Música

Güei xueves, 7 d’ochobre, a les nueve y media la nueche, el grupu folk “Pelgares”, a mediu camín ente una bandina tradicional y un grupu de folk, va actuar na sidrería Tierra Astur de Cualloto, en Siero.

El grupu ta formáu por Xosé Nel Otero Puente a la xiblata travesera, Martín Fernández-Peña al curdión diatónicu, José Martínez Álvarez a la guitarra acústica y voz, y Ángel Cuesta Piquero a la gaita.

Tres la so inauguración oficial el pasáu día 20 de setiembre, la nueva Escuela Municipal de Música de Grau celebra’l xueves día 30 de setiembre unes xornaes de puertes abiertes pa que tolos interesaos puedan visitar estes nueves instalaciones. L’horariu va ser de 10 a 14 hores y de 16 a 20 hores. Los centros escolares van poder alcordar visites pa grupos d’alumnos.

Amás, el día 1 d’ochobre empieza’l nuevu cursu de la Escuela de Música celebrando un actu simbólicu: una cadena humana pa treslladar los últimos trés oxetos y materiales de la Escuela (atril, partitura y flauta trevesera) dende la Casa de Cultura hasta’l nuevu llar de la Escuela de Música nel antiguu Colexu Sagráu Corazón. La Escuela fai un llamáu a tolos moscones pa participar nesti actu, la cita ye a les 18 hores na Casa de Cultura de Grau.

La llegada d’un asturianu, Lisardo Lombardía, al frente del festival más prestixosu del arcu atlánticu paecía que nun podía suponer más que bones noticies p’Asturies y la so música tradicional. Sicasí, el Gobiernu asturianu nun ta pol llabor de promocionar la nuesa música en Lorient, y la edición de 2011, que taba previsto dedicase a Asturies, va homenaxear a la “diáspora celta”. La causa ye la negativa de la Conseyería de Cultura d’Asturies a dedicar 350.000 euros como sofitu a la organización de la que sedría tercer edición dedicada al nues país, dempués de 1998 y 2003.

L’impactu publicitariu del festival ye bien importante, con más d’850.00 persones viendo los conciertos, como asocedió l’añu pasúa, y reportaxes en medios de comunicación del mundu enteru. La negativa del Gobiernu llama l’atención, n’especial, cuando coincidiría cola puesta en marcha de la conocida como “autopista de la mar” ente Xixón y Nantes, capital de la Bretaña, país onde s’asitia Lorient.

Esta oportunidá perdida por Asturies recibió crítiques del mundu de la música y de Bloque por Asturies, que calificó la decisión del Gobiernu asturianu de “otra ocasión más desaprovechada pa la promoción d’Asturies a nivel internacional”.

“Misiva, Asturies Punk Rock”, ye una banda que ñaz en Grau, Asturies, al final del anu 2007. Cuando deciden embarcase nuna nueva aventura Punk Rock billingue na que l’asturianu y el castellán comparten protagonismu. La idea yera la de facer un grupu comprometiu que ficiera reflexonar sobre munchos de los problemes qu’hai na socieda asturiana, y nel mundu en xeneral, y plasmar toes eses idees nes sos canciones. Agora estrena de la mano d’Algamar, el so primer discu, y güei, vienres 17, van presentalu a lo llargo d’un conciertu acusticu na FNAC de Parque Principau, de magar les siete.

En “Parte de la solucion” atopamos un doble discu con diez canciones cada uno d’ellos, diez n’asturianu y les mesmes diez en castellán, onde les contundentes promeses musicales que se desprendien de la maqueta, queden perfectamente patentes. “Parte de la solucion” vien a traer a la musica fecha n’Asturies un nuevu soniu y un nuevu referente nes escenes rock y punckrock.

Misiva avanzábanos va delles selmanes les novedaes del discu, na Entrevista de la Selmana

La edición del añu 2010 del Día de la Mocedá Revolucionariu, la folixa añal de Darréu, va entamar el 2 d’ochobre, cola celebración per primer vegada del concursu “Sones de Revolución”, que tendrá llugar n’Uviéu, nel llocal I-POP, de magar les siete la tarde. Esti concursu servirá p’escoyer d’ente tolos grupos de música participantes a un grupu ganador, que va abrir la IX edición del conciertu “Asturies nun escaez”, xunto a grupos de más sonadía.

