Política

Jesús Iglesias, Coordinador Xeneral d’IX d’Asturies, aconceyó ayeri pela mañana mañana colos secretarios xenerales de los sindicatos CCOO y UXT, Antonio Pino y Justo Rodríguez Braga, pa dar cuenta de los resultaos de la ponencia estatutaria y evaluar les necesidaes d’Asturies que tovía queden por incluyir na reforma del Estatutu. Nesi sen Iglesias apuntó que’l nuevu testu del Estatutu d’Asturies tien de recoyer una Carta de Drechos Sociales, na que se mencione, la sanidá, la educación, los servicios sociales y el drechu a la vivienda, “amás de la oficialidá del asturianu”.

El Coordinador Xeneral recibió’l sofitu de los dos secretarios xenerales de CCOO y UXT pa defender esta propuesta na mesa de la reforma estatutaria y esplicó que, anque la participación de los sindicatos ta prevista nes comisiones que van celebrase, una vez la ponencia remate’l so trabayu, “ye meyor que les sos reivindicaciones se recueyan enantes de tener un testu mui avanzáu”.

La conseyera de Cultura y Turismu del Principáu d’Asturies, Encarna Rodríguez, comprometióse esti día, sigún Europa Press a que’l so equipu presente a primeros del próximu periodu de sesiones, en setiembre o ochobre, l’informe d’evaluación del plan de normalización del asturianu. A pesar de qu’una resolución aprobada nel Alderique d’Orientación Política, celebráu n’ochobre del 2007 indicaba que l’informe debía presentase a finales d’esi añu, Encarna Rodríguez esplicó que nun se pudo realizar la evaluación completa, dao que’l plan van prollongase hasta finales del exerciciu.

Encarna Rodríguez realizó estes manifestaciones nel trescursu de la so intervención nel Plenu de la Xunta Xeneral del Principáu d’Asturies (XXPA), onde foi entrugada pol diputáu d’IX-BA-Verdes, Francisco Javier García Valledor, sobre la política llingüística. Valledor acusó al Gobiernu de non cumplir los mandaos de la Xunta y d’aplicar polítiques ‘involucionistes’.

“Un plan qu’acaba’l 31 d’avientu del 2007 difícilmente pue ser evaluáu enantes”, señaló la conseyera de Cultura. Asina, dixo que’l plan ta “entamando a evaluase”. Per otru llau, defendió les polítiques del Principáu en rellación a la promoción del asturianu. Nesti sen dixo que dende’l Gobiernu d’Asturies tán “comprometíos” col fomentu “firme” y “progresivu” del asturianu y del gallego-asturianu. “Continuamos con toles llinies de trabayu abiertes n’otres llexislatures”, afirmó, y punxo como exemplu les sovenciones pa potenciar l’asturianu, l’aumentu de la so presencia na RTPA, asina como l’ampliación del númberu d’oficines de normalización llingüística.

Sigún Europa Press, a Valledor nun lu convencieron les esplicaciones d’Encarna Rodríguez y mostróse “preocupáu” polos sos incumplimientos en rellación a les resoluciones de la Xunta. Reprochó amás el restu de polítiques del Principáu na materia. Asina, desplicó que la Xunta de Toponimia malpenes s’aconceya nos últimos meses. “Hai una paralización y una vuelta p’atrás”, señaló y dixo que se tán “desandando” los pasos que se dieron na llexislatura anterior en materia de campañes d’información, rotulaciones, documentos de l’Alministración o enseñanza nos colexos.

L’equipu de gobiernu del conceyu de Xixón anunció apocayá l’aprobación del testu de la Ordenanza d’Usu del asturianu que van aprobar a lo llargo del mes de xunu en plenu. El Partíu Popular de Xixón, según anuncia del Círculu Lliberal, va presentar delles propuestes “pa meyorar la redacción del testu”, qu’a xuiciu de los lliberales asturianos “ye muncho menos ambiciosu que’l borrador d’ordenanza que se quiso impulsar na anterior llexislatura, y que refugó poles males l’alcaldesa Paz Fernández”.

El Círculu Lliberal recordó qu’“En tou casu, el Partíu Popular de Xixón ya dexó claro que quier que’l conceyu tenga una ordenanza pa regular l’usu oficial de la llingua asturiana nel conceyu”.

