Música

Son ún de los grupos folk con más ésitu nos últimos años y esti xueves presenten el que ye yá’l so tercer trabayu. Un títulu cenciellu, como los anteriores, “Tuenda 3”, y una llinia de continuidá, la de recuperar cantares tradicionales y da-yos “una vuelta”, col saber facer de Paepín de Muñalen, Elías García y l’alma y voz del grupu, Xosé Fernández Ambás. Esti tríu d’amantes de la música más tradicional van tocar los temes de Tuenda 3, esti xueves, 14 d’abril, de magar les ocho la tarde na Sala de Cámara del Auditoriu d’Uviéu. La entrada ye de cinco euros.

El trabayu musical de Tuenda busca reellaborar los cantares tradicionales siendo lo más fieles posible a les fontes, tanto nes melodíes y estructures, como nes variedaes llingüístiques qu’empleguen en caún d’ellos. Los temes escuéyenlos d’ente la bayura amuesa del Archivu de Tradición Oral de Xosé Ambás, consiguíu a lo llargo de munchos años d’investigación per tolos conceyos d’Asturies.

El cantautor xixonés llega a la so ciudá natal pa presentar los sos nuevos temes nel Teatru Xovellanos. El sábadu 16 d’abril Vegas va pesllar en Xixón la primer parte de la esitosa xira de presentación del so nuevu discu, que percorrió yá gran parte de la xeografía estatal escosando entraes y que lu va llevar a México nel mes de xunu. El grupu Welcome culebras va facer de telenoru de Vegas, mientres Pauline en la playa va collaborar nos coros.

El Conceyu de Xixón anunció yá delles de les actuaciones coles que va cuntar esti branu, dedicaes a la música y el musical. El musical Chicago, Miguel Ríos y el musical pa neños “Cantajuegos”, van llegar a estremaos espacios del conceyu a lo llargo de xunetu.

Chicago, del 7 al 17 de xunetu nel Teatru Xovellanos

Asesinatu, avaricia, corrupción, esplotación, adulteriu, y traición: toes eses coses qu’amamos y llevamos con ciñu cerca del corazón… Asina entama Chicago unu de los musicales más espectaculares del nuesu tiempu de los mesmos productores de Cabaré.

Marta Ribera, María Blanco y Manuel Rodríguez acompañaos d’un brillosu cuerpu de baille constitúin la pieza clave del musical Chicago qu’arrincó la xira’l 12 d’agostu pasáu y va percorrer demientres un añu ininterrumpíu más de 35 ciudaes de tol estáu.

Miguel Ríos despídese de los asturianos nel Palaciu los Deportes de Xixón

El sábadu 9 xunetu, a les diez de la nueche, Miguel Ríos diz adiós cola so xira “Bye bye tour”, nel Palaciu los Deportes de Xixón.

Miguel Ríos ñació en Granada en 1944. Editó’l so primera EP en 1962 pa la compañía Phillips Records y, dende entós hasta los nuesos díes, produció dalgunes de los meyores cantares del repertoriu del rock en castellán n’infinidá de discos, y contribuyó al desenvolvimientu d’esta música nel estáu español y en Llatinoamérica, actuando con munchos de los sos meyores esponentes.

CantaJuego, la música de moda ente los más pequeños

El domingu 10 de xunetu de magar les siete la tarde, el Palaciu los Deportes acueye’l músical basáu nos vidios del “CantaJuego”.

Una vegada más, de la mano de CantaJuego, lléganos un entreteníu y risonderu espectáculu del que podrá esfrutase, como siempres, en familia y con amigs. CantaJuego – ¡Qué lo Baille Tol Mundu 2011!, introduznos na aventura de preparar una fiesta sorpresa a unu de los nuesos personaxes más queríos. 70 minutos de diversión por que toos y caún dende’l so llugar participen y se sumen a la maxa y el ciñu qu’esprenden los amigos y personaxes de CantaJuego.

Les entraes pa tolos espectáculos yá tán a la venta nos llugares habituales nos que distribuye’l Teatru Xovellanos.

