Plástiques

Una amuesa de l’artista plástica Inés López Manrique inaugura el prósimu 14 d’ochobre un ciclu d’esposiciones de diversos artistes asturianos qu’entama l’Aula Abierta de la llibrería uvieína Trabe. Cinco creadores contemporáneos van ufiertar los sos trabayos a lo llargo de los meses vinientes na sala de la llibrería y editorial.

El viernes 14 d’ochobre, a les 19.00 hores estrena la so esposición la pintora Inés López Manrique, que va colgar obres feches en papel enriba caxes embaxo’l títulu “Ente papeles”. El restu de la programación d’esposiciones que van celebrase n’Aula Abierta hasta fin d’añu van amosar la obra d’artistes como Nel Amaro que presenta el trabayu “Españoleando 1990-2005” (Poemas visuales y poesía acción) del 28 d’ ochobre al 17 de payares.Marta Alija ye la siguiente artista que va esponer na llibrería Trabe embaxo’l títulu “Fábulas” del 18 de payares al 1 d’avientu.

Yolanda González Alonso cola esposición “Óleos”, del 2 al 15 d’avientu y Luis Vega tamién con una amuesa titulada “Óleos”,del 16 d’avientu al 7 de xinero de 2006, completen la nómina de los creadores plásticos que van pasar pela sala uvieína.

El director del Muséu Meadows de Dallas Marc Roglán visitó ayer el Muséu de Belles Artes d’Asturies nuna atopada con responsables de la pinacoteca y de la Conseyería de Cultura col fin d’entamar víes de colaboración ente les dos instituciones.

Roglán, tres la visita, emponderó la colección abellugada nel centru museísticu del Principáu y afirmó que d’agora pa en delantre quedaben abiertes les posibilidaes pa collaborar al través de préstamos o intercambios sobre los fondos d’entrambos centros artísticos. El Muséu de Dallas abelluga una importante colección d’arte español de toles dómines, con presencia d’obres contémporánees d’artistes como Miró, Picasso o Gris.

La XXIX edición del Salón del Cómic del Principáu va celebrase un añu más en Xixón ente’l 11 y el 15 d’ochobre. Ian Boothby, creador de los Simpson, Bryan J. L. Glass y Jim Starlin son les figures internacionales más destacaes d’esta edición xunto al mierense Xuaxus, ilustrador de filmes como Harry Potter II y el Reinu de los Cielos de Ridley Scott. La organizción del Salón llamenta la mengua d’apoyu del Ministeriu de Cultura y del Institutu Asturianu de Mocedá.

La revista “El Wendigo”, entamadora del Salón del Cómic de Xixón, informa na páxina web del festival el recorte sufríu nel capítulu de les aportaciones económiques por parte d’instituciones que patrocinaron les anteriores ediciones. Los principales recortes vienen de parte del Ministeriu de Cultura, que denegó la subvención solicitada y que según la organización suponía la mitá del presupuestu del eventu. L’Institutu Asturianu de la Mocedá tamién suprime esti añu el so respaldu, apurríu hasta anguañu como conveniu de colaboración.

La mengua del presupuestu del Salón, sicasí, nun va impidir que nesta edición númberu ventinueve acudan a Xixón figures del prestixu internacional de Boothby, Starlin o Glass. Tocante a la presencia d’autores del estáu, destaquen Pia Guerra, Antonio López, Rodolfo Martínez o los asturianos Gaspar Meana, Neto y Alberto Álvarez Peña. Esti últimu ufierta una esposición de los sos trabayos nel Antigu Institutu embaxo’l títulu “Mito y realidad”.

El director xeneral de Promoción Cultural y Política Llingüñistica, Carlos Madera, asiste esti martes a la inauguración en París de la esposición “Sebastiao Salgado: territoires e vies”. Frutu d’esti viaxe podía ser la presencia n’Asturies d’esta amuesa de los trabayos fotogtáficos de Salgado.

