Política

Compromisu por Samartín refuga l’enllaz ente’l Corredor del Nalón y l’Alcampo y fai anuncia que va presentar allegamientos al proyectu, calificándolu de chanchullu y denunciando la connivencia esistente ente Ayuntamientu y l’empresa.

Ante la publicación nel BOPA del 25 de febreru del anunciu del resolvimientu de la CONSEYERÍA DE FOMENTU, ORDENACIÓN DEL TERRITORIU Y MEDIU AMBIENTE pola que se somete a información pública’l proyectu d’obres consistente na construcción d’una vía de salida dende la carretera de la Rede del Principáu d’Asturies AS-117 Riañu-Puertu de Tarna, al altor del puntu kilométricu 9+590, marxe derecha ( L´Entregu), nel conceyu de Samartín del Rei Aurelio que tien como finalidá enllazar el corredor del Nalón col Centru Comercial Alcampo Valle del Nalón, Compromisu por Samartín anuncia yá que, nos próximos díes, va tomar vista del espediente y va presentar allegamientos refugando estes pretensiones.

Compromisu, que yá tomó vista del espediente nel ámbitu municipal onde s’atopó con una situación escandalosa llarada d’illegalidaes ya irregularidaes que fraya lo contemplao na Llei de Procedimientu Alministrativu y del que s’esprende la connivencia de les autoridaes municipales colos representantes de la empresa, considera que nos alcontramos ante una cacicada monumental qu’antepón l’interés privativu de la empresa penrriba del bien xeneral de los usuarios del corredor y que’l so únicu fin ye consiguir qu’esti centru comercial, sobremanera la so gasolinera, s’asitie en condiciones ventaxoses sobre’l pequenu comerciu local y estaciones de serviciu competidores suyes. Nesti sentíu hai que recordar la última decisión municipal del zarru de la gasolinera de L´Entregu na que, a pesar de que la concesión esaniciarase, ello nun significaba la clausura automática de la gasolinera, tal y como se vendió dende’l gobiernu municipal, na opinión de Compromisu.

Compromisu encamienta a los grupos municipales de la oposición a que digan clara y públicamente cuál ye la so actitú nesti asuntu y dexen d’amoriar la perdiz. La ciudadanía tien drechu a saber que ye lo que piensen al respective. Queremos saber si van dexar que lo que nun foi posible nin pal pueblu de Blimea, nin pa equipamientos públicos tan importantes como los polígonos industriales de La Florida y el de Villar, lo vaya a ser pa una empresa privada que los sos tentáculos paecen llargos y poderosos, algamando, non yá oxetivos municipales, sinón tamién autonómicos.

Compromisu recuerda tamién que la Llei de Carreteres Asturianes prohibe taxativamente esi tipu d’enllaces dende carreteres como’l Corredor del Nalón a propiedaes privaes, como ye’l casu, que se frayen les instrucciones técniques de seguridá qu’afiten les distancies ente salíes y considera una tomadura de pelo les referencies al colapsu de los accesos al L´Entregu. Recuerda, amás la importancia del Corredor como exe vertebrador del valle y la so comunicación col restu de Asturies.

Pa finar, Compromisu manifiesta la so voluntá de collaborar con toles organizaciones polítiques, sociales y vecinales que s’opongan a esti chanchullu que dexa pelos suelos el principiu d’igualdá que debe de rexir les actuaciones de los poderes democráticos.

La conseyera de Agroganadería y Recursos Autóctonos del Principáu d’Asturies, María Jesús Álvarez, fizo anuncia esti martes de que’l Ministeriu d’Agricultura, Alimentación y Mediu Ambiente (Magrama) tien la intención de “recuperar” nel presupuestu del próximu exerciciu subvenciones pa los habitantes y residentes locales de la parte asturiana del Parque Nacional de los Picos d’Europa, magar que dende’l Partíu Popular dicen nun tener conocencia de tala midía.

