Política

Compromisu por Asturies del Nalón califica de terrorismu empresarial la decisión de la Dirección de Duro-Felguera de desmantelar les instalaciones que caltien en Llangréu, Felguera Melt y Construcciones Mecániques, según los sos planes de presentar un espediente d’estinción d’emplégu pa Felguera Melt.

Compromisu pol Nalón conderga les recientes declaraciones del Presidente de Duro Felguera, Ángel Antonio del Valle, por considerales una prevocación propia de daquién que, más qu’un empresariu, paez un dinamiteru empresarial empeñáu en volar cualesquier atisbu del pasu de Duru-Felguera pol conceyu que la vio nacer y crecer, y al que tanto debe dicha empresa.

Compromisu denuncia “la inutilidá de quien dirixe’l Gobiernu Asturianu, incapaces de frenar estos planes, amás de promover xuntu cola empresa la deslocalización de DF, inclusive con fondos mineros, y de ser cómpliz necesariu nesta situación xenerada”.

Finalmente llama a los conceyos del Valle “a manifestar la so oposición a estos planes, a les organizaciones polítiques, sociales, sindicales y a la población del Nalón a movilizase masivamente, con tola dureza que la situación requier, en defensa de los puestos de trabayu, contra l’esmantelamientu industrial del Valle, contra’l terrorismu social de l’actual direición de Duro- Felguera y contra l’autismu d’un gobiernu asturianu cómpliz, yá sía por acción u omisión, del zarru de les instalaciones llangreanes y de los despidos que pretenden efectuase”.

A lo llargo d’esti mes de payares sigue en marcha l’actividá cultura¡ na Casa de los Alberti de Ciañu cola programación de “Los xueves de castilletes y carbón que vien” desenvolviéndose esti mes y va cuntar mañana xueves día 14 cola visita a Ciañu d’Adrián Barbón Rodríguez que va lleer la ponencia “Reflexones alredor del municipalismu”.

Adrián Barbón ye llicenciáu en Derechu pola Universidá d’Uviéu y alcalde de Llaviana dende l’añu 2008, en definitiva una persona con una gran esperiencia política ya institucional dende l’alministración local.

Esta charra enmárcase dientro les xornaes culturales De Castilletes y carbón que per cuartu añu consecutivu, organicen la Fundación Nuberu y l’Ayuntamientu de Llangréu. Trátase d’una actividá de dinamización cultural qu’estes dos entidaes ponen en marcha como consecuencia del conveniu de collaboración firmáu ente elles y xiren alredor de les interrellaciones ente cine, mina, música, lliteratura, economía, política…

Los xueves de castilletes y carbón van siguir cola ponencia Enseñanza n’asturianu, a cargu de Xosé Antón González Riaño y un recital lliterariu nel que van participar destacaos escritores en llingua asturiana. L’actividá de De castilletes y carbón remata’l 4 d’avientu, día de Santa Bárbara, con un conciertu del grupu Nuberu na Casa la Cultura de La Pola Llaviana.

Andecha Astur acota-y a IX la so responsabilidá pa cola represión llingüística, desixe la imediata oficialidá de la llingua asturiana y la imediata aprebación d’unes Ordenances de Conceyu que reconozan los drechos llingüísticos de los mierenses mentes persista n’Asturies la situación predemocrática de represión llingüística.

Na opinión d’Andecha, “qu’un Ayuntamientu d’IU, formación política que diz respetar los drechos llingüísticos de los asturianos, sofite un nueu casu de represión llingüística comu l’acabante d’aportar en Mieres, retirando les autorizaciones n’asturianu que la Casa de Cultura de Conceyu emplegaba p’autorizar l’estacionamientu frente al citáu centru, ye una espresión más de comu la represión llingüística nun ye solo sistemática ya indiscriminada, sinon de comu IU ye una parte más d’esi entramáu represivu”.

