Política

L’Asociación de Trabayadores de Normalización Llingüística (ATNL) sumóse a les quexes del sindicatu CSI y l’asociación Xunta pola Defensa de la Llingua Asturiana, poles deficiencies na convocatoria d’una plaza de filólogu pa Política Llingüística, recordando que ye vezu pa ellos “denunciar anomalíes nes convocatories de places pa los Servicios de Normalización Llingüística nos conceyos, mesmo que la falta de mecanismos de control de la so actuación pol Principáu acullá de cuestiones económiques, asina como’l desinterés a la hora de buscar fórmules que garanticen la estabilidá y funcionamientu de los SNL, que nos meses últimos carecieron pieslles, non sustitución de baxes y l’aumentu de precarización nes condiciones llaborales de los y les sos trabayadores”.

Recuerden amás que “nun ye la primer vez qu’asocede” y ponen como exemplu más claru “l’anguaño inesistente Unidá de Traducción, nun área, la Direición Xeneral de Política Llingüística, que cuenta con una plantiya escaso”. Piden una solución y esixen “una convocatoria pública, tresparente y afechisca pa col puestu que s’ufierta”.

La Xunta pola Defensa de la Llingua vieno acabante denunciar irregularidaes nes contrataciones de la Oficina de Política Llingüística, ente les que s’alcuentra daqué inalmisible: “que nun se pidiera titulación específica d’asturianu y gallego-asturianu pa ser filólogu nesi departamentu”.

Los dos últimos responsables de la Dirección Xeneral de Política Llingüística, namás llegar al cargu, llamentáronse nos medios de la falta de personal especializao que tenía’l so departamentu, quier dicise, filólogos espertos n’asturianu y gallego-asturianu. Esta situación fíxose más difícil agora al asumir esa dirección xeneral dende mediaos del añu pasáu les funciones d’órganu de traducción oficial a eses llingües. Hai que recordar que nel añu 2009 creárase una Unidá de Traducción qu’en realidá nun llegó a funcionar porque, como denunció yá daquella Xuristes pol Asturianu, a la persona encargada nun se-y esixía conocimientu d’asturianu nin de gallego-asturianu.

Pala XPDL “resulta increíble, pero foi verdá. Agora la historia vuelve a repetise. La directora xeneral de Política Llingüística, Ana Fueyo, anunciara esti branu pasáu que diben convocar una plaza d’especialista n’asturianu y gallego-asturianu pa cubrir les necesidaes de técnicos filólogos que teníen. Según acaba de denunciar el sindicatu CSI, la plaza, de carácter temporal, axudicóse nesti mes de xineru pasáu nun procesu de selección internu, non públicu, onde too foi secreto y ensin posibilidá de reclamación en nenguna de les sos fases. El baremu, según esplica tamién la CSI, nun paecía valorar de manera axustada lo que se buscaba nel perfil de la plaza. Pero lo más increíble d’esta axudicación ye que, anque se puntuaba’l dominiu oral, nun s’esixía como requisitu tar en posesión de dalguna de les titulaciones oficiales que certifiquen la conocencia d’asturianu y de gallego-asturianu. ¿Cuála foi la razón? Eso tendrá que lo aclariar Política Llingüística, pero esti tipu de práctiques namás faen pensar a la ciudadanía, como señala la CSI, n’amagüestos”.

Pala XDLA, “ye una reivindicación histórica del asturianismu la dignificación del profesoráu d’asturianu y pa ello yera imprescindible una reglamentación que regulara les titulaciones necesaries pa impartir la materia. Nun se podría entender que la Conseyería d’Educación y Cultura nun esixera tar tituláu pa dar clas d’asturianu o de gallego-asturianu. Lo mesmo asocede colos puestos de técnicos normalizadores nos conceyos, pa los que l’Asociación de Trabayadores de la Normalización Llingüística vien pidiendo una regulación clara nes convocatories, de manera que les entidaes convocantes pidan que los candidatos tean en posesión de determinaes titulaciones d’asturianu. Agora ye la práctica habitual. A pesar de too esto, ¿pue entendese que la entidá cimera en Política Llingüística, de la mesma Conseyería d’Educación y Cultura, cubra una plaza de filólogu/a especialista n’asturianu y gallego-asturianu ensin que se pida esa titulación?”.

