Política

Gaspar Llamazares, diputáu d’IX nel Congresu, rexistró esti día una batería d’entrugues pa saber los plazos colos que se van executar les grandes infraestructures del Estáu n’Asturies.

El diputáu asturianu esixe información, según elli “per enésima vegada, sobre les feches previstes pa la finalización de la Variante Ferroviaria de Payares y la so apertura al tráficu d’alta velocidá, más de saber si va entrar en funcionamientu un tubu o dos de los que se tán construyendo”. De la mesma pregunta tamiém “qué obres tán previstes p’habilitar unos accesos afayadizos a Uviéu y a Xixón y pa cuándo tán previstes la llegada de conexón del ferrocarril d’altes prestaciones a estos dos ciudaes, y cuálos son los planes que tien el Gobiernu pa la llegada del ferrocarril d’altes prestaciones a Avilés y la so conexón col aeropuertu”. A lo último, y al respective de la llegada de l’AVE Gaspar Llamazares, entruga “pola culminación del tramu Valladolid-Llión, la construcción del tramu Llión-La Robla y del tramu La Pola L.lena-Xixón, según poles soluciones que piensa dar al fondu de sacu y marcha tras a la que se ven obligaos los trenes na estación de Llión”, una idega que se presentó como provisional y que en palabres de la ministra de Fomentu “nun se-y asocede nin al que rustió la mantega”. Per otru llau, el diputáu pregunta sobre los planes, plazos y presupuestos pal soterramientu de víes en Llangréu, pa la realización del plan de víes en Xixón, pa Rondar Norte d’Avilés y l’autovía Uviéu-La Espina-Canero. Al respective de l’autopista del mar ente El Musel y Nantes-Saint Nazaire quier saber en qué situación s’atopen les xestiones pa la so continuación y por qué esta llínea nun recibe un sofitu similar al que’l Gobiernu espacha a la llínea Vigo-Saint Nazaire. Esixe información sobre si Fomento tien prevista la supresión del peaxe na autopista del Güerna y en qué plazu. A lo último, entruga al executivu de Mariano Rajoy sobre cuál ye la valoración d’AENA sobre’l retrocesu esperimentáu pol aeropuertu d’Asturies en 2014, tantu en númberu de viaxeros como n’aerollínees,, según si piensa’l Gobiernu arrenunciar al retayu de la pista, agora que la Organización d’Aviación Civil Internacional (OACI) esanició’l so encamientu de que los 240 metros de terrén inmediatu a les pistes aérees tean llibre d’elementos non frangible.

Nun duru comunicáu asoleyáu esti día, Andecha critica que’l “Principado” ponse de nueu n’evidencia al refugar los 302 altriques escontra la espansión de Cogersa en Serin. Andecha Astur califica de falta de respetu democráticu y complicidá especulativa la refuga de los 302 altriques presentaos escontra l’espediente qu’autoriza a Cogersa a duplicar el so actual complexu industrial asitiáu en Serín, aceutando namás correxir un par d’erros formales que contenía’l plan urbanísticu.

Pala organización política nacionalista “esta actitú pon n’evidencia a un “Principado” que fai de los mecanismos de participación democrática y control mediu ambiental simples trámites alministrativos valeros de conteníu. Cuandu entá tan mui presentes los chamullos del “Principado” pa favorecer la esplotación privada minera d’oru en Salave, felizmente non autorizada, esta nuea actuación pon n’evidencia la falta de respetu a los procedimientos democráticos ya inclusu’l xacíu común d’una istitución incapaz d’asumir la menor crítica nin aportación de la sociedá asturiana, esmolecía y concenxada polos riesgos medioambientales”. Nel fondu d’esta nuea cacicada atópase siúgn Andecha “l’enfotu del “Principado” d’aniciar una incineraora en Serín ignorando los problemes medioambientales, sociales y sanitarios asociaos a la mesma. Tamién a la so falta de voluntá política pa considerar opiciones menos agresives, viables y caltenibles medio-ambientalmente comu les qu’anguañu furrulen en toa Europa, onde proyeutos comu’l de la incineradora formen parte d’un pasáu al que nun se quier tornar, y cuyes complicaciones y efeutos secundarios son enforma bien conocíos, y pesia los cualos el “Principado” anecia con esti proyeutu faraónicu que nin ye necesariu p’Asturies nin soluciona la problemática de la xestión de residuos nel nuesu país”.