Aprobaes les ordenances de normalización llingüística de Xixón en Xunta de Gobiernu

La Federación Socialista Asturiana, FSA-PSOE, dexó estos díes bien clara la so postura no que cinca a la materia llingüística pa la reforma del Estatutu d’Autonomía. O polo menos asina apaez na Ponencia Marcu del 30 Congresu Rexonal de la FSA onde’l PSOE sigue falando de “promoción del asturianu”, calteniendo la so postura, talo como ficieron en declaraciones d’esta mesma selmana, nes que comentaron que l’asturianu “ha promocionase pero nun pue haber obligatoriedá y muncho menos, oficialidá”. Sicasí, nel mesmu docmentu afiten que van crear una Llei pa facilitar “el disfrute de los drechos ciudadanos, evitando la discriminación por cualesquier causa”.

La Ponencia Marcu del Congresu Rexonal ye la ferramienta de trabayu pal alderique de los socialistes asturianos, que van celebrar l’alcuentru ente los díes 25 y 27 de xunetu,

Mientres, Izquierda Xunida sigue apostando pola oficialidá del asturianu nel próximu Estatutu y el Partíu Popular fala de “camudar un artículu –el cuartu- que ta obsoletu dempués de tantos años, ensin definir nada, salvo que nun van tar d’alcuerdu con una redacción que suponga “obligatoriedá”.

D’otru llau, el movimientu cívicu a favor de la oficialidá sigue trabayando. El CAO presentó estos díes la camapaña “doi la cara pola oficialidá”, na qu’axunten semeyes d’asturianos que tán a favor de la oficialidá y lo amuesen nun cartelu con que se retraten. La collaboración con esta campaña sigue abierta.

Artículu orixinal sobre l’asturianu na Ponencia Marcu pal 30 Congesu Rexonal de la FSA-PSOE

La lengua asturiana: recuperación, promoción y
voluntariedad

202. Los socialistas asturianos, desde la aprobación de nuestro Estatuto, nos hemos
comprometido con la puesta en marcha de actividades relacionadas con el
asturiano, estableciendo numerosas medidas de promoción del mismo con el
objetivo de favorecer la recuperación, conservación e impulso de nuestra lengua
autóctona.

203. Pensamos que es necesario actuar para consolidar lo realizado hasta el presente y
emprender una acción coordinada y planificada para, desde el respeto a los
principios de libertad y voluntariedad en su uso, se pueda despertar un grado
suficiente de consenso social en la protección de este patrimonio cultural de los
asturianos.

204. Por eso, a partir del estatus otorgado en el vigente Estatuto de Autonomía,
continuaremos comprometidos en el fomento del uso institucional y público del
asturiano y del gallego-asturiano en el ámbito de la Administración y de los
organismos del Principado de Asturias, en la promoción de su uso en los medios de
comunicación y en garantizar la oferta de su aprendizaje en el sistema educativo.

Ponencia Marcu completa del 30 Congresu Rexonl de la FSA-PSOE

Francisco Javier García Valledor, diputáu d’IX-BA-Verdes, adelantó ayeri la posición contraria del grupu parllamentariu d’esta formación a la votación sobre la candidatura de Pérez Ornia como director del Ente Públicu de Comunicación del Principáu d’Asturies. Valledor espresó’l so desalcuerdu porque reglamentariamente “nun hai posibilidá d’alderique nin turnu d’esplicación de votu”, según comentó.

Na anterior llexislatura “IX dio un votu de confianza al actual director del ente públicu” pero col trescursu del tiempu, declaren, “retiró la so confianza sobre cómo se diba desenrrollando la puesta en marcha de la televisión pública”.

Esta actitú contrasta pa los dirixente d’IX, cola del Partíu Popular “dafechu belixerante nun principiu con acusaciones na prensa de manipulación, comisariu políticu de la propaganda d’Areces, televisión a la Bulgara y un llargu etcétera, mientres qu’agora callen”. Valledor denunció “el procesu d’averamientu evidente del PSOE al PP –que’l diputáu denomó “la tenaza”- que ta dando los sos frutos n’importantes asuntos como’l creitu estraordinario, la llectura única n’esta votación, o la negociación del Estatutu, ente otros”.

