Música

El Gobiernu chinu vieno acabante prohibir la distribución y venta del últimu discu de Guns N’Roses por mor del so títulu, ‘Chinese Democracy’, y porque contién delles crítiques al réxime chinu. El Gobiernu chinu calificó esti día la música del grupu de “ruidosa” y a los sos componentes de “inmaduros”.

‘Chinese Democray’ ye’l primer discu de la banda dende hai 15 años, cuando asoleyaron ‘The Spaghetti Incident?’ (1993). Guns N’Roses nun publicaba composiciones nueves material dende un discu doble anterior, ‘Use your illusion’ (de 1991), hai 17 años.

El grupu asturianu Bacotexo ta acabante anunciar la espublización del discu “A máquina del tempo”, una novedá nel panorama musical asturianu, al ser el primer discu de música rock na fala del Eo-Navia. El grupu ta formáu por Marcos Nogueiro, Daniel García y Ricardo Saavedra (estos dos últimos, ex-Babilon Chat), los dos primeros son de Tapia y l’últimu de Bual.

Coles sos lletres tán convecíos de que’l gallego-asturianu pue ser un “vehículo normal de comunicación llingüística, pode usarse pral llinguaxe del rock con total naturalidá y axudar a atopar resonancias, evocacióis y connotacióis inéditas”.

El grupu ñació movíu pol interés “d’atopar novas sonoridades al xénero del rock col uso esclusivo da fala eonaviega”, referiéndose, según los miembros del grupu “metafóricamente a un viaxe imaxinario hacia outros espacios temporales, reales ou ficticios, unde lo esencial é el conocemento emocional a través das esperiencias evocadas, suxeridas ou esfarelladas en narracióis”.

Pa llevar a cabu esti propósitu decidieron “escoyer a escritura na nosa fala, a llingua del occidente d’Asturias, convencidos de que, como vehículo normal de comunicación llingüística, pode usarse pral llinguaxe del rock con total naturalidá y axudar a atopar resonancias, evocacióis y connotacióis inéditas”, con procuru llingüísticu y “seguindo sempre as normas ortográficas del gallego-asturiano aprobadas pol Academia da Llingua Asturiana nel 2007”.

Los miembros de Bacotexo compuxeron 12 temes pa esti primer CD, ente les que tán “Vamos a queimar el cielo”, “As de corazóis”, “Vazamar”, “Submarín nuclear” o “Cancióis de revolución”. Trés d’elles puen sentise yá nel so myspace.

Calca pa sentir trés de los temes nel myspace del grupu

El grupu Felpeyu va rematar la xira presentación de Canteros esti sábadu, 22 de payares, a les 20:15 hores nel Nuevu Teatru La Felguera con un conciertu nel Nuevu Teatru La Felguera. Felpeyu va poner remate esti día a la xira presentación del so trabayu Canteros. Felpeyu, grupu de referencia de la música asturiana fundáu en 1991, trabaya col fondu musical tradicional asturianu creando un discursu musical personal, potente y actual. El resultáu d’esti trabayu ye un repertoriu sólidu ampliamente aceptáu pela crítica y el públicu, defendíu n’intensos conciertos en directu.

Felpeyu revitaliza sones populares coles sos interpretaciones al traviés del usu d’arreglos de cuerda contundentes que sofiten lletres, les más de les veces creaes pol propiu grupu, atopando asina un términu mediu ente creatividá y tradición, y siempre col envís d’esfrutar faciendo bona música sobre l’escenariu.

El so primer trabayu discográficu fue’l discu homónimu Felpeyu, editáu en 1994 por FonoAstur. Dempués vinieron Tierra, en 1997, Live Overseas (Urchin Records) en 2000, y en 2002 Yá!, publicáu esta vez pola compañía creada pol grupu, Tierra Discos. Seis años dempués d’esti discu, Felpeyu punxo na cai Canteros (Tierra Discos), un trabayu onde se caltienen fieles a ellos mesmos al tiempu qu’incorporen delles novedaes qu’evidencien la so evolución como grupu. El discu presentóse en directu’l 12 d’abril n’Uviéu, dempués vieno una esitosa xira a la que van pone-y el ramu nesti futuru conciertu en Llangréu.

Esti vienres, 21 de payares, a partir de les 20.30, entamará con un amagüestu la Selmana Cultural del Grupu de Baille Tradicional San Félix que nacía en 1979 col envís de que nun se perdieren los bailles y les dances d’Asturies.

Esta selmana d’actividaes inclúi un programa d’actos protagonizaos pola música que se va llevar alantre nesti mes de payares y que recueye, per exemplu, un taller de Musicoterapia’l sábadu 22 a partir de les 17 hores.

El domingu, a les 12.30 va desendolcase la TRADICIONAL MISA POLOS COMPONENTES Y FAMILIARES y a lo llargo la selmana entrante tan previstes actividaes como’l cursu de cocina del miércoles 26 a les 19 hores o l’ensayu de puertes abiertes de xueves 27.