Andecha Astur, al traviés del Diputáu Jon Iñarritu –Amaiur- miembru de la coallición Los Pueblos Deciden de la que forma parte, presentó una batería d’entrugues sobro problemes reinales de la collación de Bañugues. Concretamente, Andecha refierse a “la incapacidá, sinón falta de voluntá política, del Conceyu Gozón pa dar rempuesta a múltiples problemes qu’afeuten principalmente a la collación de Bañugues, con un gobiernu municipal cuya incompetencia ye asemeyada a la falta d’iniciatives de la oposición, lo que llevó a una situación de problemes enquistaos indefinidamente”.

Énte esta situación, Andecha Astur tomó la iniciativa pa llograr rempuestes, soluciones y pa que se depuren les oportunes responsabilidaes. Nesti sen, y al traviés del Diputáu Jon Iñarritu –Amaiur- miembru de la coallición Los Pueblos Deciden xuntu con Andecha Astur, dirixóse al Gobiernu español solicitándo-y la rempuesta per escrito a dalgún d’estes temes pendientes, en visu a llograr la información precisa –que la Casa Conceyu Gozón ñega- pa posteriores actuaciones, tantu a nivel européu comu direutamente llegales.

L’actu d’homenaxe a Andres Solar Santurio qu’entamó esta fin de selmana Andecha Astur sirvió pa reivindicar la so figura comu militante nacionaliegu d’izquierda perriba de la puramente lliteraria. Nel actu entamáu por Andecha Astur cola xida del 30 cabudañu del fallecimientu d’Andrés Solar Santurio, reivindicóse la so figura humana y el so compromisu militante comu nacionaliegu d’izquierda, faceta esta que sistemáticamente pretende escaecese cuandu se fai referencia al so llegáu lliterariu.

Ente les intervenciones destacó la de Carme Pérez, qu’arriendes de reivindicar l’Andrés Solar comprometíu col so tiempu y el so pueblu, fundador del Ensame Nacionalista Astur, tamién tuvo pallabres “pal Andrés Solar presona, pal compañeru siempres dimpuestu y solidariu, modestu y lluchaor, que foi en sigo mesmo un exemplu pa la xeneración d’entós y una referencia obligada pa la mocedá d’agora”.

Nesi sen remembró qu’ente los participantes nel homenaxe atopábense antiguos compañeros de militancia d’Andresín nel Ensame Nacionalista Astur, agora n’Andecha Astur; organización política qu’asume’l llegáu d’aquel hestóricu ENA que marcó l’escomienzu de la llucha pola recostruición nacional y social d’Asturies, que non solo ye posible sinon pernecesaria.

Nel actu colocóse un ramu flores na placa qu’Andecha Astur tien llantada a la puerte del cementeriu Deva na alcordanza d’Andresu y nelli participó con fonda emoción la familia del homenaxeáu. En pallabres de la so hermana Lali: “Daqué tenía Andresín d’especial y daqué importante semó pa que trenta años dempués de la so muerte lu sigan teniendo comu referente presones que pola so edá nun llegaron a conocelu”.

IX pide la devolución del presupuestu por atalantar que la rebaxa d’impuestos supón poner en riesgu los servicios públicos. Na so opinión, “el proyectu del PSOE y el PP nun atiende a la reactivación económica, la protección social, la meyora del sector agrariu o la garantía de los servicios públicos”.

Manuel González Orviz, Coordinador d’IX d’Asturies, y Aurelio Martín, voceru parlamentariu d’IX na Xunta Xeneral, presentaron esta mañana la enmienda a la totalidá con devolución al Gobiernu que va defender el próximu vienres basada en que nun escenariu de crisis y fuerte cayida d’ingresos, les alministraciones públiques nun pueden dexase baxar los impuestos si lo que pretenden ye caltener el nivel mínimu de gastos pa sostener l’estáu del bienestar, onde les polítiques sociales, d’educación y sanidá xueguen un papel primordial.

