Política

“Les declaraciones de Daniel Ripa despreciando la llingua asturiana y de la Secretaria Xeneral de Podemos en Gozón, ente otros, defendiendo la unidá d’España y faltando al respetu a asturianos y catalanes son cenciellamente inaceutables”. Con esta dureza salía Arturu X. Bermeyu, secretariu Xeneral d’Andecha Astur, a la palestra del debate políticu esta selmana al mesmu tiempu qu’afirmaba que “nun esperaba esti españolismu dende Podemos”.

Bermeyu tamién dicía esti día nun comunicáu que “perriba del calter sucursal de la formación madrilana n’Asturies, la prosimidá en plantegamientos políticos y sociales, nun facía esperar un comportamientu tan españolista, con declaraciones de cabezaleros d´esta formación nes que nun respeten la identidá llingüística asturiana y lleguen a ponemos a los asturianos comu referentes de la unidá d’España, faltando al respetu non solo al Pueblu Asturianu sinon tamién al Catalán”.

Respeutu a la propuesta d’IAS d’una “unidá popular” con IX y Podemos, Arturu X. Bermeyu esclarió qu’ensin pesllar denguna puerte, Andecha Astur ye una formación nacionaliega que defende la soberanía del Pueblu Asturianu, y que per ende nun-y paez probatible participar en proyeutos estatalistes, muncho menos con formaciones comu IX “cuya implicación colos estremaos gobiernos del PSOE n’Asturies y los ayuntamientos asturianos failos direutamente responsables de la situación política qu’anguañu carecemos n’Asturies, por nun falar de los casos de corrupción direutamente lligaos a los gobiernos d’Areces”.

Gaspar Llamazares aseguró esti día nuna xunta que caltuvo col Vicepresidente de l’ALLA, Xosé Antón González Riaño. que la declaración d’oficialidá de la llingua asturiana ye y va ser parte del programa d’IX y el pasu va ser un “pasu bien importante” y “fundamental” nun potencial diálogu pa formar el próximu Gobiernu del Principáu, en casu de qu’IX llogre formar parte del executivu. El diputáu d’IX d’Asturies nel Congresu tamién encamienta a tolos grupos parlamentarios, incluyíu’l PP, y les instituciones pa que priman al Ministeriu d’Educación, al Gobiernu, pa que reconoza la especialidá docente del asturianu na enseñanza.

A xuiciu del diputáu, que güei se xuntaba col Vicepresidente de l’Academia de la Llingua Asturiana, Xosé Antón González Riañu, esta presión tien de ser complementaria a les iniciatives como les presentaes por IX nel parlamentu asturianu y nel Congresu. Llamazares alvirtió de qu’inda esiste tiempu por que’l ministeriu de Wert rectifique ya incluya la especialidá d’asturianu nel decretu d’especialidaes del oficiu docente.

El diputáu asturianu va defender nel Congresu una Proposición Non de Llei con esta finalidá y una batería d’entrugues encamentando al Ministeriu a axustase cola Conseyería y al executivu central a defender esta propuesta nel Conseyu Escolar del Estáu, que debe de ser consultáu pa tomar la decisión. Nesti sentíu, Xosé Antón González Riañu avanzó que l’Academia de la Llingua Asturiana tien el compromisu de los sindicatos CCOO, SUATEA, UXT, y de les asociaciones de padres CEAPA y CONCAPA, y el Sindicatu d’Estudiantes de defender de forma conxunta la reconocencia de la especialidá nesti órganu estatal.

González Riañu emponderó la “especial implicación” de Gaspar Llamazares y d’Emilia Vázquez, proponiendo iniciatives en defensa de la especialidá y del asturianu nel Congresu y na Xunta Xeneral. Pela so parte, la diputada Emilia Vázquez señaló qu’estos problemes solucionense cola cooficialidá del asturianu, que supondría la reconocencia plena del idioma: “nun ye aceptable pa nós que l’asturianu sía la única llingua del Estáu que nun tenga reconocencia y los asturianos nun tengamos los derechos que tienen los falantes d’otra llingua que nun sía’l castellán”.

A entrugues de los periodistes, Llamazares aseguró que la declaración d’oficialidá de la llingua asturiana ye y va ser parte del programa d’IX y el pasu va ser un “pasu bien importante” y “fundamental” nun potencial diálogu pa formar el próximu Gobiernu.

