Música

La pianista china Jie Chen, esitosa interprete a paser tener namái que 21 años, va tar ufriendu un conciertu nel Teatru Filarmónica d’Uvieu el xueves 7 de febreru a les 19:45 hores. Nel repertoriu, col que la pianista vuielve a pisar los escanrios asturianos tres dos esperiencies cola Sinfónica del Principáu en Xixón y Uvieu, va incluyir pieces de Haydn, Bach, J. Brahms y Granados.

La Conseyería de Cultura y Turismu del Principáu d’Asturies vieno acabante de convocar el Premiu al Meyor Cantar por segundu añu, col enfotu de premiar el meyor cantar con lletra en llingua asturiana o gallego-asturianu comercializáu a lo llargo del últimu añu. el premiu, que l’añu pasáu ganó Toli Morilla con “Azul y Gris”, por delantre de Tejedor, Carlos Rubiera, La Tarrancha y Asgaya, tien como condición que seya una obra orixinal.

El Xuráu d’esti premiu tará compuestu por un máximu de nueve miembros ente los que van alcontrase la Direutora Xeneral de Promoción Cultural y Política Llingüística y la Xefa de la Oficina de Política Llingüística nos puestos de Presidenta y Secretaria respeutivamente. Esti xuráu fará una preselección d’un´máximu de cinco obres y dará a conocer el fallu’l día 21 de febreru nun actu públicu. L’intérprete de la obra ganadora va recibir una escultura orixinal y una dotación económica de 1.000 euros, amás del compromisu del Principáu d’esparder y esti cantar nos medios de comunicación y nos eventos entamaos opol propiu gobiernu.

Nacho Vegas y Xel Pereda van presentar el so nuevu proyectu musical “Lucas 15”, esti miercoles 6 de febreru a les 19:30 hores nel aula Ámbito Cultural del centru comercial El Corte Ingles de Xixón (Cai Ramón Areces, 2). N’esti trabayu, qu’entamo a garrar forma en 2006, Pereda y Vegas faen usu de la tradición musical asturiana, añaes, villancicos o romances, p’amestala a la so propia formación nel terren del rock y crear un productu nuevu nel que los testos n’asturianu garren especial importancia.

El musicu Daniel García de la Cuesta, miembru de Lliberdón amás d’investigador de la tradición musical asturiana y conciertista va ufrir una actuación en direutu dientro del programa “Toma Nota” de Televisión Local Gijón a les 19:00 hores. El músicu va participar nel apartáu “Tócame algo” d’esti magazín, una pequeña seición dedicada a dar a conocer los instrumentos tradicionales asturianos.

Daniel García de la Cuesta ye autor de numberos estudios sobre’l folclore musical asturianu ya’l papel que xueguen determinaos instrumentos n’elli como l’arpa, la gaita, la bandurria, el rabel o los distintos instrumentos d’aire, percusión y cuerda.

Two Cow Garage, banda norteamericana enmarcada pola crítica dientro de la escena “Americana”del rock con raigaños folk, van tar presentando’l so últimu trabayu d’estudiu, “III”, esti llunes 4 de febreru a les 22:30 na sala Savoy de Xixón. Les entraes tan disponibles nos puntos de venta habituales a los precios de 7 euros, por anticipáu, y de 9 nes taquilles de la sala.

Col cantante, harmonicista y guitarrista Micah Schnabel a la cabeza, Two Cow Garage entemencen la meyor tradición country col rock n’roll ya’l punk. Completen la formación Dustin Harigle y Shane Sweenie na seición rítmica-bateria y baxu- ya’l teclista Crist Flint, un habitual nes xires y nes dos grabaciones anteriores del grupu d’Ohio.

Two Cow Garage

Yá ta disponible en myspace un vidiu de La Tarrancha con un montaxe de como fixeron la grabación del cantar “Tía Nemesia”, tema col que la banda participa, xunto con 21 bandes más, nel discu homenaxe a Dixebra “Salú ya dixebra. Perversiones” y que ya’ asoleyaron recientemente nel so espaciu d’internet. La Tarrancha ya una banda fundamentalmente de directu, con influencies rock, ska, reggae o funk. Cunten con varies grabaciones feches hasta la fecha, ente elles dos maquetes “QLT?” y “EXITencia” amás de canciones en dellos recopilatorios.

El quintetu del saxofonista vascu Iñaki Askunze y del guitarrista Alfredo Morán va tar tocando nel Centru Cultural Cajastur Colexata San Xuan Bautista de Xixón esti vienres 1 de febreru dientro de nuevo ciclu de jazz qu’organiza la entidña financiera asturiana pa esti añu 2008. Completando’l quintetu sobre les tables de la Colexata van tar el baxista Juan San Martín , el pianista Jose Ramón Feito ya’l baterista Felix Morales.

Tanto Askunce, director de la Pirineos Jazz Orquesta, como Morán, componente de John Falcone Group y Confluen-Jazz, son músicos esperimentaos dientro del circuitu de conciertos de la escena jazzística nacional. Amás Iñaki Askunze tien espublizao dellos llibros sobre la tecnica del saxofón y ye profesor nos conservatorios del País Vascu y Pamplona.

Vaudí va ser l’encargáu d’abrir l’antroxu de Xixón con ritmos propios del antroxu brasileñu. La cita col artista brasileñu afincáu n’Asturies ye esti sábadu 2 de febreru nel Paseu de Begoña. L’espectáculu va entamar a les 21:15 hores con una batucada na que van participar venti percusionistes amás d’un grupu de baillarines de capoeira y samba. Tres del desfile, Vaudí xunto cola so banda van subir a l’escenariu habilitáu pa la ocasión, pa facer repasu del so repertoriu nun conciartu previstu pa les 22:00 hores.

Güei, vienres 1 de febreru, a les 20:00 hores, nel Salón d’Actos del Institutu Carmen y Severo Ochoa de L.luarca, Rossaleda Jazz Quartet va tocar dientro del ciclu “La Caxa de Música. Jazz Caxastur 2008”. La entrada ye de baldre.

Los ovetenses Bubblegum, una de les propuestes más interesantes y afitaes de la escena power-pop española, van tar tocando esti sábadu na sala Nuevo Savoy (C/Pelayo, 12) de Xixón a les 21:00 hores con entraes al preciu de siete euros. Pani, a la batería; Ángel, guitarra y voces; Marín na guitarra ya Ívan al baxu van tar tocando xunto cola formación madrileña The Mittens.