Al actu de París tienen previsto asistir el ministru francés de Cultura, Jean Nöel Jeanneney y el director de la Biblioteca Nacional de Francia, Jean Gautier, asina como un representante de la Fundación Príncipe d’Asturies, instución que podía tar interesada en colaborar col Principáu pa traer a Asturies la última esposición del fotógrafu brasileiru Sebastiao Salgado.

La inauguración de l’amuesa de Salgado inxérese dientro les actividaes programaes dientro del Añu de Brasil en Francia.

Una esposición xunta nel Muséu Antón de Carrerño dos sieglos d’iconografía alrodiu de la imaxe del Cristu de Candás. L’amuesa, comisariada por Francisco Crabiffosse, ufierta reproducciones de la talla y semeyes relatives a la so devoción, ente elles obres de Nicanor Piñole y un manuscritu del polígrafu Carlos González Posada.

La esposición ufierta en tres espacios distintos la iconografía del Cristu de Candás en pintures, grabaos, estampes, fotografíes, tarxetes postales, medalles; otru de los espacios ta dedicáu a la documentación referida a la devoción de la imaxe y un tercer núcleu espositivu nel que se recueye una amuesa d’ex-votos fechos al Cristu.

El Muséu Antón acueye esta esposición hasta’l prósimu 30 d’ochobe.

Avilés acueye la esposición Tipos Ilustrados, una amuesa que s’enmarca nes Xornaes de Diseño Motiva 2005 y axunta obres de 114 ilustradores de varies xeneraciones, españoles o residentes, dende Alfredo Alcaín (1936) a Jano (1979). La esposición va poder visitase hasta’l 7 d’ochobre nel Centru Municipal d’Arte y Esposiciones (CMAE)

.

L’amuesa recueye los trabayos de dalgunos de los nomes más representativos y consagraos del mundu de la ilustración, con una trayectoria que permite establecer un recorríu pol variáu panorama d’esti arte n’España: Alfredo Alcaín, Ana Juan, Carlos Killian, Dodot, Garces, Jacobo Pérez Enciso, Peret o Óscar Mariné, asina como con creadores más mozos que empiecen a despuntar nesi ámbitu y ente los que alcontramos a Santiago Sequeiros, Jano, Pep Monserrat o Pablo Amargo -últimu Premiu Nacional de Ilustración Infantil y Juvenil- y un de los dos únicos creadores asturianos n’amuesa, xunto al ilustrador Miguel Santamarina.

Bruseles va agospiar una esposición de cómic asturianu del 23 de setiembre al 1 d’ochobre. L’amuesa, organizada pola asociaciòn Asturianos en Bruseles (ASBRU) y el Centru Asturianu de la capital belga, ufierta les obres de dellos de los más representrativos dibuxantes y illustradores del nuestru país.

La Casa d’Asturies de Bruseles va ser la sé d’esta esposición na que s’ufierten treinta trabayos orixinales d’artistes como Alfonso, Rovés, Niembro, Falo, Naves y Pablo García, entre otros. Xunto a ellos van esponer les sos obres autores mozos de la nuestra comunidá.

El 23 de septiembre, día de la inauguración de la esposición, va celebrase a les 20,00 hores una charra retrospectiva de la historia del cómic asturianu a cargu d’Isaac del Rivero, autor, ente numberosos trabayos de la versión dibuxada de La Regenta. Darréu de la conferencia va ufiertase un pinchéu preparáu pol restaurante “Les Asturiennes” y amenizáu con una actuación musical.

El 30 de setiembre contaráse cola presencia del dibuxante de La Voz de Asturias y coordinador de la esposición Neto, que va entamar una visita guiada de l’amuesa. El 1 d’ochobre, y como actu de pieslle, el propiu Neto va animar un taller infantil pa estimular la capacidá creativa y l’atracción pol cómic de los neños d’orixen asturianu residentes en Bruseles.