Esti ye’l mesmu argumentu que señala l’Informe Económicu-Financieru qu’acompaña’l proyectu presupuestariu y que pa IX ye una contradicción con que’l mesmu presupuestu contenga una bien significativa rebaxa del tramu autonómicu del impuestu sobre la Renta de les Persones Físiques y una medría de les deducciones d’esi mesmu impuestu. “El presupuestu compromete un amenorgamientu de recursos nel añu 2017”, aseguró tamién el Coordinador d’IX.

Gaspar Llamazares, diputáu d’IX per Asturies, rexistró una Proposición Non de Llei de plena reconocencia de la llingua asturiana nel Diccionariu de la Real Academia Española na qu’encamienta al Gobiernu a que, en cumplimientu del mandatu constitucional de respetu y protección de les llingües españoles, solicite a l’Academia qu’estudie cuatro modificaciones nes entraes del diccionariu, referíes a la llingua asturiana. Llamazares atalanta que la RAE tien de dexar los prexuicios y los plantegamientos llingüísticos totalmente caducos pa otorgar un tratu d’igualdá col restu de llingües del Estáu.

El diputáu pretende que la RAE defina la categoría llingüística y l’importancia cultural, histórica y política d’esta llingua que pertenez a tolos asturianos y asturianes y a los falantes del so dominiu llingüísticu, pero tamién a la ciudadanía del Estáu español. De la mesma, convida a que la RAE dexe los sos prexuicios sobre la nuesa llingua, escaeza planteamientos llingüísticos totalmente caducos y otorgue un tratu d’igualdá col restu de llingües del Estáu.

Nuna nota de prensa espublizada esti día, el diputáu asturianu demanda que l’Academia española modifique l’actual acepción d’asturianu: “dizse de la variedá asturiana del dialectu romance asturlleonés” y la sustituya por: “lengua romance que se habla en Asturias y otros territorios del antiguo reino asturleonés”.

Llamazares pide tamién el cambéu del términu bable, anguaño descritu como “dialectu de los asturianos”, y ponga a cencielles “llingua asturiana”. El tercer cambéu qu’esixe’l diputáu ye la d’asturlleonés, que na edición actual figura descritu como: “diese del dialectu romance nacíu n’Asturies y nel antiguu reinu de Llión como resultáu de la peculiar evolución esperimentada ellí pol llatín”. El diputáu propón que la nueva acepción diga: “díc ese de la lengua romance que se habla en Asturias y nen el antiguo reino de León”.

La cuarta variación refería se a la sesta y séptima acepción de lleonés, que figura “como dichu del dialectu romance”. El diputáu asturianu propón que la nueva definición sía “dicho de la lengua romance” y que suma esa séptica acepción.

Ente los argumentos qu’espresa’l diputáu pa responder por estes cambeos atopa’l que “a pesar de que la llingua d’Asturies ta reconocida pola lexislación, espresamente protexía y promovida polos poderes públicos, a pesar de que cunta con instituciones de prestíu científicu respondiendo por el so desenvolvimientu, como la Universidá d’Uviéu, a pesar de cuntar con una Academia de la Llingua Asturiana, de cuntar con una Xunta de Toponimia y a pesar de que los estudios científicos europeos na materia inclúin l’asturianu n’igualdá de condiciones col restu de les llingües romances, la Real Academia Española de la Llingua sigue ignorando’l nuesu idioma nel so diccionariu, calteniendo una definición casi invariable nos sos ventitrés ediciones”.

El diputáu tamién recuerda qu’a la Real Academia de la Llingua “presentóse-y na so see de Madrid, en 2012, un informe solicitando cambeos nes entraes d’asturianu, bable, asturlleonés y lleonés, respondíu por por profesores universitarios d’Asia, Europa y América y sofitáu por fuerces polítiques, sociales y culturales asturianes y que, magar les sos bones palabres iniciales, fzxo casu omiso al pidimientu de la comunidá científica internacional y a sociedá asturiana que lo reclamaba, despintando información sobre’l cambéu que se diba a realizar y finalmente publicando una revisión totalmente agresiva que se retrotrai a la tesis acientífica de “los bables” negando asina la unidá idiomática del asturianu”.

