persones represaliaes nos caberos meses por distintos conflictos sociales y llaborales como puede ser el casu del mineru”.

“Y ye que nuna Asturies con 100.000 paraos y paraes, na que dende Xineru de 2011 tuvieron qu’emigrar 17.000 mozos y moces, na que perdemos miles d’habitantes al añu, nun país cada día más avieyáu y con menos perspeutives de futuru, nun podemos facer más que denunciar la política del “pan y circu” a la que dende les instituciones estatales, asturianes y municipales mos somorguien en toles ocasiones que pueden”, espliquen.

Consideren estos premios “una obscenidá y una burlla a la ciudadanía’l fastuosu despliegue de medios económicos y humanos, con sovenciones millonaries a una fundación qu’escapa al control públicu y que nun sabemos mui bien en qué emplega caún de los euros del pueblu que-yos apurren les instituciones”, recuerden. Por ello soliciten que se termien “cola marxinación y represión na que vemos sometida a la nuesa cultura, identidá, y a la nuesa llingua a la que contribuyen estos premios qu’en nengún casu tienen en cuenta los nuesos rasgos propios”.

Por toes estes razones Conceyu Abiertu ve necesaria una movilización lo más amplia posible, en númberu de participantes y en variedá d’aiciones, “pa denunciar la situación y amosar el refugu del nuesu pueblu pa con esta llaceria”.

Esti martes 9 d’ochobre, Javier Fernández, presidente d’Asturies, intervenía na Xunta Xeneral nel Debate d’Orientación Política del 2012 y facía un repasu a les llinies d’actuación del Gobiernu pa los próximos meses. La Xunta pola Defensa de la Llingua Asturiana (XDLA) quier llamar l’atención sobre les referencies que fixo a la reforma del Estatutu d’Asturies y sobre les referencies que nun fixo a la situación de la llingua asturiana.

Fernández tuvo una referencia inesperada pa la reforma estatutaria, teniendo en cuenta que tanto’l so partíu (FSA-PSOE) como’l PP encargáronse de dexala en vía muerta y enterrada dende’l 2008. Fiel al so estilu, Javier Fernández sacó’l tema al debate políticu y públicu colos condicionantes del “despachu rápidu” y del “amagüestu ensin lluz nin taquígrafos”. Y amás fíxolo usando siempre’l pasotismu y la dexadez que determinada clas dirixente asturiana utiliza sistemáticamente como táctica de desprestixu del textu llegal más importante d’Asturies. Y ye que, nun lo hai qu’escaecer, l’oxetivu principal ye facer a tola sociedá asturiana partícipe y cómpliz de la deriva de les últimes décades que, en cuenta d’afitar el futuru d’Asturies, dedicóse a la negación de sí mesma y a enanchar les sos dependencies.

Dientro d’esti panorama, a la XDLA nun-yos estraña “la sistemática falta d’alusiones a la llingua asturiana y a la so oficialidá. La reividicación del estatus d’oficialidá pa la nuestra llingua vien siendo ún de los movimientos sociales más importantes de la historia comtemporánea d’Asturies. Ye más: ye l’únicu que nos últimos trenta años tuvo esixendo na cai les reformes estatutaries, esixendo la oficialidá, plantando cara a los partíos gobernantes y a la so fiel oposición interesadamente inoperantes y calculadamente agalbanaos”.

Pa la Xunta tamién foron bien calculaes les ausencies de referencies al asturianu nel terrén d’Educación y Cultura, teniendo en cuenta que Fernández encabeza un Gobiernu que ta siguiendo la “tradición” de proponer el caos y la dexación na xestión de la enseñanza de la llingua asturiana, y l’arrequexamientu y la inoperancia nel desarrollu de polítiques llingüístiques afayadices que traten de dar futuru al nuestru idioma. Sabemos qu’a él nun-y da más, pero hai una parte importante de la sociedá a la que sí-y da más por más que se ximielgue la pantasma de la crisis como coartada pa too.

Polo tanto, decíen esti día nun comunicáu de prensa “nun nos queda otro que denunciar esti discursu vacíu y negador de la realidá y esixir un tratamientu de la llingua asturiana acordies cola so importancia na vertebración del futuru d’Asturies, planificando y comprometiéndose a facela visible y normal na alministración, na educación, nos medios de comunicación…”

De la mesma manera, la Xunta Pola nun va dexar d’esixir la oficialidá de la llingua asturiana y un Estatutu que la recueya: “Si dalgún sentíu tienen les reformes estatutaries ye’l de reconocer derechos fundamentales de la ciudadanía y non negalos”.