Música

Habrá Paul McCartney por partida doble. Los siguidores del ex Beatle qu’acudan al conciertu col que’l músicu abrirá la so xira europea el prósimu martes en Xixón sedrán recibíos nel estadiu d’El Molinón por un ‘discjockey’ qu’animará la espera pinchando remezcles de conocíos temes del astru británicu. Esi ‘pre show’ abrirá la puerta a tres hores de conciertu en directu.

Según fontes de la organización del recital, cola intervención del dj nos momentos previos al conciertu persíguese dir ‘calentando’ al públicu hasta la apaición n’escena del músicu británicu, de mou que la espera se faiga más afayadiza pa los miles de persones qu’acudirán en Xixón al estrenu de la xira europea de McCartney.

Cola venta d’entraes abierta hasta’l mesmu día del recital, los organizadores del eventu esperen que l’ex vocalista y baxista de Los Beatles salga al escenariu d’El Molinón énte un aforu lo más completu posible, pesie a que los últimos recuentos oficiales, asoleyaos hai tres selmanes, falaben de 13.000 llocalidaes yá vendíes, un númberu enforma meyorable si se toma en cuenta que los organizadores del conciertu punxeron a la venta unes 30.000 entraes.

Nel so recital de Xixón, l’únicu que Paul McCartney ufrirá nel Estáu español na so xira 2004 amás del conciertu que dará en Madrid cinco díes depués, l’artista británicu interpretará a lo menos venti temes de la so dómina nes files de Los Beatles, col envís d’implicar al públicu lo más posible nel desendolcu del espectáculu.

Los señaldosos de Los Beatles alcontraránse como en casa nel estadiu d’El Molinón. L’ex baxista y vocalista de la hestórica banda británica, Paul McCartney, tocará venti temes del que fora’l so grupu nel conciertu col que, dientro de quince díes, va abrir la so xira europea en Xixón. A esa cifra, McCartney prevé añadir a lo menos otros quince grandes ésitos pa remanar un repertoriu con gran ‘tirón’ popular.

La venta d’entraes prosigue a bon ritmu, darréu que los siguidores del artista británicu conocieren hai unos díes que Paul McCartney quier facer del so primer recital en Xixón un estimable despliegue de medios técnicos p’asegurar un espectáculu con lletres mayúscules: El mayor escenariu que’l músicu emplegó hasta la fecha nes sos xires, pantalles xigantes a venti metros d’altor y efectos de pirotecnia.

Esi sedrá l’envoltoriu que’l públicu asturianu va atopase al acceder al estadiu d’El Molinón el prósimu martes 25 de mayu, fecha’l conciertu. El conteníu pondránlu la voz y los acordes d’un músicu qu’escoyó la península norteamericana de California pa preparar los sos recitales de Xixón y Madrid -y el restu de la xira europea- rodeáu del mayor secretu posible, según la productora qu’entama los espectáculos de McCartney n’Europa, Doctor Music.

Ye la primer ocasión en que’l que fora cabezaleru de Los Beatles xunta’l desapaecíu John Lennon actúa n’Asturies. L’añu pasáu, la ciudá de Barcelona centró’l pasu de Paul McCartney pol Estáu español na so xira europea.

Web de la productora’l conciertu

Noventa grupos d’estremaos xéneros musicales animarán el veranu xixonés con conciertos nes cais de la ciudá, dientro’l programa ‘Arte na cai’, que ta acabante pesllar el procesu de selección de bandes y solistes y cuyos conciertos empezarán a finales del mes de xunu pa prollongase nos dos meses siguientes, xunetu y agostu.

El programa municipal de conciertos al aire llibre, pioneru n’Asturies, ta entamáu pol teatru Xovellanos, que darréu fexo una criba de participantes tá negociando yá colos grupos les feches de les sos actuaciones y los cachés con qu’éstes tarán remuneraes.

Los escenarios d’esta edición sedrán los mesmos que n’ocasiones anteriores pero con una salvedá: Una entidá privada vinculada al puertu deportivu de Xixón pasa a xestionar los conciertos que van cellebrase nel entornu’l Muelle xixonés, los allugaos na vieya rula y nel espigón de les federaciones deportives.

El restu de tarimes tarán espardíes por céntricos llugares de pasu tales como la Plaza’l Parchís, la Plazuela San Miguel y los Xardinos de la Reina.

Contra les inclemencies del tiempu, una carpa de 70 metros de llargor. La Xunta pola Defensa de la Llingua Asturiana cellebra en Xixón los sos venti años de vida cola mesma reclamación cola que naciera: Esixir la oficialidá del idioma asturianu. Dixebra, Skontra, Skanda, La Bandina y Los Ciquitrinos pondrán el soníu nuna folixa regada con sidra de dos llagares premiaos pol so usu y promoción de la llingua asturiana.

Son los fabricantes de Sidra Choro, de Meres, y de Sidra Alonso, llagar allugáu en Nava, que resultaron galardonaos pola propia Xunta col Premiu Andrés Solar na so edición d’esti añu n’atención al so procuru col emplegu l’asturianu nel etiquetáu.

