Política

El próximu miercoles día 13 d’agostu Andecha Astur tien convocada una concentración delantre la Xunta Xeneral n’Uviéu de magar les 13 hores y embaxo’l lema ¡Queremos votalu!. La idea d’Andecha Astur ye la de “presentar una propuesta nel rexistru la Xunta Xeneral pidiendo que les asturianes y los asturianos podamos votar la institución ‘principado’ y esta cabera reforma”.

La iniciativa forma parte d’una campaña entamada va delles selmanes pola formación independentista que busca concenciar a los ciudadanos asturianos de la necesidá de poder votar l’Estatutu “igual que lo faen catalanes, gallegos, valencianos…”

El Conceyu Abiertu pola Oficialidá anunciaba estos díes al traviés d’un comunicáu la so propuesta pal 8 de setiembre, Día d’Asturies. “La idea ye publicar na prensa escrito una fueya con mil firmes de persones. L’artículu constaría de les firmes, un testu introductoriu más l’artículu IV propuestu pol CAO”, comenten dende la organización.

Pa financialu piden 10 euros por cada firmante, necesitando unos mil pa completar les perres necesaries.

Les persones qu’a títulu individual quieran firmar na fueya, han ingresar 10 euros na cuenta 2048 0146 20 3400003740, de la que ye titular la Xunta pola Defensa de la Llingua Asturiana. Amás, ha notificase per corréu lletrónicu en uvieu@exunta.org La organización recuerda “qu’hai que poner nel ingresu’l nome completu del remitente, que ye lo qu’al final va salir nel artículu”.

El testu que va apaecer ye’l que va darréu:

Ensin oficialidá nun hai estatutu que valga.

Propuesta d’artículu IV del Conceyu Abiertu pola Oficialidá

Les llingües cooficiales del Principáu d’Asturies son el castellanu y l’asturianu. El gallego-asturianu tamién ye llingua oficial nel so ámbito territorial.

Tolos ciudadanos y ciudadanes tienen derechu a conoceles y usales. Nadie va poder ser discrimináu pola mor de la llingua que llibremente escueya y utilice.

Les alministraciones públiques han garantizar l’usu normal d’estes llingües, amás de la so promoción, enseñanza y presencia amañosa nos medios de comunicación.

Una llei de la Xunta Xeneral del Principáu tien que determinar los criterios del procesu de normalización llingüística.

Los embaxo firmantes sofitamos esta redacción pal artículu IV del Estatutu d’Autonomía d’Asturies. Ye la que necesita la nuestra llingua y ye la que necesitamos los ciudadanos.

La organización política independentista y énte la situación que, “s’aniciada cola reforma del Estatutu d’Autonomía” ven la “necesidá de da-y una rempuesta dende’l nacionalismu d’izquierda” y pa ello, Andecha Astur camienta que ye imprescindible “facer un analís lo más ampliu posible, de tala miente que puea ser compartíu pol mayor númberu de presones y muerganizaciones, y darréu d’ello avanzar nuna xunidá d’aición que permita reactivar la rempuesta popular a la situación predemocrática que carecemos n’Asturies”.

El documentu qu’ufierten ye, según declaren, “d’analís de la situación política xenerada pola reforma del “Estatuto del Principado” y con unes llínies básiques d’actuación y rempuesta-. a alderique abiertu, alvirtiendo que se trata d’un documentu voluntariamente inacabáu al oxetu de que seya más permiable a toles collaboraciones”.

La dinámica de participación tien calter universal. Pudiendo participase a nivel presonal o coleutivu y onde toles participaciones tendrán que contar con una redaición alternativa o nueva (especificando separtáu y puntu) y si se quier con una desplicación del porqué de lo propuesto.

Fcilitaráse nome y direición de corréu lletrónicu o de contautu si se fai per escrito, con vistes a contautar posteriormente pa la convocatoria d’un Conceyu Abiertu que se convocará públicamente y nel que –comu’l nome indica- podrá participase con voz y votu, y nel que s’aprebaría’l testu definitivu.

La Xunta pola Defensa de la Llingua criticó ayeri al traviés d’un comunicáu la “hipocresía del PSOE” y por mor de les declaraciones de los políticos asturianos nel homenaxe a Xovellanos celebráu na plaza del 6 d’agostu de Xixón, esti mesmu día y n’alcordanza de la torna del xixonés más ilustre a la ciudá dempués del so encierru forzosu en Mallorca. Nel actu tuvo l’alcaldesa de Mallorca, Aina Calvo, que defenió la visión plurar que tenía Xovellanos d’España, llegando a deprender catalán nel so esiliu balear. Sicasí, los políticos asturianos “escaecieron” la defensa continua del asturianu del ilustráu, que la usaba nos sos escritos, pa la que planificó un diccionariu, gramática y una Academia, ente otres cuestiones.

Al traviés d’una nota de prensa, la Xunta solliñó que “mientres l’alcaldesa de Palma argumentó a favor de la diversidá llingüística y del catalán, homenaxeando a Jovellanos, los representantes asturianos nun tuvieron la dignidá de mencionar que’l pensador asturianu yera un defensor de la llingua asturiana”.