La cantante de tonada María Luz Cristóbal Caunedo foi la ganadora del XI Distintivu a la Investigación folklórica “Fini Suárez”, un premiu que recuerda la memoria de la reconocida folclorista mierense y que s’enmarca dientro de los actos culturales de la Folixa na Primavera de Mieres, cita que se va celebrar esta selmana, los díes 8, 9 y 10 d’abril, un escaparate internacional de les músiques que se faen nel Arcu Atlánticu.

María Luz Cristóbal Caunedo, de Máñules (Tinéu), ye cantante de tonada, autodidacta, con una llarga trayectoria nel mundu del cantar asturianu. Ente los argumentos pa la so elección, que fecha con unanimidá per parte del xuráu, tán la gran calidá del so trabayu, con un absolutu respetu al estilu tradicional que supo xunir coles renovaciones que nos postreros 25 años vienen dándose nel panorama musical asturianu xeneral. Ye una de les protagonistes del averamientu ente la xeneración más veterana, representada por ella, y otra más nueva onde tán presentes los músicos y arreglistes más actuales. Ganadora de los principales concursos de cantar asturianu y con un llargu percorríu d’actuaciones, del so trabayu discográficu como solista destaquen en particular trés grabaciones: “Misa asturiana de gaita” (1998), “El gaiteru de veriña” y “Onde la ñublina posa” (1999), discu que se convertiría nuna referencia imprescindible polo que supunxo d’actualización de la tonada y onde la acompañen bona parte de los meyores músicos tradicionales asturianos. La so última grabación ye “Cantar de Seronda” (2005). Ta integrada nel Coleutivu de Música Tradicional “Muyeres” dende la so fundación, y grabó con elles tamién cuatro trabayos discográficos.

El Distintivu va apurríse-y a Cristóbal Caunedo coincidiendo col pregón de la Folixa na primavera, mañana, vienres 8 d’abril, nel parque Xovellanos de Mieres.

Dientro de la so xira de primavera, La Tarrancha va tar actuando la nueche del sabadu 9 d’abril a la madrugada del dia 10 nel conocíu restorán Tierra Astur de Cualloto. La entrada nun ye de baldre como se informara, sinon que ye u concirtu priváu, y nél van poder escuchase cantares nuevos, otres del so trabayu Ö-3-3 (otrestres) y delles vieyes un tantu remocicaes. El grupu sigue cola presentación del so nuevu percusonista y dalguna qu’otra sorpresa.

El grupu, fizo llegar esti xueves una nota esclariando l’erru na convocatoria, que reproducimos darréu:

Tenemos anunciao qu’esta nuechi del sabadu 9 d’abril a la madrugada del dia 10 nel conociu Llagar Tierra Astur de Cualloto dibemos tar actuando. Queremos aclarar que’l conciertu va facese, PERO NUN VA SER (ESTRICTAMENTE) PÚBLICU. El conciertu ta organizáu por una xente que celebra un bautizu y paecio-y un buena forma y distinta, faelo al ritmu de La Tarrancha. Nun principiu el conciertu sufragau por estos amigos, tenia caltaer de ser aviertu pa que toles amigues y amigos que quisiesen char unos bailles con nós y con ellos, pudiera faelo. Pero al paecer foi too un cumulu de malos entendios y errores de comunicación ensin nenguna mala intención por nenguna de les partes. Estos problemes ayenos a La Tarrancha, faen que tengamos que faer esti comunicau de DESCONVOCATORIA PUBLICA, pos, anque’l conciertu si se va faer, namas va ser pa la xente del convite y les persones que tean cenando esa nuechi nel TIERRA ASTUR. Si yes va aprobechar pa dir allí a cenar y depues quedase al conciertu, vémonos. Si polo contrario tenies pensao dir namas al conciertu, vas tener que esperar a otra.

EL CONCIERTU ARRANCARÁ PASÁES LES 00:30 DE LA NUECHE.

La NASA prepara’l que ye l’últimu vuelu que va facer un tresbordador espacial. El vehículu Endeavour con una figura reconocible en tol mundu, va ser retiráu al rematar esti viaxe, en cumpliendo venti misiones dende l’añu 1992. Pa escoyer el cantar col que van espertar los astronautes, l’Axencia norteamericana organiza un concursu nel que participaron 1.350 grupos del mundo enteru. Agora namás queden diez y d’ellos namás unu nun ye de los Estaos Xunío, el grupu asturianu Stormy Mondays, que nesti momento va en segundu llugar col 33.9% de los votos, colo que sedríen ún de los dos grupos que van sonar nel espaciu.