IX d’Asturies, ante’l discutiniu amenáu nel Conceyu de Mieres pola actuación d’un funcionariu municipal que multó un vehículu que cuntaba con una autorización escrita n’asturianu, quier recordar que n’Asturies la Llei 1/1998, de 23 de marzu ta dafechu a valir y que esta llei nel so artículu 4 reconoz “el derechu de tolos ciudadanos a emplegar l’asturianu y a espresase nél de palabra y por escritu”. Esti testu llegal, aprobáu col sofitu d’IX, tamién incide nel so artículu 8 en que los conceyos van poder adoptar los medios necesarios p’asegurar la efectividá de los derechos llingüísticos qu’esta llei otorga a los asturianos residentes n’Asturies. Poro, l’actuación d’esti funcionariu incumple la Llei d’Usu y Protección d’Usu y Promoción del bable asturianu, cuestión qu’escarez de discutiniu posible.

IX d’Asturies defendió y defende la oficialidá del asturianu como únicu camín escontra la normalización llingüística y allaba la práctica del Conceyu de Mieres de fomentar l’usu normalizáu de la nuesa llingüa.

IX d’Asturies llamenta que l’asturianu, como llingua propia y patrimoniu de la nuesa comunidá autónoma, háyase vistu envueltu nuna guerra d’intereses ayenos y espera que’l casu d’esti funcionariu sía un fechu aislláu pa que ciudadanos y políticos puedan poner soluciones a los importantes problemes a los que s’enfrenten día ente día y nun esviar la so atención.

El voceru nacional de Compromisu por Asturies, Daniel Fernández, treslladó’l refugu absolutu a la decisión de Foro d’escluyir a Nava del Festival del Arcu Atlánticu que se celebra en Xixón, como represalia a la espulsión de los conceyales de Foru del gobiernu navetu..

Compromisu por Asturies asegura que “utilizar la política cultural de Xixón como represalia contra otru Conceyu, nesti casu’l de Nava, por una tema políticu internu navetu como ye la espulsión de los conceyales de Foru del gobiernu, yá alza a surrealista la xestión de Rubiera en materia cultural, y amuesa el calter fondamente autoritariu y antidemocráticu de Foru que namá tien una máxima en política, o tas conmigo o tas contra mi”.

Pa Compromisu por Asturies “Rubiera nun tien derechu a convertir la ciudá nel ridículu permanente en materia cultural polos sos intereses partidistes” porque “Xixón acabará estudiándose en tol mundu como exemplu de lo que nunca tien de faese nesti ámbitu”.

Daniel Fernández quixo treslladar a “les nueses compañeres y compañeros de Asturianistes per Nava y al so Alcalde Emilio Ballesteros, el nuesu sofitu y tresmiti-y que Foru y Rubiera anguaño avergoñen a la ciudadanía, porque nun ye almitible que’l gobiernu municipal de Xixón utilice la política cultural, que tendría de ayudar a averar a los pueblos y les sos xentes, nun preséu d’enfrentamientu partidista” y aseguró que “por suerte en Nava nun se gobierna dende esa clave política, y sabemos que continuarán trabayando como capital de la sidra pa siguir siendo un referente na cultura y fomentar los llazos que nos xunen a tolos asturianos”, concluyó.

Izquierda Xunida y de Foro Asturies presentaron esti martes nel Congresu de los Diputaos delles enmiendes pa que los Presupuestos Xenerales del Estáu del 2014 incluyan una partida pa l’Academia de la Llingua Asturiana, que ye la única Academia que nun recibe fondos del Estáu. El forista, Enrique Álvarez Sostres pide 143.000 euros, ya IX reclama 75.000, nun exemplu nidiu de la falta de perspeutiva xeneral alrodiu d’estes cuestiones que tienen los partíos asturianos.

Nuna nota de prensa asoleyada esti día por Iniciativa pol Asturianu, esta asociación espresaba’l so agradecimientu a dambes formaciones polítiques, coles que s’aconceyara¡l presidente d’Iniciativa, Inaciu Galán nel Congresu de los Diputaos, en Madrid, nel mes de febreru. D’aquellos conceyos, esplica l’asociación nesa nota de prensa “surdieron dalgunos compromisos, como foi la busca d’una partida nos Presupuestos Xenerales del Estáu pa l’Academia de la Llingua Asturiana (ALLA), única academia de toles de les llingües del estáu español que nun tien nenguna partida asignada”. Y darréu d’ello confirmase agora la presentanción d’enmiendes a losPresupuestos per parte d’Izquierda Unida, (que yá presentar l’añu pasáu nel Senáu), y de Foru.

