Música

Enrique Bunbury empezará n’Uviéu un llargu camín con más de 80 etapes por España y América Llatina pa presentar el discu qu’ababa sacar del obradoriu, ‘El viaje a ninguna parte’, quintu trabayu discográficu qu’edita en solitario l’artista zaragozanu depués de la disolución de la banda na que se diera a conocer, Héroes del Silencio. El conciertu na capital asturiana sedrá’l 27 de mayu.

Bunbury va realcontrase col públicu uvieín con venti temes nuevos llistos pa rodar nel escenariu, dalgunos d’ellos con títulos talos como ‘Voces de tango’, ‘La señorita hermafrodita’ y ‘Que tengas suertecita’, corte que va ser el primer sencillu en sonar nos circuitos habituales. En toles canciones recién grabaes, l’artista mañu reedita y desendolca’l so singular soníu, evolución de la so etapa al frente d’Héroes.

Según informó la casa discográfica qu’asoleya el quintu discu de Bunbury, EMI, el trabayu pondráse a la venta el llunes 17 de mayu, y depués del estrenu en directu n’Uviéu la xira de presentación siguirá per tierres de Castiella, Galicia, Euskadi y Aragón.

La grabación de ‘El viaje a ninguna parte’ finó esti mesmu mes de marzu nos estudios Music Lan de Figueres, en Girona, mientres que la mezcla final féxose en Nueva York. Pa presentar el discu en directu, Enrique Bunbury -compositor, intérprete y productor- saldrá a escena arrodiáu de La Banda del Huracán Ambulante, el so grupu habitual de músicos, que tamién participó na grabación.

Doctor Explosion asoleya nuevu discu y entama una xira per Italia que llevará a los miembros del tríu xixonés tamién a tierres de Francia y que confirma la so amplia proyección internacional. Con Montpelier como primer escala, la banda abrió la xira italiana el vienres 16 d’abril en Piacenza, pa siguir depués per Viterbo, Teramo, Barletta, Lecce, Roma, Reggio Emilia, Pisa y Verona nun tour que se prollongará hasta’l sábadu 24, al ritmu d’un conciertu por día.

Pal viaxe de regresu, los Doctor Explosion tienen prevista una fecha en Niza, pero la promotora de la banda enfótase en confirmar dalguna actuación más en Francia.

N’Asturies, el grupu namás tien programada una actuación, en Candamu’l 5 xunu, que formará parte de la xira española que va llevalos per Madrid, A Coruña, Córdoba y Castellón, anque podría ampliase’l númberu de conciertos.

L’aniciu italianu de la temporada de conciertos coincide col llanzamientu inminente del nuevu discu de Doctor Explosion, ‘Totus tuus’, un doble recopilatoriu grabáu con Subterfuge Records nel que los xixoneses repasen los 15 años que lleven yá nel mundu de la música. Poro, el material sonoru y audiovisual que s’atopa nesti discu ye al que tán avezaos los sos fans, un mecigayu d’estilos musicales que van dende’l punk más salvaxe hasta’l pop más melódicu, con un soníu percontundente y coles pallabres folixa y xaréu por llema.

El grupu apaez con una nueva formación anque cola filosofía de siempre: Juan Martínez al baxu y Pibli a la batería acompañen agora a Jorge, que sigue al frente de la guitarra y les voces.

L’ex cabezaleru de la banda Talking Heads, l’escocés David Byrne, abrirá en Xixón una minixira española que va llevalu tamién a Málaga, Lorca y Madrid. El conciertu asturianu de Byrne, nel teatru Xovellanos, cellebraráse’l domingu 28 de marzu a les 20,30 hores y les entraes p’acceder dirán de los 15 euros en xeneral a los 25 euros por una llocalidá nel patiu de butaques.

David Byrne nun tará solu enriba les tables: Acompañaránlu los sos habituales Paul Frazier, al baxu, y Mauro Refosco na percusión, que xunta la guitarra’l propiu Byrne darán-y la base rítmica necesaria a tolos temes.

Amás, un sextetu de cuerda procedente de Texas (Estaos Xuníos) envolverá la interpretación del repertoriu’l conciertu, que tará basáu nel últimu discu de Byrne -‘Lead us not into temptation’- pero que fará tamién repás de l’álbum anterior a esti -‘Look into the Eyeball’- y de la etapa l’escocés al frente de los Talking Heads.

