Música

Les demandes de solicitúes pa participar na Escuela Internacional de Música de Veranu qu’organiza la Fundación Príncipe d’Asturies superaron les espectatives de la institución y les places pa les especialidaes de cantu y viola esgotáronse a dos selmanes pa qu’acabe’l plazu d’inscripción. En total presentáronse más de doscientes solicitúes con alumnos procedentes de tol estáu y de diversos países europeos.

L’interés suscitáu nesta décima edición de la Escuela Internacional de la Fundación Príncipe d’Asturies, tuvo una especial repercusión nos cursos de cantu y viola, que van impartir, respectivamente, Ana Luisa Chova, profesora del Conservatoriu de Valencia y Premiu Ópera Actual 2004 pol so maxisteriu na enseñanza de la lírica, y el prestixosu catederalgu de viola del Real Conservatoriu Superior de Música de Madrid, Alan Kovacs.

La cantidá de solicitúes desbordó los cupos de inscripción pa estos cursos, polo que va ser necesaria una audición ente tolos alumnos que solicitaran plaza hasta completar l’aforu. Asinameso la demanda de inscriciones pa los cursos de cuerda ta siendo igual d’altu.

Les clases de la Escuela Internacional van impartiles un ventiocho profesores procedentes de Moldavia, Italia, Ucrania, Israel, China, Armenia, Francia, Arxentina, Rusia y España. Les clases celebraránse nel Conservatoriu Superior de Música “Eduardo Martínez Torner” d’Uviéu ente los díes 27 de xunetu y 7 d’agostu, embaxo la dirección artística de Yuri Nasushkin (Kiev, Ucrania), profesor del Conservatoriu Superior d’Asturies y director de la Joven Orquesta Sinfónica del Principado (JOSPA).

El curso abarca tola partitura orquestal, dende la flauta al contrabaxo, amás de repertoriu y cantu. Los alumnos van poder poner en práctica los sos conocimientos con varios conciertos que se van celebrar nel Auditoriu d’Uviéu y nos centros culturales de Caxastur en distintes localidaes asturianes. Amás, la Escuela continuará cola ya tradicional programación de Música na cai, en sitios emblemáticos d’Uviéu.

La xira de presentación del Crosroad Festival escomienza mañana en Barcelona cola actuación na Sala Bikini de Royal Crown Revue, la banda que’l macrofestival va llevar per varies ciudaes del estáu nos prósimos díes pa promocionar l’eventu. Xixón va ser una d’eses ciudaes onde los RCR espansionen el so swing de bona raza. Va ser el prósimu domingu 10 nel escenariu central de la Selmana Negra. Amás de Barcelona y Xixón, la xira del Crossroad va pasar per Zaragoza, Bilbao y Madrid.

Mientres la organización del festival ultima los preparativos pa que too tea a puntu el 21 de xunetu, día d’empiezu de l’atopada, los Royal Crown Revue, una banda señera del rock’n’roll americanu más xenuín échense a la carretera p’asoleyar el cartel del Crossroad per cinco ciudaes del estáu, incluída Xixón el llugar onde se van celebrar los cuatro

díes de conciertos.

Little Richard, Willie Deville, Los Lobos, Presidents of the USA, El Vez y The Blasters encabecen el cartelu que va acompañar a los RCR na xira de promoción del festival a malpenes dos selmanes del so escomienzu. Otros nomes con una estela non menos fulgurante d’autenticidá van arrodiar a les cabeceres d’esi cartel que va traer a Asturies los sones de Blues Explosion, Lee Rocker, Colim James, Super Ratones y The A-Bones, ente otros.

Los bonos p’asistir a varies xornaes del festival siguen a la vienda y los qu’inda nun los pudieran algamar tovía tienen ocasión de consiguilo al preciu que tienen nesti mes de xunetu: 75 euros por tres díes y 88 poles cuatro xornaes del Crossroad.

Crossroad Festival

Después de tres díes de sesiones intenses con ritmos de toles procedences y predominiu de los enerxéticos, el festival Derrame Rock echa na nueche d’esti domingu el toldu hasta l’añu qu’entra. Más de quince mil persones pasaron estos díes pel Derrame, según los cálculos fechos pola organización. Güei como despidida d’honor: Los Berrones, Banda Bassoti y Mago de Oz.