El vienres 28 a les 20 hores ta prevista la representación teatral de “LES DESVENTURES DE XUACU” y “MENTIRES” y el sábadu 29 la entrega del premiu DISTINCIÓN a “NUBERU” nel trescurrir d’una cena de los miembros del Grupu.

Tolos actos, exceptu la misa (na Ilesia Parroquial de Valdesoto) y la entrega’l premiu DISTINCIÓN van facese nel Centru Cultural de Leceñes en Valdesoto (Siero).

El grupu asturianu Kadarma, va actuar el sábadu que vien, 22 de payares, nel llocal Bola 8, asitiáu nel númberu 11 de la cai de los Remedios, nel hestóricu barriu xixonés de Cimavilla.

Xunto a estos, va actuar el grupu cántabru Insigne.

Myspace (páxina personal) de Kadarma

Llangres presenta esti vienres na SGAE d’Uvieu “Entá”, el so tercer trabayu discográficu, qu’entamó grabase a principios d’esti añu nos estudios EMP d’Uviéu y nel que Llangres continua cola so idea d’autoproducir tolos sos trabayos.

Amás, nesti casu, los músicos participen tamién nos llabores de técnicos de grabación (Viriu Fernández y Yago Prado) y nel diseñu gráficu del digi-pack. Al igual que fixera en Esnalar, Pablo Lato ocupóse de la producción. Otru elementu que tien continuidá en Entá ye la composición propia de los temes. Del mismu mou que nel trabayu anterior, la mayoría de les canciones recoyíes nel CD tan feches polos integrantes de LLangres.

Les once canciones de Entá suponen un cambiu importante nel conceutu musical que Llangres manexara hasta agora, sobre manera nos temes cantaos, que s’averen a otros conceutos non estrictamente folk y nos que la voz d’Esther Fonseca cobra muncha más relevancia.

El discu tará nos puntos de venta esti xueves 20 de payares, distribuíu a traviés de Fonoastur. Llangres ta organizando un conciertu onde resentará´l nuevu trabayu de so, pero’l llugar y la fecha entovía tan ensin confirmar.

Los prózimos díes 15 y 16 de payares van tener llugar los actos de pieslle del programa Pueblu Cultural d’Europa 2008 en Porrúa. A lo llargo d’esti añu, Porrúa caltuvo esta distinción desnevolviendo abondes actividaes cola participación de grupos y coleutivus de delles otres partes d’Europa.

El programa de pieslle entamará’l sabadu 15, a les 9 horas, con una conferencia na que cada delegación va esponer la so visión del tema “Los recursos culturales como elementos de desenrrollu socio-económicu”.El sábadu pela tarde fadránse visites culturales pola comarca para les delegaciones.

El domingu 16, a les 9,30 hores habrá una mesa reonda onde van analizase los proyectos compartidos esistentes na rede de pueblos culturales europeos y fadrase una puesta en comuña sobre’l futuru que queremos para esti programa más allá del añu 2010, fecha na que tolos pueblos miembros de la rede foron yá Pueblos Culturales Europeos. EL domingu 16, a les 13 hores. tendrña llugar l’actu de pieslle: La Conseyera de Cultura, l’Alcaldesa de Llanes y el Presidente de la Fundación Pueblu Cultural d’Europa, van asistir a esti actu col que fina’l programa y nel que se fadrá’l treslladu de la titularidá a los representantes del pueblo danés de Tommerup, que sedrá’l Pueblu Cultural de Europa 2009.

En 1983 nacía en Candás el Grupu de Baille Tradicional San Félix col envís de que nun se perdieren los bailles y les dances d’Asturies. Polo tanto, nesti añu 2008 cúmplese’l 25 aniversariu del so nacimientu y quier cellebralo con un actu protagonizáu pola música que se va llevar alantre esti sábadu, 15 de payares, dende les 19 hores nel Teatru Prendes de Candás.

Pel escenariu candasín pasarán esa tarde la Banda de Música de Candás, la Coral Aires de Candás, los grupos de baille La Folixa y Xorrecer, la Banda de Gaites Villa de Mieres y los grupos de folk Tuenda y Blima.

Mieres acuye esti vienres la Muestra del Folclor de Santa Marina, que na so quinta edición va desendolcase nel salón d’actos de l’Asociación de Vecinos de Santa.

L’actu, que se inclúi dientro la selmana cultural de la sociedá, va tener llugar a les ocho la tarde y va cuntar cola participación de José María García, María José García, José Manuel García y el Che de Cabaños.

El sábadu 15 de payares, a les ocho y media la tarde, nel Teatru de La Llaboral de Xixón, The Matthew Herbert Big Band presenta’l so discu nuevu, “There’s me and there’s you”.