Felpeyu daráse una escapada gallega. El veteranu grupu xixonés de folk abrirá la temporada de conciertos con una minixira pol país vecín qu’incluyirá cuatro conciertos, en sales de Vigo, Ourense y Lugo y nos estudios centrales de la radio autonómica gallega, allugaos nos andurriales de Santiago de Compostela. El viaxe sedrá la carta de presentación pal públicu gallegu del últimu discu de la banda, “Yá!”.

El trabayu, el terceru que los de Xixón graben n’estudiu, salió de los obradorios de “Sinergia Digital” (Madrid) a mediaos de 2003, integráu por doce temes que, como davezu nel grupu, amiesten sones tradicionales con composiciones nueves.

Eses van ser, n’esencia, les pieces que van sonar nos recitales gallegos, programaos ente’l 23 y el 26 de marzu. El martes 23, Felpeyu actuará na sala Miudiño, d’Ourense, d’onde colará pa tocar al otru día na Clavicémbalo de Lugo. El xueves 25, los xixoneses intervendrán nel principal programa musical de Radio Galega, ‘Estudio 3’, en San Marcos (Santiago), y la minixira finará’l vienres 26 na sala Sete Mares, de Vigo.

Amás del ‘tour’ gallegu, Felpeyu tien yá programaes feches na nueche de San Xuan de Llugones y nel Festival Celta de Dowspuda (Polonia).

web oficial de Felpeyu

Víctor Manuel San José embárcase nel periodismu musical. Les catorce nueves canciones que-y dan forma a “El perro del garaje”, el nuevu discu’l cantautor, fuxen del intimismu y pónen-y ritmu y versu lo mesmo a la llaceria ecolóxica que vieno col afundimientu’l petroleru Prestige, qu’a la muerte n’Iraq del cámara José Couso o a quien falleció nel anonimatu -por nun tener ‘papeles’ en riegla- nes Torres Ximelgues de Nueva York.

Les bambalines del nuevu trabayu’l músicu de Mieres tán poblaes de xente d’Asturies: Ramón Prada asumió los arreglos de ‘Neptuno’, el tema dedicáu a la catástrofe’l Prestige; el tamién asturianu Tino di Geraldo punxo la so batería; y el saxofonista enraigonáu en Xixón Andreas Prittwitz collaboró na grabación de los metales.

La nómina de collaboraciones complétase col propiu fíu de Víctor Manuel, David San José, productor del discu y autor de los arreglos en trece de los catorce temes, y cola agrupación gallega ‘Faltriqueira’, que punxo les panderetes na canción n’alcordanza del regueru escuru que dexó’l petroleru Prestige.

En “El perro del garaje”, a la venta dende’l 9 de febreru, Víctor Manuel cuenta amás la hestoria de Juan Diego, un ‘sinpapeles’ que por nun tener identidá llegal nun pudo morrer el 11 de setiembre de 2001 pesie a quedar soterráu nes ruines de les Torres Ximelgues. Comparte espaciu col presidente’l Brasil, Luis Inazio Lula da Silva, cuya renovación de la política n’América Llatina tamién merez una canción.

La memoria de José Couso, cámara de Tele 5 asesináu n’Iraq pol Exércitu d’Estaos Xuníos, apaez tamién nun trabayu nel que’l cantautor de Mieres nun s’escaez de guardar un requexu pa la introversión: Nun hai discu ensin amor, y esi amor impregna tola grabación amás de llevar pa él una canción específica, “Cuando no pienso estoy pensando en ti”

Nun falta la referencia al entornu remotu del autor, la cabecera de la cuenca minera’l ríu Caudal, que nesta ocasión Víctor Manuel evoca pa llamentar l’ausencia de soluciones de futuru énte’l solombriegu desmantelamientu de les fontes de riqueza tradicionales na comarca, el carbón la primera.

Les afitaes bandes de heavy metal Motörhead y Alice Cooper, representantes de los meyores y más granibles tiempos del so estilu, actuarán con toa probabilidá en Xixón nel empiezu’l prósimu veranu, dientro d’un festival heavy que cuntará amás con un tercer grupu de sonadía inda por concretar y que baraxa l’escenariu del Palaciu los Deportes de La Guía como’l más probable.

