Patrimoniu

El presidente del Principáu firmó ayeri nel Museu del Pueblu d’Asturies el conveniu de constitución de la Rede de Museos Etnográficos d’Asturies (REDMEDA), na que participen los conceyos de Xixón, Santalla d’Ozcos, Grandas de Salime, Navia, Tineu, Somieu, Grau, Quirós, Morcín, Gozón, Nava, Casu y Llanes. Al par d’esti, alcordóse un segundu conveniu de guarda y difusión del patrimoniu oral del Principáu.

Areces valoró los convenios como “un pasu defenitivu pa coordinar y revalorizar los distintos museos asturianos”,y supón el desarrollu de la llei de Patrimoniu Cultural, aprobada pola Xunta Xeneral nel añu 2001.

El Museu del Pueblu d’Asturies va ser el cabezaleru d’esta rede de museos, faciendose cargu de los llabores de coordinación d’actividaes, investigaciones, publicaciones y circuitos turísticos o comerciales. Poro, de los 186000 euros colos que cunta la Rede na partida pa 2006, l’ayuntamientu de Xixón aporta la metá y la otra parte cuerre por cuenta del Principáu d’Asturies.

De momentu, la Rede echa a andar con un total de trece conceyos (Xixón, Santalla d’Ozcos, Grandas de Salime, Navia, Tineu, Somieu, Grau, Quirós, Morcín, Gozón, Nava, Casu y Llanes), pero les puertes queden abiertes pa que se sumen más alantre otros municipios, como pue ser el casu de Mieres, col so Museu de la Tonada.

Per otra parte, tamien s’alcordó la custodia y difusión del patrimoniu oral asturianu. Sigún Areces, «l’oxetivu ye poner a disposición de los ciudadanos un material documental dispersu, pero valiosu; que nos va facer comprender meyor y aprender la tradición oral y les costumes d’Asturies.

El Principáu va disponer en 2006 una partida de 32000 euros pa esta iniciativa, que va faciliar a investigadores y especialistes un fondu de vital importancia qu’abarca distintes disciplines.

Rede de Museos Etnográficos d’Asturies (REDMEDA)

El director xeneral de Promoción Cultural y Política Lingüística, Carlos Madera, presentó esti xueves 10 la páxina Web del Archivu de Música d’Asturies, una unidá de xestión documental de la Biblioteca d’Asturies “Ramón Pérez de Ayala” que naz frutu del alcuerdu ente la Fundación Príncipe d’Asturies y CaxAstur.La nueva páxina tiene por oxetivu la difusión, la comunicación y l’acercamientu a la música asturiana.

El conteníu del sitiu web apaez estructuráu en diferentes secciones o estayes, nes qu’amás de les secciones d’información xeneral del propiu Archivu de la Música d’ Asturies ufiértase una estaya de noticies, una Guía de Recursos Musicales nel Principáu, catálogos, música n’Internet, publicaciones del Archivu, boletinos de noticies pa unviar periódicamente a los usuarios, encuestes,etc.

Na so presentación, Carlos Madera señaló que “trátase d’una páxina centrada en la música, especialmente na asturiana, que busca la interactuación usuariu-archivu y que pon a disposición de los usuarios y el mundu de la música un mediu de difusión, promoción ya información”.

Páxina web del Archivu de Música d’Asturies

La investigadora de la Universidá de Barcelona Marisol Madrid Fernández abre esti llunes 24 el ciclu de conferencies sobre’l Chao San Martín qu’acueye’l Centru de Cultura Antigu Institutu de Xixón. En total van ser tres charres dedicaes a complementar la esposición que s’amuesa nel Parque Arqueolóxicu de la Campa Torres sobre’l recintu castreñu occidental.