Pala Conseyera tendríamos de tar toos d’alcuerdu pa demandar al Gobiernu de Mariano Rajoy que recupere eses ayudes, sigún dixo nuna comparecencia na Xunta Xeneral del Principáu d’Asturies (XXPA) sobre’l cumplimientu d’un resolvimientu sobre les acciones pa qu’en 2014 puedan llograse les subvenciones previstes na llei de 30 de mayu de 1995.

Les comunidaes autónomes del Principáu d’Asturies, Cantabria, y Castiella y Llión son les encargaes de la xestión ordinaria y habitual del Parque, tres el trespasu de competencies. Sicasí, Álvarez aportunó en que les subvenciones en cuestión son competencia del Estáu y que’l Ministeriu asina lo asume.

Los grupos parlamentarios de la Xunta Xeneral del Principáu d’Asturies (XXPA) nun llograron apautase nuna declaración conxunta con motivu del Día Internacional de la Muyer que se celebra’l 8 de marzu, como venía faciéndose davezu toos estos años d’atrás. El recuerdu de que la Xunta s’apautara hai poco na retirada per parte del Gobiernu central de la reforma de la llei del albuertu, al entender que yera un “retrocesu”, foi lo que torgó dafechu la declaración conxunta.

Como siempre asocede con esta mena de cuestiones, les versiones sobre lo asocedío ente PSOE y PP separtense dafechu. La diputada del PSOE Adriana Lastra foi la encargada de desplicar la versión de los socialistes, que sofiten al Executivu autonómicu, dexando bien a les clares que realizaron una propuesta’l pasáu miércoles que foi sofitada por IX y por UPyD.

Dotramiente, los otros dos grupos con representación parlamentaria, Foru y PP nun quixeron sofitar el borrador de la declaración que recordaba que la Xunta Xeneral solicitara la retirada per parte del Gobiernu central de la reforma de la llei del albuertu.

Una dellegación d’Andecha Astur participará nos Alcuentros Internacionales “Frente a la Troika la nuesa vía. Cambiu y Soberanía Nacional” que, entamaos por EH Bildu, tendrán llugar el prósimu dos de marzu.

Nellos participarán organizaciones polítiques que comu Andecha Astur comparten una visión radicalmente crítica con respeutu al modelu d’integracióneuropea. Ente otros participarán representantes del Sinn Féin (Irlanda), Syriza (Grecia), UDB (Bretaña), Bloco de Esquerda (Portugal), Sinistra Ecologia Libertà (Italia), Die Linke (Alemaña) y representantes d’otros pueblos y naciones.

Con motivu del Díi que se cellebra la Llingua Materna, Andecha Astur vieno acabante asoleyar un comunicáu nel que dexa afitao “la llingua asturiana continúa nuna situación predemocrática que facilita la so represión y que mos lleva camín del esaniciu. Y nesta xornada dedicada internacionalmente a la llingua materna, Andecha Astur remembra una vuelta más la situación predemocrática que carecemos n’Asturies onde non solo nun se mos reconocen los nuesos drechos políticos comu Pueblu, sinon que la nuesa llingua ye víctima d’una situación de represión y amenorgamientu sistemáticu por mor de la so falta de reconocencia comu llingua oficial”.

“Mentes el “Principado” permite y da puxu a la so represión y sigue faciendo’l paripé d’una Oficina de Política Llingüística ensin más función qu’aniciar una rede clientelar al so alrodiu, la llingua del Pueblu Asturianu sigue enfrentándose a una situación d’asimilación y esaniciu que namás pue iguase de magar la so declaración d’Oficialidá”. finaliza Andecha na nota asoleyada esti día con motivu de la celebración

IX vieno acabante rexistrar una llei pa llindar a ocho años el mandatu del presidente del Principáu pa contribuyir a la rexeneración democrática y a un mayor dinamismu institucional. IX tamién propón que los diputaos puedan votar en contra de la elección del presidente y suprimir l’estatutu de los expresidentes.

