Música

La Oficina Municipal de la Llingua de Xixón ta acabante convocar un Concursu de Música y Llingua pa Xente Mozo baxo’l títulu “Que suene la llingua” col envís de buscar un cantar que valga d’himnu pa los futuros “Alcuentros de la Mocedá cola Llingua”. Al certame van poder presentase grupos de cualesquier estilu musical, siendo los sos componentes xente mozo d’hasta venti años y empadronaos nel conceyu de Xixón. Tolos trabayos que se presenten tienen que ser inéditos y han presentase en llingua asturiana. Va valorase la orixinalidá y creatividá, teniendo siempres un llargor máximu de cuatro minutos.

Quien participe ha presentar una maqueta en cedé col cantar (en formatu mp3) grabáu polos mesmos componentes que formen el grupu, la lletra del cantar mecanografiada y los datos del grupu. Tienen d’aparecer tamién los nomes de les persones que formen el grupu y una persona responsable cola que la organización pueda ponese en contactu per teléfonu y/o corréu lletrónicu, amás de les señes del grupu.

Los trabayos han presentase na Oficina Municipal de la Llingua de Xixón, asitiada na cai Xovellanos, 21, enantes del día 12 de marzu de 2011 de llunes a vienres, n’horariu de 9:00 a 14:00 hores.

Como premiu, va editase’l cantar ganador, y el grupu va tocar na celebración de la VIII Edición de los Alcuentros Saca la llingua de la Oficina Municipal de la Llingua de Xixón que se van celebrar nel mes d’abril del 2011.

El llunes 27 d’avientu a les 20:00 hores, la Ilesia de San Pedro, asitiada nel Campu Valdés de Xixón, va acoyer una nueva xornada del programa Bach nel Camín na ruta Xacobea. El Teatru Xovellanos de Xixón organiza esti conciertu qu’empecipió la so andadura’l pasáu mes de xunu y que forma parte d’una serie de conciertos d’órganu dedicaos al maestru del barrocu nel so 325 aniversariu.

Nel conciertu ta programao que se toque: Conciertu de Navidá Fantasia, Oprgelbüchlein, Pastoral en Fa Mayor y Preludiu y Fuga en Do Mayor.

Sport Activities 4 all va entamar l’Urban Dance Festival, un eventu consistente n’axuntar a tolos aficionaos a la danza, una tarde, onde van poder recibir clases en cualquier nivel y modalidá.

P’asistir basta’l gustu pol baille, pol funky, hip-hop, popping… nun importa’l nivel nin la edá, una y bones les clases van ser distintes (más fáciles, más difíciles…).

Va tener llugar el 22 de xineru, de 17:00 a 20:30 hores, nel Polideportivu de “El Cristo” d’Uviéu.

La cuota de participación ye de 10 euros, nos que s’inclúi tamién la bébora, vestuarios… Les inscripciones pueden facese hasta escosar les places, al traviés de la páxina sportactivities4all.blogspot.com o nel teléfonu 627 356 498.

El conciertu de Nuechebona de la Banda de música de Xixón va celebrase esti añu’l Muséu del Ferrocarril d’Asturies, de 12:30 a 13:30, con entrada de baldre. L’actividá entámala’l Teatru Xovellanos y el propiu Muséu del Ferrocarril d’Asturies.

El grupu de punk-rock Skontra saca al mercáu’l so tercer trabayu discográficu de llarga duración “Mazcando Miseries”, que va tar disponible en tiendes esta mesma selmana y va presentase en directu n’Asturies a principios de 2011. Skontra, veterana formación asturiana entemez el so estilu streetpunk colos raigaños de la música tradicional asturiana.

Al igual que los anteriores ye autoxestionáu pero nesta ocasión cunta cola collaboración de les productores asturianes Algamar Producciones y Xunca Records. Na páxina web del grupu www.skontra.net podemos atopar dos de los cantares qu’inclúi esti discu:”Nel mio carcel” y “Santana”.

Presentación n’Europa

La banda acaba de tornar d’una xira pelos Paises Baxos y Alemaña xunto a la banda holandesa Circle J, no que foi un adelantu de la xira que tán diseñando de cara a la presentación estatal d’esti nuevu trabayu.

El trabayu discográficu, qu’inclúi 11 temes, recuperando dalgún clásicu de la primer maqueta del grupu, foi grabáu en Corvera nos estudios TUTU, cola producción musical de Sergio Rodríguez, y nél collaboraron diversos músicos de la escena asturiana.

Páxina del grupu

Esti miércoles, 22 d’avientu, de magar les ocho, nel Centru de Cultura Vieyu Institutu de Xixón, la cantante Anabel Santiago va presentar el so últimu trabayu discográficu, “Agora”. Na actuación acompañen a Anabel Santiago nesta ocasión Héctor Braga (harpa, zanfona y voz), Eduardo García Salueña (teclaos), Borja García (guitarra) y Manu Cordero (percusiones).