La prehistoriadora Marisol Madrid va falar a les 19.00 hores sobre “La terra sigillata de Baetuno Badalona (Barcelona). Estudio desde una perspectiva arqueométrica”. Mañana martes 25 va ser l’arquéologa Pilar Sáenz Preciado la que fale sobre “Tricio, La Rioja: historia de un complejo alfarero” y el miércoles Alfonso Menéndez y Estefanía Sánchez Hidalgo, investigadores del elan Arqueolóxicu de la Cuenca del Navia van tratar de “Terra sigillata en Asturias”.

La Plataforma pola Defensa del Patrimoniu Cultural de Corvera denunció énte la Conseyería de Cultura varios desperfectos en horros y paneres de Truyés. La Plataforma, enterada de los desperfectos provaocaos nos balaustres del corredor, na caxa y techume de los inmuebles. informo a la Conseyería pa que dirima responsabilidaes sobre les personas que de mano principio habíen velar pola protección de los mesmos.

L’agrupación vecinal resalta qu’un de los inmuebles protexíos ye de gran valor etnográficu debío a la so singularidá ya que trátase de dos horros uníos por un mesmu corredor, un casu del que nel conceyu namás esisten otros dos exemplares con iguales característiques.

La Plataforma Cultural facilitó a la Conseyería tamién más información alrodiu del incendiu presuntamente provocáu d’una panera nel llugar de Los Campos , asina como de les denuncies formalizaes hasta la fecha sobre esti casu.

La Escuela Universitaria Xovellanos de Xixòn acueye hasta’l sábadu les IX XOrnaes de Museoloxía. Les xornaes tán estructuraes con un esquema de ponencies y meses redondes a cargu d’ especialistes en distintes realidaes y sistemes d’organización vinculaos al mundu de los museos.

Nes diferentes meses redondes van intervenir representantes del Muséu del Exércitu, Patrimoniu Nacional, Muséu d’Historia de Barcelona, Muséu de les Feries de Medina del Campo, Xarxa de Museos de Valencia, Muséu Arqueolóxicu de Tenerife y l’Asociación de Museos Locales de Córdoba, ente otres entidaes.

El programa de ponencies inclui mañana viernes una charra de Pilar González Lafita, sobre los “Museos de Xixón”, de los que ye directora. El restu de les ponencies van ser les siguientes: “Diferentes modelos de organización en red”, “Desde la cercanía: Los museos municipales”, “Compartiendo recursos: Las redes de museos” y “Más allá del territorio: Las Redes Virtuales”.

Más d’un cientu de profesionales, responsables políticos y representantes de colectivos vecinales, sindicales y culturales, participaron ayer n’Uviéu nuna xornada de reflexón sobre’l Plan Periurbanu del Naranco. La significancia de la zona en cuantes patrimoniu hestóricu y natural centrò bona parte de les discusiones.

El respetu a les estayes monumentales del Prerrománicu, asina como de les construcciones tradicionales o con valir etnográficu, fue una de les necesidaees que se punxeron enriba la mesa nel alcuentru. La coordinación ente los distintos planes qu’afecten a la zona fue otra de les necesidaes vistes na xornada de reflexón.

La Comisión de Patrimoniu de la Conseyería de Cultura dio’l vistu bonu final a la conversión del antigu monesteriu de Courias en Parador Nacional de Turismu. Nel so últimu aconceyamientu el pasáu 29 de setiembre los espertos del Principáu aprebaron tamién l’usu de la torre medieval de Vil.lamourus como establecimientu hoteleru.

Otres de les decisiones tomaes por Patrimoniu fueron la d’estudiar el llevantamientu del altar de Santa María del Naranco con problemes de conservación y l’alzáu d’un entarimao nel pavimientu del templu. Obres asemeyaes na ilesia del Conventín en Valdediós fueron oxetu del estudiu de los espertos de Cultura na so última reunión.

La Escuela de Música Tradicional “Manolo Quirós” d’Uviéu acaba d’editar el primer cedé d’una serie na que se recueye la tradición oral de la xente vaqueiro. El discu tituláu “Los Braña: orgullo de vaqueiros” reproduz les grabaciones feches pol investigador José Ángel Llaneza en 1998 col testimoniu faláu d’una familia vaqueira del conceyu de Valdés.