D’esta manera, pa la Xunta “l’homenaxe convirtióse nun insultu a la figura del pensador xixonés y del so compromisu con Asturies.

faustino Zapico, portavoz de la federación UNIDÁ, y Tino Fernández, portavoz de Mediu Ambiente de la organización, definieron esta mañana en Xixón los datos del estudiu como “una cortina de fumu nel debate sobre la necesidá de la incineradora de Serín, robándo-yos asina a los asturianos el derechu a un debate social ampliu y llibre”.

El portavoz nacional d’Unidá Nacionalista Asturiana echó-y en cara al la FSA-PSOE la so manera d’actuar nel tema de la xestión de residuos, “l’actitú del grupu socialista nel gobiernu de tratar de xustificar lo inxustificable, con reuniones express, viaxes controlaos de xente que yá ta previamente a favor, o estudios universitarios dirixíos, nun son más qu’un intentu de burllar el debate social que se provocaría si de verdá se punxera a disposición de los ciudadanos tola información.” Asimesmo Zapico amestó que “un estudiu realizáu y controláu por Cogersa, la principal entidá interesada na construcción de la incineradora, y afaláu pol mesmu gobiernu que quiere facer a toa costa esa instalación, nun puede ser una ferramienta válida p’afalar un debate ampliu, llibre, y ensin prexuicios.”

Zapico tamién amestó que “echamos mui en falta que los datos que se fixeron públicos nun faigan más referencies a los posibles efectos sobre salú pública y contaminación, ya que namás recuerden la influyencia que “les distintes actividades humanas” tienen sobre l’atmósfera.”

La posición d’UNIDÁ sobre esti tema, afitó’l portavoz de Mediu Ambiente, ye que “la incineradora de residuos urbanos, ye de por sí una instalación contaminante, desque xenera cuatro tipos de residuos tres de la incineración que son claramente peligrosos. Per un llau los más peligrosos son les cenices que sedrán aproximadamente un 10% del pesu del productu, dempués tán les escories que supondrán alredor del 30% del productu y inda quedaríen por estudiar los efectos de los gases de combustión, asina como la emisión d’otros contaminantes líquidos, que s’utilicen pal llaváu d’escories. La incineradora nun fai más qu’allargar un problema y permite a los gobernantes que tenemos mirar hacia otru llau, evitando dar cara a un problema medioambiental de primer orde como ye la xestión de residuos que tien de ser repensada en toes les sos facetes, dende’l momentu en que se orixinen hasta’l so tratamientu posterior.”

Tocantes a la política de xestión de residuos del Principáu, Tino Fernández afirmó que “el gobiernu d’Areces, escaez toles normatives europees; les de producir enerxía cerca d’onde se consume, les de nun concentrar fontes de contaminación nes mesmes zones xeográfiques y les de nun facer trampes nes mediciones medioambientales”. Según Fernández “nun podemos poner en peligru la salud de los nuesos fíos pa qu’en Madrid y otres zones desarrollaes tengan electricidá, que ye’l fin últimu de la incineradora y del restu de les infraestructures enerxétiques promovíes por esti gobiernu y non reducir los residuos, que ta demostrao que se puede facer per otros caminos, más baratos, más ecolóxicos y qu’amás xeneraríen más puestos de trabayu”.

Pa finar Zapico y Fernández aseguraron que “dende la UNA opondrémonos con tola rixu posible a la implantación d’esta incineradora nuna de les zonas más contaminaes d’Asturies, y por supuesto vamos recurrir a toles instancias, incluyendo les europees, para tornar esti atentáu medioambiental”.

Dellos particulares tán presentando estos díes reclamaciones nel propiu llugar y nos rexistros del Gobiernu d’Asturies reclamando la presencia del asturianu nel pabellón del Gobiernu d’Asturies de la Feria Internacional de Muestres d’Asturies, qu’esti añu ta dedicáu a la nueva páxina web del Gobiernu, estrenada va dellos meses nuna versión trillingüe (castellán, asturianu ya inglés).

Asturnews ufre’l modelu de reclamación remitíu polos particulares que tán presentando estes protestes formales.

Les afirmaciones del xeneral asturianu Sabino Fernández Campo nes que “por mor de la xunidá d’España, que tanto trabayu costó”, afirmó que “l’asturianu convién caltenelu como una cosa íntima, como’l que tien dalgo en casa”, ye pal Aconceyamientu de Xuristes pol Asturianu “daqué asina como facía la sociedá, na que se crio, coles ‘vergüences’ de la carne o el “castigu divín” d’un neñu con un cromosoma distintu”

P’AXA “levaes ehí les coses les entrugues caen soles” y siguen entrugando “¿qué facemos col Estragal –“La Ñación española proclama la so voluntá de protexer a tolos pueblos d’España nel emplegu de les sos llingües”-, artículos 1, 3, 9, 10, 14, 20 y 148 y Disposición Cabera de la Constitución?; ¿y cola Declaración Universal de los Drechos Humanos, el Pautu Internacional de los Drechos Civiles y Políticos de les Ñaciones Xuníes, el Conveniu del Conseyu d’Europa pa la Proteición de los Drechos Humanos y de les Llibertaes Fundamentales o la Carta Europea de les Llingües Rexonales o Minoritaries, qué facemos?”.