El cantar presentáu pol grupu asturianu llámase “Sunrise Number 1″, ta n’inglés y na so lletra fai referencia a un espertar nel tresbordador y los paisaxes que pueden contemplase dende l’espaciu.

La misión va tener llugar el 29 d’abril y n’ella’l grupu d’Uviéu espera que los astronautes sigan esta tradición que se remonta a los años 60, mientres les misiones del programa Apolo, nes que tamién espertaben con un cantar.

Los dos ganadores van anunciarse demientres la misión y puede votase hasta’l despegue de la nave, cuando tará decidío si la música d’estos asturianos va poder sentise embaxo gravedá cero.

La lletra del cantar (tornada al asturianu)

Ye hora d’espertar y ver el primer amanecer

Va haber quince más

L’aurora boreal alluma l’horizonte

Les ñubes arremolínense debaxo

Y nun mos importa si llueve o si fai sol

Cuando tas nel espaciu, siempres fai bon tiempu.

El rellumu azul, azul de la Tierra, contra la rellumada mariello de la Lluna

Ye un espectáculu pa la vista.

L’atapecer en naranxa sanguino, esmorezse en lluces de ciudá Ciudad grabaes n’oru.

Y nun nos importa si llueve o si fai sol

Cuando tas nel espaciu, siempres fai bon tiempu

Llueu vamos saliar de vuelta al nuesu banzón azul

Llueu vamos tornar de nuevu a la normalidá

Pero agora nun mos importa si llueve o si fai sol

Cuando tas nel espaciu, siempres fai bon tiempo.

Puede votase toles vegaes que se quiera na páxina de la NASA

Güei, miércoles 6 d’abril, de magar les ocho la tarde, el Centru Cultural Caxastur d’Uviéu y el xueves 7 d’abril, a la mesma hora, nel Pabellón Caxastur del Recintu Ferial Luis Adaro de Xixón, dientro del ciclu Música del sieglu XX, va actuar el tríu formáu por Mapi Quintana, Jacobo de Miguel y Michael Lee Wolfe.

Xuntos formaron De Miguel, Wolfe y Quintana, un grupu qu’esplora les intersecciones de la música tradicional y el jazz, el soníu y el llinguaxe.

El grupu La Tarrancha llega esti sábado, 9 d’abril, al Llagar Tierra Astur, de Cualloto. Amás, el 16 d’abril, van tar nel XXIII Conciertu Pola Oficialidá de la Llingua Asturiana, que se va celebrar nel Recintu de la Feria Muestres de Xixón.

Yá en mayu, van tocar, el domingu 1, nel IX Festival del 1u Mayu, en Ciañu, Llangréu. Mientres que’l 28 van tar na VI Folixa Asturiana d’Erromo, nel Gaztetxe d’Erromo, Getxo, País Vascu.

El Teatru Nuevu de La Felguera va acoyer esti sábado l’actuación del grupu folk Brandal, formáu pol cantautor Pedru Pereira, el gaiteru Carlos Fernández, la voz de Tania Pereira, Michel Crespo al baxu y Oscar Doural a la percusión. El conciertu va entamar a les 20:30 hores con un ampliu repertoriu tradicional del suroccidente asturianu. Esti añu fueron finalistes al Premiu al Meyor cantar en Llingua Asturiana col tema «L.lueve», y a la Meyor Cancion Folk nos premios AMAS con «Adelaida».

Esti vienres 1 d’abril, el grupu Skama la Rede toca a partir de les nueve y media la nueche na sala The Cube Room d’Avilés. Nel conciertu del grupu del Cabu Peñes va poder sentise temes de los sos trés discos: La nuesa historia (2005), Echaos a la mar (2007) y Ye too mentira (2010). Con un tema d’esti tercer discu, «Condenáu», fueron ganadores del Premiu al Meyor Cantar en Llingua Asturiana d’esti añu, y van representar a a Asturies nel Liet Internacional.