Amás Santiago considera qu’esti “ye un discu enforma especial y diferente” pa ella, pues “aparte d’autoeditame y autoxestiname soi tamién la compositora y lletrista de munchos de los temes que lu componen, polo que la interpretación siempres ye más personal y dedicada, más cuidada”. Nel discu hai temes nuevos y temes tradicionales versionaos, “con sellu mui personal”.

Entrevista con Anabel Santiago n’Asturnews

Esti xueves 23 d’avientu, a les 21 hores, el grupu Spanta la Xente va dar un conciertu nel Tierra Astur de Cualloto, a pocos meses de la salida a la cai del so segundu discu. Amás, el día 30 ta programada nel mesmu llocal una nueche de blues y rock and roll cola curdionista Maraya Zydeco y una banda de músicos.

El llibru de Balbino Ménendez Suárez, preséntase güei, a les siete la tarde, nel Club de Prensa Asturiana de La Nueva España cola prensencia del gaiteru José Manuel Fernández «Guti» y del editor Alberto Suárez.

La ornamentación na gaita asturiana ye un estudiu onde’l maestru gaiteru Balbino Menéndez trata, por primer vez de forma monográfica n’Asturies, sobre ún de los aspectos menos analizaos y debatíos na interpretación de la gaita asturiana. L’ausencia hasta agora d’un estudiu d’esti tipu débese en gran midía a que la ornamentación ye un recursu interpretativu de carácter personal y identitariu de cada gaitero y, quiciás por eso, siempre tuvo un aprendizaxe basáu na imitación.

En La ornamentación na gaita asturiana, Balbino Menéndez sabe combinar con equilibriu conceptos, definiciones, vivencies y aprendizaxe, tratando un elemento artísticu de forma científica y secuenciada. Esta obra ábrese con un Tratáu, onde se describen de manera sistemática los adornos empleaos na actualidá, pa pasar a proyectar tou esti conocimientu a una segunda parte, la Propuesta pedagóxica, onde se facilita un conxuntu de ferramientes didáctiques pa deprendelos, amás d’un repertoriu pa ponelos en práctica. L’estudiu zárrase con unes entrevistes a gaiteros de trayectoria reconocida, onde s’analiza’l so Estilu d’ornamentación. La nómina de gaiteros entrevistaos ta integrada por Xuacu Amieva, Flavio Benito, Santi Caleya, Gustavo Eguren, JoséManuel Fernández ‘Guti’, José Ángel Hevia, José Manuel Tejedor, Vicente Prado Suárez ‘El Pravianu’ y Alberto Varillas.

El domingu 19 d’avientu a les 13 hores el Patiu de la Casa Cultura de Grau acueye un conciertu de la Camerata Revillaxixéu patrocináu pola Fundación Hidrocantábrico y La Nueva España. La Camerata ta dirixida por José Fernández Avello, bien conocíu en Grau onde fundó la Schola Cantorum y onde dirixó munchos años l’Orfeón.

El grupu Fala Non Caduca saca al mercáu col sellu Algamar Producciones el so primer trabayu discográficu de llarga duración “Tiempu de Povisa”. El discu ta yá disponible pal públicu y va ser presentáu esti vienres 17 d’avientu a les 20.30h nel Teatru Vital Aza de La Pola L.lena con entrada llibre, nun conciertu únicu que va marcar l’entamu de la xira de presentación. Con esti trabayu, el grupu asturianu de La Pola L.lena remata trés años de constante trabayu, un EP autoeditáu, numberosos conciertos a lo llargo de la xeografía estatal, collaboraciones con otros artistes, cambeos na formación y un soníu muncho más que curiáu y definíu.

“Tiempu de Povisa” confirma a Fala Non Caduca como una de les bandes con más futuru dientro de la música n’asturianu con un títulu de discu estrayíu de versos de la escritora asturiana Mª Teresa González, que reflexen la propuesta musical del llamáu “MecigayuSon”, etiqueta so la que “Fala Non Caduca” define’l so soníu caracterizáu pola fusión de distintos ritmos como’l ska, el rock, surf, reggae, folk o inclusive los ritmos llatinos.

“Tiempu de povisa” fala de los tiempos actuales, tiempos de crisis, non solo económica, sinón crisis de valores, d’idees, d’ideales. “Tiempu de Povisa” fala de les realidaes social y cultural de l’Asturies de güei, de les problemátiques xuveniles, de los conflictos llingüísticos, del desenvolvimientu industrial, del desamparu de la naturaleza virxe. A pesar d’esto, Fala Non Caduca nun reflexa una situación de derrotismu y pesimismu sinón que llama nos sos cantares a actuar pa camudar les situaciones adverses.

El trabayu discográficu, editáu por Algamar Producciones, foi grabáu n’Avilés nos estudios ACME, cola producción musical de Miguel Herrero, y nél collaboraron músicos de la talla d’Iñaki “Betagarri”, Mapi Quintana, Nel Sánchez, GPS Proyect, Fabián Díaz y Miguel Herrero.

La selmana que vien Asturnews va ufrir una entrevista col grupu nel que van cuntar munchos más detalles del discu y del propiu Fala Non Caduca.