Música

A escasos metros del recintu ferial de les fiestes del Corpus de Ciañu, un públicu non tan numberosu como s’esperaba pero llamativu en ganes de vibrar colos sones amestaos del Festi Foru, les voces de l’asturiana Annabel Santiago, los afroparisinos Kekelé y los catalanes del mundu Macaco conxuráronse pa escamplar al Nuberu y ufiertar un conciertu cargáu de folixa y emociones. Remataba asina con ritmos que vienen de tolos llaos del mundu el II Foru Solidariu que debatió esta selmana en Llangréu alrodiu de la llucha contra la probitú y pol desarrollu de los pueblos.

La primera en saltar al escenariu foi Annabel Santiago cola so escelente banda al mandu de Michael Lee Wolfe, l’Asturiana Mining Company. Inda clareyaben les últimes lluces de la tarde ente les llones del entarimáu y el públicu inda nun yera mui abondante, sicasí l’actuación de la cantadora de tonada con alma de fadu y corazón de rock’n’roll foi una de les más impactantes y bien tresnaes del so proyectu musical pelos caminos fronterizos de l’asturianada. Annabel quema l’escenariu que pisa, failu pequeñu cola presencia de la so voz impresionante y después guárdalu en bolsu, enantes de meter tamién al públicu colos sos nuevos temes, cantares que van de la vaqueira al fadu, pasando pel blues, la vossa nova, el

bluegrass o el pop eléctricu de raigaños claros. Una actuación que supo a poco y dexó al públicu col miel nos llabios pero agradecíu.

Conga del país orixinal d’esti ritmu, el Congo del corazón d’África, ritmos pegadizos y voces que se mueven ente ellos cola mesma arte que los pies y les manes de los músicos del combu, esa ye la receta que los afroparisinos Kekelé tienen nes sos actuaciones en directu. Veteranos de la música congolana y precursores nel tiempu d’eso qu’agora se conoz como World Music, los de Kekelé saben como poner al públicu de la so parte a fuerza d’emburrialu a bailar. Sones de bongó afro pasaos per Europa y parientes de los ritmos calientes del otru llau del Atlánticu, los temes del conxuntu congolanu, tán fechos pa reafirmar la identidá d’unos raigaños enriba tola faz de la tierra, una identidá qu’invita a que toos participemos d’ella porque ye la d’esi país ensin fronteres nin banderes que llamamos música.

Los más esperaos de la nueche, ensin dulda, yeren Macaco, un terremotu multicultural y multiétnicu con epicentru na Catalunya amestada de primeros del sieglu XXI. A los que-yos gusta buscar aires de familia, pueden buscalos n’oyendo a los catalanes en Manu Chao o en Orishas. Macaco, sicasí, amosó col so directu una vez más que tienen la so propia personalidá y que nun-yos da más que los comparen con unos o con otros. Sones del Sur que ta nel Norte y del Norte que ta nel Sur, d’esti y del otru llau del mar, de tolos mares, latinos, africanos, hip-hop, samplers de djs, conseñes. El sueñu del monu llocu puestu nun escenariu y sonando con tola contundencia de la música que nació en cualquier parte. Un grupu, Macaco, que paez concebíu pa los sos directos, énte los que los sos discos esmorecen. Música vivo pa escuchar en vivo. El platu especial de la nueche que la mayoría del públicu congregáu nel recintu ferial de Ciañu allampiaba tola nueche y que ya la voz apabullante d’Annabel Santiago y los ritmos calientes de Kekelé s’encargaran de dir abriéndo-yos boca y más ganes de fartucase a gustu d’esti menú igüáu con músiques de tol mundu. Un pieslle folixeru al II Foru Solidariu qu’esti añu tuvo como sé el conceyu de Llangréu.

Los finlandeses The Flaming Sideburnes actúen esta nueche n’Uviéu na Sala Tribeca (enantes L’Antiguo)darréu de la so última visita al estáu en 2002. La banda escandinava vien pa presentar los temes del so últimu trabayu discográficu: “Sky Pilots” y una parte curiosa del repertoriu inconfundible que vienen trabayando nos sos diez años d’esistencia nel panorama européu del rock’n’roll de raigaños piscodélicos y garaxe-punk.