Más de cien representantes electos y orgánicos d’IX Asturies presentaron esta mañana un manifiestu de sofitu a la candidatura de Manuel González Orviz a la presidencia del Principáu que, sol títulu “Voto por IX Asturies; voto a Manolo Orviz” supon el respaldu a un procesu de cambéu internu y esternu que, según los sos firmantes, entamó na asamblea de 2012. La conceyala d’IX Grau, María José Miranda, aseguró que, col manifiestu, surdíu de forma bonal, deféndese “un proyectu renovador y de futuru, fuxendo de hiperlliderazgos”.

“Sofitamos la candidatura de Manuel González Orviz porque creemos nuna candidatura colectiva; nuna suma de fuerces que va dende la militancia a les cabeces de llista”.

La eurodiputada Ángela Vallina, los alcaldes d’Illas, Alberto Tirador, Santalla d’Ozcos, Antonio Riveras, y l’alcaldesa de Castrillón, Yasmina Trigueru, el coordinador del grupu parlamentariu na Xunta Xeneral del Principáu, voceros municipales, conceyales y coordinadores locales, hasta un total de 103 representantes electos o orgánicos suscriben el manifiestu, nel qu’espresen el so convencimiento de la “improrrogable necesidá del cambéu d’IX, na renovación interna, indispensable pa la rexeneración política y na apertura a tola sociedá, como elementos imprescindibles pa ser útiles a la sociedá asturiana”.

La vocera de los firmantes, María José Miranda, destacó la importancia d’estes primaries, que dexen, per vegada primera, escoyer a militancia y simpatizantes a la cabeza de llista d’IX y al restu de la candidatura. “Sofitamos esti proyectu porque nun ye posible la rexeneración ensin renovación. Nun ye la candidatura de Orviz, ye la candidatura de toos y toes nosotres. Somos la fuerza del cambéu”.

Gaspar Llamazares, diputáu d’IX d’Asturies nel Congresu y candidatu a les primaries d’IX, y la diputada de la Xunta Xeneral, Emilia Váquez, van axuntase esti xueves 22 de xineru pela mañana cola dirección de l’Academia de la Llingua pa tratar la situación de la especialidá d’asturianu.

A les 12.45 van ufiertar una rueda de prensa na see de l’Academia (Cai La Águila, númberu 10, Uviéu).

El procesu que Conceyu Abiertu por Noreña, so’l nome d’Un Pueblu ente toos y toes, que echó a andar el pasáu 27 d’avientu entró yá na so segunda fase: los conceyos esternos con asociaciones, clubes, colectivos y tamién vecinos y vecines individuales. Esta fase aprobose nel segundu conceyu abiertu del procesu el día 10 de xinero na Casa d’Alcuentros de la Muyer, y cunta con tres puntos: encuestes online, físiques y aconceyamientos coles asociaciones interesaes.

Encuestes online. Tanto nel blogue de conceyunorena.blogspot.com como nos sos perfiles en redes sociales, la organización va habilitar una encuesta basada nes prioridaes de los y les noreñenses, pa que la puedan completar los y les usuaries que lo crean oportunu.

Encuestes en formatu físicu. La mesma encuesta va poder ser rellenada en formatu de papel. Estos cuestionarios van poder ser cubiertos en diversos espacios del conceyu, asina como en contactu con miembros d’Un Pueblu ente toos y toes.

Conceyos coles asociaciones, clubes y colectivos de Noreña. Los y les participantes del procesu tán poniéndose en contactu con un llistáu d’alredor de 40 clubes, colectivos y asociaciones presentes en Noreña, p’alcordar conceyos nos que diches agrupaciones van poder presentar al procesu les sos propuestes y necesidaes de cara a la confección del programa ellectoral de Conceyu Abiertu por Noreña pa les prósimes elleiciones municipales.

Toa esta información recoyida va ser puesta de mancomún el prósimu 31 de xineru a les 12.30 na casa d’Alcuentros de la Muyer y nos prósimos conceyos abiertos d’Un pueblu ente toos y toes.

Andecha Astur de Sieru vieno acabante presentar esti día una propuesta al Ayuntamientu Sieru pa que s’implique nel casu de la sierense Rocío Gamonal, sancionada por faer usu de la bandera asturiana. Paulo Arboleya, cabezaleru d’Andecha Astur en Sieru, presentó una propuesta al Ayuntamientu na qu’espón el casu de la siérense Rocío Gamonal, multada pola Federación Española de Ciclismu por cruciar la llínia de meta cola bandera asturiana nel campionatu cellebráu la pasada fin de selmana en Xixón, nel que resultó ganaora, siendo menaciada con anular l’entítulu de campiona qu’acababa d’algamar.

