Plástiques

Les X Xornaes del Cómic d’Avilés escomenzaron ayer con una recordanza a los dibuxantes ya ilustradores asturianos. Una feria del cómic y del llibru illustráu, esposiciones, charres y alcuentros colos autores y un cursu de Manga son la propuesta del certamen avilesín nel so décimu aniversariu.

Nomes como los de los asturianos Isaac del Rivero, Igor Medio o David de la Fuente, xúntense nestes xornaes a los de firmes estatales ya internacionales del calter d’Esteban Maroto y Victoria Francés, Alex Maleev, Gary Frank, José Muñoz o Sean Philips. Toos ellos van tar presentes en formatu editorial y en persona nel certame avilesín.

Dellos de los artistes presentes, como la valenciana Victoria Francés van tar visibles al través de l’amuesa de la so obra nuna esposición nel Centru Comercial de L’Atrio.El dibuxante D’Israeli tamién presenta una esposición nel vestíbulu del Salón d’Actos de la Casa de la Cultura.Otru de los invitaos, el gallegu Miguel Anxo Prado, apurre al certame la fechura del mesmu cartelu pa remembrar el décimu aniversariu.

Les Xornaes del Cómic cuenten esti añu ente la so ufierta de talleres y cursos como ún dedicáu al Manga a cargu del xaponés Ken Niimura. El certame va celebrase hasta’l prósimu domingu 11 de setiembre.

Xornaes del Cómic d’Avilés

La pintora astur-arxentina Teresa María Fernández Melzi ufierta dende’l pasáu 3 de setiembre una amuesa de trenta óleos nel Salón d’Esposiciones del Ayuntamientu de Cangas del Narcea. Ye la primer vez que l’artista, nacida en Bonos Aires, presenta los sos trabayos na tierra orixinaria de los sos mayores.

Melzi desenvuelve una obra de fechura autodidacta empobinada peles enseñances del so maestru Camilo Tavano-Tavano. La técnica qu’utiliza ye académica y representativa, pero avanza sobre llicencies pa lograr el climax qu’imprime nes sos obres. Ente los temes qu’acostuma tratar figura la ciudá o les marines.

L’amuesa va poder visitase hasta’l prósimu 7 de setiembre n’horariu de 12.00 a 14.00 y de 19.00 a 21.00 hores.

Güei, a les ocho la tarde, inaugúrase na sala d’exposiciones Cafe Español la colección ‘Fotógrafos de la naturaleza 2005’, con más de 88 retratos que componen esta muestra, organizada pol British Museum y la BBC Wildlife, y que traten de la preocupación pola conservación del mediu natural. La selección va poder visitase hasta’l 9 d’ochobre.

Les 88 imáxenes foron seleccionaes nun concursu nel que compitieron más de 20000 semeyes. Ente los autores de los retratos, dalgunos premiaos pola innovación, pola temática, la forma o la composición, hai dos que destaquen polos galardones que-yos dieron nel certame que se falló a finales del añu pasáu nel Museu d’Historia Natural de Londres. Trátase de los premios ‘Fotógrafu del añu’ y ‘Xoven Fotógrafu del añu’ que van tar expuestos nel Cafe. El galardón ‘Eric Hosking’ otórgase al meyor conxuntu de seis retratos d’un fotógratu menor de 26 años, qu’esti añu foi pa Kobe van Looveren.

Esta muestra yá tien visitaos diferentes ciudaes nel Reinu Uníu, Portugal, Mexico, Estados Unidos y Brasil. Y agora va tar nel Cafe Español hasta’l 9 d’ochobre. L’horariu pa poder visitar la muestra ye de 12.00 14.00 y 17.00 a 21.00, de llunes a vienres. Los sábados abre media hora primero, mentes que los domingos namás lo fai pela mañana.

El Centru de Cultura Antigu Institutu de Xixón va ufiertar dende’l prósimu xueves 1 y hasta’l 25 de setiembre la esposición “Terrenos de juego”, una amuesa d’arte contemporáneu na que’l Sporting ye’l protagonista. Orlando Pelayo, Díaz de Orosia y Kiker firmen delles de les obres espuestes alrodiu del club playu.

Un total d’once artistes actuales espresen la so mirada col fútbol y el Sporting de Xixón como centros de la so atención na amuesa ‘Terrenos de juego’. Trátase d’un conxuntu d’obres procedentes de la pinacoteca de la Fundación Sporting o remanecíes espresamente pa esta esposición.

Aspectos como la veteranía y la cantera, les aficiones, la identificación con unos colores o la tensión nel xuego son abordaos por estos artistes, qu’aporten al espectador el so especial puntu de vista utilizando pa ello diferentes disciplines como’l vídeo, la fotografía, la pintura o les artes gráfiques.

Elliott Erwitt considera la fotografía como l’arte de la observación, lo que lu lleva a escucar tamien a los aficionaos al arte mentes observen. La galería de la Fnac de Parque Principáu espón ente’l 26 d’agosto y el 14 de payares el ‘Museum Watching’. 32 retratos nos qu’Erwitt describe con ironía l’actu mesmu de mirar nel interior de los museos.

La obra d’Erwitt busca lo chocante y absurdo de la vida cotidiana dende una doble vertiente: capa les imáxenes con una aparente tresparencia visual, al tiempu que surraya’l llau irónicu de la vida.

Nacíu en París en 1928, pasó gran parte de la so vida en Los Ángeles onde conoció a Edward Steichen, Robert Capa y Roy Stryker. Con Capa trabayó na famosa Axencia Mágnum dende 1953, publicándose internacionalmente los sos ensayos periodísticos, les ilustraciones y les anuncies que foi creando a lo llargo de más de cuarenta años.