Emparentaos cola alcordanza del rock’n’roll mas suciu y fuerte, dende Link Wray y los Sonics a los Stooges y los New Cork Dolls, los Flaming Sideburns nacieron en Finlandia en 1995 cola modesta misión de ‘’salvar el R’n’R’’ n’Escandinavia. Yeren cinco fans fatales del garaxe-punk que tocaran en diversos grupos enantes de xuntase en los Flaming: el guitarrista Ski Williamson (aka Jukka Suksi) en Isebel’s Pain, el so collaciu Jeffrey Lee Burns en Teenage Kicks; y los dos xuntos en Bomber. El bateria Jay Burnside tuviera con The Lowdown Shakin’ Chills, The Unhinged, y The Kowalskis, mientres el cantante Eduardo “Speedo” Martinez y el baxista The Punisher pasaben per Jack Meatbeat & the Underground Society.

Tres diversos avatare, nel añu 2000 vio la lluz ‘’it’s time to testify, brothers and sisters’’, el so primer álbum, nel sellu danés Bad Afro, editáu en vinilu picture disc ente nós por Safety Pin Records. Dende entós pasaron ya tres vegaes pel esáu con notable ésitu de critica y publicu. Editáu nel 2001 el su segundu álbum, consideráu por gran parte de la critica y publico como meyor discu del añu, el mui aclamáu ‘’ Hallelujah Rock ‘n’ Rollah’’, y, ya nel 2003, el so mas recién álbum ‘’Sky Pilots’’, toa una esplosión de rock psicodélicu del nivel de los Soundtrack of our Lives. Esta nueche hai ocasión de velos en directu n’Uviéu. El preciu de la entrada: 13 euros anticipao y 15 en taquiella.

El II Foru Solidariu d’Asturies, qu’a lo llargo d’esta selmana lleva debatiendo alrodiu de la llucha contra la probitú en mundu y les polítiques de desarrollu, va poner el so pieslle esti viernes 10 con un festival multicultural en Ciañu nel qu’actúen l’asturiana Annabel Santiago, los afroparisinos Kekele y el catalán Macaco. El Foru continua güei con un debate sobre “Muyer y probitú” nel que van intervenir d’Ana Falú, directora rexonal de la oficina d’UNIFEM pal Brasil y los países del Conu Sur, y Aquilina Fueyo, decana de la facultá de Ciencies de la Educación d’Uviéu.

L’últimu de los debates d’estes xornaes dedicaes a reflexonar sobre la llucha contra la probitú y pol desarrollu va celebrase esti xueves 9 a les 19.30 na Casa la Cultura de La Felguera. En xornaes anteriores debatiérase dientro del Foru Solidariu a propósitu d’otros asuntos como los Oxetivos de Desarrollu del Mileniu y llucha contra la probitú y el Comerciu Xustu como calce de Cooperación al Desarrollu.

La última xornada del II Foru Solidariu va ser eminentemente festiva, ensin escaecer el so calter d’amuesa en vivo de la diversidá cultural y musical del mundu como gritu contra l’uniformismu de la globalización. La cita ye nel recintu ferial de Ciañu, en Llangréu, que va abrise a les 19.30 y nel que la compañía de teatru Nun Tris, dirá abriendo boca pal conciertu con un espectáculu de cai.

A les 21.30 Annabel Santiago y l’Asturiana Mining Company saldrán al escenariu pa amosar en directo les virtúes provechoses de fusionar la voz apabullante de la cantadora de tonada colos sones del fadu, el blues y otres músiques del

alma. Ye una ocasión pa ver en vivo a la voz más importante y premiada de la tonada asturiana nel nuevu proyectu de fusión, mestizaxe y cruce de estilos ya influencies, nel que ta embarcada, col apoyu de músicos como Michael Lee Wolfe, nes guitarres y dobro;María Álvarez, al curdión; Antón Ceballos, baxo; y Manuel Cordero y Sergio García, en percusiones.

Darréu d’Annabel, tóca-yos el turnu a Kekele, afroparisinos, una formación mítica dientro la rumba congolana. La referencia lexendaria d’un estilu únicu, nel que les voces, les guitarres y les influencies de la música llatina mécense col raigañu africanu. Kekelé constitúin una de les referencies fundamentales de la meyor World music internacional.