Talamente como anunciara nel entamu la selmana, Izquierda Xunida llevó esti día la so porpuesta a la Xunta Xeneral del Princiáu pa que se reconociera la la especialidá docente de Llingua Asturiana, cuntando col sofitu de toles demás fuercies polítiques cola esceición del PP, qu’ensin embargu llevaba esi reconocimientu nel so programa electoral, como recordaba pela tarde Iniciativa pol Asturianu.

Iniciativa pol Asturianu felicitabase esta tarde de la decisión de les fuercies polítiques asturianes y llamentaba la decisión del PP de votar en contra del reconocimentu del profesoráu d’asturianu. Sigún apuntaben n’asociación “el PP llevaba nel so programa de 2012 el reconocimentu del profesoráu d’asturianu contra’l que votó güei”.

Dende Iniciativa pol Asturianu querien felicitar “a Izquierda Xunida pola so propuesta votada güei na Xunta Xeneral col envís de que se reconoza la especialidá docente de Llingua Asturiana, decisión que ta pendiente de l’aprobación del Ministeriu d’Educación y que yá cuntó col sofitu de toles fuercies n’otres ocasiones y apocayá, cola petición esplícita del Conseyu Escolar Estatal”. Y tamién tamién a la FSA-PSOE, Foru Asturies y UPyD pol so sofitu a esta propuesta que busca normalizar la situación del profesoráu d’asturianu, que lleva trenta años d’interinidá por mor de la falta d’un reconocimientu llegal a l’asignatura, cuestión que dexa afitada la nueva llei educativa y que namás precisa de la reconocencia de la especialidá per parte del Ministeriu d’Educación, pa permitir que los profesores d’asturianu tean les mesmes condiciones y obligación de pasar per una oposición, como’l restu de les especialidaes docentes”.

Iniciativa pol Asturianu ponía enrriba la mesa que “el Partíu Popular d’Asturies llevaba nel so programa electoral de 2012, últimos comicios autonómicos celebraos n’Asturies, un apartáu dedicáu al enseñu del asturianu, onde dicía especificamente “Reconoceremos la especialidad de asturiano para el profesorado” (páx. 68

El Gobiernu español asume’l plantegamientu de Andecha Astur de que la operadora LDLines cometió una riestra d’inregularidaes que lleven a una auditoría en cordinación cola Comisión Europea, que vieno acabante d’abrir la posibilidá d’ampliar el periodu de ellexibilidá de los costos pa favorecer la continuación de l’Autopista del Mar.

En rempuesta a les entrugues plantegaes por Andecha Astur al traviés del diputáu de Amaiur, Jon Iñarritu, compañeru de la coalición Los Pueblos Deciden, (ver documentu alxuntu), el Gobiernu español respuende que:

– Efeutivamente, detéctense problemes na xestión del serviciu, tantu del llau de la política tarifaria, comu de los costos que la naviera dio a conocer.

– Que los Estaos español y francés tán empecipiando los trabayos pa que se rialice una auditoría a l’Autopista del Mar en cordinación colos servicios de la Comisión Europea a cargu del Proyeutu Marco Polu.

– Que pa favorecer un marcu favoratible pa la continuación de la llínia, la Comisión Europea respondió afirmativamente a la propuesta de dambos estaos d’enllargar el periodu de llexibilidá de los costos pa faer posible el pagu de la totalidá de la sovención.

Dende Andecha Astur vese con satisfaición comu la respuesta del Gobiernu español confirma parcialmente les denuncies que veníemos realizando tocantenes a les inregularidaes na xestión de l’Autopista del Mar, poniendo n’evidencia les declaraciones de los responsables del gobiernu del “Principado” que nun supieren dir acullá de les declaraciones valeres pa salir del pasu ensin acompangales d’actuaciones concretes.

Énte la evidencia de que’l casu Villa ye la punta del iceberg del financiamientu del sistema mafiosu-clientelar del PSOE n’Asturies, nel que los Fondos Mineros son una parte fundamental, Andecha Astur vieno acabante de plantegar una entruga al Gobiernu español sobro ello al tiempu que nuna nota de prensa consideraba “patéticos dafechu y bien significativos los intentos del PSOE por desvenceyase tantu de Fernández Villa, comu de pretender dexar los Fondos Mineros al marxe de toa investigación”.