Valledor desgranó los argumentos qu’avalen la postura d’IX-BA-Verdes basaos fundamentalmente en que Pérez Ornia “nun consiguió los oxetivos pa los que l’ente públicu foi creáu, dempués de los años de llucha d’IX pa que la televisión y la radio pública fueren creaos”. La televisión autonómica, tal como recordó Valledor, “tien de de ser un instrumentu de potenciación de la identidá, la cultura y la llingua propia”.

Nestos momentos na programación de la TPA’l fomentu d’estos aspectos ye “dafechu residual” pa IX-BpA-LV, anque, “paradóxicamente” los pocos programes de cultura y música asturiana son los más vistos. “Esto significa que los asturianos tienen una demanda evidente p’hacia una programación basada na nuesa identidá, cultura y llingua, como, per otru llau, ocurre n’otres televisiones autonómiques”, aseguró Valledor.

La TPA tampoco “nun cumplió como motor de xeneración d’un texíu industrial audiovisual”, continuó Valledor. “Yá que na nuesa comunidá sigue teniendo un déficit importante nesti ámbitu”, sentenció’l diputáu, que tamién afirmó que la mayor parte los proyectos y programes “encárguense a productores de fuera de la rexón col argumentu de que les empreses asturianes nun cumplen colos estándares mínimos de calidá, pero son éstes les que finalmente faen los programas, al traviés d’una subcontrata, y por consiguiente, ye la empresa de fuera d’Asturies la que lleva’l mayor beneficiu y prueba que nun ye ciertu l’argumentu de la calidá”.

La calidá del empléu que se xenera “tamién esmolez a IX-BA-Verdes”. Les subcontrates que practica l’ente públicu provocen, a xuiciu de Valledor, situaciones llaborales “inaceptables” en cuantes a salarios y contrataciones.

La producción propia ye pa IX “otru de los oxetivos incumplíos”. La creación propia ye mui escasa y nun esisten programes de ficción o series onde los creadores asturianos, actores, músicos, guionistes…. tengan cabida. “Ye llamentable”, dixo Valledor, quien recordó que en toles televisiones autonómiques el primer oxetivu ye consiguir que seyan un revulsivu na so comunidá.

La programación “tien munchu de xeneralista”, a xuiciu de Valledor, que recalcó la necesidá de tener una ufierta que se distinga de lo que producen les televisiones privaes. Nesi sen l’ente públicu de comunicación “nun meyoró la ufierta y nin siquiera se distingue muncho de lo que yá ufiertaben nes televisiones llocales que cuntaban con munchos menos medios”.

El gastu del ente “tampoco nun cumple’l compromisu fixáu pol so director, 15 millones d’euros añales”. Esti añu, informen dende IX, “tien 31 millones d’euros de gastu, ensin cuntar con patrocinios y convenios, que, al traviés de dineru públicu fai’l gobiernu del Principáu y que sumen otros 4 millones d’euros, ye dicir, un total de 35 millones d’euros”.

La pluralidá nel ámbitu de los informativos “n’absolutu” satisfái al diputáu d’IX-BA-Verdes. En munches ocasiones, tal como recordó Valledor, el trabayu que faen los propios trabayadores finalmente nun llega a ver la lluz porque esisten criterios informativos sui géneris que dan un sesgu progubernamental. Quiciabes seya la mayor cobertura al PP el fin que persigue’l so apoyu al nomamientu del director, asegura Valledor.

Toos estos elementos lleven a IX-BA-Verdes a reprobar l’actuación d’Ornia, y votar, en coherencia, en contra de la propuesta formulada pal so nomamientu, pesie a que’l grupu parllamentariu apostó siempres porque’l nomamientu del director del ente públicu de comunicación lu ficiere la Xunta Xeneral y non el gobiernu. Valledor tamién recordó “que foi esti asuntu unu de los elementos d’alderique na fallida conformación de gobiernu, qu’aceptaba que’l director del ente fuere nomáu na Xunta, siempres y cuando n’esta llexislatura fuere Pérez Ornia”.

El pasáu vienres 30 de mayu, el Rector de la Universidá d’Uviéu, Vicente Gotor Santamaría y el delegáu sindical de la CSI, Julio Santiago Gómez, en representación de la Corriente Sindical d´Izquierdes, firmaron un “Alcuerdu Estraxudicial” que pon fin, según cuenten dende la CSI refiriéndose al mandáu de Vázquez, “a la situación d’incertidume vivida por un colectivu de compañeros víctimes d’una xestión dominada pola prepotencia”.