Ángel González, voceru parlamentariu d’IX na Xunta Xeneral, presentó esta mañana na Xunta Xeneral una Proposición de Llei de reforma de la Llei del Presidente y del Conseyu de Gobiernu del Principáu d’Asturies coles mires de contribuyir a la rexeneración democrática y a un mayor dinamismu de les instituciones afiguráu al traviés de tres modificaciones básiques: afitar la posibilidá de que los diputaos puedan votar en contra de la elección del presidente de la comunidá autónoma na sesión de investidura, como asocede na práctica totalidá de los parlamentos autonómicos; suprimir l’estatutu de los expresidentes, qu’anque n’Asturies nun se llevó a cabu sí ta recoyíu na llei y establecer una llende de mandatos pa los presidentes autonómicos d’ocho años completos.

Angel González esplicó que tal como ta na llei vixente, 6/1984, los diputaos nun pueden votar en contra del presidente propuestu, namái abstenese, lo que produz que’l candidatu nomáu sía a cencielles el que cunte con un mayor númberu de votos a favor. Col cambéu qu’inclúi esta Proposición de Llei, el candidatu precisaría más votos a favor qu’en contra, aplicando asina’l sistema conocíu como investidura.

Nel casu de los expresidentes, IX propón esaniciar los artículos que se refieren a esta figura. Hasta’l momentu recoyía la posibilidá de que tuvieren “auxilios y medios personales y materiales que al producise’l cese asígnense-yos con calter temporal” ensin que nengún de los ex presidentes lo solicitare. A xuiciu d’Ángel González nestos momentos “nun se sostien” caltener esti artículu.

Daniel Fernández afirma que “acaldía ye más patente que tenemos que solucionar los nuesos propios problemes, porque naide va faelo por nós”

.

Daniel Fernández, como voceru nacional de Compromisu por Asturies, treslladó’l sofitu de la organización a les Marches de la Dignidá, que va rematar con una gran movilización en Madrid el 22 de Marzu.

Pa Compromisu por Asturies “les Marches de la Dignidá son berru de la Asturies que nun se resigna que, de forma solidaria con otres zones del Estáu, vamos amosar que nun engurriamos ante unes polítiques por que los de riba, y causantes d’esta estafa mal llamada crisis, tengan cada vez más recursos saqueando los servicios públicos y retayando los nuesos derechos, y los de baxo cada vez tengamos menos prestaciones y menos capacidá pa llevar una vida digna, dempués de pagar la estafa qu’entamaron la banca y les grandes empreses, cola complicidá de los distintos gobiernos de PP y PSOE”.

Dende Compromisu por Asturies destaquen que “la ciudadanía acaldía tien una percepción mayor que solo enfrentándose directamente coles inxusticies, éstes pueden parase, como amuesen los exemplu de Gamonal, la llucha de los trabayadores de la llimpieza y sector sanitariu de Madrid, y más apocayá la sentencia que declara nulu l’ERE de Tenneco”.

Según Daniel Fernández “acaldía ye más patente que tenemos que solucionar los nuesos propios problemes, porque naide va faelo por nós”.

El grupu parlamentariu d’IX na Xunta Xeneral va preguntar a la Conseyera de Agroganadería por qué nun cumplió colos plazos pa la presentación del Plan del Llobu nel parlamentu asturianu, afitaos pa finales del añu pasáu; va apelar al conseyu de Gobiernu sobre política en materia d’inmigración, concretamente sobre l’impactu nos inmigrantes residentes n’Asturies de les nueves polítiques de represión y espulsión d’esti colectivu, ante la grave alarma social que se creó ente los inmigrantes ya inclusive ente los funcionarios encargaos d’aplicales, polo que suponen de vulneración de los más elementales derechos humanos. Dambes cuestiones van tener llugar na sesión del xueves, ente que’l vienres, la coalición va defender una Proposición Non de Llei na qu’encamienta al conseyu de Gobiernu a dirixise al Gobiernu de la nación con cuenta de que ésti garantice’l financiamientu abondu que faiga posible tantu’l remate final de les obres como l’alquisición del Centru Stephen Hawking de Llangréu, pa la so apertura a lo llargo del añu.

De la mesma, IX pide que’l Gobiernu de Rajoy respecte’l proyectu inicial del Centru y, arriendes d’ello, adquiera la considerancia de Centru de Referencia Estatal pa les Persones con Discapacidáes Neurolóxiques y caltenga el previstu calter públicu de la so xestión.