Nel comunicáu de la XDLA tamién se diz que “como bien denuncia la CSI, ye hora de tresparencia y rigor y non d’amagüestos que de sobra sabemos les consecuencies que traen. Ye hora de que Política Llingüística asuma les sos responsabilidaes predicando col exemplu”.

Por eso, dende la XDLA esixen la rectificación inmediata d’esti tipu d’irregularidaes y la puesta en marcha de convocatories y procesos selectivos qu’aseguren que los candidatos y candidates tienen les pertinentes titulaciones y compiten en condiciones d’igualdá a la hora de reconocer los sos conocimientos, meritos y esperiencia.

Los despachos de los diputaos asturianos nel Congresu de los Diputaos, en Madrid, sirvieron d’espaciu pa los conceyos celebraos con un represenante d’Iniciativa pol Asturianu esti martes pasáu. Según espliquen al traviés d’una nota, ente los temes trataos tuvo “la situación del asturianu cola nueva reforma educativa o l’usu de la toponimia oficial asturiana nes carreteres estatales”, mostrando tolos diputaos bona disposición pa da participar de forma activa na busca de soluciones, afirmen dende la organización.

Iniciativa pol Asturianu agradeció a tolos diputaos “la so disposición pa recibilos”, y destaca que tolos partíos que representen a Asturies nel Congresu “tán dispuestos a trabayar por un futuru meyor pa la llingua asturiana”. El primer conceyu foi con Antonio Trevín, diputáu de la FSA-PSOE y ex presidente d’Asturies, qu’espliquen, “mostróse dispuestu a sofitar con entrugues al gobiernu y otres iniciatives la continuidá de la prensencia del asturianu nes aules”, que camienta “ye imprescindible pal futuru del asturianu”, al mesmu tiempu que coincidió con Iniciativa pol Asturianu en que “la perda de falantes ye’l principal problema que tien anguaño la llingua asturiana”.

Darréu recibieron al representante d’Iniciativa pol Asturianu, Carmen R. Maniega y Ángeles Fernández-Ahuja García, diputaes por Asturies del Partíu Popular, que dende la so posición de miembros del partíu nel Gobiernu, comprometiéronse a falar tanto col Ministeriu d’Educación, pal tema del asturianu na LOMCE, como col de Fomentu, pa facer porque esti departamentu use la toponimia oficial d’Asturies nes carreteres y otres instalaciones. Maniega espresó que’l PP “foi siempres favoratible al asturianu, con midíes como l’aprobación de la Llei d’Usu del Asturianu en 1998”. Amás, dambes dos recibieron de forma mui positiva la posibilidá d’usar l’asturianu n’actos públicos, pa lo que la organización ufrió la so collaboración.

Gaspar Llamazarez, diputáu d’Izquierda Xunida d’Asturies comentó col representantes d’Iniciativa pol Asturianu la so entruga parllamentaria presentanda al respective de la presencia del asturianu nel sistema educativu cola conocida como “Llei Wert”, al mesmu tiempu que se plantegó la posibilidá de facer nueves entrugues y proposiciones alredor de distintos temes rellacionaos col usu del asturianu o la toponimia oficial.

L’últimu diputáu en recibir a Galán foi Enrique Álvarez-Sostres, de Foru Asturies, que recordó que’l programa del so partíu recueye la defensa del enseñu del asturianu y la so inclusión reglada na etapa de 0 a 3 años. Al mesmu tiempu que destacó lo que considera “enorme importancia de que se consiga la reconocencia de la especialidá de llingua asturiana pal profesoráu”, lo que camienta pue ser la base pa futures reivindicaciones. Amás, mostróse dispuestu a llevar enmiendes y proposiciones sobre l’asturianu a la cámara alta.

Con toos ellos y según espliquen dende la organización asturiana “falóse tamién de la posibilidá d’incluyir a la llingua asturiana nos Presupuestos Xenerales del Estáu próximos”, mesmo con un partida pa l’Academia de la Llingua Asturiana, como les demás academies del estáu, qu’en partíes pa sofitar la producción cultural, inclusión del asturianu nos Premios Nacionales de Lliteratura, televisión pública, usu nes páxines web de ministerios y otres instituciones, etc.

La valoración xeneral de los conceyos per parte d’Iniciativa pol Asturianu ye “mui positiva”, anque esperen “poder valorar los mesmos según los sos resultaos futuros”. “Esti yera un primer alcuentru col envís d’abrir, lo qu’esperamos seyan, unes rellaciones continuaes y granibles pa la llingua asturiana y la so situación nel ámbitu estatal, onde agora pue dicise que nun esiste”, esplicó Inaciu Galán dempués de los conceyos.