Andecha Astur, al traviés del diputáu de AMAIUR, Jon Iñarritu García, compañeru de la coalición Los Pueblos Deciden, presentó delles entrugues al Gobiernu con ruegu de rempuesta per escritu, pa poner en primer términu los Fondos Mineros comu orixe principal de la fortuna acumulada por José Ángel Fernández Villa, “cuyu casu agora descubiertu atalantamos que nun ye más que la punta d’iceberg d’un sistema de corrupción permanente destináu al arriquecimientu presonal y a financiar el sistema mafiosu-clientelar del PSOE n’Asturies”.

Nesi sen Andecha Astur considera “patéticos dafechu y bien significativos los intentos del PSOE por desvenceyase tantu de Fernández Villa, comu de pretender dexar los Fondos Mineros al marxe de toa investigación, siguiendo’l yá avezáu sistema d’aniciar una Comisión d’Investigación nel “Principado” na que nun se llega a ná”.

Amás, nel planu xudicial Andecha diz que tan cuntando col “favor” de la Fiscalía Asturiana “cuya benevolencia nos casos de corrupción del PSOE déxa-yos unos inmensos marxes d’impunidá, talo comu quedó n’evidencia nel casu de les factures d’El Niemeyer”.

La entruga presentada al Gobiernu español ta plantegada nos siguientes términos:

Durante los últimos meses, se han hecho públicas varias informaciones que sitúan el origen fraudulento de los 1,4 millones de euros que ha blanqueado en la última amnistía fiscal el que fuera el principal dirigente sindical del SOMA-UGT y que intervino de forma directa en la gestión de los Fondos Mineros. Teniendo en cuenta, que existe un informe demoledor de la Sindicatura de Cuentas que pone en cuestión la gestión de los mismos Fondos, la formación política Andecha Astur ha solicitado en varias ocasiones que se investigue y aclare la relación entre la fortuna blanqueada y los Fondos Mineros.

Por ello, Amaiur desea conocer:

1.- ¿Ha detectado alguna irregularidad el Gobierno en la gestión de Fondos Mineros destinados a Asturies/Asturias?.

2.- ¿Tiene intención el Gobierno de realizar algún tipo de investigación sobre la gestión de los Fondos Mineros?

IX pide 340 millones d’euros adicionales p’Asturies nos Prespuestos Xenerales del Estáu, al traviés del so diputáu nacional Gaspar Llamazares, que defende enmiendes pa terminar la Variante de Payares, les conexones a los puertos de Xixón y Avilés o 213 millones de Fondos Mineros, amás de partíes pala protección del prerrománicu asturianu y el sofitu a l’Academia de la Llingua.

Izquierda Xunida propón ampliar les inversiones de los Presupuestos Xenerales del Estáu en 340 millones d’euros pa dar respuesta a les necesidaes más urxentes d’Asturies. El diputáu nacional d’IX per Asturies, Gaspar Llamazares, aseguró que l’oxetivu d’esta inversión adicional dexaría concluyir, d’una vegada, proyectos como’l de la Variante Ferroviaria de Payares, el cumplimientu de la sentencia xudicial pal desbloquéu de los Fondos Mineros que’l Gobiernu del PP intenta refugar o partíes pa Xixón Al Norte, Variante d’Avilés o’l caltenimientu del prerrománicu asturianu.

Les cuentes presentaes pol PP suponen, afirmó’l congresista, la reconocencia de los incumplimientos del Gobiernu de Mariano Rajoy con Asturies. El volume global de les enmiendes presentaes por IX pa Asturies, xube a 340 millones d’euros, de los que 43 adicionales destínense a la Variante de Payares y 213 millones a les cantidaes debíes de fondos mineros

Amás, inclúyense partíes na propuesta d’IX pala protección del prerrománicu asturianu, el sofitu a l’Academia de la Llingua y otra pa garantizar el futuru de Trubia y la reincorporación de los trabayadores despidíos, nesti casu venceyándolo al nuevu contratu col Gobiernu británicu.