Per otru llau na Xunta de Voceros d’ayeri pela mañana aprobóse, a propuesta d’IX, que la Comisión de Reglamentu de la Xunta axunte tolos xueves. Hasta’l momentu yera’l presidente quién lu convocaba más o menos cada 15 díes. Respectu al calendariu de plenos de la campaña de les elecciones europees, los grupos alcordaron que nun haya plenu namá la última selmana de la campaña, anque nel Congresu suspender mientres tola campaña ya inclusive a finales d’abril.

Sobre la sentencia de Tenneco, conocida ayeri pela mañana y a entrugues de los periodistes, Ángel González, voceru parlamentariu d’IX, considera que la meyor solución pa esti casu y otros que se tán produciendo, como’l de Coca-Cola, ye l’anulación de la reforma llaboral, “que ye la que pon en bandexa los despidos y los zarros”. Tamién aseguró’l voceru que felicitamosnos del ésitu nos tribunales na midida qu’anula los despidos y pidimos a la empresa que recapacite y siga trabayando n’Asturies como taba, con beneficios, y que nun vuelva empezar. Tienen tou nuesu sofitu los trabayadores ante lo que faiga falta faer”, concluyó.

La propuesta d’una candidatura xunitaria asturiana dientru la coalición entamada con EH Bildu, el trabayu en Conceyu Abiertu, y la necesidá d’aniciar una Mesa Nacional, ente los alcuerdos d’un Conceyu Xeneral pa medrar.

Productivu y pa medrar, eses fueron les valoraciones rializaes por Arturu X. Bermeyu pa resumir el Conceyu Xeneral Estraordinariu que tuvo llugar el pasáu sábadu 15 de febreru. Un conceyu nel que s’aprebó la llinia política de la organización pa los prósimos años, na que se perafitaba “l’apueste pola xunidá, pero ensin permitir qu’ello suponga un paralís de la organización, y el sofitu al proyeutu municipalista que representa Conceyu Abiertu, asina comu la necesidá d’aniciar una Mesa Nacional na que tean cabida toles formaciones socio-polítiques d’ámbetu nacional qu’asuman el drechu del Pueblu Asturianu a decidir”.

Asina mesmo, tamién s’aprebó la participación nes elleiciones europees na coalición entamada con EH Bildu, y la propuesta d’una candidatura asturiana xunitaria dientru d’ella, lo que se treslladará nos vinientes díis al restu de les formaciones sociales y polítiques que se mueven dientru’l marcu del soberanismu asturianu.

Arriendes d’ello, valoróse la situación socio-política d’anguañu, y tratárense aspeutos concretos de la rialidá asturiana, apostando por afondar tantu nos conteníos sociales comu nacionales, denunciando cómu la izquierda española quier aprofitar la gravedá de la situación social que carecemos pa tapecer la custión nacional asturiana.

Nel tarrén organizativu tamién hebio novedaes, afitándose responsables pa cauna de les estayes de trabayu y emplazándose pa la prósima Xunta Xeneral pa presentar los programes d’actuación.

L’Asociación N’Ast vienoa cabante pedir esta fin de selmana la dimisión de Mauricio Bogomak, talo y comu denunció apocayá la Xunta pola Defensa de la Llingua Asturiana (XDLA), por prohibir esti home l’usu del asturianu na camiseta oficial de la XXV Media Maratón de Sieru, al refugar el diseñu orixinal nel que trayía “Campeonatu d’Asturies”, pal qu’esta preba deportiva ye puntuable.

De la mesma manera que la XDLA, en N’AST camienten que’l casu “ye más grave entá si tenemos en cuenta que de la so conceyalía depende’l Serviciu de Política Llingüística d’esti conceyu: nun ye normal que tea al frente de la mesma una persona que refuga abiertamente l’asturianu”.

Poro, N’AST “nun sólo quier sumase a la denuncia d’esti casu, sinón que quier pidir públicamente la dimisión de Mauricio Bogomak de los sos cargos nel Ayuntamientu Sieru o que se lleve a cabu la so destitución por parte del Alcalde’l Conceyu”.