Los grupos que s’inscriban nel concursu “Sones de Revolución” tocarán en directu de magar les 19:00 hores del día 2 d’ochobre nel llocal I-pop d’Uviéu, según l’orde d’inscripción. Cuando finen de tocar tolos grupos participantes, el xuráu elexirá ente los grupos participantes al grupu ganador.

El premiu pal primer clasificáu va ser abrir el conciertu del sábadu 16 d’ochobre, la IX edición del “Asturies nun escaez” que se celebrará en Xixón. D’esta manera’l grupo que resulte ganador va poder compartir escenariu con grupos de renome como los participantes n’otres ocasiones: Dixebra, Skama la Rede, Obrint pas, Soziedad alkoholika, Lendakaris Muertos, Kaótiko, Koma, Habeas Corpus, Etsaiak, betagarri Skalariak…

Sedrá imprescindible que los cantares seyan na llingua asturiana. Amás, ye necesario que los cantares seyan propios del grupu, nun puen presentase versiones. Podrán participar nel concursu “Sones de Revolución” un máximu de 10 grupos musicales (según l’orde d’inscripción). La soscripción ye de baldre pa tolos grupos.

Pa inscribise ye necesario unviar un corréu a: info@darreu.org indicando’l nome del grupu, los datos de contactu y una descripción curtia del mesmu. La fecha llímite p’inscribise ye’l 1 d’ochobre.

Esti vienres 10, a les cinco la tarde, entama nel Prau de Tereñes de Ribeseya la I Xuntanza de Músicos Astures. Na primer xornada van tocar TXM, Entropía, Malvaseda, Minoría Agresiva, Kursk, Red Line, Kuarentena y Gomeru.

El sábadu dende les cuatro, y nel mesmu llugar, van tocar Critical, Uno más uno, Grisñu, G-Riddaz+13 Palabras, K T Grapo, Zurdha, Mezá, Vinagre de Sidra y Officer Down.

L’actu quier ser una alternativa a los entamaos pola mor del Día d’Asturies pol Gobiernu y la empresa d’espectáculos de Jose Luis Moreno, onde la música d’otros llugares foi protagonista.

Esti martes, 7 de setiembre, de magar les once la nueche, celébrase en Villaviciosa un conciertu de baldre. El llugar escoyíu ye la carpa de La Bodega, y los grupos La Tarrancha, N’Ochobre y Misiva, amás d’un grupu folk ensin confirmar.

La célebra cantante llírica Montserrat Caballé llega a Xixón esta nueche. Xunto a ella, la so fía, Montserrat Martí. Un recital que los sos organizadores califiquen d’“inolvidable” y nel que madre y fía aunen el so arte nel escenariu, interpretando dalgunes de les páxines más significatives de los dos xéneros llíricos de mayor importancia de la nuesa cultura: la zarzuela y l’ópera.

L’actuación doble va facese en La Llaboral, de magar les diez de la nueche, con precios que van dende los 40 a los 80 euros.

Montserrat Caballé interpretó más d’ochenta personaxes operísticos na so carrera, que van dende la ópera barroca, hasta Verdi, Wagner, Puccini, y Richard Strauss. Interpretó papeles tan distintos como Norma, Salomé, Violeta, la Marschallin, Semiramide o Isolda, amplitú de repertoriu reflexáu nes sos munches grabaciones. Tamién interpreta cantares populares españoles. La so incursión na música rock fízola xunto al cantante y compositor Freddie Mercury con Barcelona, que se convirtió nel himnu de los Xuegos Olímpicos de 1992.

Montserrat Martí fízose yá con un llugar nel mundu la llírica. Anque a “Montsita”, como asina la llamen cariñosamente, nun principiu prestába-y más el balé, disciplina qu’estudió cola célebre Maya Plisetskaya, decidió compatibilizar esta actividá colos estudios de música y cantu. El so bautismu de fueu como cantante d’ópera tuvo llugar na Staatsoper d’Hamburgo, en febreru del 98, interpretando’l papel de Zerlina en “Don Giovanni” de Mozart. La prensa alemana emponderó con entusiasmu’l so llabor, pudiéndose lleer nuna revista especializada la siguiente reseñar: “La principal atracción de la nueche foi’l debú de Montserrat Martí: una Zerlina impresionante. Una sopranu nueva con una voz bien proyectada y una sólida técnica”.

