Música

La Fundación Príncipe d’Asturies quería remembrar con esti conciertu a dos de los galardonaos colos sos premios dientro los actos d’alcordanza del so venticincu aniversariu. Barenboim recibió en 2004 el Premiu Príncipe d’Asturies de la Concordia xunta al so amigu y escritor Edward Said. El músicu, arxentín d’orixe xudíu y l’escritor, palestín emigráu a los Estaos Uníos, representaben a xuiciu del xuráu que-yos concedió’l galardón un exemplu de superación de los conflictos del nuestru tiempu y de llucha moral contra ellos. La Orquesta East-Western Diwan ye una amuesa de la colaboración entamada ente Bairenboim y Said, un conxuntu sinfónicu integráu por mozos y moces de diferentes nacionalidaes, cultures y relixones.

El Xardín Botánicu de Xixón foi esti vienres 29 de xunetu l’escenariu escoyíu por Ramón Prada pa estrenar n’Asturies “Keltikhé”, la Cantata pa Celtes y Orquesta escrita pa interpretar nel Festival de Lorient y que por fin pudo vese na tierra onde se compunxo. La Xoven Orquesta del Principáu d’Asturies (XOSPA), el coru de voces tradicionales Muyeres, músicos tradicionales asturianos col gaiteru José Manuel Tejedor como cabezaleru, escoceses y bretones, xunta la cantaora Mari Luz Cristobal Caunedo foron los encargaos de llevantar la obra de Prada en Xixón.

L’elencu completu de los músicos que participaron nesti estrenu de Keltikhé, amás de los componentes de la XOSPA, formáronlu el gaiteru asturianu José Manuel Tejedor, Marta Elola (voz tradicional), Eamonn Galldubh (gaita irlandesa), Marie Lecam (gaita escocesa), Josik Allot (biniou-koz), Fabrice Lothodé (bombardes), Igor Medio (bouzouki) y David Mateos (percusión tradicional), amás del propiu Ramón Prada (teclaos y programaciones). La dirección musical foi de Guy Berrier, director artísticu del Festival de Lorient;Rosa Fernández Delgado coordinó la percusión vaqueira; y Maribel López Parrondo y Constantino Menéndez coordinaron los bailes.

La cantata quier xunir los soníos de les tradiciones ancestrales cola música sinfónica y ta definida pol mesmu autor como una “cantata pa celtes y orquesta”, lo que pue ser enforma significativo pa desplicar lo que quier algamar esta composición sinfónica: “convertir la tradición al mundu sinfónicu teniendo como entamu la fuercia de la voz tradicional de les muyeres asturianes. Voces de muyer améstense nesti sen coles bombardes, les gaites, el binioù, el bouzouki o los whistles pa formar una estaya tradicional que se va meciendo na cantata de Ramón Prada colos instrumentos clásicos.

La obra preséntase estremada en seis movimientos qu’entamen con ‘Avalon’, una obertura de la que surde la voz nel segundu movimientu; ‘Muyeres’, nel que s’interpreten cancios tradicionales como ‘La Danza de les Vieyes’ (una danza prima arrecoyida en Mieres del Camín y qu’entama col romance de San Xuan Verde), ‘Cantar bien neña’ (una tonada del más fondu estilu ayerán) y dos dances vaqueires (La Gallegada y La Media Vuelta), y darréu ‘Carnac’, un movimientu inspiráu dafechu nel misteriu qu’arrodia a les piedres bretones que se caltienen nesa rexón y que de lo más arraigonao va treslladando l’ambiente a un adagio melancólicu pa gaita irlandesa y low whhistle.

‘Lancelot’ ye’l cuartu movimientu de la obra y apurre l’únicu romance de temática artúrica que se conoz n’Asturies y que val, sigún se recueye nel programa, “pa da-y vida, agora cola voz solista, a la lleenda”. El quintu movimientu, ‘Lugnasad’ amuesa l’ambiente de la fiesta cola que los celtes festexaben el veranu, emplegando pa ello un binioù-koz, una bombarda tenor y una gaita asturiana, cubriendo d’esta mena una gama de más de cuatro octaves.

‘Ástura’ ye’l movimientu final, y xermen de tola obra, que surde dende la ñeblina pa finar con un canciu tradicional a coru que xune otra vuelta la orquesta cola tradición de mayor raigañu.

Ramón Prada estrena con llenu total en Lorient la so “cantata pa celtes y orquesta”

Les cais d’Avilés van enllenase esta nueche colos colores de les banderes de les naciones celtes y los sones moyarientos de los finisterres atlánticos na Gran Marcha del Festival Intercélticu d’Avilés. A medianueche l’espectáculu “Lluna Celta”, emponináu por Margen va poner en danza la voz de Jorge Tuya, la gaita de Xuacu Amieva, les de les bandes participantes y los bailes de los grupos d’esta atopada intercéltica.