El Centru de Documentación Etnográfica de la Escuela de Música Tradicional “Manolo Quirós” presentó esti xueves 28 el discu “Los Braña: orgullo de vaqueiros” nun actu na sé de la SGAE n’Uviéu nel que l’estudiosu Fernando de la Puente aseguró que se trataba d’un documentu de la tradición vaqueira “no oficial”. De la Puente, xunto al autor del trabayu de campu José Ángel LLaneza y el director de la Escuela “Manolo Quirós” José Manuel Fernández emponderaron la fidelidá de la familia protagonista del cedé, los Braña, a los sos oríxenes y a la so cultura, al pesar de les múltiples adversidaes.

Con esti discu el Centru de Documentación Etnográfica de la Escuela de Música Tradicional d’Uviéu entama una serie na que pretende ufiertar grabaciones de la memoria oral asturiana pañaes directamente de les fontes orixinales.

El Principáu d’Asturies, a traves de la Conseyería de Cultura, Comunicación Social y Turismu, participa esti fin de selmana na Feria Internacional de Montluçon (Lyon) con una representación del Museu del Xurásicu d’Asturies. Col títulu “Asturies y el xurásicu”, el Principáu ofrez nun puestu de 40 metros cuadraos ún de los sos principales atractivos culturales y turísticos.

Pa la exposición de Montluçon seleccionóse aquel material más representativu del Xurásicu d’Asturies. Ente’l que destaquen les buelgues de dinosaurios y los troncos d’árboles fósiles, dalgunos de los cuales tresformáronse n’azabache. Esti mineral, mui abundante nos yacimientos xurásicos costeros, presenta una calidá excepcional pa la talla, y ta mui enraigonáu na nuestra cultura tradicional.

El singular edificiu del Museu del Xurásicu, a 155 metros sobre’l nivel del mar, a mitá de camín ente Colunga y Llastres, ye l’únicu con forma de buelga tridáctila de dinosauriu, tando nel puntu intermediu de los yacimientos d’icnites de dinosaurios.

Ente tol material paleontolóxicu recuperáu nos últimos 10 años de los acantilaos asturianos pol equipu de Jose Carlos García-Ramos y que pasó a formar parte de los fondos del MUJA, destaquen especialmente una colección de 234 exemplares d’icnites de dinosarios (terópodos, ornitópodos, saurópodos y estegosaurios), que nesti momentu constitúi la colección europea más importante nesti tipu de buelgues. Amás, contien la más completa colección de restos de vertebraos xurásicos d’España; l’esqueletu parcial d’estegosariu; el meyor yacimientu de buelgues de pterosarios, y varios exemplares de buelgues de dinosarios con impresiones de la piel, dalgo estraordinariamente escaso nel rexistru xeolóxicu.

Muséu del Xurásicu

La Plataforma pola Defensa del Patrimoniu Cultural de Corvera ( PDPCC ), ente la inactividá del equipu de gobiernu local, va estudiar na prósima reunión la posibilidá de llevar a cabu movilizaciones ciudadanes pola xabaz tala de bosque autóctonu na zona onde se quier constuyir el residencial Los Balagares, en Truyes.

La PDPCC nun entiende estes tales incontrolaes d’árboles autóctonos, dalgunos d’ellos protexíos, si todavía nun tán aprobaes definitivamente les EPIAE de la zona, nesti momentu en periodu d’información pública, con más de venti alegaciones hasta la fecha.

La PDPCC va pidi-y esplicaciones al equipu de gobiernu de Corvera pola so inactividá ente esti problema, yá que “de poco sirven les campañes de sensibilización medioambiental cuando’l responsable de las mesmes ignora o nun pide responsabilidaes a los responsables d’esti tráxicu sucesu medioambiental”.

Por too ello, la PDPCC va reunise col fin de determinar les posibles acciones, ente les que nun se descarta la movilización ciudadana y la denuncia de los fechos ente los organismos correspondientes.