Pieslla’l conciertu Macaco, el grupu más internacional y mestizu de la revolución musical independiente nel estáu. Ritmos de hip hop, funk, soul, y mucho groove afro-latino. El so últimu discu, “Entre raíces y antenas” (Mundo Zurdo-Emi, 04) ye un apasionante viaxe d’ida y vuelta hacia’l presente, el pasáu y el futuru de les músiques con raigón.

Ismael María González Arias, escritor y estudiosu de la música popular del país, acaba de publicar el volume “Cronoloxía de la música asturiana”(Ámbitu, 2005), una obra de consulta práctica cola que’l so autor tenta dir completando un trabayu abiertu y en marcha alrodiu de la hestoria musical d’Asturies, na que la tonada ye’l filu conductor. Esta tarde preséntase en Fnac el llibru del estudiosu teberganu, una obra cola que González Arias tenta recordar “que la música asturiana nun ye cosa del otru día nin empezó va venti años, remóntase como toles músiques populares europees, polo menos mil años atrás”.

La cronoloxía desenvuelta nesta obra pon la so data d’empiezu nel sieglu IX cola apaición nuna pintura de la ilesia prerrománica de San Miguel de Lliñu d’un instrumentu de cuerda, una referencia non casual, como desplica l’autor: “Si reparamos pa cualquier d’eses ilesies del prerrománicu tal como les conocemos güei nun nos resulta mui difícil figuranos cómo había ser la música de va mil años, non tan distinta a la que llegó hasta nós”. El siguiente datu conseñáu na so obra ye el “Antifonario” de Lleón del sieglu X nel qu’apaecen rexistraos grandes melismes, un rescamplu de lo que milenta años después ye la tonada actual: “La nuestra tonada relaciónase con toles formes de cantu llibre esistentes n’Europa, d’oriente a occidente y del norte al sur, ende tien los sos oríxenes, cantos llibres que tienen una gran asemeyanza ente ellos seyan de Turquía, l’Auvernia, Bulgaria, Bretaña o el noroeste peninsular y que nel nuestru casu, nel casu de la tonada, lleguen con eses formes hasta la segunda mitá del sieglu XIX, hasta que músicos y compositores clásicos los remanecen y tresformen nes pieces del repertoriu actual de la tonada”.

Un de los propósitos de la obra d’Ismael González Arias ye arroxar lluz colos datos conseñaos sobro’l verdaderu orixe de la música llamada popular y que nun ye otru “que nel llabor d’autores y músicos con formación pa los que los sones de la tradición popular incorpórense a la so obra, nun importa que na mayoría los casos seya anónima -que lo acostuma a ser- y ellos refáenlos pa componer munches d’eses melodíes, que como ocurre na época contemporánea, la xente cuenta por netamente populares, salíes espontaneamente del propiu pueblu”. L’aportación más singular y significativa que se produxo nesi campu na música asturiana ye pa González Arias “sin duda la tonada actual, dalgo que naz cuando autores y compositores clásicos, influíos polos nacionalismos musicales europeos, deciden buscar nes fontes de la tradición popular y adaptar eses pieces, buscando a los meyores cantadores pa que les interpreten y el resultáu ye dalgo que recuerda a los lieder alemanes, nos que s’inspiren estos músicos”. Esi ye’l llabor de músicos como Víctor Sanz, Manuel del Fresno o el mesmu Eduardo Martínez Torner: “Alcuando dizse que fueron ellos los que deprendieron a cantar a los grandes de la época clásica de la tonada

y nun ye asina, ellos namás los ayudaron a perfeccionar la so manera de cantar con técniques pa que pudieran subir a determinaes notes, por exemplu, pero’l potencial de les sos voces yera evidente y ende ta la influencia que dexaron nel tiempu”.