Dientro de la xornada d’esti viernes 29 de xunetu resalta la xuntanza de gaites y cornamuses que va escomenzar a les 19.30 na Plaza l’Ayuntamientu. A les 23.00 sal del mesmu sitiu la Sestaferia Marcha Celta, un desfile de músicos, danzarinos y deportistes de tolos países participantes nel festival. Media hora más tarde nel Polideportivu del Quirinal principia “Lluna celta”, un espectátulu empobináu pol grupu de teatru Margen que va cuntar cola participación del cantaor Jorge Tuya, el gaiteru Xuacu Amieva, Merce Santos a la zafoña y Héctor Braga al rabel y la bandurria, col acompañamientu de bandes de gaites y grupos de baile.

Mañana sábadu el festival avilesín celebra la víspora del pieslle a la so novena edición cola Nueche Intercéltica, una folixa na Plaza Carlos Lobo que va enveredar al escenariu a los galeses Mabon, los asturianos d’Arxentina Fardaxu, la Banda Gaites Esbardu y como estrella central al gaiteru gallegu Carlos Núñez.

La Sidrería Tierra Astur de Cualloto cuenta ufiertar el prósimu día cuatro d’agostu un conciertu mui especial: una xornada dedicada a la música asturiana que se fai na emigración, con trés bandes procedentes de fuera de les nuestres fronteres. Dientru los sos conciertos de los xueves van actuar Fardaxu,Folixa y Risca l’Alba.

Sigún cunta’l portal web de l’Axencia Asturiana d’Emigración,

El Xardín Botánicu de Xixón ye l’escenariu escoyíu por Ramón Prada pa estrenar n’Asturies “Keltikhé”, la Cantata pa Celtes y Orquesta escrita pa interpretar nel Festival de Lorient y qu’agora va poder vese na tierra onde se compunxo. La Xoven Orquesta del Principáu d’Asturies (XOSPA), el coru de voces tradicionales Muyeres, músicos tradicionales asturianos, escoceses y bretones, xunta la cantaora Mari Luz Cristobal Caunedo son los encargaos de llevantar la obra de Prada en Xixón.

L’elencu completu de los músicos que van participar nel estrenu de Keltikhé, amás de los componentes de la XOSPA, fórmenlu el gaiteru asturianu José Manuel Tejedor, Marta Elola (voz tradicional), Eamonn Galldubh (gaita irlandesa), Marie Lecam (gaita escocesa), Josik Allot (biniou-koz), Fabrice Lothodé (bombardes), Igor Medio (bouzouki) y David Mateos (percusión tradicional), amás del propiu Ramón Prada (teclaos y programaciones). La dirección musical ye de Guy Berrier, director artísticu del Festival de Lorient;Rosa Fernández Delgado coordina la percusión vaqueira; y Maribel López Parrondo y Constantino Menéndez coordinen los bailes.

La cantata quier xunir los soníos de les tradiciones ancestrales cola música sinfónica y en palabres del so autor: “partiendo de la fuerza de la voz tradicional de les muyeres asturianes, naz esta cantata que xunifica les conquiestes de la música sinfónica occidental cola fuerza ancestral del folklore”. Dividida en seis movimiento, Prada califica la so obra de “ampliu mosaicu del poder de la voz tradicional femenina” nel que los cantares populares procedentes de tola xeografía asturiana “mécense cola orquesta y los instrumentos celtes pa convertise nun gran viaxe sinfónicu pola nuestra memoria musical”.

Keltikhé represéntase esti viernes 29 a les 20.00 hores nes camperes del Xardín Botànicu de Xixòn.

Xixón va acoyer un añu más la celebración del festival Euroyeyé ente los díes 3 y 7 d’agostu. Siete conciertos, sesiones de “djS” internacionales, dos esposiciones de Pop Art y la ya tradicional xira de scooters igüen el programa d’un certame que cumple diez años siendo una referencia imprescindible ente los festivales sixties de tol mundu.

El programa de conciertos escomienza na nueche del 3 d’agostu a les 21 na discoteca Bolaocho de Cimavilla cola actuación de Mega Purple Sex Toy Kit + allnighter. Al día siguiente, n’abierto, nel escenariu de la Plaza Mayor van tocar los míticos The Yardbirds. The Gonks + Modus actúen nel Parque del Piles el viernes 5 y The Link Quartet el sábadu 6 ufierten un conciertu de baldre nel Puertu Deportivu. El pieslle pónenlu Speaklow + The Nedebietels na nueche del domingu 7 cola so actuación nel Parque del Piles.

Del 3 al 6 d’agostu va haber una amuesa de cine de los 60 con filmes como “Duffy”(1968) de Robert Parrish, “Here we go round The Mullberry Bush”(1967) de Clive Donner, “Brigitte Bardot cool clips” (1968) de Jack Cardiff y “Yellow Submarine” (1968) de George Dunning. Entrambes esposiciones titulaes “The Pop Conspiracy” de Fabio Conti y “A SmArtDirector’s Cut & Cytoplasm Experiment” de Jassmin Scheneider van poder visitase nel Centru Cultura Antigu Institutu. Al empar el Café El Guetu acueye la esposición “Modest Maid” d’Esther Messner y el bar Loui-Loui l’amuesa “Scooters” de Paloma y Jimmmy.