Pa la CSI queda claro que “foi necesariu un cambiu d’Equipu Rectoral pa recuperar la cordura y la bona praxis d’una institución de la que nunca tendríemos que tener colao”.

La postura del CSI foi nesti tiempu, y según los sos responsables, “clara, ensin ocultismos, firme na defensa del conveniu y tresparente”.

Les declaraciones feches a la revista Interviú sobre la negativa del PSOE a la oficialidá del asturianu per parte del presidente d’Asturies, Vicente Álvarez Areces, tán acabante de recibir la respuesta de l’Aconceyamientu de Xuristes pol Asturianu qu’al traviés d’un comunicáu quixo espresar “la so tristura y vergoña énte’l despreciu que’l señor Areces amuesa pol ordenamientu xurídicu” cola afirmación de que nin elli nin el PSOE tán pel llabor de permitir l’usu de la llingua asturiana dientro de l’Alministración.

Pal AXA, esti drechu y el d’enseñanza “son dos obligaciones impuestes a tolos poderes públicos, estatales y rexonales, pelos artículos 10 y 8, respeutivamente, de la Carta Europea de les Llingües Rexonales o Minoritaries, tratáu fechu al amparu del Pautu Internacional de Drechos Civiles y Políticos de les Naciones Xuníes y del Conveniu del Conseyu d’Europa pa la Proteición de los Drechos Humanos y de les Llibertaes Fundamentales, y ratificáu por España nel añu 2001 siendo don Josep Piqué Ministru d’Asuntos Esteriores”.

Los xuristes quixeron tamién amosar “tristura y vergoña énte’l despreciu que’l señor Álvarez Areces amuesa pola Xunta Xeneral, muérganu llexisllativu del país que pente medies del artículu 10 de la Llei 1/98, d’usu y promoción del bable/asturianu, tien proclamao que’l “Principáu d’Asturies garantizará l’enseñanza del bable/asturianu en tolos niveles y graos… dientro del horariu escolar… y como materia integrante del currículu”, arriendes de robláu un “Plan pa la normalización social del asturianu”, col gobiernu del Principáu presidíu pol señor Areces, pel qu’ésti s’obliga, de magar l’añu 2005, a “facilitar progresivamente a los trabayadores del Principáu d’Asturies la conocencia y usu de la llingua asturiana y, nel so ámbitu, del gallego-asturianu”.

Una desconocencia d’Areces que pa los xuristes vese reforciada “pola inorancia qu’amuesa’l señor presidente del Principáu d’Asturies al afitar que nun ta a favor “de la oficialidá nin de la cooficialidᔠcuando, por mor del conteníu del artículu 3.1 de la Constitución (“El castellán ye la llingua española oficial del Estáu”), la oficialidá del asturianu sedrá –y tarde o temprano va selo- cooficialidá col castellán, porque otra cosa nun pue constitucionalmente ser demientres Asturies seya parte d’España”.

Amás pal Aconceyamientu nun se pue midir el nivel democráticu d’un gobiernu, “pel númberu d’eleiciones ganaes a otros candidatos que participen en condiciones d’absoluta desigualdá, sinón pol respetu a los drechos fundamentales de tola ciudadanía”, incluyendo, siguen “les minoríes”.

Les declaraciones a la revista Interviú son “como poco” pal AXA “fonderamente intolerantes y autoritaries”.

Énte les declaraciones d’Areces, nes que dixo que’l pueblu asturianu votare “mayoritariamente escontra la oficialidá de la so llingua tradicional”, Aconceyamientu de Xuristes pol Asturianu reta al presidente a “plantegar un referendu, como la forma más democrática de consulta”. Los que p’AXA desmontaría les teoríes del señor Areces.

El Ministeriu de Cultura ta acabante facer públicu un informe nel que contabiliza los trabayadores del sector cultural por comunidaes autónomes. El trabayu recueye los datos de tol estáu, onde trabayen 544.000 trabayadores, alredor del 2,8% del total de empléu estatal. Nel llistáu de comunidaes autónomes Asturies ta a la cola, con namás 7.500 trabayadores n’esti sector, frente a, por exemplu, los 13.300 de les Islles Baleares, que tien cuasi 50.000 habitantes menos qu’Asturies.