La última xornada escomienza nel escenariu Sol a les 13.30 cola actuación de Null System, a los que van siguir Stro, los cangueses Hermitaños del Río y Adgar. A les 18.00 lléga-yos el turnu a Transfer, darréu Despistados y pa finar, unos clásicos del Derrame, la banda de Tolivia Los Berrones.

Nel escenariu San Miguel la fiesta entama a les 13.00 con Efecto Parra, Pez Payaso, Dogfaith, My Stereo y No Apto. A les

19.00 actúa Mamá Ladilla. El turnu pa la Banda Bassotti llega a les 21.00 y la despidida con Mago d’Oz a les 24.30.

Dientro de la programación de debate y reflexón Derramidea güei hai un espaciu pa aldericar alrodiu de “Música y piratería” cola presencia de Manuel de Benito (SGAE), el locutor Mariscal Romero, los músicos Rafa Kas y Jorge Martínez, Juan Villadangos de Tiendas Tipo, Sandra Serrano de Sol Música y Diego Martínez Pérez de Music for us. A les 23.30, nel escenariu San Miguel la compañía Margen va poner n’escena l’espectáculu “War!”.

Les primeres hores de les sesiones musicales del Derrame van tar dedicaes a actuaciones de los grupos finalistes del concursu de maquetes Principáu d’Asturies qu’entamen la Cadena 40 Principales y l’Institutu la Mocedá d’Asturies, una fase eliminatoria de la que habrá salir el ganador del certame.

Tres el pasu nada inadvertíu pelos escenarios del Derrame Rock del descaru de La Mala Rodríguez, la raza d’Orishas y el realcuentru de los fans siempre fieles de Dixebra, el macrofestival llega güei al so Ecuador ensin baxar mediu grau de temperatura ambiente. Sesión de sones amecigayaos y rock de la vieya escuela radical nel escenariu San Miguel con Albertucho, Skalariak, El Bicho y Reincidentes. Nel escenariu Música Sol, doble ración de gamberrería iconoclasta con O’funk’illo y Def Con Dos.

Los amigos de madrugar tienen a les 13.30 l’empiezu de la segunda xornada del Derrame con Sabandijas nel escenariu con nome de marca de cerveza. Van siguilos nel mesmu sitiu Albertucho, Vacazul y los vascos Skalariak. Los inclasificables El Bicho, los veteranos del rock cañeru del país Fé de Ratas y como traca final Reincidentes.

Nel escenariu que patrocina asoleyando’l so nome una cadena televisiva

musical la sesión escomienza a les 14.15 con Discordia. Darréu Síncope, Hora Zulú y EUKZ. Rage apaez a media tarde y cierren la nueche dos estrelles nada fugaces: O’funk’illo y Def Con Dos.

De metanes les actuaciones d’esta segunda xornada, non aptes pa cardiacos sensibles, siguen desenvolviéndose les actividaes de la parte del festival dedicada a la reflexón y a la mirada sobre la memoria hestórica. Güei los protagonistes son los supervivientes de los campos d’esterminiu nazis, con un testimoniu directu d’Ángelita Andrada (Amical Mauthaussen) y el gabitu del periodista Xuan Cándamo. De siguío videoforum cola proyección del documental “Vascos esclavos del III Reich”, una producción d’Euskal Telebista y Canal d’Hestoria, sobre los prisioneros fuxíos del frente republicanu d’Euslherria caíos nos campos nazis.

Mañana, últimu día del Derrame Rock, nun escenariu la presencia de Transfer y los ya clásicos nel festival Berrones. Nel otru escenariu les brigaes coloraes de la Banda Bassotti y Mago de Oz.

Derrame Rock ’05

El festival Derrame Rock escomienza güei en Pravia con un menú del día non aptu pa les dietes musicales baxes en caloríes. La Mala Rodríguez , Orishas y la Pulquería como platos fuertes nun de los escenarios; nel otru, Dixebra, Boikot, Gatilazo y Skikoo –que sustitúin a A.N.I.M.A.L después de la so caída del cartelu por causes ayenes a la organización. Entrambos escenarios tienen el comederu abiertu dende’l mediudía y nun van parar de servir cebera hasta onde la madrugada mande. Dende esti meudía hasta les últimes hores de la nueche del domingu 3, el recintu d’Agones va convertir Pravia nel puntu más caliente d’Asturies.