Asina lo aconseyen les obres del metrotrén, qu’impiden cellebrar recitales con normalidá nel habitual allugamientu al aire llibre del hipódromu de Las Mestas, mientres que l’aforu de la plaza de toros xixonesa -unes 8.000 persones- abúltase-y enforma curtiu a los organizadores del conciertu.

Tanto Motörhead como Alice Cooper lleven tres décades enriba les tables y acumulen por ello una bayurosa trayectoria nos caminos del heavy metal. Polo d’agora, la conceyalía de Festeyos del Conceyu de Xixón piensa nel últimu fin de selmana de xunu o nos dos primeros de xunetu pa cellebrar el festival.

Quince euros por escuchar “Canciones de amor y droga”. Con esa tarifa única y con esi enunciáu que titula el so últimu discu, el singular cantautor Albert Pla tien cita en Xixón el sábadu 7 de febreru pa presenta-y al públicu asturianu los conteníos d’un trabayu que tresciende lo musical y apuesta por amestar constatación sonora y provocación estética.

Dicho d’otru mou: na xira que lu trai dende setiembre dando vueltes per España, Pla propónse contar coses evidentes que por embargu suelen callase y al mesmu tiempu quier revolver los güeyos del auditoriu, cola estimable collaboración de la tamién música Judith Farrés, cuya desnudez permanente sobre les tables xunta Pla contribúi a alitar un espectáculu poco o nada convencional.

Sobre testos de Pepe Sales que falen de refugayes de pasiones y llercies, el cantautor catalán y so compañera d’escena esfueyen una ‘performance’na que Pla pon la voz y la guitarra y Farrés carga col pesu escénicu del espectáculu, faciendo les veces d’actriz-dj-compañera de viaxe.

Too ello y probablemente más, el sábadu 8 de febreru nel Palaciu de Congresos de la Feria Internacional de Muestres d’Asturies, allugáu en Xixón.

Desapaecieron del panorama musical en 1998, namás un añu depués de grabar el so trabayu inagural y d’andar por un estimable númberu de caleyes escéniques y radiofóniques del país. Llueu de munchos quilómetros d’orquesta ‘pachanga’, clásicu destín de subsistencia musical al que tres de los componentes d’AC Soul hubieron d’acoyese temporalmente, regresen con sede de direutu y discu frescu.

Primer parada, Uviéu. La sala Tribeca -antes El Antiguo- pon les tables pa que los cinco músicos que firmen el neonatu “Danos sentido y pies para correr” -yos arruñen a sos respectivos instrumentos tolo que faiga falta a partir de les 21 hores del vienres 30 de xineru.

Sofitu nel marketing pa promocionar esi nuevu trabayu discográficu nun-yos pue faltar, si la llóxica nun falla y la editorial multinacional BMG Ariola caltién l’apoyu qu’acaba de compromete-y a la banda.

D’Asturies al mundu, nesta ocasión con una grabación de nueve temes fervida n’ochobre pasáu nos estudios corveranos de Paco Martínez y Sergio Rodríguez, con lletres que suelten entá ciertos arumes surrealistes propios d’aquellos inicios nos que la collaboración d’Adolfo Camilo Díaz col cantante y baxista del grupu, Xulio Antidio, producía canciones con sellu singular de la casa.

Ente convocatories que tan programándose dientro de l’actividá comarcal nel Parque Histórico del Navia, vieno acabante d’anunciase’l Conceyo de cantares III, qu’el Conjunto Os Folkgazáis va ufrir nel Auditorio As Quintas (A Caridá) el próximu domingu 21 de setembre, ás 8:30 da tarde, dientro tamién de la programación de la XXXI Semana Cultural de San Miguel.

Sigún desplicaben esti día nuna nota de prensa na que daben anunciadel conciertu “el Conjunto os Folkgazáis vai ofrecernos, entre outras, pezas del sou último disco Alorias y tamén poderá verse a proyección del videoclip del tema Desafío, incluído neste mesmo último trabayo discográfico”.

Esti próximu vienres 14 de febreru, a les 23 hores, en El Cafetón, C/ El Sol 8, en Avilés, celebraráse un conciertu del dúo asturianu Harpe Diem, formáu por Pedro P. Sanjurjo, xiblates y gaita rabil, y Dani García de la Cuesta, harpa céltica y vigulín.

El so repertoriu tien como fontes melodíes tradicionales de los países del ámbitu célticu, medievales y de composición propia.