La Gala d’Asturies programada pal día 10 de Setiembre pola productora de José Luis Moreno y que diba a xuntar a Isabel Pantoja y dellos otros artísties kirsch del Estáu con Hevia, Doctor Explosion y otros artistes asturianos, acaba de ser suspendida ensin fecha de celebración cola disculpa de facilitar l’arranque de la Vuelta a España dende la Llaboral, na etapa ciclista que pasa per Asturies.

L’ausencia de noticies sobre la participación na Gala del Día 8, que diba tresmitir la TPA, d’Isabel Pantoja, qu’esta mesma selmana adelantaba Asturnews ya facía albidrar que xurdíen problemas alrodiu de la programación que vien desendolcando José Luis Moreno y la suspensión de la otra Gala prevista nun fai sinon afitalo.

La productora de José Luis Moreno (Kulteperalia) decidió esti día suspender de la programación la Gala d’Asturies prevista pal día 10 de setiembre nel patiu de Llaboral pa facilitar que La Llaboral seya’l puntu de partida de la Vuelta Ciclista. Sigún fontes de RECREA, les necesidaes de montaxe de la Vuelta Ciclista aconseyaben esta decisión que toles trés partes apautaron.

La disculpa ye enforma estraña y da bona idega del fracasu estrepitosu que ta teniendo la programación de José Luis Moreno y la contestación política de la decisión dende tolos frentes, incluyíu l’internu de la propia FSA-PSOE.

El programa de la Gala incluyía les actuaciones d’Hevia, Doctor Explosion, Dark la Eme, Los Oricios, Banda de Gaites Villa Xixón, Pablo Valdés & The Crazy Lovers y María Toledo.

Isabel Pantoja desapaez del programa del Dïa d’Asturies

Esta nueche, de magar les ocho la nueche, na Sala Savoy de Xixón va celebrase un conciertu a de los grupos asturianos Mezá y Sambre, cuntando cola presencia n’esclusiva de los canadienses The Mahones, que vienen a presentar la so xira de venti aniversariu. Lo meyor de la música asturiana y una amuesa de música internacional de calidá.

The Mahones

The Mahones, el grupu punkrock irlandés númberu unu de Canadá, formóse en 1990 nel pub Tucán en Kingston (Ontario, Canadá). La idea ñaz en Dublín, de manes de Finny McConnell y el so hermanu musical y mentor Barry Williams, que decidieron formar una banda que sonara asemeyáu a The Clash, The Pogues, The Who, Shane MacGowan y los Papas, The Waterboys, Husker Du y The Dubliners, con una migayina de Social Distortion y Replacements, y un nome que rima con The Ramones. Nos sos venti años d’ hestoria, The Mahones lleven editaos hasta agora ocho trabayos discográficos.

Sambre

Tán llamaos a convertise na nueva referencia del punkrock-folk fechu n’Asturies. La banda asturiana Sambre tá acabando la xira de presentación del so primer trabayu discográficu “Na solombra”. Sambre, palabra asturiana que significa ‘pena’, ‘tristura’, ye tamién el nome d’un grupu de Xixón creáu a principios del 2007 col enfotu de reflexar les influyencia musicales de los sos miembros, con una base rock y escoyendo la llingua asturiana como forma d’espresión. Hasta la grabación d’esti discu participaron nel discu de versiones de Dixebra “Perversiones” col tema «Asturcón» y nel recopilatorio “Calzada News vol. 2” con «Atravesáu pelos chigres».

Mezá

Mezá ye ún d’esos grupinos musicales de xente mozo de la llamada “Tercera Xerenación” del folk asturiano. La media d’edá d’estos rapazos ta nel momentu más prestosu de la vida (20) y esto nótase muncho nos conciertos: la rellación ente les persones que tán enriba l’escenariu y el públicu estréchase nas presentaciones de los temes y nas conversaciones entambas partes. La frescura y el bon humor son les claves d’este conxuntu, afincáu nel occidente d’Asturies, que lo único que busca ye recuperar parte de la tradición y entregala, renovada y con un aire nuevu d’autenticidá del sieglu XXI, a los espeutadores cola másima espontaneidá y faciéndo-yos pasar un bon pedacín.

Anguaño, Mezá ta enredao neses hores interminables d’ensayu y de trabayu duru tan propies de los músicos que naguan por que’l so esfuerzu garre fuerza y que lluchen por ver medrar la so cultura.