Considerando inxustificable que “naide puea ser sancionáu por facer usu de la bandera asturiana, reconocía costitucionalmente, y que per ende nun ye de recibu l’argumentación de la Federación Española de Ciclismu de que la multa tien comu oxetu alloñar la política del esporte”,y dao la condición de sierense de Rocío Gamonal, Andecha Astur “atalanta que l’Ayuntamientu Sieru tien de ser el primeru en defender los drechos de los sos vecinos, polo que solicitó del mesmu:

Que l’Ayuntamientu Sieru aprebe una resolución de sofitu a la esportista sierense afitando’l so drechu a facer usu de la bandera asturiana y agradeciendo-y que lo fixera nel momentu del so trunfu.

Que l’Ayuntamientu Sieru aprebe y unvíe una quexa formal a la Federación Española de Ciclismu pola inxustificable sanción.

Que l’Ayuntamientu Sieru, en sofitu de Rocío Gamonal y por solidaridá,­ asuma’l pagu de la multa impuesta pola Federación Española de Ciclismu.

Que l’Ayuntamientu Sieru desixa al “Principado” una rempuesta proporcional a la ofensa sufría non solo na presona de Rocío Gamonal, sinon del conxuntu del Pueblu Asturianu pola Federación Española de Ciclismu.

Emilia Vázquez, diputada d’IX na Xunta Xeneral, sostien que la negativa del Ministeriu d’Educación a crear la especialidá d’asturianu nel profesoráu ye “un despreciu al sentir de los asturianos”, opinión reflexada na votación parlamentaria d’una moción d’IX sobre esti mesmu asuntu que foi sofitada, el 21 de payares, por tolos grupos a esceición del PP. Esti grupu, a xuiciu de la diputada, nun fai más que manifestar de cutio la so poca o nula empatía cola llingua asturiana, amás de refugar la igualdá de los derechos de los trabayadores qu’imparten l’asignatura yá que soporten un doble raseru, qu’amenorga los sos derechos y el so futuru estable. La diputada d’IX sostien que’l PP asturianu tien la oportunidá de demostrar qu’IX enquivocárase nestes considerancies pidiendo a los sos correlixonarios del Gobiernu central una rectificación. Inda queda tiempu d’equí a principios del mes de febreru nel que s’axunta’l Conseyu Escolar del Estáu, que por cierto manifestó apocayá’l so sofitu a la creación de la especialidá. Amás, la diputada considera que’l Gobiernu d’Asturies nun puede dase por satisfechu con esta negativa y recuerda que la Xunta, col sofitu del grupu socialista, esixó la más alta implicación del Gobiernu. Nesti sentíu, esplica que ten de ser la Conseyera, Ana González, o’l mesmu Presidente, Javier Fernández, quien s’impliquen nesti asuntu. “Eso ayudaría a que’l Ministru viera que ye una cuestión importante pal Gobiernu d’Asturies”, esplica Vázquez. Estes socesives negatives y dificultaes pa que la llingua tenga la considerancia que merez nel conxuntu del Estáu devuélvenos, a xuiciu de la diputada, a la necesidá de que l’asturianu sía oficial. “Cualesquier otra considerancia más moderada demostró’l so fracasu”, sostien la diputada d’IX. Llegaos a esta situación, IX llama l’atención del Gobiernu asturianu por que defenda la cooficialidá si realmente ta a favor de los derechos llingüísticos de los asturianos. Acorde con esta posición, el grupu parlamentariu de la formación va presentar iniciatives na Xunta Xeneral nesta dirección.

La diputada d’IX sostien nun comunicáu asoleyáu güei “que’l PP asturianu tien la oportunidá de demostrar qu’IX enquivocárase nestes considerancies pidiendo a los sos correlixonarios del Gobiernu central una rectificación. Inda queda tiempu d’equí a principios del mes de febreru nel que s’axunta’l Conseyu Escolar del Estáu, que por cierto manifestó apocayá’l so sofitu a la creación de la especialidá”.

