Patrimoniu

Esti miércoles a les 12.00 hores nel salón de plenos del Ayuntamientu de Llaviana tuvo llugar la presentación de la Toponimia Oficial del Conceyu, ellaborada pola Xunta Asesora de Toponimia a partir de los nomes de llugar tradicionales del conceyu. Na presentación tuvo presente la Direutora Xeneral de la Conseyería de Cultura, Consuelo Vega.

El vienres 4 de xineru publicáronse nel Boletín Oficial del Principáu d’Asturies (BOPA) los topónimos del conceyu de Llaviana, talamente como foran aprobaos pol Conseyu de Gobiernu del Principáu d’Asturies na so sesión del miércoles 19 d’avientu. Con esti trámite yeren yá 25 los conceyos asturianos que finalizaben el procesu pa la determinación de los sos topónimos oficiales.

Hasta l’11 de marzu ta abiertu’l plazu p’apuntase al Parque Arqueolóxicu de La Campa Torres, la Villa Romana de Veranes y a les Termes Romanes del Campu Valdés. La salida pa la escursión, que va facese’l sábadu 15 de marzu, va ser a les 9:39 hores, delante de l’Hotel Regente d’Uviéu. El preciu col autocar y les entraes ye de 15 euros por persona.

La organización política Andecha Astur acaba de solicitar nel rexistru municipal de Noreña “que se proceda a buscar un emplazamientu pa la recostruición de la ponte del Ferrocarril d’El Rebalde”, una infraestructura que fuere desmontad en 1996 y qu’agora ta amenzada. Les partes numberaes de la ponte del ferrocarril de Llangréu d’El Rebalde, del siglo XIX, desmontáu en 1996, tán, según andecha, “abandonaes nun prau y en seriu riesgo de desapaecer”.

La ponte d’El Rebalde formaba parte del trazáu de la llinia ferroviaria de “Ferrocarriles de Llangréu” inaugurada oficialmente’l 25 d’agostu de 1852 ente Xixón y Pinzales y qu’en 1853 empecipió a prestar serviciu efectivu ente Xixón y Carbayín. Una ponte que formaba parte del trazáu del cuartu ferrocarril de la Península siendo’l primeru de vía estrecha y tamién el primer ferrocarril industrial. Tamos, dicen dende AA, “énte una verdadera ayalga de patrominu industrial asturianu, de la historia del ferrocarril y la industrialización n’Asturies y nel restu la Península, en definitiva d’una parte de la primer llínea ferrea d’ Asturies”.

La ponte, comenten los nacionalistes, “desmontárase piedra por piedra pa la so reconstrucción debío a la reorganización del tráficu rodáu qu’implicaba la eliminación del pasu a nivel d’entrada a Noreña y a la reordenación de la zona d’El Rebalde, cola inclusión d’un cruce con semáforu onde antiguamente s’asitiaba la ponte”. Les distintas partes de la construcción “foron numeraes y dende va más d’una década, tán abandonaes, de mala manera, nuna finca municipal, conocía popularmente como’l “Prau La Rebusca”, na cai El Sol”.

La ponte, de más de 150 años, alcuentrase “lliteralmente “tirada en práu” semienterraes, ente maleza y les sos partes cuerren un seriu riesgu de desapaecer yá que’l solar municipal nel que s’lacuentren les piedres ta usándolu la empresa que fai obres de renovación de la cai del Sol pa depositar maquinaria y como vertederu”. La empresa, añaden, “nun duldo n’utilizar maquinaria pesao pa desplazar les piedres, lo que provocó daños en delles”.

Andecha Astur pidió al gobiernu municipal “que se proceda a buscar un emplazamientu seguru y acondicionado pa la conservación de toles partes de la ponte”. D’otra miente, Andecha Astur quier dexar constancia “de la gran responsabilidá que l’alcalde d’anguaño, Cesar Movilla tien nesta grave situación d’abandonu y destrucción del patrimoniu al ser parte del gobiernu municipal estos años siendo conceyal de cultura”.