L’autor de “Cronoloxía de la música asturiana” quier qu’esta obra valga “lo mesmo pa recordar que nos capiteles románicos apaecen constantemente toa clase d’instrumentos que se tocaben neses mesmes dómines n’Asturies como que la primer banda de gaites creóse nos años ochenta, qu’hasta entós nunca les hubiera como tales”. Respective a la utilidá práctica del volume, González Arias afirma que “prestábame que fuere ún d’esos llibros qu’ofienden al que los llee porque de sópitu esa persona dase cuenta que falta dalgún datu imprescindible que se-y escapó al autor y si m’escribe indignáu pa echámelo en cara, ya me presta porque m’acababa d’apurrir un datu que desconocía, nesi sen ye una obra onde de xuro hai más ausencies que presencies, por eso ye una obra abierta, que habrá dir completando en nueves entregues como ya fice con anteriores llibros y amás la hestoria de la música asturiana tamién ye una hestoria abierta, de lo que suceda nos prósimos años o nel futuru, inda poco somos a barruntar”.Tocante a cómo imaxina l’autor de la “Cronoloxía” esi futuru pa la nuestra música afirma que “seguramente cada vez se va dir asemeyando más a toles otres músiques del mundu, como ya ta ocurriendo dende va tiempu en tolos países, hai unes músiques qu’influin más qu’otres, como ye’l casu del nuevu flamencu, por exemplu en músiques qu’aparentemente nun tienen muncha relación con él”, pa González Arias “güei más que nunca cúmplese l’anuncia de Bob Dylan de que los tiempos tan cambiando, los del folk contemporáneu cambiaron cuando él enchufó la guitarra eléctrica y dio empiezu a nueves formes de música popular en tol mundu, pa l’asturiana igual esi momentu nun-y llegó o sí y nun lu fuimos a valorar cuando sucedió”, afirma l’autor d’esta obra que va presentase güei a les 19,30 nel Fnac de Sieru.

Xixón ye’l llugar escoyíu pola organización del Festival Asturies Rock pa la so segunda atopada qu’empieza na tarde d’esti viernes 3 y va siguir a lo llargo de la tarde-nueche del sábadu 4 na Sala Álbeniz. Ocho bandes d’estremaes opciones musicales que tienen en común la preferencia polos soníos fuertes del rock’n’roll y el tocar dende Asturies salvando les llendes. L’apoyu a les bandes del país ye un de los motivos que ficieron surdir esti festival qu’agora cumple la so segunda edición.

El menú del II Festival Asturies Rock inclúi na so sesión d’esti viernes les actuaciones de Xplainit, The Punishers, Electric Funeral y Ermitaños del Río. La hora de la cita, a les 18.00 hores pa en delantre, y el sitiu, la Sala Albéniz de Xixón. El programa del sábadu 4, empieza a la mesma hora y ufierta nesta segunda sesión a otres cuatro bandes asturianes: Aprieta’l Kulo, S.t.i.g.m.a.t.a., Skontra y Amon Ra. El mesmu sábadu pela nueche va celebrase una fiesta de pieslle del festival nel bar El Duende de Cimavilla a partir de la medianueche.

Amás de les actuaciones de les ocho bandes a lo llargo de los dos díes van poder vese nel escenariu de la Sala Albéniz eshibiciones de Capoeira y perfomances teatrales. Los precios de les entraes del festival son de 3 euros pa la sesión de cada día y 5 euros el bonu pa el viernes y el sábadu. La organización considera esta entrada, de preciu cásique simbólicu, un donativu pa l’asociación cultural Asturies Rock, un colectivu nacíu pa fomentar y apoyar a los grupos que desenvuelven el so llabor nel nuestru país. El mesmu festival ta concebíu como una manera de potenciar el trabayu de les bandes asturianes y dalu a conocer tamién al públicu interesáu que pueda venir de fuera a participar de l’atopada. La primer edición celebróse l’añu pasáu en Pravia cola participación de catorce grupos, agora la organización escueye la ciudá playa como la sé del II Festival Asturies Rock y una sala con acústica y sona acreditada como ye l’Albéniz. El cartelu d’esta segunda atopada medra tamién en calidá y interés al ufiertar la posibilidá de ver en directo a bandes tan contundentes como The Punishers, S.t.i.g.m.a.t.a o Ermitaños del Río, xunta el punk-ska n’asturianu y con tastu a tierra brava de los imprevisibles Skontra. Un cartelu curiosu al que s’añede la presencia de grupos igual de gustosos pa ver en directo: Xplaintit, Electic Funeral, Aprieta’l Kulo y Amon Ra.

El discu col que se dieron a conocer Ilegales ta a puntu de salir reeditáu nuna grabación qu’inclúi nueves pieces adicionales al orixinal y la remasterización de tolos temes. La salida d’esta reedición coincide nel tiempu col entamu d’una nueva xira del grupu de Jórge Martínez qu’emprima con dos conciertos na sala Sol de Madrid los prósimos díes 3 y 4 de xunu. El sellu La Casa del Misterio, qu’empobina el cabezaleru de Ilegales, va rescatar tamién los dos siguientes discos que publicara’l grupu: “Agotados de esperar el fin” y “Todos están muertos”.