Amás, la diputada considera “que’l Gobiernu d’Asturies nun puede dase por satisfechu con esta negativa y recuerda que la Xunta, col sofitu del grupu socialista, esixó la más alta implicación del Gobiernu”. Nesti sentíu, esplica que ten de ser la Conseyera, Ana González, o’l mesmu Presidente, Javier Fernández, quien s’impliquen nesti asuntu. “Eso ayudaría a que’l Ministru viera que ye una cuestión importante pal Gobiernu d’Asturies”, esplica Vázquez.

Estes socesives negatives y dificultaes pa que la llingua tenga la considerancia que merez nel conxuntu del Estáu devuélvenos, a xuiciu de la diputada, a la necesidá de que l’asturianu sía oficial. “Cualesquier otra considerancia más moderada demostró’l so fracasu”, sostien la diputada d’IX. Llegaos a esta situación, IX llama l’atención del Gobiernu asturianu por que defenda la cooficialidá si realmente ta a favor de los derechos llingüísticos de los asturianos”. Acorde con esta posición, el grupu parlamentariu de la formación va presentar iniciatives na Xunta Xeneral nesta dirección.

Faciendo País espresa la so solidaridá cola ciclista multada por amosar la bandera d’Asturies y esixe a la Federación de Ciclismu’l cambéu del so reglamentu. Víctor Suárez coordinador de Faciendo País, área d’Izquierda Xunida d’Asturies, llamentó güei que “l’estáu español prohiba los símbolos de los distintos pueblos que lo conformen de la mesma manera que lo faía la dictadura franquista”.

El coordinador respuende asina a la multa impuesta pola Real Federación Española de Ciclismu a la ciclista asturiana Rocío Gamonal por entrar a meta con una bandera de Asturies. Según el so reglamentu esta exhibición ta prohibida y, por ello, ye un símbolu illegal, Suárez consideralo “una actitú represiva contra un símbolu d’identidá protexíu nel nuesu marcu xurídicu y un ataque a la llibertá d’espresión de la ciclista” y contrapuso esti fechu con “la impunidá cola que se dexa la exhibición de simboloxía neonazi nun cientu d’alcuentros deportivos, daqué espresamente prohibíu pol Códigu Penal”.

Finalmente Víctor Suárez espresó’l so sofitu a la ciclista Rocío Gamonal multada con unos 100 euros y afirmó que “vamos lluchar por llevar esti sucesu a toles instituciones, onde tenemos representación, y a treslladar el nuesu refugu a esta midida a la Real Federación Española de Ciclismu solicitándo-y que camude’l so reglamentu”.

Andecha Astur considera que multar a un esportista por esibir la bandera d’ Asturies cosititúi una inalmitible amuesa d’intolerancia españolista y demanda “l’aniciu de Seleiciones Asturianes soberanes dafechu que mos dexen llevar la nuesa bandera y los nuesos símbolos ellí onde compitan los esportistes asturianos”.

El determín de la Federación Española de Ciclismu de multar a la sierense Rocío Gamonal por cruciar la llínea de meta cola bandera asturiana nel campionatu cellebráu la pasada fin de selmana en Xixón, costitúi sigun Andecha Astur “una amuesa más de persecución ya intolerancia españolista. La Federación española llegó a menaciar inclusive con anular l’entítulu de campiona qu’acababa d’algamar. Considerar comu lo fixo la Federación Española de Ciclismu que prohibir llevar una bandera estremada a la española ye una forma d’alloñar la política del espor pon n’evidencia fasta que puntu ignoren y desprecien la esistencia d’otres rialidaes nacionales dientru l’Estáu, y confirmen que la única posibilidá esistente pa poder faer honor a la nuesa condición d’asturianos pasa pol aniciu de Seleiciones Nacionales Asturianes independientes 100 % de les españoles, que permitan a los nuesos esportistes cellebrar los sos trunfos ensin arrenunciar a ser asturianos”.

El Partíu Asturianista (PAS), axuntóse a les demás fuerces aturianistes sofitando a Rocío Gamonal, al tiempu qu’agradecía a la pluricampeona ciclista asturiana, “los sos ésitos, el so trabayu, los sos triunfos y la manifestación pública del so amor pa con Asturies”.

Amás de “felicitala especialmente pol ésitu de la pasada fin de selmana y animala a seguir asina, manifestando’l so asturianismu” el PAS facía-y un brinde comprometiéndose a paga-y la multa y toles que se produzan (“otres tres más”) si son pol mesmu motivu.