Música

The Yardbirds nun defraudó na so aparición énte’l públicu xixonés cuadro décades después de qu’un garrapiellu de mozos británicos la echaran a esnalar. L’escomienzu del festival Euroyeyé tuvo na nueche d’ayer vuelos altos peles esferes lluminoses de la esencia musical de los sesenta.

La mítica banda cola que tocaron ente otros ilustres caballeros andantes del rock’n’roll contemporáneu Eric Clapton y Jack Jeff salió al escenariu de la Plaza Mayor dispuesta a dar lo meyor de só y consiguiólo. Decenes de fanáticos de la cultura sixtie veníos de los cinco cabos del planeta disfrutaron de la folixa xunta miles de variopintos a los que tampoco-yos abultó indiferente el regresu a esta orxía de soníos frenéticos. Un bon escomienzu pa la década cumplía del Euroyeyé.

El músicu Simao Félix da Cunha ufierta esti sábadu un conciertu dientro’l ciclu “Música con raigaños” del Xardín Botánicu de Xixón. Nacíu en Guinea Bissau, da Cunha residió un tiempu en Portugal y dende finales de los ochenta vive en Sevilla onde fundó dellos grupos de música étnica como Wede. Na so carrera en solitariu trai a Xixón ritmos africanos mecigayaos con sones flamencos.

Músicu de formación autodidacta, nació nel somantu d’una familia con una llarga y distinguida tradición artística y toca la guitarra dende los doce años. De bien mozu escomienza a componer les sos primeres melodíes y participa en diveros proyectos musicales nel so país y en Senegal. Dende’l so treslláu a Europa entra en contactu con nuevos ritmos como’l rock, el jazz y el flamencu. La so etapa artística d’anguañu amuesa un poco de toes eses esencies nueves ensin perder un rispiu del so raigañu africanu orixinal.

El conciertu del músicu guineanu ye a les 22,00 hores nel recintu del Xardín Botánicu de Xixón.

El Festival Aquasella 05 escomienza esti viernes nuna finca asitiada ente Ribesella y Les Arriondes y dende’l so empiezu a media tarde hasta’l meudía del sábadu va constituir la ufierta alternativa y complementaria a la celebración de la tradicional folixa de Les Piragües. La Mala Rodríguez y Stoned Atmosphere son dos de les actuaciones que van poder disfrutase nesti festival de música electrónica.

L’apuesta de los organizadores del eventu ye nesta nueva edición del Aquasella dos escenarios y un programa d’actuaciones ininterrumpíu dende les 20.00 hores del viernes 5 al meudía del sábadu 6, too ello ambientao por visuales y l’afayu d’una zona especialmente prestosa pol so entornu natural. Ente la nómina de músicos y dj’s que van animar el cotarru electrónicu: Higinio, Eulogio, Lego my Ego, Oscar Mulero, Steve Rachmad, Alex Smoke, Technasia, amás de La Mala y los asturianos Stoned Atmosphere.

El festival Euroyeyé escomienza cola presencia en Xixón d’unos invitaos de luxu: la mítica banda británica The Yardbirds. El grupu pel que pasaron músicos como Eric Clapton o Jeff Beck actúa na Plaza Mayor cola so formación actual tres volver a xuntase después de tres décades inactivos.

La cita ye a les 22.00 hores nun conciertu de baldre y va ser la ocasión de ver en directu a una banda que darréu la so remanecencia apocayá vien a Xixón con un discu “Birdland” nel que colaboraron artistes como G. Mayo (Dr. Feelgood), Slash, Steve Vai, Joe Satriani y Brian May. The Yardbirds fueron una referencia fundamental del rock psicodélicu de finales de los sesenta y escomienzos de los setenta, xermen de grupos como los non menos míticos Led Zeepelin.

La so actuación esta nueche da empiezu a la onceana edición del festival Euroyeyé, una cita irrefugable del veranu xixonés y de tolos apasionaos de la cultura “sixtie” del mundu enteru.

Mañana viernes 5 va ser el cantautor asturianu Toli Morilla el qu’actùe nel escenariu de la Plaza Mayor col so espectáculu “Nueche d’insomniu nel Hotel Madrid”.