Erwitt tien sío oxetu de varies exposiciones individuales per museos y galeríes de tol mundu, como’l Museum of Modern Art de Nueva York, The Smithonian Institute, el Art Institute de Chicago, el Museo Moderno de París, el Kundsthaus de Zurich y el Photokina de Colonia.

El Palaciu de Revillaxixéu de Xixón acueye hasta’l prósimu 27 de setiembre la esposición “Pintores de la tierra”, una amuesa que recueye obres de cincuenta y ún pintores españoles nes que la visión del paisaxe ye tamién espresión de fidelidá a unos oríxenes. Ente los artistes asturianos, resalten les obres espuestes de Nicanor Piñole y Evaristo Valle.

Los fondos d’esta esposición pertenecen al patrimoniu de les Caxes d’Aforros Confederaes y representen un percorríu pela pintura española de los últimos ciento venticinco años. La más vieya de les obres amosaes ta fechada en 1880 y la más recién nel añu 2000.

Autores como Joaquín Mir, Ricardo Baroja, Vázquez Díaz o Eugenio Granell son dellos de los que componen esta esposición, amás de los citaos Valle y Piñole, xunta l’astur-madrilanu José Robles del que s’ofrez la so pintura “Soto del Barco”. En xunto una visión plural y poliédrica d’un paisaxe que tamién lo ye a lo llargo de los distintos países que formen l’actual estáu español.

La Obra Social y Cultural de Cajastur ye la responsable de l’amuesa que se puede visitar nel Palaciu de Revillaxixéu de Xixón.

El Muséu Antón de Candás acueye hasta’l prósimu 28 de xuno la esposición “Nicolás de Lekuona. Una selección”. Artista de fonda personalidá y precursor de les vanguardies, Lekuona morrió prematuramente a los 24 años na guerra civil.

La obra del pintor guipuzkuanu foi reivindicada por artistes vascos posteriores como Jorge Oteiza y cásique setenta años después de la so muerte considérase un creador d’una singularidá fuera de lo corriente nel so tiempu. Agora rescátase una parte de la so obra pa contemplase nel muséu candasín.

Nicolás de Lekuona cultivó diverses disciplines plástiques, de la pintura al oleu a la fotografía, la escultura, el grafismu y el diseñu. Después de frecuentar les tertulies madrilanes de Gómez de la Serna y otros cenáculos vanguardistes, volvió al so País Vascu natal, onde lu movilizó l’exércitu franquista. En 1937 morrió nel frente de Fruniz mientres evacuaba feríos, víctima del ‘fuegu amigu’ de les sos propies tropes.

L’ayuntamientu d’Uvieu organiza un certame de graffiti dientro del programa de les fiestes de San Mateu, nel que van poder participar toos aquellos que lo deseen y presenten un bocetu de la obra que van representar nel concursu. Los participantes tienen que presentar estos orixinales nos locales de la SOF, na cai Ildefonso Sánchez del Río.

Esti certame va facese na plaza la Catedral el 15 de setiembre. El tema de los bocetos ye llibre (exceptuándose aquellos que faigan apoloxía de la violencia o tengan conteníu racista, xenófobu o sexista) Los orixinales podrán presentase en tamañu A-4 o en soporte dixital (formatu jpg) hasta’l día 2 de setiembre. Dándose a conocer los seleccionaos el día 5 a travies de la páxina web del ayuntamientu.

Los premios son de 300 euros pal primer puestu, 200 pal segundu y 100 pal terceru.

El pintor y diseñador Julio Saldaña Manero espón dende esti llunes 1 hasta’l prósimu 7 d’agostu parte de la so obra gráfica nuna amuesa que puede visitase na Casa de Cultura de Llanes. Ye la quinta esposición programada dientro’l ciclu d’artes plástiques de branu y la primera del mes d’agostu.

Saldaña, qu’estudió Dibuxu y Pintura na Escuela d’Arte d’Uviéu, vien realizando esposiciones individuales dende 1985. La gran característica de la so obra radica nel sobresaliente tratamientu del color. A xuiciu del críticu Jesús Villa Pastur, la so pintura enmárcase dientro un realismu d’apuraes depuraciones espresives, con una gran capacidá tanto pa les apoyatures dibuxístiques como coloristes.

Na Casa de Cultura de Llanes presenta una selección de veinticinco cuadros, óleos sobre tela y pasteles, inspiraos nel paisaxe asturianu y castellanu, ensin que falte la so personal visión del Llanes de güei.

Ente los numberosos premios que recibió Julio Saldaña, figura el Primer Premiu nel Concursu de Cartelos “Fiestes del Santísimu Cristu de Candás”, en 2001. Abondes colecciones públiques cuenten con obres suyes, como Caja Duero de Valladolid, Caja de Ahorros de Burgos, Universidá d’Uviéu y Colexu Oficial de Médicos d’Asturies.

La pintora xixonesa Pepa Osorio morrió na madrugada d’esti miércoles 27 después d’una llarga enfermedá. L’artista, de 82 años, formaba xunto a Rosario Areces y Covadonga Romero una xeneración de muyeres creadores a la que se reconoció en 2004 cola concesión de la Medalla de Plata del Principáu. Discípula del pintor Eugenio Tamayo, Osorio supo desenvolver una carrera estética acordies col ritmu mudante de les vanguardies.

La pintora yera dende cuantayá una presencia singular na vida pública xixonesa y amás de les plástiques buscó tamién la espresión n’otres formes espresives como la poesía y los aforismos.

Pepa Osorio nació en Xixón en 1923, estudió na Escuela de Belles Artes y vivió en Madrid, Bruseles, Barcelona y Marbella. Les sos últimes esposiciones fueron nes sales Altamira y Cornión de Xixón.

El so funeral va celebrase esti xueves a les 17.00 na ilesia de Begoña de Xixón.