Música

Una bona tonada y un baille cenciellu y efeutivu foron l’homenax que la delegación asturiana ufrió en Lorient a les autoridaes na recepción de la Subprefectura que se cellebra cada xueves primeru d’agostu en Lorient. Nel vídiu, miembros d’Escontra echen un baille na casa del suprefectu en Lorient onde se celebró la tradicional recepción a los países celtes.

La casa del subprefectu francés foi como cada añu l’escenariu de les actuaciones coles que cada delegación participante homenaxea a les autoridaes locales, talamente como fai’l llunes al entamar la selmana nel Ayuntamientu de Lorient. Cada país escueye a ún de los sos grupos representantes pa facer esti pequeñu homenaxe y esti añu, el baille foi la escoyeta de los países de siempre: Asturies, Irlanda y Escocia, qu’ufrieron lo meyor del so floklor. Nel casu asturianu, al baille acompangolu la tonada de la mano d’escontra’l Raigañu, grupu que siempre s’alcuentra tan averáu a la tradición más afitada y afalagada.

Como la traca final de fueos artificiales cola que fina cada Nueche Máxica, la delegación asturiana que nun pudo salir por mor de la lluvia na primera Nueche, ufrió esti miércoles na cuarta d’estes Nueches una actuación enforma aplaudida pol públici qu’enllena l’Estadiu de Fútbol de los “merluzos” del FC Lorient.

La delegación asturiana, compuesta poles Bandes de Corvera y La Reina del Truébano y el grupu Escontra’l Raigañu salieron pasada la medianueche xunta los grupos gallegos pa ufrir una actuación que completaba l’apaición previa nel escenariu de la gaitera solista Andrea Joglar. La Delegación ufrió delles pieces característiques de la música de bandes asturiana y permitió a los componentes d’Escontra’l Raigañu amosar el baille, apegáu a lo tradicional, pero brillante na so execución.

Los conceyales de Cultura, Festexos y Vivienda del Ayuntamientu d’Avilés visitaron esti miércoles el Festival de Lorient recorriendo les distintes instalaciones del mesmu y acudiendo a les estremaes actuaciones a lo llargo de tol día, cola idega de tomar buena nota del formatu y bonfacer d’esti Festival “pa aplicalo n’ameyorar el Festival Intercélticu d’Avilés”, sigún dixeron a Asturnews.

Los tres conceyales aportaron na nueche del martes a Lorient y colaben esti xueves pela mañana, tornando a Asturies, depués d’axuntase cola direición del festival bretón y de percorrer toles instalaciones onde se desendolquen les actuaciones.

Los Ciquitrinos sorprendieron al públicu de Lorient na so primer actuación del Festival d’esti añu, na que foron enforma aplaudíos dende qu’entamaron a les 10 de la nuechi nel Espace Bretagne. La música irónica y desenfadada y la puesta n’escena a lo Xavier Cugat encandiló a los bretones qu’aplaudieron a rabiar mesmo que los asturianos presentes na ciudá bretona nestos díes de Festival.

Col so conceutu d’orques de romería y la gayola qu’amuesen davezu, acompangada nesta ocasión por un francés d’andar por casa, los Ciquitrinos foron los más aplaudíos nesti escenariu del Festival dende qu’entamara’l vienres pasáu. La so amestadura ente folk y orquesta cañí dio’l meyor de los frutos delantre d’un públicu predispuestu que yá lleva viendo les evoluciones d’Indalecio nel escenario dende la fin de selmana gracies a les so actuaciones con La Curuxa na carpa Asturiana.

El cantautor xixonés Carlos Rubiera va interpretar temes de tola so carrera na Plaza Mayor de Xixón, esta nueche a les 22 hores. Nel conciertu va tener especial relevancia’l so discu “Canciones de Xixón”, asoleyáu l’añu pasáu y presentáu nel Teatru Xovellanos.

A les ocho la tarde va poder sentise un conciertu, dirixíu por Friedrich Haider, col qu’escomienza’l V Festival de Música Ciudá d’Uviéu. La sopranu que va acompañar a la orquesta ye la uviedina Ana Nebot. Nel conciertu van sentise les aries de conciertu de W. A. Mozart “Voi avete un cor fedele kv 217”, “Basta, vincesti… Ah, no lasciarmi”; la “Sinfonía númberu 3 en Re Mayor” de Schubert y, por últimu, l’“Arabesque, op 22” de Wolf Ferrari amás de dos estractos sinfónicos de “I gioelli della madonna”.

Jimme O’Neill, vocalista y guitarra de los míticos “The Silencers” foi’l teloneru de Moving Hearts en Lorient anticipando’l que diba ser, y asina lo confirmaren depués Donal Lunny, Davy Spillane y compañía, ún de los conciertos estrella del festival.

El vocalista del míticu grupu irlandés que llegó a comparase nos 80 con U2 y qu’axuntaba pop col folk del país y músiques tradicionales de raigañu celta fizo una actuación llimpia y brillante, acompañáu la mayor parte namái que d’una guitarra tan fonda como la so voz.

Moving Hearts cumplió dafechu coles espectatives con una actuación en Lorient que sedrá inolvidable pa les más de dos mil persones qu’enllenaron l’Espace Marine de Lorient. Tres de l’actuación del teloneru, Jimme O’Neill, Donal Lunny, Davy Spillane y el restu de músicos que formen el grupu instrumental de música folk más nomáu del arcu atlánticu amosaron un conciertu tan equilibráu y brillante como efeutivu.

La flauta y la gaita irlandesa de Spillane sonó como nunca ente los acordes del bouzuki de Lunny y la brillante percusión de Noel Eccles y toos ellos en comuña ficieron una collecha de los trabayos qu’asoleyaren hai poco en “Live in Dublin” y que suponen la recuperación d’un grupu míticu na escena del folk mundial.

Loreena McKennit ufrió na nueche del sábadu un conciertu memorable con cuatro mil persones aplaudiéndola a cada pallabra y cada canción y ella respondiendo cola mesma afabilidá, premiando esa entrega con dos bises que cumplieron les espectatives del públicu.

Al pianu, al arpa y sacandoy tol partíu posible a la so portentosa voz, Loreena McKennit dexo nidio que yera ensin dubies la estrella de la programación d’esti festival, col permisu de Moving Hearts, que toquen guei domingu, y los Chieftains.

La Grand Parade, el Gran Desfile de los Países Celtes que supón el momentu estelar de la primer fin de selmana en Lorient cuayó penrriba l’orbayu que presidió una gran parte del Desfile y la lluvia qu’entamó no postrero la mañana. Los paragües ficieron compaña a les gaites y les bombardes nuna xornada na que l’ésitu de púbicu nun se recordaba en Lorient.