Música

La selmana jazzística asturiana continua esti sábadu 2 de febreru cola actuación del cuartetu asturianu Monk O’Clock. Enmarcáu dientro del ciclu “La Caxa de Música. Jazz Cajastur 2008”, esti conciertu ye una buena ocasión pa recordar los meyores temes del pianista Thelonious Sphere Monk: artista al que’l grupu rinde homenaxe col so nome y versioneando los sos temes. La cita, cola entrada de baldre, va ser esti sábadu 2 de febreru a les 20:0 hores nel Casinu de Llanes. Monk O’Clock ñacio de la mano del saxofonista Roberto Abella, el pianista Alejandro Mateos , el baterista Israel López ya’l contrabaxista Víctor Álvarez.

El cantautor asturianu Pablo Valdes va tocar esti sábadu 2 de febreru nel espaciu que la tienda Fnac dedica a conciertos nel centru comercial Parque Principado de Siero. A les 19:00 hores, Valdes subirá el escenariu del Fórum xunto cola so banda The Crazy Lovers formada pol guitarrista Sergio García, el baxista David Freire ya’l baterista Álvaro González.

Pablo Valdes, a base de rock clásicu, foi’l ganador del concursu de maquetes de 40 Principales nel Derrame rock y ta nomináu a los premios AMAS nes categoríes de meyor grupu revelación, meyor lletrista, meyor vidiuclip y meyor canción non folk.

La Casa la Cultura d’Aviles va acoyer esti xueves 31 de xineru, a les 21:15 hores, el segundu de los dos conciertos n’Asturies del trompetista Jerry González. Xunto col trompetista americanu van actuar, como nel recital del miercoles n’Uvieu, los miembros del tríu del pianista asturianu Isacc Turienzo.

Jerry González foi un de los creadores del estilu “afrocuban jazz”. Como trompetista formó parte de la banda d’Eddi Palmieri y del grupu “Fort Apache Band”, algamó’l reconocimientu de l’Academie du Jazz en Francia en 1989 y garró fama mundial cola so participación na película “Calle 54” de Fernando Trueba. Acompañando al músicu norteamericanu van tar Isaac Turienzo, al pianu; Miguel Ángel Chastang, al contrbaxu y Carlos Carli a la batería.

El restorán-sidrería Tierra Astur de Cualloto va cellebrar l’antroxu esti xueves cola actuación del grupu Cádaba y una escpicha. Cádaba, banda afincada nel conceyu de El Franco tien un discu, “Do y Sidemól”, nel mercáu y lleven tocando dende l’añu 2001 cuando ñacieron al abellugu de l’asociación cultural Arcángel San Miguel n’A Caridá. El so repertoriu ta compuestu por pieces propies y versiones adautaes de canciones tradicionales.

Cádaba son Jose Luis, vocalista y guirtarra; Daniel González, na gaita, les voces ya’l wistle; Pelayo H. López, na gaita, el baxu y les voces; la gaitera Araceli López, l’acordionista Miryam González; Javier González col tambor, Adrián López col bombu y Laura López na pandereta.

Dende esti prósimu xueves entama la programación músical pal prósimu trimestre en Llaboral Centru d’Arte y Creación Industrial con un conciertu del músicu esperimental Dot tape dot, nomatu del artista asturianu Daniel Romero que amás ye’l coordinador de los actos pa estos tres meses. Según anunció la Directora de Llaboral Centru d’Arte y Creación Industrial, Rosina Gómez-Baeza, el ciclu enllenará los últimos xueves de cada mes con propuestes esperimentales de creadores llocales y estranxeros.

Amás de Daniel Romero, van pasar polos distintos escenarios de la Llaboral l’alemán Sinebag. con una mestura d’instrumentois tradicionales y grabaciones de campu dixitalizaes; l’asturianu Xel Díaz, Stephen Leonard, el grupo Pangea, del madrileñu afincáu n’Asturies Juan Antonio Nieto y Roc Jimenez de Cisneros con una propuesta de soníos computerizaos

El 29 de febreru que vien va tener llugar la gala d’entrega de los Premios AMAS 2007 nel Teatru Filarmónica d’Uviéu y a partir de les 21 hores. Los premios tán organizaos pola Asociación Cultural Canal Asturias. Sicasí, los nominaos yá tán na so web y como n’ediciones anteriores el votu del públicu va ser lo que determine los ganadores d’esti añu.