La fecha pa la salida al mercáu del primer álbum de Ilegales nuna reedición especial va ser “en breve”, talo anuncia’l propiu sellu La Casa del Misteriu. Esti primer trabayu -güei una rareza- titulóse orixinalmente col nombe del grupu, simplemente “Ilegales”, inda munchos conócenlu como “Tiempos Nuevos, Tiempos Salvajes”. Foi un álbum con una hestoria movida dende la so grabación en 1982 y pasó per diversas discográfiques y ediciones: Hi-Fi Electrónica (1982), La Sociedad Fonográfica Asturiana (1983) y CBS-Epic (1984). Una carrera axetreada paralela a la del grupu, que nesos mesmos años pasó, talo remembra La Casa del Misterio: “de la semi-clandestinidá a la fama”. Aparte del repertoriu orixinal remasterizáu nel estudiu pola mano del propiu Jorge Ilegal, inclúinse cinco temes adicionales y va ser la primer reedición d’una serie na que van publicase tamién los álbumes, “Agotados de esperar el fin” y “Todos están muertos”, tamién con nuevos conteníos adicionales a la grabación orixinal.

Ilegales anunció la reedición de los sos primeros álbumes cuando ta a puntu d’emprimar una nueva xira de conciertos. La primer cita va ser los prósimos viernes 3 y sábadu 4 na sala Sol de Madrid, dos actuaciones nuna plaza onde la banda de Jorge Martínez acostuma a tocar en doble sesión pa la numberosa parroquia de fieles que tienen na capital. El siguiente conciertu va ser el 17 de xunu na sala Salamandra de Barcelona.

R.E.M. dio ayer en Xixón l’últimu conciertu del so periplu peninsular, enantes de siguir camín per Europa na xira “Around the Sun”. Un escenariu sobriu, dos pantalles de manual con imáxenes del conciertu a ritmu de clip y un repertoriu aptu pa tolos públicos, con guiños constantes a lo qu’esperaben los más incondicionales de la banda norteamericana, fueron les claves pa que Les Mestes vibraren dos hores llargues que supieron a poco. A la fin, nos bises, nun faltó’l detalle local, con Michael Stipe sudanndo la camiseta del centenariu del Sporting.

Depués d’una tarde duldosa n’echar agua y cuando paecía que nin el Nuberu quería perder el conciertu de R.E.M. los primeros acordies de la banda de Stipe nel escenariu de Les Mestes valieron pa escamplar los nublayones y dexar la nueche abocanada de la enerxía matemática del grupu. “Outsiders”, un de los temes del so

últimu discu: “Around the Sun”, abrió la sesión pa siguir con un tema abondo más conocíu polos sos fieles: “¿What’s the frecuency, Kenneth?”. A lo llargo de les dos hores cundíes que los d’Athens tuvieron enriba les tables los temes clásicos: “The onde I love”, “Imitation of Life”, “Everybody hurts” o “Losing my religion” fueron alternando con delles de les canciones de los sos últimos discos. A la fin, l’últimu bis, acabante salir Michael Stipe cola camiseta del escenariu del Sporting, el remate col tema que vien cerrando tolos conciertos de R.E.M. nesta xira, otru clásicu cola meyor carga enerxética de los americanos: “The Man of the Moon”.

Nel conciertu nun faltaron les referencies a dalgunes de les causes que sofita el grupu d’Athens, amás de la de siguir creyendo na música ensin aditivos y en constante evolución colos tiempos: la intervención bélica de los Estos Uníos n’Irak o la llucha polos derechos humanos d’Amnistía Internacional, de la que fizo publicidá Stipe apuntando pal casetu instaláu pola organización humanitaria nel recintu l’actuación. Canciones rotundes, curtaes a escuadra y midíes hasta nos sos momentos más emocionantes, con un soníu impecable, y bones dosis d’honestidá enriba les tables, ensin concesiones al esparabán de baldre, sigue siendo la receta de los directos de R.E.M., como lo amosaron esta nueche en Xixón. Mitos vivientes del rock alternativu de los ochenta, amosaron tamién que nun-yos caen los aniellos por alcordase nel escenariu, como fexo Michael Stipe, de los sos teloneros: “Fábula”, un grupín que pasó enantes d’ellos como esi platucu de canapés ensin muncha sustancia que ponen en dellos restaurantes pa facer naguar polo que va venir después. En resultancia, dos hores cundíes de lo meyor de R.E.M. que supieron a poco y a la vez dexaron fartucos a les casi dieciseismil almes vivientes que se xuntaron nel hipódromu de Les Mestes, nel que foi el conciertu del añu n’Asturies.