El conciertu, cuyu empiezu ta previstu pa les 19,30 hores de mañana, sábadu 8 de mayu, nel recintu del Muséu Etnográficu del Pueblu d’Asturies, contará amás cola participación de les bandes de gaites Llangréu y Xiranda y desendolcaráse enriba d’un escenariu de más de doce metros equipáu con una potencia de 50.000 vatios de lluz y soníu. El preciu d’entrada en taquilla ye de 3 euros.

La Xunta pola Defensa de la Llingua Asturiana sorraya la singularidá “emocional” del conciertu d’esti añu, tanto pola cellebración del vixésimu aniversariu de la organización como pola dedicatoria de la XXV Selmana de les Lletres Asturianes, que güei termina, al fallecíu escritor xixonés Andrés Solar, pioneru nel movimientu social que desembocó na creación de la Xunta.

L’asociación cultural Banda de Gaites Noega y el Teatru Xovellanos de Xixón tán acabante de convocar en comuña el II Concursu de Gaita de Xixón, que va cellebrase del 22 al 28 de xunetu na Plaza Mayor de Xixón y que repartirá casi 1.600 euros en premios.

El concursu, pensáu pa la modalidá de solista, ta empobináu a gaiteros que, como muncho, cumplan los dieciocho años d’edá a lo llargo de 2004. Esos participantes quedarán encuadraos na categoría xuvenil y optarán a un primer premiu de 600 euros, mientres que los gaiteros menores de quince años concursarán n’infantil y podrán algamar, si ganen, un reconocimientu de 300 euros.

El plazu d’inscripción -que pue formalizase en persona nel teatru Xovellanos o por corréu- tá abiertu y finará el prósimu 14 de xunu. Les eliminatories empezarán el 22 de xunetu con pieces de llibre elección, en tantu que na final requeriráse-yos a los participantes na categoría infantil qu’interpreten La Muñeira’l Gaiteru Lliberdón, y los xuveniles habrán tocar como obligada la Muñeira de Remis.

Cai una de les sales más actives nel ciruitu asturianu de música en directu. El llocal L’Antigua Estación, allugáu n’Uviéu, abandona la programación de conciertos depués de que sendes intervenciones policiales desaloxaren la sala hai agora una selmana, precipitando el fin de los recitales que se taben cellebrando. Baby Woodrose y The Punishers foron les últimes bandes en pasar pol malográu llocal uvieín.

Primer consecuencia de l’abandonu de la programación de música en vivo por parte de los responsables de L’Antigua Estación ye la suspensión del conciertu que’l grupu Mala Reputación tenía previsto ufrir nel llocal el prósimu sábadu y pal que yá taben a la venta les entraes. Eses llocalidaes sedrán canxeables agora nos puntos de venta pol so valor en metálicu.

L’Antigua Estación venía perfilándose como una de les sales asturianes más interesada na promoción de la música en directu, gracies a la iniciativa particular d’un grupu d’hosteleros con esperiencia na xestión y programación de conciertos.

La primer cantata en llingua asturiana yá ta rexistrada en soporte sonoru. La obra musical ‘Solar d’amor y arume verde’, compuesta por Carlos José Martínez y Xulio Ramos sobre testos del desapaecíu Andrés Solar, regresa a los escenarios tres de tar cuatro años escaecida nos caxones y sal a la venta la selmana qu’entra editada nun cd qu’inclúi el llibretu n’asturianu, castellán y inglés.

Con vixencia renovada por mor de la dedicatoria de la XXV Selmana de les Lletres Asturianes al malográu xixonés Andrés Solar, autor de los poemes qu’armen el testu, la cantata axuntará mañana enriba les tables del Teatru Xovellanos a más de mediu cientu de músicos pa da-yos vida a 63 minutos de música continuada.

Sedrá una “esplosión de señardá pa los que conocimos a Solar”, según el director de la Oficina de Política Llingüística del Principáu, Ramón d’Andrés, pero amás va constituyir “un regalu pa los oyíos y pal corazón”, en pallabres d’un de los compositores, Carlos José Martínez, que como él mesmu sorrayó nunca nun s’averara a los testos llitararios n’asturiano.

Eso sí, alvirtió Martínez, la cantata fuxe dafechu de tou tópicu posible, tanto asturianu como asturianista, y busca una plena universalidá que-y permita a un ciudadanu de cualquier país esfrutar de l’audición de la obra musical ensin parase a estremar la llingua na que ta compuesta. Nesa dancia na llende que separta la identidá del tópicu, la interreptación de ‘Solar d’amor y arume verde’ inclúi l’usu del gadañu y el cabruñu como instrumentu de percusión por primer vegada nuna obra sinfónico-coral d’estes característiques.