Les enmiendes permitiríen que l’Academia cuntará la primer vez na historia con un presupuestu del gobiernu central pa financiase distintu del del Principáu que ye l’únicu del que dispunxo a lo llargo de tola so hestoria.

Daniel Fernández, como voceru nacional de Compromisu por Asturies, destacó que Asturies ye la Comunidá Autónoma con más superávit n’agostu, un 0,34 % del PIB, cuando’l desempléu nel tercer trimestre de 2013 llega a 115.900 persones.

Pa Compromisu por Asturies el Tripartitu que sofita al gobiernu asturianu de PSOE, IX y UPyD ye “anguaño más –pepero- que’l PP, asina ta primando cumplir les esixencies de Madrid y de la Troika frente a la supuesta principal esmolición del executivu que sofiten, que dicen ye l’empléu, onde por contra si tamos a lo cabero de too l’Estáu, algamando cifres récord nel tercer trimestre de 2013 con 115.900 paraes y paraos, lo que ye a cencielles insultante”.

Dende Compromisu por Asturies señalen que “el superávit del 0,34 % del PIB de Asturies respuende a l’alloñanza de PSOE, IX y UPyD de los problemes de la xente, y a un executivu muncho más esmolecíu con nun fadiar en Madrid qu’en defender los nuesos intereses” como asina reconoció’l mesmu Javier Fernández nel Alderique d’Orientación Política apocayá celebráu ya que “lo qu’el nuesu Presidente entiende por llealtá institucional ye nun cafiar nin faer enforma ruiu cuando se tán pisando los intereses d’Asturies, porque somos la Comunidá Autónoma peor tratada nos Presupuestu Xenerales d’Estáu, ensin qu’esti gobiernu tenga pensáu faer absolutamente nada”.

Compromisu por Asturies recuerda que “Asturies tien una llende de déficit del 1,06 % pal exerciciu 2013, pero prefieren aplicar a raxatabla les polítiques d’austeridá del PP y de la Troika, anque ello sía condergar al desempléu a una cantidá inadmitible d’asturianes y asturianos, aumentu del paru que se produz a pesar del éxodu masivu de moces y mozos que nun tienen nenguna oportunidá llaboral nin personal na so tierra” lo que Daniel Fernández calificó de “indolencia d’unos partíos que sofiten un gobiernu inerte, más esmolecíos poles sos temes internos que polos problemes de la ciudadanía, con un PSOE que solo quier siguir gobernando, una IX atada polos sos problemes de corrupción y UPyD que convirtió a Asturies nun campu de batalla contra Catalunya” concluyó.

Daniel Fernández como voceru nacional de Compromisu por Asturies, animó a tola sociedá asturiana democrática y cansada del réxime corruptu borbónicu, a participar na concentración de refuga a los premios Príncipe d’Asturies, que va tener llugar el vienres 25 d’ochobre a les 17:00 hores na Plaza de la Escandalera d’Uviéu.

Dende Compromisu por Asturies recuerden que “somos Principáu dende 1.388 de resultes de les victories militares de Castiella contra tres rebeliones asturianes contra la corona, la postrera de 1883, y los nuesos políticos quieren que veamos tal condición como un honor, cuando nun ye más que la constatación de la sumisión política, social y económica a intereses ayenos a la nuesa tierra”.

Pa Compromisu por Asturies “esta sumisión cristalizar nel sucursalismu de la nuesa clase política frente a Madrid” y asina los Premios Príncipe d’Asturies “amuesen una realidá ficticia onde se sofiten les ciencies, cuando la realidá ye un retayu dramáticu n’investigación y l’esiliu forzosu de les y los investigadores, onde s’apuesta pola solidaridá cuando se retayen toles ayudes a la dependencia y les prestaciones sanitaries esistiendo n’España un aumentu alarmante de la probeza, qu’apuesta pola conocencia cuando güei mesmu tenemos una fuelga educativa ente otros motivos pola eliminación de too lo que tien que ver col pensamientu y filosofía, y defensora de los valores del deporte cuando España ye’l ñeru del doping”.