Galería con toles semeyes del conciertu

Micah P.Hinson actúa esta tarde nel salón d’actos de Caxastur n’Uviéu dientro del ciclu de conciertos d’Intersecciones. Nacíu en Texas va malpenes ventitrés años, dende la publicación del so primer y únicu discu hasta la fecha: “The Gospel of Progress”(2004)por un sellu pequeñu británicu el boca-oreya primero y darréu la crítica especializada internacional tienen celebrao la calidá de les sos canciones, asina como d’una personalidá artística que lu emparenta colo meyor de la tradición de los song-writter americanos.

Hinson ye a los sos 23 años toa una llienda ya de la música d’autor nos Estaos Uníos, portador d’una voz bien personal y suxestiva, amosó nel so discu “The Gospel of Progress” la so capacidá pa escribir cantares esféricos, balaes escures que cuenten hestories de perdedores y díes rotos, de la eterna otra cara del sueñu d’América. La llienda acostina con ella dende bien mozu: nacíu nun pueblín de Texas, marchó de neñu cola so familia -un casu de familia americana desestructurada- dica Memphis y siendo malpenes un rapazacu dexó’l llar pa enveredar vida de vagamundu. El descubrimientu de la música y les sos primeres actuaciones en públicu sucéden-y cuando inda nun cumpliera la mayoría d’edá llegal. Dende entós el so camín como cantante y compositor nun fexo más qu’enanchase y allongase hasta afitase como un de los músicos más particulares del panorama independiente americanu.

En 2004 treslladóse a Europa pa grabar con un minoritariu sellu de Manchester el so primer discu: “Micah P. Hinson & The Gospel of Progress”,

un trabayu que bien lluego empezó a difundise como discu de cultu y al que la crítica especializada del Reinu Uníu, USA y otros países acoyeron como la obra d’un artista dignu de tener en cuenta, una amuesa de que la música americana del sieglu XXI siguía fiel a la so meyor tradición de crooners cuntadores d’hestories. Anguaño, mientres fai les Europes na xira que lu averó a la península ibérica y qu’esta tarde va empobinalu hasta Uviéu, Hinson ta a piques d’editar ente xunu y xunetu el so segundu discu: “The Baybe and the Satellite”, un trabayu nel qu’axunta temes vieyos, anteriores a los que recueye nel so emponderáu “The Gospel of Progress”. La cita asturiana con esti mozu con pasáu de perdedor que canta hestories de perdedores ye a les 20.00 hores nel centru cultural de Caxastur n’Uviéu, una ocasión única de comprebar en vivo si tolos críticos del mundu tan ciertos o s’enquivoquen al upar a la categoría de míticu a un puntu, del que nun cueye duldar a lo menos la so singularidá, y que vien de la estirpe familiar, pela vía del vagabundiaxe peles tierres de naide, de los Dylan, Young, Oldham.

El conciertu de R.E.M. en Xixón el prósimu domingu 29 de mayu puede ser el primeru en númberu d’espectadores si se cumplen les previsiones del Teatru Xovellanos, organizador del eventu. Según ficieron saber esta mañana los organizadores hasta’l día d’ayer llevábense vendíes 13.500 entraes de les 15.000 puestes a la vienda. Como datu d’interés súpose tamién que se adquieron localidaes pal conciertu en toles comunidaes del estáu, con gallegos, vascos y castellanos a la cabeza de la xente que va venir dende fuera Asturies a ver a R.E.M. na so cita de Les Mestes.

El tirón del míticu grupu de Michael Stipe, Mike Mills y Peter Buck paez un fechu constatable n’Asturies, onde van ufiertar con toa probabilidad el so conciertu más multitudinariu del so pasu pel estáu. Ayer pela nueche los estaounidenses actuaben en Granada énte un aforu de nueve mil espectadores nel que yera la so primer actuación de la so xira per Europa. Na ciudá andaluza nun enllenaron l’estadiu de Los Cármenes

inda si convencieron al fiel y entusiasta públicu que namás echó de menos dellos de los temes más clásicos del repertoriu de R.E.M.