Una concentración de scooters y una feria del discu de música de los sesenta completen esta atopada de fanáticos de la cultura underground de la década yeyé.

Euroyeye 2005

Los cursos de la Escuela Internacional de Música de la Fundación Príncipe d’Asturies escomiencen güei nel Conservatoriu Superior “Eduardo Martínez Torner” d’Uviéu. Un total de 265 matrícules y de 198 alumnos tan rexistraes pa estos talleres de formación coordinaos na estaya artística pol director de la Joven Orquesta del Principado de Asturias (JOSPA) Yuri Nasushkin.

Les claees de cantu y viola son les que más aceptación tuvieron ente les ufiertes de los cursos. Ana Luisa Chova, profesora del Conservatoriu de Valencia y el caderalgu de viola del Real Conservatoriu Superior de Música de Madrid, Alan Kovacs, son los encargaos d’impartir estes disciplines. Otros ventiséis profesores procedentes de diversos países van empobinar les clases d’esti cursu qu’abarca dende la partitura orquestal a instrumetos como flauta y contrabaxo, repertoriu y armonización.

Los alumnos de los cursos entamaos pola FPA van ofrecer entrambos conciertos que van celebrase nel Auditoriu Príncipe d’Asturies como parte del programa formativu.

El músicu brasileiru Carlinhos Brown actúa esta nueche na Plaza de Toros de Xixón nun conciertu de la so xira internacional Sarau do Brown. Los ritmos calecíos y contaxosos de los tambores del barriu bahíanu de Candeal van facer vibrar el cosu del Bibiu nuna folixa que promete ser fiel a la máxima del percusionista: “el sudu ye comunicación”.

Quince músicos n’acción y una bona batería de tambores e toles traces y sonoridaes formen la guerrilla musical de Browm nesta xira que’l brasileiru anunción apocayá va ser una ocasión pa velu en vivo enantes de qu’entame un retiru temporal de los escenarios pa dedicase a trabayar nel so proyectu educativu del barriu del Candeal.

La cita ye a les 20.00 hores na Plaza Toros de Xixón dientro los conciertos programaos pol Teatru Xovellanos pal veranu. Mañana xueves van ser el duu Amaral los que garren el relevu de Carlinhos Brown en El Bibio.

La XXV edición del Concursu de Tonada de Xixón entamáu pol diariu El Comercio escomenzó esti llunes 25 nel so escenariu avezáu de la Plaza Mayor. Cincuenta y dos intérpretes de canción asturiana van participar esti añu nel que ye un de los cértamenes de música tradicional más veteranos y prestixosos d’Asturies. Como novedá na edición de 2005 los organizadores del concursu van editar un CD coles voces de los 21 meyor clasificaos.

Con un públicu qu’abarrotaba dende les primeres hores de la media tarde la Plaza Mayor de Xixón escomenzó la XXV edición del Concursu de Tonada. María Begoña Rodríguez, José Manuel Robledo, Carmen Camporro y los ganadores d’otres ediciones del certame como Jorge Tuya, Mari Celi Fernández y José Manuel García fueron dellos de los quince participantes na primer xornada del festival.

Na xornada d’esti martes 26, a partir de les 19,15 van pasar pel escenariu del Concursu catorce cantantes en calidá de competidores, amás de los que van actuar na categoría de campeones: Mari Luz Cristobal Caunedo, Ismael Tomás y José Ramón Menéndez. El gaiteru oficial qu’acompaña les pieces con esi instrumentu ye Alberto Fernández Varillas y el xuráu del concursu ta formáu por Margarita Blanco, Avelino Fernández y Narciso Fernández.

Les espectatives énte’l conciertu d’homenaxe al escritor palestín Edward Said que va ufiertar Daniel Barenboim nel Auditoriu d’Uviéu el prósimu 31 de xunetu tan sobrepasando les propies previsiones de los organizadores del eventu y asina l’anunciu del repartu d’entraes de baldre p’asistir a l’actuación fizo llegar a la Fundación Príncipe d’Asturies cientos de solicitúes que superen con muncho l’aforu del coliséu uvieín. Les entraes de baldre van empezar a repartise esti viernes 27 nel propiu Auditoriu.

TVE va retrasmitir el conciertu nel que’l músicu arxentín Daniel Baremboim va dirixir a la Orquesta West-Eastern Divan nun homenaxe al so amigu col que compartió el Premiu Príncipe d’Asturies de la Concordia en 2002 y común fundador xunta a Baremboim d’esa orquesta sinfónica empobinada a xente mozo de diverses procedencies nacionales, relixoses y étiniques. Al empar 1.500 espectadores, el total del aforu que cueye nel Auditoriu d’Uviéu, van poder asistir en directu a esti conciertu entamáu pola FUndación Príncipe d’Asturies dientro los actos conmemorativos del so venticincu aniversariu.