El presidente d’Iniciativa pol Asturianu, Inaciu Galán, va a tar nel Congresu de los Diputaos, en Madrid, na tarde d’esti martes 12 de febreru, p’aconceyar colos diputaos de la circunscripción asturiana que dempués de convidar tanto a senadores como diputaos, quixeron recibir a la organización pa tratar cuestiones “como la situación del asturianu cola nueva reforma educativa, l’usu de la toponimia oficial asturiana nes carreteres estatales y otres cuestiones qu’afecten a la llingua asturiana nel ámbitu estatal”, espliquen dende la organización. Tán confirmaos conceyos con Antonio Trevín, diputáu de la FSA-PSOE, Carmen Maniega, diputa del PP d’Asturies, y Enrique Álvarez-Sostres, de Foru Asturies, anque dende la organización anuncien qu’entá “pueden confirmase conceyos con otres fuercies”.

Los conceyos, que van celebrase nos despachos del Congresu de los Diputaos, “van servir como primer contactu colos diputaos asturianos en Madrid”, a los qu’Iniciativa pol Asturianu va pidir “que tengan una postura activa na defensa de la llingua asturiana nel ámbitu estatal, onde l’asturianu ta siempres marxináu por nun cuntar col estatus d’oficialidá”, recuerden. La idea del conceyu ye según anuncien dende la organización “la d’informar de les cuestiones más importantes nestos momentos pal idioma, como la so presencia na reforma educativa, pero al mesmu tiempu ufrir unes llinies de trabayu de cara a facer una defensa continuada del idioma, y dir buscando solucionar problemes del idioma que provienen de la xestión del gobiernu central”.

Entrega de cartes nel Ministeriu de Fomentu y nel d’Educación

Ayeri llunes 11 entregáronse nes sedes del Ministeriu de Fomentu y Ministeriu d’Educación, cartes dirixíes a los respectivos ministros, “cola fin d’amosar el refugu de la organización a la situación na quedaría la llingua asturiana d’aprobase la nueva reforma educativa” , solicitando una solución que permita que l’asignatura “tea pelo menos nes mesmes condiciones nes que ta agora, que yá son bastantes males”, espliquen.

La carta dirixida al Ministru de Fomentu reclama que’l Gobiernu d’España “cumpla col usu de la toponimia oficial nel territoriu asturianu, y anima a esti departamentu a usar l’asturianu con normalidá nes infraestructures, instalaciones estatales de tresportes, dependientes del mesmu y presentes n’Asturies: carreteres, ferrocarriles, aeropuertos, puertos, etc.”

En dambos casos solicitaráse tamién a los ministerios qu’usen l’asturianu na so páxina web, “como faen col restu de llingües del estáu ya inclusive col inglés, que nun ye llingua oficial”.

El conceyal de Foru Asturies en Noreña, Inaciu Iglesias, fizo una intervención nel plenu del Conceyu, la selmana pasada, na qu’esplicó la llexislación llingüística asturiana, estatal ya internacional y na qu’entrugó al alcalde, César Movilla, por mor del refugu a un testu presentáu n’asturianu por Pablo Pérez, conceyal de la formación Conceyu Abiertu por Noreña, y a les continues quexes y dalgunos intentos de torgar l’usu del asturianu, que vien faciendo’l primer edil d’esta Casa Conceyu, que ta gobernada pola FSA-PSOE. Na mesma Iglesias entrúgase por qué nun-yos dexa usar l’asturianu, pidiéndo-y respuesta a por qué nun se trescriben l’usu del asturianu nel plenu y comisiones dientro de les actes y por qué se niega a tratamitar les solicitúes nesti idioma.

Estes son les trés entrugues plantegaes pol conceyal de Foru:

1.- ¿Qué midíes tien tomao esti Ayuntamientup’asegurar la efectividá del exerciciu de los derechos llingüísticos que la llei otórganos?

2.- ¿Cómo cuadra que, sistemáticamente, se nos traduzan les nuestres intervenciones en plenu y comisiones faciendo desaparecer de les respectives actes l’usu efectivu del asturianu que facemos?

3.- ¿Por qué esti ayuntamientu niégase sistemáticamente a tramitar les solicitúes, mesmo les más cencielles “por estar escritas en asturiano”?