Si el conxuntu americanu repitiere en Xixón el repertoriu del conciertu ufiertáu ayer en Granada el menú de canciones entamaría con “Leave” y había poner el puntu final con otru tema míticu: “Man on the Moon”. Nun paez probable qu’esto ocurra y el conxuntu d’Athens repita menú en Xixón. Stipe afirmaba na presentación de la so xira europea pa presentar el so últimu trabayu discográficu “Around the Sun” que’l grupu raramente repite les mesmes canciones nin el mesmu orde d’interpretales y que-yos prestaba escoyer los temes el mesmu día del conciertu. Nesi sen l’actuación de Les Mestes puede ser una caxa de sorpreses na que lo único más o menos seguro ye que la guinda postera van ponela col so clásicu “Man on the Moon”, como ficieron en Granada y nos conciertos del so anterior pasu per Europa en xineru.

El montaxe desenvueltu en Granada presentaba un curiáu aparataxe de lluces y pantalles puestu n’acción nun escenariu diseñáu especialmente pa la so xira europea pola francesa Susanne Sasic. La enerxía desplegada pol grupu de Michael Stipe nun descayó en nengún momentu a lo llargo de les más de dos hores d’actuación qu’ufiertaron nel estadiu granaín de Los Cármenes. Dalgo asina o meyor ye lo qu’esperen los quince mil espectadores que van corrompinar l’hipódromu de Les Mestes de Xixón el prósimu domingu nel que ye’l primer macroconciertu del veranu n’Asturies.

Nun se cumplen los cincuenta tolos díes. Por eso la fiesta tenía que ser especial y por eso nun faltó naide al convite. Amigos, compañeros y vecinos llegaos de toles partes d’Asturies cantaron-y anueche’l cumpleaños feliz al cantante entreguín, recientemente galardonáu nos premios de la SGAE. Un Chus Pedro emocionáu salió al escenariu pa presentar el discu “De Ñublu y Orpín”, que foi coreáu por tolos presentes ente aplausos y afalagos. “Vosotros sois los protagonistes d’esta celebración. Gracies por venir.” Con estes palabres entamaba un conciertu emocionante, nel que nun faltaron tampoco dalgunos de los temes más conocíos de Nuberu, como “Tengo de rondar to valle”, “Chalaneru” o “Aida la Fuente”.

Y como Nuberu ye parte fundamental na so vida, nun podía faltar la otra mitá nel escenariu nun día tan especial. Bromiando sobre’l mediu añu d’edá que-y saca, Chus Pedro invitó a Manolo Blanco Peñayos al escenariu pa tocar xuntos. El públicu, completamente entregáu dende que s’apagaron les primeres lluces y empezaron a sonar los acordes de “L’amante xana”, ovacionó a los sos vecinos más populares. Xunta ellos, y acompañándolu nel recorríu pelos temes del so últimu discu, dalgunos de los meyores músicos del panomara asturianu d’anguaño. Gabino Antuña, coautor del cantar galardonáu, dirixía dende los teclaos una banda que sorprendió a tolos prensentes. Nella taben amigos y compañeros de tola vida: Julio Sánchez Andrade, Tom Prendes, Pedro Pangua, Alberto García, Eva, y Nacho.

El conciertu que duró casi dos hores nun defraudó a naide. Les cuatrocietes persones que llenaben el teatru de L’Entregu, y les que quedaron fuera por falta d’aforu, corearon les canciones d’un discu nel que Gabino Antuña y Chus Pedro recopilaron y adaptaron canciones tradicionales asturianes, como “Agora sal a baillar”, cola que fueron premiaos recientemente. Tampoco nun faltó l’homenaxe a Sergio Domingo, el recuerdu nel aniversariu de Torner y les palabres cariñoses pal gaiteru Manolo Quirós. Mesmo qu’una tarta cola que nun cuntaba y cola que tol mundu quixo celebrar el mediu sieglu de vida que fai güei ún de los cantantes más importantes de la música asturiana. El conciertu terminó con tol públicu puestu de pies, aplaudiendo durante varios minutos a un emocionáu Chus Pedro que, cuando dalguién-y gritó dende’l fondu “yes el meyor”, respondió riéndose: “eso cuando sea mayor”.