Plástiques

Arte y tecnoloxía danse la mano en Xixón. L’Antiguu Institutu Xovellanos acueye dende güei y hasta finales d’ochobre, baxo la coordinación del caderalgu José Ramón Alcalá, unes xornaes y una esposición consagraes a delimitar les interferencies que l’usu de les nueves tecnoloxíes provoca na reconocencia de les identidaes de persones y pueblos.

Primero abriráse l’alderique. Les Xornaes Observatoriu Orbital de lo Humano llevarán a la ciudá, hasta’l prósimu 17 de setiembre, a los espertos Fred Adam, Peter Bosch, Álvaro Rey y Federico Muelas, nuna sucesión de debates y talleres bautizaos baxo l’epígrafe xeneral ‘Práctiques del arte ellectrónicu como estratexes pa una cartografía de la interculturalidá contemporánea’.

De sutaque se piesllen eses xornaes, abrirá les sos puertes la esposición ‘Arte interactivu pa una cartografía de la interculturalidá’, una amuesa que va allugase na sala númberu 2 del Centru de Cultura Antiguu Institutu y aconceya trabayos recientes d’artistes mozos que, desendolcando los dispositivos ellectrónicos basaos na dixitalidá, la multimedialidá y la interactividá, afitaron espacios pa la reflexón sobro la identidá del individuu al entamar el tercer mileniu.

Nel trescursu de les xornaes sobro arte tecnolóxicu, que la conceyala xixonesa de Cultura, Mercedes Álvarez, presentó esta mañana, cellebraráse amás una sesión d’ellectroacústica y proyecciones en directu na sala Albéniz, a cargu de VJ’ Calpurnio y DJ’ Sr.Imbécil.

Les artes plástiques faen les maletes en L.luarca. La capital de Valdés pieslla güei les puertes del so 35 Certame Nacional d’Arte, que premió a los creadores asturianos Ernesto García y Marcos Morilla d’ente un total de 170 obres presentaes a concursu y busca yá superar esa cifra de participación na prósima edición.

Nacíu como un certame d’acuarela y óleu, el concursu valdesanu dio-y cabida esti añu al xéneru de la videoinstalación y seleccionó 38 obres pa la so esposición na sala municipal ‘Álvaro Delgado’. D’elles, resultaron ganadores les fotografíes ‘Como nosotros somos, vosotros seréis’, obra d’Ernesto García, y ‘Nocturno’, de Marcos Morilla.

Dambos autores recibirán un premiu de 3.600 euros y verán circular les sos obres por esposiciones que los organizadores del certame entamarán na prósima temporada, col envís de promocionar a los ganadores del concursu.

Na llista d’artistes esbillaos pa colgar les sos creaciones nel certame que güei tranca les puertes figuren, ente otros, Rebeca Menéndez, Raquel Miranda, José María Mellado, Santos Monestina, Fidel Pena, Lara Ríos, Ana Vila, Carmen Rosa y Ayumi Nakai.

Dende la inauguración na Galerie Faouëdic del ‘Euro Celtic Art’, la esposición que tolos años axunta en Lorient obres d’autores destacaos d’ente los estremaos países celtes con representación nel festival bretón ye una de les opciones más interesantes pa completar la xornada nel festival.

Esti añu, xunta un garrapiellu d’obres del creador homenaxeáu, l’artista contemporáneu Jean Vaugeois, una granible representación d’autores mozos asturianos completa una esposición bien interesante, abriendo l’espaciu espositivu ya introduciendo al espectador nel mesmu.

Cada añu que pasa puen agüeyase meyores trabayos pictóricos nel espaciu artísticu’l festival y la pintura asturiana nun anda a la zaga d’esa situación.

Sandra Paula Fernández ufierta una composición de téunica mista, ‘Rip’, que pol so conteníu destaca ente les demás obres coles qu’Asturies aporta a esta esposición d’arte célticu. Fernando Gutierrez López tamién participa na amuesa. Lorena Palomar Fernández, que trai a Bretaña el so autorretratu ‘I may not be a Lady, but I’m all woman’ o Cristina Busto Álvarez, cola so serigrafía sobre tela ‘Aquelarre’, son otres dos amueses del arte más mozu d’Asturies que tamién se pue ver estos díes en Lorient xunta la obra de Jean Vaugeois.