Daniel Fernández acusó a la clase política de “dexase cegar pola pompa d’unos actos marcaos por una puesta n’escena típica de les monarquíes europees decimonóniques, onde naide s’atrevía a contradicir a la verdá oficial que marcaben les cases reales, anque estes tean llenes de podrigueru, corrupción ya impunidᔠuna Asturies ficticia y súbdita frente “a la Asturies real de ciudadanes y ciudadanos llibres que se va concentrar na Plaza de la Escandalera a les 17:00 hores, denunciando una realidá d’estafes bancaries, despidos, probeza, inxusticies y desigualdaes que los nuesos políticos nun quieren que se vea como bonos súbditos de la so Maxestᔠconcluyó.

Nuna nota de prensa asoleyada esti día, Andecha Astur llama a movilizase escontra los Premios Principiegos, na llucha pola República Asturiana y el Socialismu.

“Enxamás comu agora, en plena espresión del capitalismu más xabaz y de falta de llibertaes individuales y colleutives foi tan preciso dar una rempuesta na cai a la setosa esibición d’españolismu colonialista que tien a los “Príncipes d’España” comu protagonistes”, aseguren n’Andecha.

Ello asina, fai un llamamientu al conxuntu del Pueblu Trabayaor Asturianau a participar na concentración convocada pal prósimu vienres 25 d’ochobre a les 17hores na Plaza la Escandalera d’Uviéu. ¡Pola República Asturiana y pol Socialismu!.

El voceru nacional de Compromisu por Asturies, Daniel Fernández, calificó d’esperpéntica la suspensión del conciertu d’Albert Pla poles sos declaraciones supuestamente antiespañolas, al dicir que-y daba ascu ser español.

Pa Compromisu por Asturies lo más escandaloso ye “la vuelta a la censura y l’ataque contra la llibertá d’espresión d’un artista, qu’acertada o equivocadamente, como cualquier ciudadanu, puede espresar llibremente les sos idees ensin sufrir represalies por ello” y destacaron que “mientres nun esista apoloxía de delitos, como por ciertu constitúin les declaraciones de ciertos obispos al respective de los abusos sexuales de menores y abusos sobre les muyeres, ensin que naide nel PP realizaren la más mínima valoración, tamos falando llanamente de censura”.

Compromisu por Asturies destacó que “especialmente esperpéntico ye que la derecha saltara ante les declaraciones d’un artista como Albert Pla, que ye básicamente un polemista y un prevocador, asina que perdieron los papeles ante un espectáculu que s’anunciaba como –Tu vida es una puta mierda y lo sabes-, lo cual demuestra lo risible de la reacción del PP solicitando la suspensión del conciertu y de Foru aceptando tal pidimientu”.

Daniel Fernández tamién resaltó que “n’Asturies tenemos precedentes de declaraciones muncho más ofensives, ensin que provocaren tales reacciones, asina Arturo Fernández humildó a les persones con problemes económicos diciendo que nunca interpretaría a un mendingo, porque eso pegase, y los defensores de la cultura asturiana tamos acostumaos a los exabruptos de Gustavo Bueno, ensin que naide nin siquier amenazara con quitar les subvenciones a la so fundación” añediendo que “por enforma que fadien les sos opiniones, tán protexíes pola llibertá d’espresión, pero polo visto les d’Albert Pla non”.

Finalmente Compromisu por Asturies solicitó que “cualquier costu que se derive de la suspensión del conciertu, tendríen d’asumilo’l PP y Foru, porque solo faltaría que tuviéramos que pagar les y los xixoneses la vuelta al NODO, al nacionalcatolicismo y a los censores qu’amenorgaben escotes, ampliaben faldes y protexíen l’espíritu nacional” concluyó.