Reflexonen ya ironicen los Xuristes “¿Cómo “vergüences” democrátiques que son, metémosles tamién nel cuartón íntimu de los fíos nun deseyaos, mentantu pasiamos con arguyu a los repeñaos ximielgos llingüísticos –Decretos 1433 y 2929- que nel añu 1975 y pol bien d’España enxendró’l tamién xeneral Francisco Franco?.”.

Pablo Fernández Fernández, Secretariu d’Organización del Bloque por Asturies espresó güei la opinión de la formación nacionalista sobre la invitación de la FSA p’abrir negociaciones que lleven a un pactu de gobiernu con Izquierda Xunida-Bloque por Asturies-Los Verdes. Una convidada que pal Bloque ye inútil de nun camudar la estratexa “llexítima y llibremente asumida per parte de la FSA de renunciar a formar un gobiernu d’izquierdes”, nuna decisión que’l BpA considera “contravenir de forma clara la voluntá popular espresada nes urnes”.

Pal Bloque esta situación “d’inestabilidá manifiesta” y “l’apuesta decidida pol desenrrollu d’un programa políticu, claramente de dreches”, faen imposible la formación d’un gobiernu cola FSA.

Les principales diferencies argumentaes pol Bloque por Asturies son la incineradora de Serín, la suba del preciu de la vivienda protexida, el bloquéu de la llei de dependencia, o la conderga p’hacia l’ostracismu estatal del nuesu país mediante l’aprobación del retro-Estatutu d’Autonomía ente’l PP y la FSA, col non reconocimientu de la Carta de Drechos Sociales y la Oficialidá del Asturianu.

“Una serie de dificultaes insalvables a día de güei, y que polo tanto faen imposible cualesquier averamientu políticu que pudiere cristalizar nun pactu o alcuerdu de gobiernu”, comenten dende la formación asturiana.

Sicasí, dende’l Bloque dicen tar siempres “dimpuestos a discutir y acordar polítiques que s’enconten nos valores de la izquierda y polo tanto, si la FSA, llegáu’l casu, , y se decide a apostar claramente por un averamientu programáticu d’izquierdes, creemos qu’una negociación n’estos términos pue ser altamente fructífera de cara a la estabilidá de gobiernu y a la defensa del interés xeneral de tolos asturianos y asturianes”.

Los llíderes autonómicos del PP aprobaron güei una declaración “en defensa de la llingua común” na qu’esixen al Gobiernu que garantice l’accesu a la función pública en toa España “ensin discriminación por razón de llingua”, ye diciri, esixendo únicamente’l castellán. El documentu aprobóse nel conceyu que caltuvieron ayeri los responsables autonómicos “populares” col presidente del PP, Mariano Rajoy.

La ‘Declaración de San Milán de la Cogolla’ firmóse nel pa los populares “bierzu de la llingua castellana”, y col enfotu, siempres según los conservadores, de defender “la llibertá a la hora d’elixir la llingua y el drechu a usala ensin ser discriminaos”, proclamen los ‘populares’, que se comprometen a presentar proposiciones non de llei nes cámares autonómiques y entidaes llocales pa que’l Gobiernu garantice que “tolos españoles tengan derechu a formase en castellán y facer usu del castellán siempre que lo deseen”.

Amás, los presidentes autonómicos del principal partíu de la oposición encamienten al Executivu nacional “a qu’elimine cualquier torga qu’impida que la llingua española se caltenga nes comunidaes autónomes que tienen una llingua cooficial como instrumentu de llibertá y solidaridá al serviciu de les persones”.

Per otra parte, la ‘Declaración de San Millán’ reivindica tamién les demás llingües d’España que “formen parte del nuesu patrimoniu cultural y, poro, tamién tienen de ser oxetu d’especial respetu y proteición pola so riqueza”. Nesta llinia, aseguren promover un “billingüismu integrador” que concible llingües “como instrumentu d’entendimientu y nunca como fonte de desigualdaes”.

Sabino Fernández Campo, ex xefe de la Casa Real y miembru de la Real Academia de Ciencies Morales y Polítiques, afirmó ayeri nun actu que “l’asturianu convién conservalu como una cosa íntima, como quien tien una cosa importante en casa, almirándola y conservándola”, añadiendo que “tratar de sustituyir el castellán por otra llingua, como se fai en Cataluña ye una esaxeración peligrosa y desagradable que va a la escontra de la unidá que tanto trabayu costó consiguir”.

Fernández Campo dixo sentise “mui asturianu, pero siempres dientro d’España”.

L’asturianu, que dixo “nun concibo ser asturianu ensin ser español” fizo estes declaraciones nel trecursu d’una conferencia nos cursos de branu de La Granda.