A esi autor homenaxea esti añu el salón, reivindicándolu como un artista contemporáneu y vivu que llogra representar nos sos cuadros el corazón de la Bretaña más vieya y con más raigañu nuna intepretación personal de los paisaxes de la marina de Morlaix. La so pintura emplega téuniques mistes pa facer un amestáu del paisaxe y los materiales colloreaos que lu componen, toos amestaos perdafechu y superpuestos nuna composición qu’amás d’esperimental y creativa atalántase fondamente decorativa y comercial.

Suplementu d’Asturnews sobro’l Festival de Lorient 2004

Una bona llibería, actividaes atractives o una cafetería prestosa pa facer un altu nel camín. Directores de los principales museos públicos d’España pesllaron ayeri unes xornaes monográfiques en Cuideiru afitando la necesidá de meyorar los servicios de los centros museísticos, edificios a los qu’acude el públicu “non sólo de pasu, sinón p’habitalos”.

Poro, los museos tienen de ser más habitables, señaló’l director del cursu y caderalgu d’Hestoria del Arte na Universidá Complutense de Madrid, Francisco Calvo Serraller, yá que “cuando se xestiona bien un muséu, dase-y meyores servicios al visitante; les pinacoteques nun puen ser un llugar onde s’asitien una serie d’obres y acabóse depués de la so inaguración”.

Nos cuatro díes que se prollongó’l cursu, cellebráu na quinta de los Selgas baxo organización en comuña de la Universidá d’Uviéu y de la Fundación Selgas-Fagalde, los espertos participantes amosáronse partidarios de da-y continuidá al alcuentru, “inéditu en toa España”, n’años posteriores col envís de compartir estímulos intelectuales.

Ente otres personalidaes, nel cursu participaron Juan Ignacio Vidarte, responsable’l Muséu Guggenheim de Bilbao; Miguel Zugaza, director de la pinacoteca d’El Prado; y l’acabante ser nomada directora’l Centru d’Arte Contemporáneu Reina Sofía, Ana Martínez de Aguilar, enfotaos na gueta de nuevos modelos de xestión qu’adapten los museos a les nueves demandes del públicu.

Dos asturianos controlarán el patronatu de la más importante pinacoteca d’España. La filósofa y ex conseyera de Cultura Amelia Valcárcel accederá güei a la vicepresidencia del órganu que rixe’l Muséu d’El Prado, allugáu en Madrid, y que va presidir l’abogáu d’orixen uvieín Rodrigo Uría. Dambos formaben parte yá del patronatu’l muséu, qu’atesora unes 8.600 obres pictóriques, 700 escultures y miles de bocetos y grabaos.

L’accesu de Valcárcel a la vicepresidencia’l patronatu interprétase como la confirmación d’una xestión continuista yá afitada col pasu de Rodrigo Uría de la vicepresidencia -cargu qu’ocupaba hasta agora- a la presidencia’l muérganu colexáu, en sucesión d’Eduardo Serra, ya que tanto la filósofa como l’abogáu uvieín tán vinculaos dende hai años tanto al Real Patronatu como a la comisión permanente’l muséu.

Caderalga de Filosofía Moral y Política na Universidá d’Uviéu y pionera del movimientu asturianista, Amelia Valcárcel dirixe la revista de pensamientu ‘Leviatán’ y ye autora d’abondos estudios y artículos especializaos. Ún de los sos testos de publicación más reciente foi una semblanza de los anicios del simbolismu asociáu al Surdimientu, asoleyada nel llibru n’homenaxe al malográu Andrés Solar con ocasión de la XXV Selmana de les Lletres Asturianes, cellebrada en mayu pasáu.

Valcárcel y Rodrigo Uría coincidieron los pasaos martes y miércoles n’Uviéu, como integrantes del xuráu del Premiu ‘Príncipe de Asturias’ de les Artes, qu’ayeri recibió el guitarrista gaditanu Paco de Lucía.