Xuacu Amieva foi l’encargáu d’entamar el primeru de los conciertos populares que cada veranu programa’l departamentu de Festeyos del Conceyu de Xixón. Vistíu con un impecable traxe blancu d’indianu el maestru gaiteru amosó’l so saber facer nel escenariu y derrochó enerxía ya intensidá a partes iguales.

Amieva salió puntual cumplíes les diez de la nueche arrodiáu d’una banda na que predominen les bases de la música tradicional asturiana combinaes con instrumentos propios de cualquier conxuntu del nuestru tiempu, abiertos a tolos sones del mundu. El nuevu proyectu artísticu del gaiteru bebi en diverses fontes y tenta buscar filos de conexón con ritmos y percusiones del otru llau del mar, especialmente de la música brasileira.

En directu Xuacu Amieva tuvo ocasión d’amosar una vez más que

la fidelidá a los sos oríxenes nun ta reñida cola elegancia y la puesta n’escena propia d’un músicu contemporáneu. El públicu, heteroxéneu como aveza ser el de cualquier conciertu n’abierto, supo agradecer el procuru del gaiteru por tar al altor de les circunstancies como nos sos conciertos más recoyíos ya íntimos.

Abríase asina’l ciclu de conciertos de baldre del branu xixonés que güei va tener la so continuidá colos británicos The Yardbirds, na estrena tamién del festival Euroyeyé, y mañana xueves col asturianu Toli Morilla y el so espectáculu “Nueche d’insomniu nel Hotel Madrid”.

La ópera “Pelagio” escrita en 1857 pol compositor italianu Saverio Mercadante va estrenase n’Asturies el prósimu 9 de setiembre con Montserrat Caballé y el tenor Carlos Álvarez como principales estrelles del repartu. El Teatru Xovellanos de Xixón va ser l’escenariu del estrenu y la OSPA, xunta la Coral Polifónica Xixonesa los acompañantes de Caballé y Álvarez.

La diva catalana va interpretar a Bianca, una supuesta fía perdida del rei Pelayu a la qu’esti alcuentra tres la batalla de Cuadonga casada con un rei moru. Esti ye l’entamu de la traxedia na obra compuesta por Mercandante y estrenada nel teatru de San Carlo de Napoles en 1857 y representada por última vez en Bérgamo en 1864.

La dirección musical de la ópera va tar a cargu de Mariano Rivas y el director de los ensayos Adolfo Gutiérrez, director artísticu del Coro Nacional de España. El Teatru Xovellanos ye’l responsable de la producción de la ópera rescatada de Saverio Mercandante y el so estrenu va facese el 9 de setiembre, un día después de la celebración institucional del Día d’Asturies.

El gaiteru Xuacu Amieva inaugura esti martes 2 d’agostu la serie de conciertos de baldre entamaos por Festeyos de Xixón deica la celebración de la Selmana Grande. El miércoles 4 van ser los británicos The Yardbirds los qu’actúen na Plaza Mayor dientro’l Festival Euroyeyé. Toli Morilla va ser el siguiente en pasar pel escenariu del Ayuntamientu el xueves 5 d’agostu col so espectáculu “Nueche d’Imsomniu”.

La última cita na Plaza Mayor enantes del empiezu de la Selmana Grande va ser el domingu 7 col Festival Nacional de Gaites Villa de Xixón cola participación de bandes procedentes de Galicia, Bretaña, Escocia y Asturies.

La Selmana Grande va llevar a los escenarios de la Plaza l’Ayuntamientu y de Poniente al cantaor flamencu Falete y al grupu Saratoga el llunes 8 d’agostu. Al día siguiente actúen Helder Moutinho y Andy & Lucas. Martirio con Chano Rodríguez van tar na Plaza Mayor el miércoles 10 y esa mesma nueche en Poniente actúen Orishas. El músicu brasileiru Zuco y Marta Sánchez protagonicen los conciertos del día 11. The Herbaliser y Tamara actúen el 12, y Ernnesto Tito Puente’s Big Band na nueche del 13 d’agostu como remate a la Selmana Grande.