Hasta les doce la nueche del 17 de febreru pue votase na web d’AMAS a los nominaos en toles categoríes. Destaquen esti añu con más nominaciones Anabel Santiago con trés, pol so discu “Desnuda”, Pablo Valdés & The Crazy Lovers con otres trés, Carlos Rubiera con dos nominaciones por “Asturianaes” y Dulcamara con dos nominaciones pol so primer discu “Sali, l.luna”. Amás apaecen ente los nominaos Rafa Lorenzo, Xaime Arias, Clashturies pol so discu “Soncai System”, Dark la eMe y Skama la Rede ente otros munchos.

Vota ente los nominaos

El músicu de L.lena Dark la Eme ta acabante de poner nel marcáu “Underprau”, lo que ye la tercer referencia discográfica de Mario Fueyo en formatu llargu. Nesti nuevu discu, el raperu asturianu vuelve a trabayar una producción na que rescampla sobre manera l’emplegu d’instrumentos reales y les influecies d’otros xeneros musicales como’l reggae ya’l folk. Amás, el discu cunta cola participación de La Bandina, el cantante ovetense Pablo Moro, Tuenda, el MC asturianu Arma X, la banda xixonesa Cuac! ya’l cantante asturianu espacializáu na música cubana Jacobo Cano.

Siente’l nuevu duscu de Dark La Eme

Dende agora y hasta’l 6 de febreru pue votase, na web de los premios AMAS 2007, polos finalistes nes distintes categoríes que van reconocer a los meyores artistes del añu. La entrega d’estos premios, organizaos pola Asociación Cultural Canal Asturias, va tener llugar el 29 de febreru nel Teatru Filarmónica d’Uvieu nuna gala que va entamar a les 21:00 hores.

Ente los artistes nominaos destaquen Anabel Santiago con tres: meyor canción folk, meyor cantante y meyor discu folk. Al meyor discu folk opten amás de la cantante, Carlos Rubiera, Ramón Prada y Tutu. Pablo Moro, Soncai System, Mus y Unomasuno compiten na categoría d’otres escenes y The punishers, Amon Ra, Avalanch y Helltrip al premiu pal meyor discu de rock.

Nesta ocasión, amás de reconocer la llabor d’otros instrumentistes, tamien se va premiar al meyor gaiteru xoven. Al galardón nesta categoría opten Andrea Joglar, Hugo Noval, Pablo Carrera y Ruben Alba. Ente otros premios tamien va reconocese la trayectoria musical de Tino Casal y de Nuberu cola entrega de dos premios honoríficos.

Mieres, nes instalaciones de la casa la cultura Teodoro Cuesta, va acoyer esti sábadu la final de la XI edición del concursu de tonada “Cuenca del Caudal”. Les actuaciones van entamar a les 19:00 hores y dempues de les mesmes será’l turnu del xuráu pa escoyer los ganadores na edición d’esti añu. Al premiu opten Andres Cueli, Juan Jose Martínez, Rogelio Suárez, Ismael Tomás y Jorge Tuya na categoría masculina y Lorena Corripio, Laudelina Hortal, María Sánchez, Anabel Santiago y Marisa Valle na femenina.

Esti sábadu 26 de xineru va cellebrase la primer de les tres representaciones que l’escenariu del Teatru Campoamor d’Uvieu va acoyer de la ópera “Macbeth”. La cita cola pieza clásica de Giuseppe Verdi ye nes tres ocasiones a les 20:00 hores y dempues del pase del sábadu van tener llugar otros dos más, el llunes ya’l miercoles. Esti programa va ser l’encargáu d’echar el piesllu a la temporada d’ópera na capital.

“Mcbeth” llega a Uvieu na versión que fixo Francesco Maria Piave alredior de la traxedia homónima de William Shakespeare, cunta cola direición de Miquel Ortega, col barítonu Carlos Álvarez y la soprano Tatiana Serjan y la participación musical de la Orquesta Uvieu Filarmonía ya’l Coru de la Ópera d’Uvieu.