Según esplica Iglesias, l’alcalde nun respondió a nenguna de les sos entrugues.

Esti martes 29 de xineru, la Tertulia Pachín de Melás va aldericar alredor de la tema de la cooperación al desenrrollu n’Asturies, sol títulu de “Malos tiempu pa la solidaridá: Golpes baxos a la cooperación internacional”, dientro del enclín por amenorgar los fondos pa esta materia, y un contestu de crisis, que ta poniendo en cuestión el llogru del 0,7% pa cooperación nos presupuestos públicos onde yá se consolidó tal porcentaxe pa solidaridá internacional.

Pa falar d’esta cuestión cuntamos con Javier Orozco, Representante del Colectivu de Colombianos y Refuxaos n’Asturies “Luciano Romero Molina”, Jorge Coque en nome d’Inxenería Ensin Fronteres d’Asturies (ISFA) y Merced González presidenta de la Coordinadora d’ONGD del Principáu d’Asturies (Codopa), pa esplicar cómo tán afectando los retayos a la cooperación al desenrrollu y cómo la crisis ta abriendo’l camín a cambeos importantes na concepción de la solidaridá internacional.

L’actu que va tener llugar nel Chigre Cantábrico (Cai Muelle d’Oriente 3), asitiáu frente a los Xardinos de la Reina de Xixón a les 20:30 hores, va ser presentáu por Rafael Palacios, ex director de l’Axencia Asturiana de Cooperación al Desenrrollu.

Compromisu por Asturies quixo facer notar el so maltar poles recientes declaraciones de la Conseyera d’Educación, Ana González, nes qu’asegura que l’asignatura d’asturianu va ser d’ufierta obligada nos diferentes ciclos educativos. Yolanga Huergo, vocera de la federación, aseguró que “l’asignatura yá ye d’ufierta obligada n’Educación Primaria y Secundaria, que non n’Infantil, polo que nun supón avance nengún respecto a lo que yá teníemos”. Mui a la contra Compromisu denuncia l’empeoramientu nes condiciones de l’asignatura que supón pasala de “voluntaria” a “optativa” yá que “ye una degradación en toda regla qu’obligará a les families n’Educación Primaria a escoyer ente asturianu y otra asignatura, casu que yá taba ocurriendo en Secundaria”.

Huergo denuncia asina mesmo que “la Conseyera utiliza’l pretestu de la LOMCE pa tomar una decisión que namás compete a la Conseyería qu’ella dirixe, yá que na Llei’l tema l’asturianu nun llega siquiera a tratase”. Asina ataca l’actitú del Gobiernu asturianu que “como lleva faciendo durante los últimos años, xuega a dicir una cosa y facer otra, y a echar balones fuera cuando la responsabilidá última ye únicamente suya”.

Otra miente, y no tocante a les declaraciones nes que dexaba abierta la posibilidá de convocar oposiciones nel presente añu, afirma “la Conseyería nun puede dicir que ta zarráu’l tema les oposiciones hai malpenes dos meses y agora asegurar que ye un tema que tán plantegándose, porque esos cambios d’opinión dexa a les clares la importancia que-y merecen los miles d’opositores asturianos y asturianes”.

Al traviés de comunicaos, el grupu políticu Compromisu por Xixón y l’asociación Crírculu Lliberal d’Asturies, súmense a la denuncia fecha pola Xunta pola Defensa de la Llingua Asturiana contra’l Conceyu de Xixón, por, según la organización, cambiar cartelos cola toponimia oficial por otros cola derogada.

Compromisu por Xixón esixe la restitución de la topononimia y recuerda “los años de llucha” que costó que se punxeren de forma correcta estos nomes. Por ello piden responsabilidaes por una decisión que camienten “atenta contra la cultura asturiana, contra la llegalidá y contra la economía llocal, al emplegar perres públiques pa estropiar, lo que per una vegada taba bien fecho”.

El Círculu Lliberal d’Asturies, pela so parte, diz tener constancia de que “dende hai selmanes tán sustituyéndose decenes de lletreros cola toponimia oficial, na zona rural del conceyu de Xixón y per parte del Ayuntamientu, por otros castellanizaos y que nun se correspuenden colos nomes de llugar vixentes y únicos llegales”. Recuerden que “los topónimos oficiales sonlo a tolos efectos y per parte de les instituciones son d’usu obligáu”.