Andecha Astur, sigue’l comunicáu, “denunciará nos próximos díes al Ayuntamiento de Noreña, ante la Comisión de Patrimonio Cultural del Principado de Asturias, por esti grave casu de vulneración de la Llei de Patromoniu na que aportará un dossier con pruebes fotografiques d’esti escándalu patrimonial”.

Güei, xueves 28 de febreru, a les 12 hores, nos llocales del Ateneu Obreru de Xixón, la Tertulia Cultural “El Garrapiellu” convoca una rueda de prensa pa desplicar la actividá de la delegación asturiana que participara na segunda sesión extraordinaria del Comité Intergubernamental pa la salvaguarda del Patrimoniu Cultural Inmaterial (UNESCO), fecha en Sofia, Bulgaria, del 18 al 22 de febreru del 2008. Una de les llínies de trabayu de la UNESCO ye la Convención pa la Salvaguarda del Patrimoniu Cultural Inmaterial (PCI).

Amás el 16 de mayu de 2007, l’Asamblea Xeneral de les Naciones Xuníes proclamara’l 2008 Añu Internacional de los Idiomes; nel marcu d’esti eventu, la UNESCO tien l’eslogan: “¡Los idiomes sí que cuenten!” y convida a los sos socios a multiplicar les sos actividaes col envis de fomentar y protexer tolos idiomes, especialmente los que tean dafechu en peligru, en cualesquier situación inteleutual y coleutiva. Nesti sen, tenemos de facer notar que nel Atlas de la UNESCO de les llingües del mundu en peligru de desapaición, contémplase l’asturianu como una d’eses llingües en situación de peligru.

“El Garrapiellu” foi convidao pola UNESCO al conceyu de Sofia, en calidá d’entidá oservadora. La delegación d’El Garrapiellu, integrada por Ánxel Nava, Sixto Armán, miembros de la so Xunta Direutiva, y Ramón García, traductor, centró la so xera n’espardir la situación d’esta llingua amenorgada, asina como l’alderique social plantegáu al rodiu la oficialidá de la llingua asturiana, y gallego-asturianu, presentando un dossier informativu y una selección de documentación y publicaciones al rodiu d’esti tema. Traen información direuta de los criterios la UNESCO en rellación al patrimoniu cultural intanxible de les llingües amenorgaes como tresmisores de la cultura universal.

Ficieron contautos con miembros d’otres delegaciones y caltuvieron alcuentros d’altu nivel, tantu con representantes del Ministeriu de Cultura español como con responsables de la UNESCO en materia llingüística, amás de participar activamente en toles actividaes y debates. D’otra miente, algamaron interesentes intercambios n’otres estayes de patrimoniu inmaterial, como’l deporte tradicional, na qu’El Garrapiellu fizo rellaciones con delles otres delegaciones y trai información pa integrase nuna rede europea.

UNIDÁ-Andecha Carreño va esibir el documental “Paraiso Industrial”, esti vienres 15 de febreru nel Teatru Prendes de Candás. El pase de la película va entamar a les 20:00 hores y amás del mesmu va haber un actu nel que va tar una de les directores de la obra, Konchi Rodríguez pa participar nun alderique alredor del riesgu que suponen pal ecosistema asturianu les nueves polítiques enerxetiques.

El documental denuncia l’impautu que puen tener na rexón el llevar al cabu proyectos como facer más centrales de ciclu combináu, l’ampliación de El Musel, la regasificadora o la presa Caliao ente otros. Tamien fai un repás del movimientu social y vecinal que ta surdiendo alredor d’esta sitiuación

L’asociación cultural “Fenoyo” de San Pedro de Ceque prepara los detalles del II Alncuentru de Falantes pal branu que vien. Na presente edición, los organizadores quieren programar un concursu de rellatu curtiu pa los escolinos de les escueles de la zona .

Amás, los miembros quieren asoleyar una publicación con motivu d’esti II Alncuentru de Falantes qu’axunta a un garapiellu de mozos col fin de recuperar el vocabulariu de la zona. L’alcuentru va cuntar con una xinta nel campu.

foto1>L’Academia de la Llingua Asturiana espublizada dende va diecisiete años la revista “Cultures”, una publicación que dirixe l’antropólogu, académicu y profesor de la Universidá d’Uviéu, Roberto González-Quevedo. El so númberu 15, acabante de ponese a la venta, ta dedicáu nesti casu, y en forma de númberu monográficu, a les fiestes n’Asturies, dende los aspectos más tradicionales a los cambios esperimentaos nes últimes décades.