Web oficial del Muséu d’El Prado

El futuru de los grandes museos debátese en Cuideiru. Responsables de los principales equipamientos museísticos d’España -ente ellos los directores del Guggenheim de Bilbao, El Prado y el Reina Sofía- discuten a partir de güei nel Palaciu de los Selgas les posibilidaes de xestión de les sales, qu’afronten un fondu procesu de renovación pa responder a les nueves demandes del poúblicu.

Juan Ignacio Vidarte, responsable’l Muséu Guggenheim de Bilbao; Miguel Zugaza, director de la pinacoteca d’El Prado; y l’acabante ser nomada directora’l Centru d’Arte Contemporáneu Reina Sofía, Ana Martínez de Aguilar, falarán xunta homólogos d’otres sales de los posibles modelos pa meyorar la xestión de los grandes museos, equipamientos que requieren inversiones descomanaes y mui difícilmente amortizables.

El discutiniu enmárcase dientru d’un cursu monográficu entamáu pola Universidá d’Uviéu, en comuña cola Fundación Selgas-Fagalde, y prollongaráse hasta’l prósimu xueves baxo la dirección del caderalgu Francisco Calvo Serraller.

Pablo Raúl Armesto, col proyectu ‘Caminando’, y Andrés Avelino Sala, autor del montaxe ‘La espera’, recibirán los tres mil euros que los acrediten como ganadores del V Premiu Astragal, que premia instalaciones espresamente pensaes pa ser amosaes na Sala d’Esposiciones del Centru de Recursos del Conseyu de la Mocedá de Xixón.

Amás d’otorgar los dos premios qu’estipulen les bases del certame, los miembros del xuráu decidieron encamenta-y al Conseyu los trabayos ‘Jesús es tu amigo’, de Jesús Sanz, y ‘Mudando’, obra del collectivu Ratopaco pa que los esponga dientro de la programación habitual del denomináu ‘Espaciu Astragal’.

El Conseyu de la Mocedá de Xixón realizará la esposición de los dos proyectos ganadores coincidiendo col desendolcu de los alcuentros de Cabueñes 2004 y cola XI Escuela de Seronda.

Nesta edición, a la que concurrieron nueve proyectos, formaron parte’l xuráu la directora l’Institutu Asturianu de la Mocedá, Carmen Barrera; el pintor Hugo O´Donnell; La responsable de la Fundación Municipal de Cultura de Xixón, Pilar González Lafita; la técnica de museos Raquel Huergo; l’artista plásticu Pelayo Varela; y Juan Carlos Gea, redactor na sección de Cultura del diariu La Nueva España.

Revisión de l’ausencia del soníu, autoparodia de les artes plástiques y una visión de la contaminación del arte contemporáneu. El creador Pelayo Varela espón dende güei na galería xixonesa ‘Espacio Líquido’ la instalación ‘Escucha’, premiada na última edición de la Feria Internacional d’Arte Contemporáneu de Madrid (Arco).

Nuna única sala, Varela propónse revisar les interferencies que se dan ente los mundos entecruciaos del arte, la moda y la música al traviés de dos reproducciones de los sos propios pabellones auditivos que, medraos en tamañu, conviértense en sendos sofás na llinia d’una de les corrientes del diseñu pop de mobiliariu n’espardimientu nos años setenta.

A partir d’eses dos pieces, Varela proyecta nuna pantalla de grandes dimensiones una animación na que s’amuesen de mou repetitivu decenes de discos de vinilu que van cruciando’l campu visual y son destruyíos por un tirador invisible. Too ensin soníu y completao por un par de traxes nos que l’autor, según esplicó esti mediudía na presentación n’Asturies de la so instalación, quier simbolizar la profilaxis qu’hai que caltener p’averase a un arte cada vez más contamináu.

Nel actu de promoción de la so obra, Pelayo Varela tuvo flanqueáu pola conceyala de Cultura del Ayuntamientu de Xixón, Mercedes Álvarez, qu’eloxó el so llabor creativu como “espectacular ya esponencial”, y pola responsable de la galería, Nuria Fernández.

‘Escucha’ suscitó l’interés del públicu qu’asistió a la última edición d’Arco, cellebrada’l pasáu mes de febreru nel recintu ferial de Madrid, y valió-y a Pelayo Varela la distinción como ‘artista revelación’ del eventu. La instalación pue visitase hasta’l 7 d’agostu na galería ‘Espacio Líquido’, allugada enfrente de La Escalerona, de martes a sábadu n’horariu de 12 a 14 y de 18 a 21.