El llistáu encabézalu Cataluña con 134.600 trabayadores nel sector cultural, siguida de la Comunidá de Madrid, con 120.800 empleagos, Andalucía con 67.100, la Comunidá Valenciana con 51.300 y Galicia con 26.300.

Darréu tán País Vascu con 25.300 trabayadores culturales, Castiella y Lleón con 19.800, Canaries con 18.000, Castiella-La Mancha con 16.600, Islles Baleares con 13.300, Aragón con 12.800, Navarra con 9.600, Murcia con 9.400 y Asturias con 7.500, que tien namás per detrás a Cantabria, Estremadura, La Rioxa,Ceuta y Melilla que sumen 11.600 empleaos dedicaos al sector cultural.

Los datos amuesen lo curtio del desenrrollu de la industria cultural n’Asturies.

El Partíu Popular d’Asturies comprometióse esti día col voceru del CAO Fernando Ornosa a estudiar un modelu d’artículu cuartu sobre la llingua asturiana del Estatutu d’Autonomía d’Asturies que va plantega-y el Conceyu Abiertu pola Oficialidá nos próximos díes, de cara a la so consideranza nel procesu de revisión de la norma que ta desarrollándose nesti momentu.

Sigún asoleyaba Europa Press, “ye’l principal acuerdu al que llegaron Fernando Ornosa, voceru del CAO, y el diputáu popular, Joaquín Aréstegui, nun conceyu celebráu na Xunta’l Principáu. El Conceyu quier falar sobre’l tema de la oficialidá con tolos grupos políticos representaos na cámara autonómica, pa negociar la posible incorporación de la reconocencia oficial de la llingua nel Estatutu d’Autonomía”.

Según desplicó Ornosa al final del alcuentru a Europa Press, “el diputáu popular propunxo que’l CAO faiga un modelu d’artículu cuartu pa estudialu y tratalu. El voceru del CAO matizó que la organización tien d’estudiar esta posibilidá, pero prevé qu’asina se faiga”.

La intención del CAO ye facer un modelu que recueya la reconocencia de la llingua en cuatro ámbitos principalmente: nes rellaciones cola Alministración autonómica, nes rellaciones cola Alministración estatal, que tenga validez xurídica nel ámbitu priváu y que tenga los mesmos derechos que’l restu de llingües oficiales del Estáu.

Na xunta que caltuvieron los representantes del CAO y el PP, esti partíu amosóse dispuestu a algamar un consensu sobre’l tratamientu de la llingua, pero recordó tamién la “posición cerril” del Partíu Socialista sobre l’asuntu. Sicasí, esplicó a Europa Press que’l so partíu “nun ta d’acuerdo cola oficialidá” anque sí se mostró partidariu de que’l nuevu Estatutu recueya les diferentes modificaciones llegales que se rexistraron nos últimos años, en rellación a la llei d’usu y proteición a los planes de normalización.

Nuna entrevista qu’espubliza la revista Interviu nel so últimu númberu de mayu’l Presidente del Principáu diz que nun ye partidariu nin de la oficialidá nin de la cooficialidá pero reconoz que l’asturianu ye una llingua, polo que sigún manda la constitución tendría de ser “oficial”.

—Se está debatiendo estos días la reforma del Estatuto asturiano. ¿Debería ser el bable la lengua oficial del Principado?

—En el PSOE siempre hemos mantenido la misma posición. Estamos a favor del uso del bable, de la voluntariedad del aprendizaje, pero no de la oficialidad ni de la cooficialidad. Esto lo han votado mayoritariamente los ciudadanos asturianos y así lo vamos a mantener en el Estatuto.

—En Izquierda Unida aseguran que ustedes están demonizando el asturiano.

—Con todo el respeto, entendemos que es una lengua, pero no estamos a favor de la cooficialidad, porque implicaría su uso dentro de la Administración y la obligatoriedad de su enseñanza, y no estamos por esa labor.

—¿No será que lo ven como un posible germen del nacionalismo asturiano? —No lo interpretamos así. Nuestra postura es una manera de entender la convivencia en nuestra comunidad. Las medidas que hemos tomado para proteger el bable son suficientes para mantener su vigencia en nuestra sociedad.

Entrevista completa na web d’Interviu