Eso sedrá na representación en directu. Pal públicu que quiera escuchar la versión d’estudiu tarán a disposición darréu unos 3.000 cedés a la venta cola grabación de la obra que se fexo na ilesia parroquial del barriu xixonés de Contrueces, y qu’implicó a artistes del Orfeón Xixonés, a dalgunos de los meyores intérpretes asturianos. El tenor José Ramón Alonso y la soprano Paula Lueje, amás del propiu Xulio Ramos, llevarán el pesu de la representación cantada, qu’inclúi recitativos como correspuende al xéneru.

Bones y males cifres. La Sociedá Xeneral d’Autores y Editores (SGAE) recaudó l’añu pasáu n’Asturies un 9,4 por cientu menos que en 2002 por mor de la piratería musical, que colocó unes 400.000 copies clandestines nel mercáu asturianu y llevó a Comisaría a casi un cientu de persones. Nel otru llau de la balanza, el teatru y la música en vivu contribuyeron a ameyorar la cuenta de resultaos xenerales de la Sociedá d’Autores.

Nesti sen, los artistes más taquilleros na estaya de la dramaturxa foron la compañía teatral d’Arturo Fernández y los cómicos arxentinos Les Luthiers, en tantu que los conciertos que más perres xeneraron foron los de Maná, Bruce Springsteen y los englobaos nel festival Derrame Rock, qu’esti añu treslládase de Llangréu a Pravia.

Nel contestu del Estáu, les descargues d’Internet siguen trayendo de cabeza a los responsables de la SGAE, que calculen que sólo l’añu pasáu realizáronse 200 millones d’elles, cola consecuente perda d’ingresu de drechos d’autor.

Paralelamente, la Sociedá d’Autores cifra en 17 millones el númberu de discos illegales que se vendieron nes ‘mantes’, frente a un total de 63 millones de discos orixinales vendíos.

Les dos bandes municipales de gaites uvieínes, la ‘Ciudad de Oviedo’ y la ‘Joven Banda Vetusta’, desplazaránse a Madrid el prósimu 22 de mayu pa tocar na boda real ente’l Príncipe Felipe y l’asturiana Letizia Ortiz. Nel enllace actuará tamién el Coru de la Fundación ‘Príncipe de Asturias’, que tien l’encargu de cantar nun actu posterior a la solemne ceremonia relixosa.

Según pudo afitar Asturnews.com, los miembros del coru recibieron yá la confirmación del viaxe por parte de’l so director, y nun actuarán nel trescursu de la cellebración relixosa, sinón nuna ceremonia posterior, con toa probabilidá nel ofrecimientu’l ramu que Letizia Ortiz fará énte la Virxe d’Atocha, una imaxe bizantina del sieglu VII. La dirección del Coru ta tramitando yá cola Casa Real l’acreditación de los sos miembros.

Na parte instrumental, la banda ‘Ciudad de Oviedo’ amenizará parte del ampliu programa d’actos previstos al rodiu de la boda real. Dirixida por José Manuel Fernández Gutiérrez, ‘Guti’, y Vicente Suárez, ‘el Pravianu’, la banda fai unes 80 actuaciones añales dende la so constitución, en payares de 1992, baxo’l nome ‘Asociación Agrupación Folklórico Musical Grupo de Gaitas Ciudad de Oviedo’.

La ‘Joven Banda Vetusta’, que tamién tien previsto viaxar a Madrid el 22 de mayu, ye la estaya infantil de la ‘Ciudad de Oviedo’ y orixinóse en 1997 por mor de la iniciativa personal del alcalde d’Uviéu, Gabino de Lorenzo.

El Coru de la Fundación ´Príncipe’ tien una esperiencia inda más dilatada: L’agrupación polifónica constituyóse nel añu 1983 y cuenta anguaño con un cientu de miembros.

Web de la Banda ‘Ciudad de Oviedo’

Los clásicos Barricada y los cántabros La Fuga tarán nel IX Derrame Rock, qu’esti añu abandona Llangréu y treslládase a Pravia. La novena edición del veteranu festival entamáu por Santo Grial Producciones, cuyu cartel inda ta por completar, cellebraráse nos primeros díes de xunetu prósimu nel recintu pravianu d’Agones, con un aforu aprosimáu pa 20.000 espectadores.

Dambes bandes tienen confirmáu el so viaxe al Derrame nes sos respectives páxines web, a la espera de qu’otros grupos vaigan completando la llista de los conciertos del festival, nacíu hai agora ocho años nel recintu ferial de Grao.

N’ediciones sucesives, el Derrame Rock pasó per Xixón, la sala La Real d’Uviéu y distintos allugamientos nel conceyu de Llangréu, qu’acoyó el festival a lo llargo de los últimos cuatro años. Pravia estrénase, poro, nel agospiu de la cita musical, gracies a un alcuerdu suscritu ente l’Ayuntamientu pravianu y los organizadores del certame.

Santo Grial tien editaos dos discos recopilatorios con participaciones de los artistes que pisaron los escenarios del Derrame nes últimes ediciones, ente los que figuren primeres figures del rock como Rosendo, Koma, Soziedad Alcoholika y Barón Rojo.