La fotógrafa y pintora Irma Álvarez Laviada recibirá los 2.200 euros que l’acrediten como ‘artista moza revelación del añu’ n’Asturies y que la comprometen a entamar una esposición individual de trabayos na uvieína Sala Borrón a partir de la seronda. Xunta ella, otros doce creadores tan acabante ser esbillaos pol Principáu pa formar parte de la XV Amuesa d’Artes Plástiques d’Asturies.

Por estayes, el xuráu seleccionó los dossieres de pintura presentaos pola propia Irma Álvarez, José Jorge Nava Montes, Juan Díaz-Faes Díaz, Jacobo de la Peña Miguelez, Jorge Faes Ruiz, Elena Rato Tascón, Lorena Álvarez Barrero y Cristina Busto Álvarez, mientres que na modalidá de fotografía resultaron elixíos tamién Irma Álvarez Laviada, Eva María Pividal Alonso ya Isabel Fernández Rodríguez.

Según una nota pública difundida güei pola Conseyería de Cultura, Comunicación Social y Turismu, la llista d’autores escoyíos complétenla, na estaya de grabáu, Eduardo Guerra Álvarez y Fermín Santos López, al quedar erma la categoría d’escultura ya instalaciones.

Tolos creadores premiaos recibirán un premiu individual en metálicu de mil euros empobináu a sufragar la fechura d’obres que formarán parte, a partir del 28 d’ochobre prósimu y hasta’l veranu de 2005, d’una esposición itinerante comisariada por Francisco Crabiffosse Cuesta y cuyu catálogu tará diseñáu por Jorge Lorenzo.

El xuráu de la XV Amuesa d’Artes Plástiques del Principáu d’Asturies tuvo integráu por Pilar González Lafita, responsable de la Estaya de Cultura de la Fundación Municipal de Cultura, Educación y Universidá Popular de Xixón; Alfonso Palacio, hestoriador del Arte; Francisco Crabiffosse, comisariu d’esposiciones y críticu d’arte; Francisco Javier García, fotógrafu; Ángel Antonio Rodríguez, críticu d’arte y comisariu d’esposiciones; y Carmen Barrera, directora l’Institutu de la Mocedá, qu’exerció de presidenta.

A esta edición concurrieron un total de 62 propuestes artístiques, la mitá d’elles encuadraes na modalidá de pintura, 18 en fotografía, 9 en grabáu y 5 n’escultura ya instalaciones.

Les xestiones del director del Muséu de Bellas Artes d’Asturies, Emilio Vázquez Vallaure, p’arriquecer la colección del centru con un cuadru rematáu por Diego Velázquez en 1651 nun llograron aportar a bon puertu. El Ministeriu de Cultura refuga la compra de la obra ‘Retrato de una joven campesina’, cuyu preciu diba sufragar dafechu la constructora ACS pa llueu ceder el lienzu al Estáu, que previsiblemente lu treslladaría a Asturies.

Según publica na so edición de güei el diariu La Nueva España, de nada valió la predisposición de la empresa propiedá de Florentino Pérez a pagar los 15 millones d’euros en que ta tasáu el cuadru, yá que la Xunta de Calificación y Esportación d’obres d’arte del Ministeriu de Cultura dio-y carpetazu a la operación el pasáu martes al amosar dalgún de los espertos consultaos duldes sobro l’autoría del cuadru.

Pesie a que la obra interesaba al Muséu del Prado, la más prestixosa pinacoteca pública d’España, el ‘Retrato de una joven campesina’ tenía grandes posibilidaes de pasar a arriquecer la colección del Bellas Artes d’Asturies, allugáu n’Uviéu, que vía n’alquisición de la obra de Velázquez una decisiva oportunidá p’axuntar un nuevu lienzu ‘de pesu’ a los sos fondos.

El cuadru qu’agora refuga mercar l’Estáu español, renunciando a la operación que dende l’empiezu xestionara Marcos Vallaure, foi pintáu pol artista sevillanu ente 1649 y 1651, y conozse tamién col nomatu de ‘La gallega’.