Música

La idega d’Anuariu Sonoru ’09 surdió conxuntamente del Ensame Cultural Sonastur y de Fnast.net nel mes de payares de 2009. Col oxetivu de da-y puxu y dotar d’infraestructures a la música fecha n’Asturies, esti Anuariu Sonoru preséntase como un nuevu anuariu asturianu, complementariu a los yá existentes, col fin de recopilar el material sonoru y audiovisual de tolos grupos que fixeran actividá d’esti calter nel 2009.

Aprovechando les ventaxes de les nueves tecnoloxíes, esti anuariu tien la peculiaridá de que solo se distribuye per Internet. Faise asina acordies a la filosofía de los sos promotores de defensa del llibre espardimientu de la música y la cultura. Por eso l’Anuariu Sonoru ’09 se pue descargar de baldre al traviés de Fnast.net, llegando a tolos requexos del mundu ensin llendes nin torgues económiques.

Facelo per Internet nun significa que se faiga d’un mou descuidao; asina ye como tolos cantares qu’apaecen nel Anuariu Sonoru ’09 fueron iguaos nos Tutu Estudios de Corvera p’algamar homoxeneidá y coherencia nos volúmenes. Amás, xunto a los temes y los vidioclips, hai un llibretu en formatu pdf con información biográfica de tolos grupos participantes, daqué afayadizo p’ampliar conocimientos sobre les bandes asturianes y ayudales a promocionase dientro y fuera de la Comunidá Autónoma.

Otra de les característiques del proyeutu ye’l so deseo de promoción y espardimientu tanto n’Asturies como fuera d’ella. Pa ello los organizadores entamaron una ronda de contactos con estremaos medios de comunicación pa que sofitaran publicitariamente l’Anuariu Sonoru ’09; dos medios dixitales asturianos y unu musical de calter estatal son los que dieron el so apoyu recopilatoriu y, a la fin, a la música fecha n’Asturies.

“Nun son tolos que tán, pero tán tolos que son”, esta frase aplícase perfeutamente al Anuariu Sonoru ’09. 44 son los grupos qu’aportaron una composición musical pal recopilatoriu, pero son munchos más los que grabaron discu, maqueta o temes sueltos durante’l 2009. Delles causes fixeron que non tola actividá musical asturiana durante’l 2009 se recopile nel Anuariu Sonoru ’09, pero de cara al futuru esto va meyorase pa qu’esti proyeutu sea un referente de la música astur.

Con esti Anuariu Sonoru ’09 entama un proyeutu que nagua por asoleyar anualmente y medrar en calidá y participación. Anguaño yá ta entamando a preparase l’Anuariu Sonoru ’10, que tendrá les mesmes carauterístiques que’l d’esti añu. La preparación con tiempu del anuariu y un siguimientu diariu de l’actividá musical d’Asturies servirá pa meyorar y afitar el recopilatoriu sonoru y audiovisual.

“Cantar de redención” de Dixebra, incluyíu nel caberu discu del grupu, “Amor Incendiariu”, algamó a lo postrero’l premiu a la Meyor Canción n’Asturianu, pasando penrriba de cantares como “11 de mayu” de Mapi Quintana, “El canciu’l mineru” de Spanta la Xente y “Ye lo que nos pasa” de Músicos pola Oficialidá.

El premiu de la SGAE va entregase’l próximu cuatro de marzu nel Teatru madrilanu Häagen Dazs Calderón y Dixebra ye tamién ún de los nominaos al Premiu al Meyor Cantar, que va entregase esti sábadu en Mieres.

Los ganadores dende la creación de la categoría ente los premios qu’ufre la SGAE y qu’algame esti añu la 14 edición foron Pepín Robles con “Nunca máis” (2004), Chus Pedro con “Agora sal a bailar” (2005), Los Berrones con “Fai deporte” (2006), Rossaleda Jazz Quartet con “Na fonte” (2007), Tejedor con “Seique non” (2008) y Esther Fonseca con “Negra” (2009).

Esti xueves 11 de febreru, a partir de les 21:30 hores, la sidrería Tierra Astur de Cualloto va ufrir un nuevu conciertu de los xueves cola bandina Les Comadres qu’actúa precisamente na xornada que-y da nome y entama les celebraciones del Antroxu nesta Sidrería.

Los componentes d’esta formación vienen de llugares ya influencies musicales bien estremaes que van del folk a la música clasica, el jazz o’l rock. La bandina Les Comadres son un grupu de musicos que s’axunten pa esta ocasión y que na so mayoría pertenecen a otres formaciones más estables como son Los Ciquitrinos o los Llanzones.

La banda de rock Dixebra presenta estos díes na rede, el primer vidioclip con un cantar del so trabayu discográficu nuevu, tituláu “Amor incendiariu”, que salió nel mes de payares. El tema escoyíu pa convertilu n’audovisual ye «Blancos andantes», con lletra del escritor xixonés Quique Faes y del vocalista del grupu Xune Elipe, y música del productor y componente de Dixebra Sergio Rodríguez. La temática de la canción xira alredor del anonimatu y el so usu retorcíu al traviés d’Internet.