La fiesta principia a les 13.30 nel escenariu San Miguel cola actuación de Human, al que van siguir Skund DF, a les 15.30 y los veteranísimos Ñu a les 17.30; Dixebra llega a les 19.30, Boikot a les 21.45 y Gatillazo a les 24.30; Skizzo son los encargaos de pesllar la romería alrodiu de les 3.30 nesti escenariu pa los amigos del rock más enerxéticu.

Los primeros n’actuar nel otru escenariu, el de Sol Música, son Los Reconoces, a les 14.30; síguelos Savia a les 16.30 y darréu Eskorzo a les 18.30. La Pulquería tienen anunciada la so actuación pa les 20.30; Orishas a les 23.00 y La Mala

a les 2.00 de la mañana. Habeas Corpus echa’l toldo al macrofestival nel so primer día alrodiu de les 4.15 de la madrugada.

Amás del menú musical, Derrame Rock ufierta pa güei y dientro de les actividaes programaes en colaboración cola Fundación Muñiz Zapico y y el Conseyu de la Mocedá d’Asturies, un homenaxe alcuentru con veteranos lluchadores de la guerrilla antifranquista y la proyección del documental “Maquis”, producíu por Canal de Historia. Inaugúrense tamién güei dientro’l recintu del festival les esposiciones “Diez años de Derrame” y “El Ché Guevara n’España”.

Los platos fuertes pa mañana sábadu son El Bicho y Reincidentes, nel escenariu San Miguel y O’Funkillo y Def Con Dos nel escenariu de Sol Música. El domingu llegara-yos el turnu a Transfer, Los Berrones, Banda Bassotti y Mago de Oz. Xunta ellos una docena y media más de grupos preparaos pa nun dexar indiferente a nadie.

La organización tien instalada una zona d’acampada alrodiu’l recintu del festival y hai diverses llinies d’autobuses especiales y organizaos que lleven hasta Agones. Derrame rock 2005 espera recibir alredor de diez mil asistentes na so décima edición. El preciu de les entraes: 25 euros en venta anticipada y 30 en taquiella pa un día; los abonos pa los tres díes tan puestos a la venta en 40 euros, anticipada y 45 en taquiella.

Tuña celebra esti sábadu 2 la so segunda Nueite Folk coles actuaciones de La Bandina’l Tombo, Corquiéu y Los Ciquitrinos. A lo llargo del día van actuar tamién diversos grupos de música y baile tradicionales como “Os Xeitosos” de Trazo (A Coruña), el Grupo de Gaitas “Axouxere” tamién de Coruña y el Grupu d’Investigación Folclórica “Sulabarda” de Tineo. L’aldea natal del xeneral Riego acueye tamién un mercáu d’artesanía y l’amuesa en vivo del procesu d’elaboración de la llana, con esquiláu d’oveyes incluíu.

La II Nueite Folk de Tuña va tar arrodiada de les actividaes citaes y al empar van poder contemplase entrambes esposiciones, una de traxes tradicionales asturianos y otra de madreñes. La primera ye’l resultáu de la investigación y la colaboración de colectivos etnográficos como’l Grupo de Bailes y Costumbres San Miguel de L.laciana; Grupu Folclóricu y de Investigación El Ventolín, de La Pola Siero; Grupu d’Etnografía y Folclor Reija, de-l La Felguera; Na Señardá, de Xixón; y Ärea Tradicional de la Escuela de Música de Tineo. La otra esposición amuesa madreñes y zuecos, non namás procedentes d’Asturies, sinón tamién de diversos países.

El programa de conciertos nel Xardín Botánicu de Xixón pa esti veranu escomienza mañana sábadu cola actuación de los músicos Andreas Prittwitz y José Antonio Ramos. Embaxo’l títulu “Música con raíces” a lo llargo de los meses de xunetu y agostu van desfilar pelos xardines del Botánicu ritmos y propuestes musicales de diversa procedencia. Un de los conciertos más esperaos d’esti programa ye l’estrenu el prósimu 29 d’agostu de la cantata Keltikhe de Ramón Prada, compuesta orixinalmente pa representar nel Festival Celta de Lorient.

