Música

Col títulu d’“El medrar del carbayu”, la banda de gaites Xácara, formación ñacida n’Uviéu en 1999, asoleya’l que ye’l so primer trabayu discográficu. La obra ta dirixida por Ricardo Soberado y cunta con 10 pieces nes que se homenaxea a Llan de Cubel y Gordon Duncan, cola collaboración Les Pandereteres de Fitoria, xunta otros músicos.

Les pieces son tradicionales, anque delles son de composición propia, amás de los homenaxes yá nomaos.

La formación va presentar los temes nel Festival Intercélticu de Lorient, onde van participar dientro de la representación asturiana, cola Nueche Máxica como’l momentu más emocionante pa la banda.

L’Ayuntamientu de Xixón presentó estos díes un nuevu festival, que va celebrase a la fin del branu na ciudá y que va denomase Festival Xixón 5º 40′, en referencia al meridianu que pasa per Xixón y pel restu de los países del arcu atlánticu. Del 19 al 23 d’agostu van instalase dellos escenarios onde van actuar grupos de Bretaña, Escocia, Galicia y Asturies.

El programa completu tovía nun ta definíu, pero la inauguración del 19 va facese col conciertu en Poniente «Xixón con Jota». El día 20 van actuar na plaza Mayor, a les 20.00 hores, los grupos folclóricos «Los Xustos», «La Deva» y «Asturies», y en Poniente va actuar, a la mesma hora, el grupu «Awen Magic Land».

Dientro del festival va celebrase el IX Festival de bandes de gaites y el día 23 va pesllar los actos «Dixebra», nel escenariu de Poniente.

Páxina web del festival

El grupu de rock avilesín Dixebra va celebrar esti vienres 3 de xunetu un conciertu dientro del Revoltosa Rock ’09 que se celebra n’Ordes, n’A Coruña. L’actuación supón la vuelta a Galicia, de Dixebra, que llevaba cuasi cinco años ensin visitar esti país.

Páxina web del festival

Piedrasblancas acueye esti sábadu 4 de xunetu un Alcuentru de Bandes de Gaites, organizáu pola Banda “Xácara”. L’Alcuentru va entamar a les 19 hores y finar a les 22 de la neuche.

Güei, xueves 2 de xunetu, a partir de les diez de la nueche, Xixón va celebrar ún de los primeros conciertos del branu, el del grupu pop madrilanu “El canto del loco”, llideráu pol cantante y actor Dani Martín. Nel mesmu van presentar el so últimu discu “Personas”.

El conceyal de Cultura Tradicional, Jesús Montes Estrada, presentó esti dia’l II Alcuentru cola Música Tradicional, que va celebrase nel Muséu del Pueblu d’Asturies, del 3 al 5 de xunetu. Montes Estrada destacó l’ésitu de la segunda romería de Xixón, con motivu de la festividá de San Pedro, ya invitó a disfrutar d’un espaciu “fracamente nuevu” con esti alcuentru dedicáu nesta edición a les bandines.

L’alcuentru axunta bandines d’Asturies, con representación esta vegada d’Aragón y Lleón, cola fina de crear un espaciu pa que los músicos puean intercambiar esperiencia. La primer edición d’esti alcuentru tuvo dedicada a les pandereteres.

El Festival “La mar de voces”, qu’axunta a formaciones corales, llega esta nueche, a les 20:30 hores, a La Llabora de Xixón. Güei van participar la Banda de Música de Xixón, la Coral Polifónica d’Asturies “Cruz de la Victoria” d’Uviéu y la Coral Villa de Xovellanos de Xixón.

El músicu americanu Michael Jackson, conocíu como’l rei del pop, morrió esta nueche en Los Ánxeles (EE.XX.) a los cincuenta años y por mor d’un paru cardiacu. Una muerte que sorprendió a los sos siguidores, yá qu’anunciare apocayá la so vuelta a los escenarios.

La figura del cantante convirtiérese yá en vida nun mitu, lo mesmo pola so música, que cambió según munchos la hestoria del pop, que pola so polémica vida, con problemes familiares, económicos y cola xusticia.

Jackson visitó Asturies nuna ocasión, celebró un conciertu nel yá desapaecíu estadiu Carlos Tartiere d’Uviéu, el 21 de setiembre de 1992.

Güei, vienres 26 de xunu, a partir de les once y media la nueche, el grupu d’ska-reggae La Tarrancha torna a los escenarios nel llocal “El Picu la Xerra” asitiáu en Meruxeo, pueblu de Samartín del Rei Aurelio.

Nesti conciertu van tocar temes nuevos y recuperar dalgún del so repertoriu habitual. Ente les novedaes, dalgunos de los cantares que van apaecer nel so primer discu de llarga duración, que va tar nel mercáu a lo llargo del iviernu.

Los escolinos de Turón y Candás que participen nos talleres de rock que se vienen desendolcando neses dos localidaes dende hai unos años son los protagonistes de la emisión d’esti sábadu del espaciu “Nós” qu’emite la TPA en llingua asturiana, pasaes les 12 hores del mediudía.

La Conceyalía de Cultura del Conceyu Mieres entamó hai poco más d’un mes el I Festival de Rock & Guaje, que cuntó cola actuación de los grupos Pingüinos Asesinos, Fracaso Escolar, Doctor Centollu y Los Bichosaurios; formaos por rapazos menores d’edá en talleres de rock y que canten delles canciones n’asturianu.

L’actividá tuvo llugar nel Parque del Atenéu de Turón.

Nós, espaciu dirixíu y presentáu pol periodista y profesor universitariu Próspero Morán, emítese tamién pol satélite Hispasat pal restu d’España, Europa y América y por Internet para tol mundiu al traviés de la web de la RTPA.