Los esteriores grabáronse na parte vieya de la villa d’Avilés y de Villalegre y nel barriu de Los Campos (Corvera), amás de nel Teatru Filarmónica d’Uviéu. El realizador foi Guillermu Fernández, que yá trabayara con Dixebra n’anteriores ocasiones.

Nel videoclip de «Blancos andantes», amás de los miembros de Dixebra, participen les baillarines de la Escuela de Danza Lía d’Uviéu con una coreografia montada a costafecha pal tema. Como protagonista del vidiuclip, apaez, amás de los miembros del grupu, l’escritor Frantxu Melero.

A esti videoclip va sumase na seronda otru col tema «De prau», que va dir grabándose a lo llargo de la primavera-branu coles aportaciones de los siguidores del grupu.

El “Premiu al Meyor Cantar” ñació nel añu 2007 como reconocimientu del Gobiernu d’Asturies a la creación musical en llingua asturiana o gallego-asturianu, y llega esti añu a la so cuarta edición. Acordies coles bases, puen optar a esti galardón les canciones con lletra n’asturianu o gallego-asturianu que fueran comercializaes ente’l 1 de xineru y el 31 d’avientu del 2009, una y buenes sían obres musicales de creación orixinal. Na presente edición, cumplíen estos requisitos un total de 106 temes interpretaos por 21 grupos o artistes.

Un xuráu formáu por espertos en música y llingua asturiana escoyó a los cinco finalistes, que van actuar en directo’l próximu día 20 de febreru, con motivu del Día Internacional de la Llingua Materna, na Gala d’Entrega del Premiu, que va retresmitise pola Televisión del Principáu d’Asturies (TPA). L’actu emprima a les 19.00 hores nel Auditoriu de la Casa de la Cultura “Teodoro Cuesta”, de Mieres del Camín.

Los grupos finalistes na presente edición son:

-Brandal, con “Chueve” (lletra y música de Pedru Pereira). Esta formación, ñacida nel conceyu de Cangas del Narcea y que canta na variedá occidental del asturianu, fai un folk melódicu de calter tradicional valiéndose d’una instrumentación a mediu camín ente lo acústico y lo eléctrico. El discu …Na fonte la canalina, onde s’inclúi’l tema “Chueve” ye’l primeru que publiquen.

-Dixebra, con “El dinamiteru” (lletra y música de Primi Abella). Formación decana del rock asturianu, Dixebra nació n’Avilés en 1987 y hasta’l momentu publicó diez discos nos que’l grupu siguió fiel a les sos premises fundacionales: facer un rock mestizu d’influencies variaes, usar la llingua asturiana y reflectar nes sos lletres la realidá social d’Asturies.

-Lafu & Rebeca, con “El mio sitiu” (lletra y música d’Alejandro Lafuente). El dúu artísticu formáu por Rebeca Velasco y Alejandro Lafuente tien yá una trayectoria llarga na escena musical asturiana. Publicaron trés discos de calter intimista y personal y nos qu’esperimenten con diversos estilos musicales: jazz, folk, funky…

-Misiva, con “La casa’l mieu” (lletra y música de Misiva). Misiva surde nel añu 2007, nel conceyu Grau, como un proyectu musical basáu nel usu d’un punk-rock directu y reivindicativu. El so primer discu, del que fai parte’l tema “La casa’l mieu” apaeció nel añu 2009.

-Xera, con “Tierra” (lletra y música de Xera). Con una propuesta musical y novedosa nel panorama musical asturianu, Xera busca fusionar corrientes entemeciendo elementos electrónicos con instrumentos acústicos casu del bouzuqui, el vigulín o la gaita. Esti discursu musical concretóse hasta’l momentu na edición de dos discos.

L’espectáculu va zarrase cola actuación d’Alfredo González, ganador de la edición anterior. Alfredo González ye un cantautor nacíu en Turón qu’emprimó la so carrera musical al empiezu d’esta década, acompañándose de primeres cola guitarra y depués col pianu. Publicó trés discos.

El grupu o intérprete ganador va representar internacionalmente a Asturies nel Festival de la Canción en Llingües Minoritaries (Liet Internasjonaal), organizáu col apoyu del Conseyu d’Europa, que va facese n’Inverness, la capital de les Highlands escoceses.

Tola información d’ésta y les ediciones anteriores del Premiu al Meyor Cantar va tar disponible nun sitiu web de nueva creación (www.premiumeyorcantar.es) que va ufrir noticies, fotografíes y información de los grupos y cantares finalistes. Amás d’ello un reproductor va permitir sentir los temes que compiten na Gala.