ASBRU, l’asociación organizadora d’esta amuesa, afirma que con iniciatives como esta aspira a guiase nes sos propuestes pol principiu de plantear actividades qu’encaxen nel ambiente cultural de Bruseles, col fin de buscar la mayor difusión posible, visibilidá y repercusión de les mesmes ente los sos socios, la comunidá asturiana y la comunidá internacional. Esti colectivu busca la posibilidá d’axuntar esfuerzos y colaborar con otres entidaees de la comunidá asturiana na capital belga nel importante llabor de la promoción d’Astueries. Nesi sen, ASBRU collaboró col Centru Asturianu de Bruseles nel planteamientu d’esta esposición nun ámbitu de la creación cultural como ye’l cómic, del que los belgues son grandes aficionaos como lo amuesa’l fechu de contar con un prestixosu Muséu del Cómic que s’asitia ente los grandes atractivos turísticos de la ciudá y bien prósimu a la Casa d’Asturies, sé d’esta amuesa.

L’amuesa d’arte urbanu Motiva 2005 ábrese esti martes 20 en Xixón cola presencia de setenta autores que coles sos estremaes propuestes ufierten la so visión personal de les relaciones del ser humanu col automóvil na ciudá. “Festina lenta” ye’l títulu col que s’entama esta amues de diseñu gráficu na que los creadores utilicen como soporte espositivu los mupis pubicitarios.

Motiva ye una iniciativa de l’Asociación de Diseñadores Gráficos d’Asturies y la Escuela d’Arte d’Asturies cola que se tenta integrar les estremaes propuestes artístiques del diseñu gráficu na reflexón sobre los asuntos claves de la realidá. Na edición anterior el tema principal fue’l de la violencia de xéneru, esti añu trátase de reflexonar sobre la conducta de los ciudadanos nos sos desplazamientos pel ámbitu urbanu utilizando vehículos de motor.

L’amuesa “Festina lente” (cuerre despacio) va tar nos mupis publiciatarios del caixeru xixonés dende esti martes 20 de setiembre hasta’l prósimu 18 de payares. Después la esposición va percorrer distintes ciudaes del estáu.

Motiva 2005

Esta mañana constituyóse formalmente en Xixón la Fundación La Laboral Centro de Arte Industrial, l’organismu encargáu de poner en marcha y xestionar el nuevu espaciu dedicáu a la creación plástica y audiovisual empobináu pol gobiernu del Principáu.

L’administración autonómica xunta l’Ayuntamientu de Xixón, son los emburriadores d’esti patronatu nel que tán presentes tamién entidaes como l’Autoridá Porturaria de Xixón, Telefónica, Hidroeléctrica del Cantábrico, Cajastur, FCC Construcción, Alcoa Inespal, Dragados S.A., Necso Entrecanales Cubiertas, SEDES y Constructoras San José.

La Fundación constiúise como entidá ensin ánimu de lucru, amparada n’actual lexislación de Fundaciones y col respaldu institucional del Principáu. Va ser la encargada de xestionar el futuru centru d’Arte Contemporáneu de La Llaboral.

La XVI Amuesa d’Artes Plástiques del Principáu d’Asturies, Ilusionarte 2005, puede contemplase dende esti martes 13 y hasta’l prósimu día 28 de setiembre na sala d’esposiciones de la Casa de Cultura d’Avilés. L’amueesa presenta la obra d’ocho cradores mozos, ente ellos el ganadeor del últimu premiu Asturies Xoven.

Trabayos de pintura, fotografía, grabao, escultura ya instalaciones son les propuestes que dan a conocer n’Ilusionarte los ocho artistes seleccionaos. Pablo Fernández, Premiu Asturies Xoven d’Artes Plástiques 2005, presenta la so obra xunto a Juan Ignacio Fernández Alava y Assaf Iglesias na categoría de pintura; Pablo Armesto y Blanca Nieto ufierten los sos llabores n’escultura ya instalaciones,respectivamente; Jacobo de la Peña Miguélez ye l’artista seleccionáu en grabao y Eduardo Guerra Alvarez en fotografía.