Ente los autores que firmen trabayos tán Joaquín Fernández García, Concepción Lada Tuñón & Genaro Alonso Megido, Pilar Fidalgo Pravia, Matilde Fernández Álvarez, Xosé María García Sánchez, Llorián García Flórez, Vicente Rodríguez Hevia, Josefa Couceiro Gestal & Severino Antuña González, Juan José Domínguez Carazo & Nacho Fonseca Alonso, Mª Antonio Pedregal Montes, Xandru Martino Ruz, Mª Aurina González Nieda y Jesús Fernández Reyero ente otros. Apaeciendo estudios de munchos conceyos asturianos y de dellos del norte de Lleón.

Conteníu completu del númberu 15 de Cultures

El Conseyu de Gobiernu dio esti llunes el preste al decretu pol que se determinen los topónimos oficiales del conceyu de Riosa. Con ello, los topónimos tradicionales, n’asturianu, pasen a ser los únicos oficiales, sacantes dalgunes escepciones onde se caltién el topónimu billingüe.

Les alministraciones públiques han dir adecuando los cartelos y rotulaciones públiques de Riosa, asina como mapes y planos. Con esti, van 26 conceyos cola toponimia tradicional aprobada, magar de les llargues étapes nes que’l gobiernu paraliza les aprobaciones.

La editorial “La Cruz de Grau”, ta acabante d’anunciar la so intención d’espublizar un nuevu proyeutu, una revista d’estudios llocales de Xixón que va tener por títulu “Vieya Gigia” y que va tratar de recoyer diversos artículos de diferentes disciplines rellacionaes col conceyu. La revista va ser, amás, como la propia ciudá de Xixón, billingüe.

La publicación, diz el xerente de la editorial, “ñaz col oxetivu de caltener viva la identidá del conceyu xixonés al traviés de la pallabra escrita que va a perdurar cola fin de tresmitir esti llegáu a les xeneraciones vinientes”.

Arqueoloxía, economía, xeografía, folclore, xeoloxía y otros temes van enllenar cada seis meses les 132 páxines de 21×21 centímetros.

Nel proyectu confimaron la so collaboración, ente otros, Chema Vega, José Luis Suárez, Tino Lozano, Janel Cuesta, Inaciu Galán, Boni Ortiz, Xurde Morán y Alberto Álvarez Peña.

Sicasí, la editorial ta abierta a nueves inclusiones. La estensión máxima d’estes collaboraciones ha ser de seis páxines y pueden incluyise fotografíes, gráficos…, lo mesmo en castellán, que n’asturianu.

Hasta’l 15 de marzu ta abiertu’l plazu pa esti primer númberu. Les collaboraciones pueden mandase a vieyagigia@yahoo.es

Alredor 300 persones asistieron en Corao al III Conceyu Abiertu del Texu pa sofitar la denuncia polos daños ocasionaos a los texos durante les obres de restauración na Ilesia d’Abamia. “La execución de la obra foi verdaderamente espantosa. Ye inadmisible. Ye un despropósitu, una falta de sintíu común y una falta de respetu tantu al edificiu como a la naturaleza el so entornu”, dixo’l presidente de l’Asociación Cultural d’Abamia, Paco Pantín .

Amás los representantes de l’Asociación Cultural d’Abamia pidieron la inclusión d’esta ilesia nel plan director del Prerrománicu Asturianu pa que tolos monumentos venceyaos de dalguna manera al Reinu d’Asturies sían trataos col mesmu procuro que los prerrománicos. Per otra parte tamien anunciaron la so participación nun congresu científicu de la Dirección Xeneral de Patrimoniou Cultural, que se va cellebrar el prósimu fin de selmana en Cangues d’Onís, nel que van tratase temes tocantes a la restauración del patrimoniu cultural y monumental d’Asturies y de elementos como la Ilesia d’Abamia.