Los primeros en debutar nel escenariu del Xardín Botánicu, Andreas Prittwitz y José Antonio Ramos, son dos músicos de llarga trayectoria y que tienen colaborao con sinfinidá d’artistes y grupos del estáu. L’alemán Prittwitz -qu’acaba de sacar un nuevu discu- ye un instrumentista que colabora habitualmente con artistes como Víctor Manuel, Ana Belén, Joaquín Sabina, Miguel Ríos, Manolo Tena o Luis Eduardo Aute; ye tamién el coordinador de los talleres d’improvisación musical que se van impartir a mediaos de xunetu en Xixón. Ramos, pela so parte, ye un músicu canariu que colaboró con grupos y cantantes como The Chieftains, Kepa Junquera, Pedro Guerra o Pancho Amat. Formó parte del grupu de folk canariu Trío Timple y ye un de los másimos esponentes del dominiu del instrumentu tradicional que llevaba’l nome del so antigu grupu.

José Antonio Ramos y Andreas Prittwitz estrenen mañana nel Botánicu el so espectáculu “Noches atlánticas”. Darréu d’ellos van siguilos nel programa de les nueches musicales, el grupu de folk tradicional andaluz La Jambre, el prósimu 16 de xunetu y el sábadu 27, los alumnos del cursu Magistralia de gaita, metales y percusiones van ufiertar un conciertu de cámara.

El 29 de xunetu ye l’estrenu de la cantata Keltikhe de Ramón Prada, un espectáculu nel qu’intervienen más d’un cientu de músicu y cantantes. El compositor de Cangues va tar acompañáu nel escenariu pola Joven Orquesta del Principado de Asturias (JOSPA), el coru tradicional Muyeres, los hermanos Tejedor, Mari Luz Cristóbal Caunedo y un importante elencu d’artistes pa llevantar esta cantata compuesta en seis movimientos que s’estrenó nel Festival de Lorient con gran ésitu de públicu y crítica.

El 30 de xunetu ufiértase’l conciertu de clausura de los Cursos Magistralia y el 6 d’agostu va ser el músicu de Guinea-Bissau Simao Félix da Cunha el qu’actúe dientro’l ciclu “Música con raíces”. Los encargaos de rematar les Nueches del Botánico van ser los británicos de la Compañía Kicking the Ceiling cola representación de “El suañu d’una nueche de veranu” de Shakespeare ya interpretada por actores asturianos.

Los xueves musicales programaos na sidrería Tierra Astur de Cualloto van siguir celebrándose tol veranu. Dalgunos de los grupos punteros de la escena folk asturiana van desfilar pel escenariu de l’antigua Fábrica del Águila, convertida anguañu en llagar-restaurante. Los primeros en tocar el prósimu 7 de xunetu son Llangres, a los que van siguir La Bandina’l Tombo el día 14 de xunetu. El tríu tradicional de voces y percusión formáu poles cangueses González, Maribel Cangas y Noelia Prieto actúen el xueves 21 y los alleranos Tarañu el 28 de xunetuMentantu, esti últimu xueves 30 de xunu ye La Bandina la que va tar en Cualloto na tarde nueche de la segunda de les xornaes dedicaes a los cuarenta quesos asturianos pol establecimientu organizador de los xueves musicales.

Los primeros en debutar en Tierra Astur, Llangres, ye una de les bandes que consiguió algamar un soníu más personal. Integráu por músicos de Llangréu, Uviéu y Mieres, apocayá publicó el so segundu trabayu discográficu: “Esnalando”. La Bandina’l Tombo que van siguir a los anteriores nos xueves musicales, son una formación que sigue’l modelu de les orquestines de músicos populares tradicionales y ye una de les más conocíes d’esti estilu que cuenta anguaño con delles formaciones asemeyaes.

Los protagonistes de los otros dos conciertos del mes de xunetu son el tríu formáu por Ángeles González, Maribel Cangas y Noelia Prieto, tres cantadores y percusionistes tradicionales que participaron en proyectos como’l del Colectivu Muyeres o Vezos Astures. La última banda, Tarañu, lleven tocando dende l’añu 2002 y son ya una referencia imprescindible del folk acústicu asturianu. Apocayá grabaron l’albúm “Al xeitu de Nenyuri” y anguaño trabayen na elaboración d’un segundu trabayu discográficu.