Pal Círculu “considerando la situación económica actual, el que dende l’Ayuntamientu de Xixón se despilfarre dineru público no que ye una manifiesta illegalidá, fai muncho más grave esta inaceptable actuación” polo qu’esixe que dende la conceyalía xixonesa encargada de la zona rural se dean les esplicaciones oportunes, procedan a reponer tolos lletreros camudaos y asuman responsabilidaes polítiques, dáu’l casu, pa iguar lo que ye pa esta organización “un ataque a la identidá asturiana, a los valores democráticos y a la mesma Constitución Española”.

La organización política asturiana considera que’l gobiernu del PP pretende rematar la llingua asturiana cola Lei Wert y la negativa a usar la toponimia oficial. Compromisu pide a les instituciones que “defendan con dignidá les decisiones que se tomen n’Asturies”.

Compromisu por Asturies fixo pública la so postura respecto a la negativa del ministeriu de Fomentu d’usar la toponimia oficial asturiana nes carreteres del país. La organización política asturiana califica de “demencial qu’un Ministeriu dea una respuesta que ye un auténticu insultu a la intelixencia, a la llexislación y al autogobiernu d’Asturies”.

Compromisu recuerda que la toponimia llocal ye de competencia autonómica y que dende hai años n’Asturies existe un procesu de recuperación toponímica, independientemente del estatus xurídicu de la llingua asturiana, pol que ye necesario axustar los topónimos de les carreteres a les formes aprobaes pol gobiernu asturianu y que con esti argumentu lo único que queda claro ye la fobia escluyente del gobiernu del PP a tolo que s’asemeye a la capacidá d’autogobiernu y al respetu a les decisiones de les instituciones asturianes

Amás, la organización considera qu’esta noticia, xunto cola esclusión de la llingua asturiana dientro de la llamada Llei Wert ye un exemplu más de que’l gobiernu del PP pretende rematar el llabor de desaniciu de la llingua asturiana que yá entamaron gobiernos de tendencies distintes nes anteriores llexislatures, echando p’atrás mesmamente lo poco que se fixo nel procesu de normalización del idioma.

Dende Compromisu por Asturies pídese una respuesta contundente y digna de les instituciones asturianes y recuérdase que’l marcu llegal que quitaría les escuses pa la marxinación de la llingua ye la oficialidá polo que pide al conxuntu de la sociedá asturiana y a los partíos politicos presentes na Xunta Xeneral, que se reabra la reforma del estatutu d’autonomía pa recoyer, ente otres reformes necesaries, la declaración d’oficialidá.

La Conseyería d’Educación, Cultura y Deporte del Gobiernu del Principáu d’Asturies va poner en contactu col Ministeriu de Fomentu pa pidi-y que replantegue la so postura al respective de la toponimia oficial “teniendo en cuenta les particularidaes llingüístiques de la comunidá autónoma”, acordies cola nota unviada a los medios esti miércoles y dempués de la denuncia fecha por Iniciativa pol Asturianu pola respuesta dada por Fomentu sobre la cuestión. EL senador Jesús Iglesias ficiere una entruga per escrito a la que Fomentu respondió xustificando que nun usen la toponimia asturiana oficializada “por nun ser oficial l’asturianu”.

El Principáu quier que’l Gobiernu d’España tenga en cuenta que l’Estatutu d’Autonomía establez un réxime de protección pa la llingua asturiana, y que la Llei d’Usu y Promoción, publicada nel Boletín Oficial del Principáu d’Asturies el 28 de marzu de 1998, indica que “los topónimos de la comunidá autónoma del Principáu d’Asturies van tener la denominación oficial na so forma tradicional. Cuando un topónimu tenga usu xeneralizáu na so forma tradicional y en castellán, la denominación va poder ser billingüe”.

La conseyería decidió treslladar esti pidimientu al ministeriu tres l’anunciu del Gobiernu de nun usar la toponimia tradicional “nos indicadores de carreteres y autopistes nacionales al so pasu pola comunidá por nun ser l’asturianu una llingua oficial”, sigue la nota gubernamental.

D’esta miente, la Conseyería d’Educación, Cultura y Deporte entiende que la presencia de los topónimos tradicionales que yá fueren oficializaos nos indicadores de les autopistes y les carreteres asturianes “namás obedez al cumplimientu estrictu de la llei”. Coles mesmes, el Gobiernu destaca que la midida respuende a la necesidá de señalizar cada llugar col so correspondiente topónimu oficial.