La Banda de Gaites de Villaviciosa-Sidra El Gaiteru algamó’l primer puestu del campeonatu internacional de la Liga Galega, el concursu más prestixosu del país vecín. Los asturianos llograron imponese a bandes procedentes de toa Galicia, Escocia, Bretaña, Cantabria y Lleón.

La Banda asturiana ye una de les más veteranes de la nuestra comunidá y tuvo como primer director al maestru José Ängel Hevia. Patrocinada pola empresa de sidra villaviciosina de El Gaitero cuenta ente los sos músicos con dellos de los gaiteros más péritos del panorama musical asturianu. Con esti primer premiu de la Liga Galega, la banda maliayesa algama un pasu más na so carrera fuera de les llendes del nuestru país.

Los alumnos del cursu de cantu de la Escuela Internacional de Música de la Fundación Príncipe d’Asturies van dar un conciertu con acompañamientu de pianu y orquesta mañana miércoles 3 n’Uviéu. L’actuación va celebrase na Sala de Cámara del Auditoriu a les 20.30 y los alumnos van interpretar obres de Schubert, Strauss, Mozart, Verdi o Tchaikovsky.

Los cursos de branu de la Escuela Internacional de Música de la Fundación Príncipe de Asturias escomenzaron el pasáu miércoles 27 de xunetu y van piesllase’l 7 d’ agostu. Los alumnos proceden de Francia, Inglaterra, Portugal y España, y les sos edaes oscilen ente los nueve y los cincuenta años. Les clases tán impartíes por un elencu de 28 profesores procedentes de Moldavia, Italia, Ucrania, Israel, China, Armenia, Francia, Argentina, Rusia y España, embaxo la dirección artística de Yuri Nasushkin (Kiev, Ucrania), profesor del Conservatoriu Superior del Principado de Asturias y director de la Xoven Orquesta Sinfónica del Principado (XOSPA).

El Festival Euroyeyé cumple una década d’esistencia na edición d’esti añu. Entamáu como una modesta folixa d’amigos de la cultura underground de los sesenta, diez años después ye una cita imprescindible ente les celebraciones asemeyaes de tol mundu. Un conciertu abiertu de los británicos The Yardbirds na Plaza Mayor de Xixón va cargar les bateríes de los que quieran disfrutar un añu más d’esta cita cola señaldá activa.

Xixón acueye un veranu más la celebración del festival Euroyeyé hasta’l prósimu 7 d’agostu. Siete conciertos, sesiones de “djS” internacionales, dos esposiciones de Pop Art y la ya tradicional xira de scooters igüen el programa d’un certame que cumple diez años siendo una referencia imprescindible ente los festivales sixties de tol mundu.

El programa de conciertos escomienza na nueche del 3 d’agostu a les 21 na discoteca Bolaocho de Cimavilla cola actuación de Mega Purple Sex Toy Kit + allnighter. Al día siguiente, n’abierto, nel escenariu de la Plaza Mayor van tocar los míticos The Yardbirds. The Gonks + Modus actúen nel Parque del Piles el viernes 5 y The Link Quartet el sábadu 6 ufierten un conciertu de baldre nel Puertu Deportivu. El pieslle pónenlu Speaklow + The Nedebietels na nueche del domingu 7 cola so actuación nel Parque del Piles.

Del 3 al 6 d’agostu va haber una amuesa de cine de los 60 con filmes como “Duffy”(1968) de Robert Parrish, “Here we go round The Mullberry Bush”(1967) de Clive Donner, “Brigitte Bardot cool clips” (1968) de Jack Cardiff y “Yellow Submarine” (1968) de George Dunning. Entrambes esposiciones titulaes “The Pop Conspiracy” de Fabio Conti y “A SmArtDirector’s Cut & Cytoplasm Experiment” de Jassmin Scheneider van poder visitase nel Centru Cultura Antigu Institutu. Al empar el Café El Guetu acueye la esposición “Modest Maid” d’Esther Messner y el bar Loui-Loui l’amuesa “Scooters” de Paloma y Jimmmy.

Una concentración de scooters y una feria del discu de música de los sesenta completen esta atopada de fanáticos de la cultura underground de la década yeyé.