L’estrenu n’Asturies de “Keltikhe”, la cantata compuesta por Ramón Prada pa interpretala nel Festival Intercélticu de Lorient, tien ya fecha y llugar, después de meses de preparación del proyectu. La cita va ser el prósimu 29 de xunetu nos praos del Xardín Botánicu de Xixón, dientro’l programa “Les Nueches Máxiques” que se desenvuelve a lo llargo’l veranu ufiertando velaes musicales nesti espaciu públicu. La Xoven Orquesta Sinfónica del Principáu d’Asturies, el coru Muyeres y un bon elencu de músicos tradicionales acompañarán a Prada na representación de la cantata.

La obra “Keltikhe” compúnxose especialmente pa representar en Lorient y recibió una unánime acoyida d’ésitu tanto de públicu como nel reflexu que d’ella ficieron los principales medios bretones y franceses que cubríen el festival. De magar el so autor allampiaba la idea de poder estrenar la cantata

n’Asturies, pero les dificultaes de toa mena pa un conciertu d’estes característiques, nel qu’intervienen más d’un cientu de músicos y voces foi retardando la ocasión. Agora, por fin, el públicu asturianu va tener la oportunidá d’asistir en directu a la representación de “Keltikhe” dientro de poques selmanes en Xixón.

La Xoven Orquesta Sinfónica del Principáu d’Asturies, el coru tradicional del grupu Muyeres y como solistes: Eammon Gaildubh, José Manuel y Javier Tejedor, Mari Luz Cristobal Caunedo y Marta Elola, van interpretar los seis movimientos nos que ta organizada esta pieza, y que va tar dirixida na parte musical por Guy Berrier, director musical del Festival Intercélticu de Lorient. En total más d’un cientu d’artistes enriba l’escenariu y el sofitu d’una pantalla xigante pa que’l públicu pueda siguir afayadizamente esti conciertu únicu en Xardín Botánicu de Xixón.

Dos cursos dedicaos a la improvisación musical van desenvolvese a lo llargo del mes de xunetu organizaos respectivamente pol Taller de Músicos de la Fundación Municipal de Cultura de Xixón y pola Escuela Municipal de Música de Llanera. La iniciación al llinguaxe y a les técniques del jazz, l’entamu de conciertos y jam-sessions y diverses activaes, constúin el programa d’estos talleres que van coordinar en Xixón Andreas Prittwitz y Marco Martínez en Llanera.

El cursu d’improvisación musical de Xixón va desenvolvese ente los díes 11 y 15 de xunetu y el so conteníu va xirar alrodiu de talleres instrumentales y teóricos, trabayu en grupu y clases maxistrales de los profesores invitaos a impartilu. Los encargaos de dar estos talleres van ser, como profesores residentes: Joaquín Chacón: guitarra; Joshua Kuhl: bajo y contrabaxu; Félix Morales: batería; Andy Phillips: pianu; y Andreas Prittwitz: instrumentos melódicos y coordinación didáctica. Como profesores invitados, van participar nel cursu: Carlos Carli, batería; Pablo Martín, contrabaxu; Polo Ortí, pianu y Matthew Simon, trompeta. Los talleres inclúin una serie de conciertos didácticos col siguiente calendariu: llunes11: Pablo Martín, martes 12: Carlos Carli, miércoles 13: Matthew Simon, xueves 14: Polo Ortí y viernes 15: conciertu d’alumnos.

Pel so llau, el taller de Llanera, coordináu por Marco Martínez, va impartise del 18 al 22 de xunetu na Escuela Municipal de Música del conceyu y ta orientáu esencialmente a la difusión de la música de jazz y les sos posibilidaes como llinguaxe improvisáu. Como profesores va cuntar, amás del citáu Martínez en materia de guitarra, con Alfonso Vega (baxu y clarinete), David López (trompeta y trompa), León Duarte (batería y percusión). Como profesores invitaos van participar los músicoa Xaime González Arias (pianu) y Eladio Díaz (saxos).