El grupu La Tarrancha nun va ser a actuar esta nueche na sidrería Tierra Astur de Cualloto, sustituyéndolu’l grupu de folk Duerna.

La indisposición d’ún de los sos miembros ye la causa de que nun se puea presentar güei’l so nuevu y primer discu oficial, ‘Ö33’, editáu pola productora audiovisual Algamar.

La convocatoria, con Duerna nel cartel, caltiénse pa ente les nueve y media y les diez de la nueche, con un coste de 16,50 euros y dos pases del grupu participante, con un descansu pel mediu.

La Tarrancha, que vieno acabante sacar al mercáu discu nuevu (otres trés), diba actuar nel célebre restorán de magar les diez de la nueche d’esti xueves 4 de febreru. Pa conocer más sobre’l grupu recuperabamos la Entrevista de la selmana, que protagonizaba Delfo Valdés, voz del grupu, apocayá.

Entrevista a Delfo Valdés

El llibru lleva dellos díes nes llibreríes y supón la segunda referencia bibliográfica del cantante de Dixebra, que yá publicara na década de los noventa del sieglu pasáu l’ensayu “Rock & Llingua”.

Rockmería axunta dellos testos que conformen una hestoria de los venceyos ente la música popular y el compromisu social y ideolóxicu. El filu cronolóxicu empiezan nel añu 1914, con Joe Hill como representante de la cultura que surdió alredor del movimientu obreru nos Estaos Xuníos, y acaba nel añu 2000, cola creación n’Italia de les orquestes multiétniques que ñacieron a manera de respuesta artística a les polítiques ultraconservadores de Silvio Berlusconi. Pel mediu van pasando nomes como los de Woody Guthrie, Joe Strummer, Alan Stivel o Fermín Muguruza.

El volume zárrase con un apartáu dedicáu a la música asturiana onde se pon atención a aspectos como la importancia de la figura de Berto Turulla, el ñacimientu del Nueu Canciu Astur o los grupos que nestos últimos años tán empezando a facer rock n’asturianu.

Yá ta colgáu na rede’l vidioclip del cantar “La nada y tu”, un tema d’Alfredo González que consiguió facese col Premiu al Meyor Cantar en Llingua Asturiana correspondiente al añu 2008 y que representó a Asturies na última edición del festival Liet International. El cantar, con lletra d’Antón García, incluyóse nel discu col mesmu nomes, espublizáu por L’Aguañaz a últimos del añu 2008. Asturnews ufre’l vidiu, producíu por Señor Paraguas, a los sos llectores.

Güei, martes 2 de febreru, a les 20:15 hores, na Casa Municipal de Cultura d’Avilés, l’intérprete Xuacu Amieva va ufiertar un conciertu didácticu sobre la música tradicional asturiana, que s’enxerta dientro la xira que lu lleva tamién per Uviéu y Xixón, con entrada llibre y de baldre hasta completar l’aforu.

Compitiendo col Sporting-Barcelona d’esti sábadu, la Segunda Gala “Xixón fala n’Asturianu” algamó una perbona rempuesta d’un públicu que disfrutó como siempre de Dixebra, el cantar vaqueiru de Rafa Lorenzo y la promesa de Chus Pedro y Manolo Penayos de que Nuberu tornará a los escenarios el día que l’asturianu seya llingua oficial. Manolo Penayos adelantó temes del o nuvu proyeutu musical, con una versión mui personal de la Danza Prima como entamu.

Ismael Tomás, cantante de tonada, entamó con Soi de Llangréu esta II Gala Xixón fala n’asturianu de la que hasta Guardiola fio saber el so interés en dir a vela sigún fizo sarcástica referencia’l presentador de la Gala Toño Caamaño. Tres de la tonada foi nesta Gala’l momentu de Rafa Lorenzo qu’ufrió una selección de los sos cuatro discos, onde pudo sentise dende l’alcordanza a los tiempos de mili de “Casina mía” hasta’l cantu a los antepasaos vaqueiros del cantautor.

Tres de l’actuación de Rafa Lorenzo, Toño Caamaño, presentador de la Gala, entamo a protagonizar una serie de monólogos baxo’l títulu ‘Sexu sentíu’, abriendo les actuaciones drmátiques que continuaríen ‘El Pola’ y el guitarrista ‘Rafa Kas’ protagonizando un monólogu sobre la historia del rock n’España nos últimos años, tanto del cantáu n’asturianu, como del cantáu en castellán.

Chus Pedro y Manolo Penayos prometieron nel escenariu que Nuberu tornará a los escenarios el día que l’asturianu seya llingua oficial. Y mientres Manolo Penayos adelantaba temes del o nuvu proyeutu musical, con una versión mui personal de la Danza Prima como entamu, Chus Pedro, con Gabino a los teclaos, facía cantar a l’audiencia del Xovellanos.

Dixebra pondría puntu final a una Gala qu’amosó la vitalidá de la música y el teatru en lingua asturiana y la so capacidá de convocatoria.